2 Samuel 1 - Bible in Tzotzil de Chamula

Ti Davide ta xc'ot ta sni' ta xchiquin ti cham xa ti Saule

¹ C'alal chamem xa ti Saule, sut ech'el ta Siclag ti David ti c'alal tsalbil c'ot yu'un ti amalecitaetique. Chib c'ac'al icom ta Siclag.

² Ja'uc ti c'alal sta ti yoxibal c'ac'al une, ti bu to ox vololic ti Saule, vul ta loq'uel jun vinic ti jatantic talel ti sc'u'e, ti balom pucuc ti sjole, svinajeb ti mu x'ech' ta xa'i ti vul-o'ntone. C'alal c'ot ta stojol ti Davide, snupilan xa banomil laj spatan sba ta lumtic, svinajeb ti ta x'ich'van ta muq'ue.

³ —¿Bu lalic talel? —xi jac'bat yu'un ti Davide. —Cuch to cu'un loq'uel talel jatobal ti bu vololic ti israeletique —xi laj stac' ti vinic taje.

⁴ —¿C'usi c'ot ta pasel laj avil un? ¡Albun ca'i, avocoluc! —xi laj stsatsal jac' ti Davide. —Yu'un ti soldadoetique jatavic ti c'alal syaquilic ta letoe. Ep chamic ta j'ech'el —xi laj stac' ti vinic taje—. ¡Ja' jech xtoc cham ti Saule xchi'uc ti Jonatán ti ja' xnich'one!

⁵ —¿C'uxi laj ana' ti cham ti Saúl xchi'uc ti Jonatán ti ja' xnich'one? —xi jac'bat yu'un David ti mosovil ti buch'u yich'oj talel ti a'yeje.

⁶ —Ti c'alal jech c'ot ta pasel taje, ta jech yepal ja' o oyun ta vits Gilboa. Laj quil ti yicobinoj ti slanzae, ti jutuc xa mu tae ta be yu'un ti buch'u oyic ta carretae, xchi'uc ti c'u yepal cajalic ta ca' ti ja' yajcontrae.

⁷ Ja' o laj sq'uel sutel ta svalopat. C'alal laj staun ta ilele, laj yavtaun. Laj jch'unbe batel un.

⁸ Ta jech to yepal, lic sjac'bun buch'uun. Laj calbe ya'i ti amalecitaune.

⁹ Va'i un, laj yalbun ti nopajcun ech'el ta sts'ele, ti j'ech'eluc ac'o jmile, yu'un natic xa ta xich' ic', ja' no'ox ti cuxul to une.

¹⁰ Linopaj ech'el ta sts'el. Laj jmil, yu'un laj quil ti mu xa cha'bel xcuch yu'une, ti lubtsajem xa xchi'uc ti syayijemale. Laj taj une, laj jloc'be ti sronail sjole, xchi'uc ti xoj-c'obale yo' jech tal cac'bot ta atojol, Ajvalil —xi laj yal ti vinique

¹¹ Va'i un, ti David une xchi'uc ti c'u yepal xchi'ucanoje, laj xch'i'ic ta jatel ti sc'u'ique, svinajeb ti mu x'ech' xjelav ta xa'iique.

¹² X'oc' x'avanic xa ti jech cham ti Saule xchi'uc ti Jonatán ti ja' xnich'one, xchi'uc ti laj sta svocolic ti israeletic ti ja' yajsoldadotac ti Diose. Mu'yuc o ve'el yu'unic mal ti c'ac'ale.

¹³ —¿Bu liquelot talel? —xi jac'bat yu'un David ta ts'acal ti querem vinic ti buch'u yich'oj talel ti lo'il a'yeje. —Jyanlum amalecitaun —xi laj stac' ti stuque.

¹⁴ —¿C'u cha'al laj ayales avoc ac'ob ta stojol ti ajvalil ti t'ujbil yu'un ti Diose? —xi avan ti Davide.

¹⁵ —¡Ba milo ya'i le'e! —xut jun ta scotol svinictac ti Davide. Mu ta sc'obuc laj ya'i laj yac'be ti amalecitae, ti laj smil ta j'ech'ele.

¹⁶ —Ta amul atuc lacham, yu'un laj avinajes aba ta jamal ti laj aval ti laj amil ti ajvalil ti t'ujbil yu'un ti Diose —xi albat yu'un ti Davide.

Ti Davide mu x'ech' sme'inalil ta xa'i ti cham ti Saúl xchi'uc ti Jonatane

¹⁷ Ja'uc ti Davide lic sliques q'uejimol oq'uel ta scoj sme'inalil ti cham ti Saule xchi'uc ti Jonatán ti ja' xnich'one.

¹⁸ Laj yal mantal ti ac'o yich'ic chanubtasel ti jnaclejetic ta Judae. Ta tael ti me'unal oq'uel taje, ts'ibabil ta jpoc vun ti Lec Chapanbile:

¹⁹ “Mu xa ono'ox cha'bel un, Israel, yich' xa yayijesel ti axojobal alequilal ta vitstique, c'ot ta pasel ti tsalatic xa ti tsatsaquil viniquetique.

²⁰ Mu me xvinaj batel sc'oplal avu'unic c'alal to ta jteclum Gat, mi ja'uc xalo'iltaic ech'el sc'oplal ta scalleal Ascalone, yo' jech mu xmuyubajicuc xa ti filistea antsetique, mi ja'uc ti xbitic xa ta muyubajel ti jeche' antsetic taje.

²¹ “Laj to me sc'oplal ma' ti ta xac' vo' ta vitstic yu'un ti Gilboae, mi ja'uc ta xac' sts'ujulal ti job banomile, yu'un c'ot ta milobbail banomil. Laj yich' ju'bel ta teq'uel smacobbailic ti jpojvanejetic ti bu taje. C'ot ta ch'ayel xojobal smacobbail ti Saúl ti bu taje.

²² “Ti yespada syolob ti Saúl xchi'uc ti Jonatane, ta j'ech'el mu'yuc xa ta sbonbeic ta xch'ich'el ta xepu'al ti tsatsal j'ac'-letoetique.

²³ “Ti Saule, ti Jonatane, c'anbilic, lec ilbilic, jmoj yalel muyelic ti c'alal cuxulique, jmoj chamic xtoc. Xviletic no'ox ta j'ech'el, ja' mu sta ti xiquetique. Ech'em xu' yu'unic, ja' mu sta ti leónetique.

²⁴ “Israelal antsetic, oq'uitaic ti Saule, ti laj yac'boxuc alapic ti yax'elan c'u'ile, ti lec luchbil ta oro laj yac'boxuque.

²⁵ C'u no'ox cha'al un, ti tsalbil c'otic ti tsatsal viniquetic ti c'alal syaquilic ta letovajele. Ti Jonatane cham xa ta toyol vitstic.

²⁶ “Cuts' calal, Jonatán, mu x'ech' xjelav ta xca'i ti ame'inalile. Mu no'ox albajuc yutsil slequil avo'nton laj avac' iluc ta jtojol. Ech'em no'ox yutsil ti avo'nton laj quile, ja' mu sta syail xc'uxul yo'nton ti antsetique.

²⁷ C'u no'ox cha'al tsalbil c'otic ti tsatsaquil viniquetique, ti tan puc xa com ti abtejebaletique.”