2 Samuel 12 - Bible in Tzotzil de Chamula

Ti Natane ta svul ti Davide

¹ Ti Diose laj stac ech'el ti j'alc'op Natán ta sq'uelel ti Davide. Xi laj yal ti Natán c'alal c'ot ta stojole: —Oy cha'vo' vinic ti oy ta jun jteclume. Ti june, toj ech'em sc'ulejal ta j'ech'el. Ja'uc ti june, me'un ta j'ech'el.

² Ti buch'u jc'uleje, mu albajuc yepal ti sme' xchijtaque, ti sme' xvacaxtaque.

³ Ja'uc ti me'une, mu'yuc xa yan ma' ti c'usi oy yu'une, c'ajomal jcot sme' yuni chij smanoj ti laj sts'ites ti stuque. Ti sme' yuni xchije ch'i ta yoc ta sc'ob jmoj xchi'uc yuni alabtac, ti jun sets'ic ta xve'ique, ti jun ti yuch'ob vo'ique, ti nujul ta xvay ta sti' yo'ntone. Ti vinic taje, co'ol s'elan sbisoj ta jun yantsil nich'on ta xa'i.

⁴ Oy jun c'ac'al, tal yajvu'lal ti jc'ulej vinique. Ja'uc le' une, ti c'alal lic smeltsanbe sve'el ti yajvu'lale, mu'yuc xloc' x'ayan ta yo'nton ti ta xac' jcotuc ti sme' xchije, mi ja' ti sme' xvacaxe. C'ajomal no'ox bat spojbe talel sme' yuni chij ti me'un vinique, ti lic xchapanbe sti' ti yajvu'lale.

⁵ Ep soc sjol ti Davide yu'un ti vinic ti va'i s'elan ta spas taje, ti xi laj yalbe ya'i ti Natane: —¡Xil Dios xcal, ti buch'u jech laj spas taje, xtun o ti ac'o yich' milele!

⁶ ¡Ti c'u s'elan stojol ti uni me' chije, tsots sc'oplal ti ech'uc to chanib velta ac'o stoj. Ta j'ech'el yu'un mu'yuc xc'uxul yo'nton ti va'i s'elan laj spas taje!

⁷ Va'i un, xi albat yu'un ti Natane: —¡Vo'ot ma' ti vinic va'i s'elan sc'oplal une! Xi s'elan ta xal ta jamal ma' ti Ajvalil Dios yu'un ti Israele: ‘Vu'un laj jt'ujot ti lac'ot ta ajvalilal yu'un ti Israele. Laj jtic' jba ta apojel ta yoc ta sc'ob ti Saule.

⁸ Laj cac'bot ti anae, ti antsetic yu'un ti avajvale. Ma'uc no'ox taje, laj avich' ta venta ta sbainel ti Israele xchi'uc ti Judae. Ti mi mu to xu' o taje, x'ech' to ta xcac'be sts'aqueb ti jechuque.

⁹ ¿C'u cha'al laj avalopatin ti jc'ope, ti ja' laj apas ti c'usi mu lecuc ta xquile? Laj avilbe svocol ti Urias ti hititae, ti laj avac' ta milel ta stojol ti amonitaetic yo' jech ta xavu'ninbe ti yajnile.

¹⁰ Jipbil tenbil lic'ot avu'un ti jech laj avu'ninbe yajnil ti Urías ti hititae yo' jech ta xavajnilan. Ta j'ech'el mi ja'uc xtub ma' ti vocol ta ana une.

¹¹ Xichi ta xcal ta jamal ti vu'un Ajvalilune: Ta xvul ta loq'uel ta ana ti avocol ta xcac'bot xchi'uc ti avuts' avalale. Ta xavil ta aba ta asat ti avuts' avalal no'oxe, ta xcac'be sc'upin ti avajnile, ti mu'yuc xq'uexlalilic ta satilal ta xchi'in sbaique.

¹² Ta mucul laj apas ti avabtele. Ja'uc ti vu'une, ja' cabtel ta xcac' ta vinajesel ta sba ta sat scotol ti Israele.’

¹³ Ti Davide xi loc' ta ye ta stojol ti Natane: —Laj xa jta jmul ta stojol ti Diose. Xi tac'bat yu'un ti Natane: —Ti laj ava'i aba ti oy amule, mu xastsitsot ti Diose, mi ja'uc ta xacham.

¹⁴ Ja'uc le' une, ti ech'em laj asoquesbe yo'nton ti Diose, ti anich'on ti naca to no'ox voq'ue, ta j'ech'el ta xcham.

¹⁵ C'alal sut batel ta sna ti Natane, c'ot ta pasel yu'un ti Dios ti tsots lic ipajuc yu'un ti olol ti laj yilic ti David xchi'uc yajnil ti Uríase.

¹⁶ Va'i un, ti Davide xvocolet liquel ta stojol Dios ta sventa ti olole. Lic yicta yot, ti puch'ul ta lum ta x'ech' yu'un ti ac'ubale.

¹⁷ Ti moletic ti nacalic ta snae, laj sc'anbeic vocol ti licuc ti xpuch'anoj sba ta lumtique. Mi ja'uc xch'un. Mi ja'uc laj xchi'inan ta ve'el.

¹⁸ Ech' yucubal c'ac'al un, ta ts'acal to cham ti olole. Ti yaj'opisialtac ti Davide ta xi'ic ta yalbel ya'i, ti xi laj snopique: “Ti c'alal cuxul to ox ti olole, mi ja'uc xisch'unbotic ti c'alal ta jc'opontique, ¿mi yu'un stac' to ono'ox la c'oponel ti ta xcalbetic ya'i cham xa ti olole? ¡Xu' nan ti x'ech' to xjelav ti c'usi xu' ta xlic spase!”

¹⁹ Ja'uc ti Davide, ti c'alal laj yil ti xvulajetic xa stuquic ti yaj'opisialtaque, vul ta sjol ti cham xa ti olole. Va'i un, xi jac'batique: —¿Mi cham xa ti olole? —Cham xa —xi laj staq'uique.

²⁰ Va'i ti David une va'i batel ti puch'ul ta banomile. Lic atinuc. Lic xjaxbe sba muil poxil. Lic sjelta sc'u'. Och batel ta ch'ulna ta yich'el ta muc' ti Diose. Ts'acal to un, bat ta sna. C'ot sc'an sve'el, lic ve'uc.

²¹ Va'i un, ti yaj'opisialtaque xi laj sjac'beique: —¿C'usi ta xapas, Jcuch abtel? C'alal cuxul to ox ti olole, laj acomtsan avot, la'oc' yu'un ti olole, Jcuch abtel. Avi tana ti cham xa ti olole, ¡xava'et xa liquel, lic ve'an, Jcuch abtel!

²² Ti Davide xi laj staq'ue: —Ti c'alal cuxul to ox ti olole, laj jcomtsan cot, xi'oc'olet ta sventa ti laj jnop ta xc'uxubaj yo'nton ti Dios ta jtojole, yo' jech ta xac' ch'iuc.

²³ Ja'uc avi tana li' une, cham xa ti olole. Mu'yuc xa c'usi xa bal o ta jcomtsan ti cote, ti c'alal mu'yuc xa c'usi xcut ta xcuxi talele.

Svoq'uebal ti Salomone

²⁴ Ts'acal to un, ti Davide bat sq'uel ti Betsabé ti ja' yajnile. Laj spatbe yo'nton. Laj xchi'in sbaic. Nab yol yu'un. Laj yilbe sat xnich'on ti David yu'une. Laj yac'be sbiin Salomón. C'uxubaj yo'nton Dios yu'un ti olol taje.

²⁵ Taj une, ac'bat sna' ti David ta sventa ti j'alc'op Natane. Ti jech laj stuc'ulanbe sc'opojel Dios ti David une, Jedidías laj yac'be sbiin ti olole.

Ti Davide ta xu'nin ti jteclum Rabae

²⁶ Ja'uc ti Joabe ja' o xyaquet ta stsac ta leto steclumal ti amonitaetic ti oy ta Rabae. Jutuc xa sc'an xu'nin ti lum ti bu chotol ti ajvalile,

²⁷ ti c'alal ja' o xi xcholet laj stac mantal ti Joab ta stojol ti Davide: “Li' xa cac'ojbe yipal ta stsaquel ta leto ti Rabae, ti och xa ta coc ta jc'ob ti jteclum ti naca oy lec vo'e.

²⁸ Ja' yu'un un cha'e, Jcuch abtel, tsobo ti soldadoetic ti c'u to yepal comeme. Tsaco ta leto ti jteclume, u'nino, naca mi vu'un laj jpas ti ta xlic cac'be sbiin ti jbie.”

²⁹ Va'i un, ti Davide lic stsob scotol ti yajsoldadotaque, ti xvoletic batel stamoj batel sbeic ta stsaquel ta leto ti jteclum Rabae. Lic stsac ta leto, laj yu'nin.

³⁰ Ts'acal to un, laj sloc'be ta sjol sronail sjol ti loc'obbail dios yu'un ti ajvalile, ti naca oroe, ti yich'oj oxlajuneb xcha'vinic (33) kilo ti yalale, ti yich'ojan c'upil sba baxtonetique. Ti tonetic taje, laj sloq'uesic yo' ta xnoch'anbeic ta sronail sjol ti slapoj ti Davide. Ep ti c'usitic toyol stojol laj stam loq'uel ti David ta jteclume.

³¹ Ma'uc no'ox taje, ti buch'u com ta jteclume, laj sloq'ues batel ti bu oye, lic yac' abtejuc ta sil te', ta sloquel banomil, abtel ta eq'uel, xchi'uc ta xchiq'uel latriyoe. C'alal ja' jech laj spasbe scotol ti jteclumetic yu'un ti amonitaetique, sutic ech'el ta Jerusalén xchi'uc scotol ti yajsoldadotaque.