2 Reyes 8 - Bible in Tzotzil de Chamula

Ti pojbat ti c'usi x'ayan yu'un ti ants ta Suneme, ta xcha'ich' sutel

¹ Ti Eliseoe laj xchi'in ta lo'il ti ants ti buch'u laj xcha'cuxesbe ti squerem ole. Laj yalbe ya'i ti baticuc ta naclej ta yan jmoj xchi'uc ti c'u yepal oyique. Yu'un ti Diose laj scaj'al ti ta xtal vucub jabil muc' ta vi'nal ti ta jteclume.

² Jech ti antse lic xchapan sba. Laj xch'un jech c'u cha'al albat yu'un ti j'alc'ope. Sbejelic ta na batic c'alal to yosilal filisteoetic ti com nacliicuc vucub (7) jabil ti bu taje.

³ Ech' ti va'i sjalil taje, ti antse loc' batel ta yosilal filisteoetique, bat c'opoj ti'inuc ta stojol ti ajvalile ta sc'anel ti sutesbatuc ti snae, ti yosil sbanomil ti bu macbil xa oxe.

⁴ Ti ajvalile, ja' o yacal ta xlo'ilajic xchi'uc ti Giezi smosov ti j'alc'op Eliseoe, ti albat ya'i yu'un ti ac'o xchapbe scotol ti oy c'usitic ch'ayal ta xc'ot o'ntonal yu'un ta spasel ti Eliseoe.

⁵ Naca xa xchapet ti Giezi ta yalbe ya'i ajvalil ti c'u s'elan laj xcha'cuxesbe yol jun ants ti Eliseoe, ja' o xa c'ot ti ants ti ta sc'an ti chapanbatuc yu'un ajvalil ti sutesbatuc ti snae, ti yosil sbanomile. Va'i ti Giezi une xi laj yalbe ya'i ti ajvalile: —Jcuch abtel, ja' me ma' ti ants ta xcal le' une, ja' me ma' ti squerem ol ti cha'cuxesbat yu'un ti Eliseoe.

⁶ Ti antse lic jac'batuc yu'un ti ajvalile. Lic xchap ya'i scotol ti slo'il ya'yeje. Ts'acal to un, ti ajvalile laj yalbe mantal jun yaj'opisial ti co'ol yo'ntonic xchi'uque, ti ac'o xchi'in batel ti antse yo' jech ta sutesbat scotol ti yosil sbanomile, xchi'uc scotol ti c'usitic ch'iem ta osil vul sta ti c'u sjalil sloq'uel batel ta jteclume.

Ti Hazaele ta x'och ta ajvalil yu'un ti Siriae

⁷ Ta ts'acal to un, bat ta Damasco ti Eliseoe. Ti jech yorail taje, ja' o xa ip ta xa'i ti Ben-adad ajvalil yu'un ti Siria, ti bat albatuc ya'i ti c'ot xa ti j'alc'ope.

⁸ Va'i un, xi albat yu'un ajvalil ti Hazaele: —Chapano lec matanal, ba q'uelo ti j'alc'ope. C'anbo vocol ti ac'o sjac'un ta stojol Dios yo' jech ta jna' mi ta x'ech' cu'un yu'un ti jchamele.

⁹ Ti Hazaele bat sq'uel ti j'alc'ope. Yich'oj ech'el matanaletic ti c'usitic lec xloc' x'ayan ta Damascoe, ti staoj lec yicats cha'vinic (40) ta cot camelloetic bate. Ti c'alal c'ot ta stojole, xi lic yalbe ya'ie: —Ti Ben-adad ajvalil yu'un ti Siriae, ti buch'u co'ol s'elan sbisojot ta stote, laj stacun talel ta sjac'belot mi ta la x'ech' yu'un ti xchamele.

¹⁰ Xi tac'bat yu'un ti Eliseoe: —Batan, ba albo ya'i ti ta x'ech' yu'un ti xchamele, ac'o mi laj xa yac'bun jna' ti Diose ti ta ono'ox xchame.

¹¹ Ta jech to yepal ti Eliseoe lic sq'uelbe lec sat ti Hazaele, ti chopol laj ya'ie. Lic yoq'uita sba ti j'alc'op ta ts'acal to une,

¹² ti xi laj sjac' ti Hazael une: —¿C'u cha'al ta xavoq'uita aba une, yojtot? Xi laj stac' ti Eliseoe: —Yu'un jna' lec ti ta xlic avilbajin ti israeletique. Ta xlic atic'be sc'ac'al ti nacobbail lumetic yu'unique. Ta xlic amilan ta espada ti querem viniquetique. Ta xlic avilbe svocol ta milel ti bic'tal ololetic yu'unique. Ta xlic ajatbe xch'ut ti antsetic ti x'uxet xchi'uc yolique.

¹³ Ti Hazaele xi laj staq'ue: —¿Bu la xata ti jech ta jpas ti va'i s'elan taje, ti c'alal co'ol j'elan jech c'u cha'al junuc me'un ts'i'e? —Ti Diose laj yac'bun jna' ti ta xa'och ta ajvalilal yu'un ti Siriae —xi tac'bat yu'un ti Eliseoe.

¹⁴ Ti Hazaele laj sc'opon comel ti Eliseoe, ti bat c'alal ta stojol ti yajval ti xi jac'bat yu'une: —¿C'u s'elan laj yalbot ava'i ti Eliseoe? —Laj yalbun ca'i ti ta la x'ech' avu'un ti chamele, xiyutun —xi laj stac' ti Hazaele.

¹⁵ Ja'uc le' une, ta sacubel osil ta yoc'omal un, laj stsac jlic poc' ti Hazaele. Laj xt'uxubtas ta vo'. Bat slambe ta sat ti ajvalile. Cham ti ajvalile. Laj taj une, och ta ajvalil ti Hazael ta xq'uexol ti ajvalile.

Yorail tiq'uil ta ajvalilal ti Joram ta Judae

¹⁶ Ti ta yo'obal (5) xa jabil yochel ta ajvalilal ti Joram xnich'on ti Acab ta Israele, ja' o lic ochuc ta ajvalil yu'un Judá ti Joram xnich'on ti Josafate.

¹⁷ Yich'oj xa lajcheb xcha'vinic (32) jabil xch'iel sc'opojel ti c'alal lic ochuc ta ajvalilale. C'ajomal no'ox vaxaquib (8) jabil ech' ta ajvalilal ta Jerusalén.

¹⁸ Ja'uc le' une, ja' laj xchanbe ta spasel ti c'u s'elan laj ech'uc ti ajvaliletic ta Israele, ti c'u s'elan laj spasic snitilultac ti Acabe. Ti yajnil eque, ja' snitilul ti Acabe. Ti c'usitic laj spas une, chopol laj yil ta sba ta sat ti Diose.

¹⁹ Ja'uc le' une, ti Diose mu'yuc sc'an stubbe sc'oplal ti jteclum Judae, ta sventa ti mu tuch'baj ta yo'nton ta xa'i ti David ti ja' yajtunele, ti laj ono'ox yalbe ya'i ti ja' no'ox ta sventa ti mu xch'ay sc'oplal ti snitilule.

²⁰ Ti c'u sjalil ochem ta ajvalilal ti Jorame, jech ti Edome lic stoy sbaic ti jech pasbilic ta mantal yu'un ti Judae. Va'i un, lic sva'anic jun yaj'ajvalil stuquic.

²¹ Jech o xal ti Jorame tey laj stam batel sbe ta Zair xchi'uc ti scarretatac sventa ti pasob-letoe. Jech ti stuque, xchi'uc ti banquilaletic ti buch'u yich'ojic ta venta ti ac'ob-leto carretaetique, tey liquic batel ta ac'ubaltic ta stsaquel ta leto ti edomitaetique. Jatav batel yu'unic ti c'alal joyol c'otic ta spat ti jteclume.

²² Ja' no'ox un, ti jteclum Edome cuch yu'unic xch'aquel sbaic ti mu'yuc xa ventainbilic yu'un Judá avi tana li'e. Ja' jech xtoc ti jech ora taje, ch'acal com ec ti jteclum Libnae.

²³ Ti scomelal slo'iltabel sc'oplal ti c'u s'elan laj spas ti Jorame, ts'ibabil com ta jpoc svunal yabteltac ti ajvaliletic yu'un ti Judae.

²⁴ C'alal cham ti Jorame, tey bat yich' muquel ta Steclumal David ti bu mucul ti stot sme'e. Ts'acal to un, ja' com ta xq'uexol ta ajvalilal ti xnich'on ti ja' Ocozías sbie.

Ti c'alal och ta ajvalilal ti Ocozías ta Judae

²⁵ Ti ta xlajchebal (12) jabil yochel ta ajvalilal ta Israel ti Joram ti ja xnich'on ti Acabe, ja' o lic ochuc ta ajvalilal ta Judá ti Ocozías ti ja' xnich'on ti ajvalil Jorame.

²⁶ Yich'oj xa chib xcha'vinic (22) jabil ti c'alal lic ochuc ta ajvalilale. C'ajomal no'ox jun jabil och ta ajvalilal ta Jerusalén. Atalía sbi ti sme'e, ja' snitilul ti Omri ti ja' ajvalil yu'un ti Israele.

²⁷ Ti Ocoziase, ja' jech lic spas ti c'u s'elan laj spasic ti Acab xchi'uc ti snitilultaque. Ta scoj ti mu yanicuc xchi'uc ti Acabe, jech ti c'usitic laj spase, mu lecuc laj yil ta sba ta sat ti Diose.

²⁸ Ti Ocoziase laj sco'oltas sjolic xchi'uc ti Joram ti ja' xnich'on ti Acabe yo' jech ta stsaquic ta leto ti Hazael ti ja' ajvalil yu'un Siria ta Ramot ti oy ta Galaade. Ja' no'ox un, ti sirioetique laj syayijesic ti Jorame.

²⁹ Va'i un, ti stuque sut ech'el ta Jezreel yo' jech ta xac' ta poxtael ti syayijemal ti ac'bat yu'un ti sirioetic ti c'alal laj stsac sbaic ta leto xchi'uc ti Hazael ti ja' ajvalil yu'un Siria tey ta Ramote. C'alal jech ip ta xa'i ti Jorame, jech ti Ocoziase bat ta vu'lal ti ta Jezreele.