2 Samuel 11 - Bible in Tzotzil de Chamula

Sc'oplal David xchi'uc ti Betsabee

¹ Oy bu c'ot ta pasel ti c'alal ja' o yorail q'uepelaltique, ti ta xloq'uic batel ta tsalvanej ta leto ti ajvaliletique, ti Davide laj stac batel ti Joabe, ti yaj'opisialtaque, xchi'uc scotol ti soldado israeletique ta stsutsesel ta j'ech'el ti amonitaetique, xchi'uc ti ta scomon voliic ti jteclum Rabae. Ja'uc ti David une com ta Jerusalén.

² Oy jun mal c'ac'al, lic batel ti David ti puch'ul ta steme, bat va'etuc ta sq'uelel osil ta sjol sna ti bu ta spas mantale. Laj yil ech'el ti bu taje ti yacal ta x'atin jun ants ti toj c'upil sbae.

³ Ja'uc ti Davide laj yal mantal ti yich'uc t'unel buch'u ti antse. Albat ya'i ti Betsabé ti sbie, yantsil nich'on ti Eliame, yajnil ti Urías ti ja' hititae.

⁴ Ti David une laj yalbe mantal jun chib yajtuneltac ti ac'o yiq'uic talele, ti vay xchi'uc ti c'alal naca to ta xlaj yo'nton ta yilel ti ue. Va'i un, sut ech'el ta sna ti antse.

⁵ Toj c'otel yol yu'un ti antse, ti ac'bat sna ti Davide.

⁶ Va'i un, ti Davide laj yalbe mantal ti Joabe, ti ac'o yich' iq'uel talel ti Urias ti hititae. Ja' jech laj spas ti Joabe.

⁷ C'alal vul ti Urias ta stojol ti Davide, jac'bat yu'un c'u s'elan oy ti Joabe, ti soldadoetique, xchi'uc c'u s'elan ti letoe.

⁸ Ts'acal to un, laj yalbe ti batuc ta snae, ti batuc smes ti yo'ntone. C'alal loc' batel ti Urias ta sna ti Davide, tacbat ech'el t'ujbil ve'lil ti ja' smoton yu'un ti Davide.

⁹ Ja'uc ti Urias une, ti oy sc'oplal ta xbat ta snae, ech' yu'un ac'ubal ta ti'na ti bu oyic ti jchabivanej soldadoetique.

¹⁰ C'alal albat ya'i David ti mu'yuc xbat ta sna ti Uríase, xi jac'bat yu'un ti Davide: —¿C'u cha'al mu'yuc xabat ta ana ti c'alal ja' to no'ox lavul avi ti c'alal jal bu la'ay talele?

¹¹ Xi laj stac' ti Uríase: —Ti ch'ul caxae, ti soldadoetic yu'un ti Israele xchi'uc ti Judae, lambil yanal te' no'ox ti yaxibique. Ja' jech ec ti Joabe, ti banquilal cu'une, xchi'uc yaj'opisialtac ti Jcuch abtele, ta osiltic lamal ta xavayic. ¿Mi sc'otebal xana' un ta xibat ta jna, ti jun co'nton ta xive', ta xcuch' vo', ti ta jchi'in ta vayel ti cajnile? ¡Ti c'usiticuc no'oxe, mu ta jpas, ja' tsots sc'oplal ta xca'i yu'un ti Jcuch abtele!

¹² Xi albat yu'un ti Davide: —Coman avi tanae, oc'om ta xabat cu'un. Ti Uríase, sacub osil yu'un ta Jerusalén ti ta yoc'omale.

¹³ Ja'uc ti David une ic'van ech'el ti jmoj ve'ic yuch'ic vo' xchi'uque, ti lic syacubtase. Loc' batel ti Urias une, bat sjip sba ta vayel ti bu oyic ti jchabivanej soldadoetic yu'un ti ajvalile. Mi ja'uc bat ta sna.

¹⁴ Ta yoc'omal un, lic sts'iba jlic vun ti David ta stojol ti Joabe, ti ja' laj yich' batel ti Uríase.

¹⁵ Ti jlic vun ti ts'ibabile, xi ta xale: “Jba'beuc ech'el ti Urias avu'unic ti bu xa spajeb ti tsots ta j'ech'el ti letovajele. Ictaic comel stuc ti yayijesatuc ya'i yo' jech ta xchame.”

¹⁶ Ja' yu'un un, ti Joabe, ti c'alal laj sjoyobtaic ta stsaquel ta leto ti jteclume, laj stac batel ti Urias ti bu sna'oj lec bu jotucal ta xtal ti soldadoetic ti tsots xu' yu'unique.

¹⁷ Ta jliquel no'ox, ti jchabiej jteclume, ta jech to yepal xc'uletic no'ox talel, tal tsaquic ta leto ti Joabe. Lajic jun chib yaj'opisialtac ti Davide, ti capal laj ec ti Uríase.

¹⁸ Ti Joabe laj stacbe batel mantal ta stojol ti Davide, ti xchapet laj yalbe ya'i ti c'u s'elan ech' ti letoe.

¹⁹ Xi laj stojobtas bat yal ti j'al-mantal j'ich'-c'ope: “C'alal mi laj xa achapbe ya'i ajvalil scotol c'u s'elan ech' ti letoe,

²⁰ xu' nan ta xlic capuc sjol ti ajvalil ti xi ta sjac'bote: ‘¿C'u cha'al toj ech'em lanopajic ech'el ta stsaquel ta leto ti jteclume? ¿Mi yu'un mu xana' ya'yel ti oy c'usi xu' ta sjipic yalel talel ta ba moque?

²¹ Yu'un jech c'ot ta pasel ti milat yu'un jun ants ti Abimelec xnich'on ti Jerobaal ta jteclum Tebes ti jipbat yalel tal stanal mulino ti ta sba ti moque. ¿C'u cha'al ya'yel un cha'e, lanopajic ta sts'el ti moque?’ mi xayute, xi xatac'bee: ‘Cham ec ti Uríase, ja' ti hitita yaj'opisial ti Jcuch abtele.’ ”

²² C'alal c'ot ti j'al-mantal j'ich'-c'ope, xchapet laj yalbe ya'i David scotol ti c'u s'elan yaloj ech'el ti Joabe. C'alal jech laj ya'i ti Davide, ep soc sjol ta stojol ti Joabe, ti xi laj yalbe ya'i ti j'al-mantal j'ich'-c'ope: —¿C'u cha'al ya'yel lanopajic ech'el ta jmec ta stsaquel ta leto ti jteclume? ¿Mi mu xana'ic ti xu' oy c'usi ta sjipic tal ta ba moc jech c'u cha'al c'ot ta pasel ta Tebese, ti jun ants laj smil ti Abimelec ti xnich'on Jerobaale, ti jipbat yal tal ta sba ti moque? ¿C'u cha'al ya'yel un ti lanopajic ta sts'el ti moque?

²³ Ti j'al-mantal j'ich'-c'ope xi laj staq'ue: —Ta jamalaltic loq'uic talel ti soldadoetic ti tal stsacuncutic ta letoe, ti jutuc xa mu laj stsaluncutique, ti xc'ulet no'ox sutic ech'el cu'uncutic c'alal to sti'il ti jteclume.

²⁴ Ja' o un cha'e, laj xach'ic talel syolobic ta ba moc ti ja' bijil satibil talel ti avajsoldadotaque, Jcuch abtel, ti chamic jun chib ti avaj'opisialtaque, ti cham ti hitita Urias eque.

²⁵ Ti Davide xi laj stac'be ti j'al-mantal j'ich'-c'ope: —Albo ya'i ti Joabe ti mu ech'emuc xat yo'nton yu'un taje, ja' jech stalel ti letovajele. Ja'uc le' une, bijubuc lec ti c'u s'elan stsac ta leto ti jteclume, ja' to ti c'uxi stsuts yu'une. Ac'bo yip yo'nton.

²⁶ C'alal laj ya'i ti ants yajnil ti Uríase, laj xchabibe sme'inalil ti cham xa ti smalale.

²⁷ C'alal ech' xa yorail ti me'inale, ti Davide laj yal mantal ti ac'o yiq'uic talele, ti smalaoj xa ta snae. C'ot ta yajnil, ti ilbat sat jun squerem yu'une. Ja'uc ti Dios une, mu lecuc laj yil ti c'usi laj spas ti Davide.