2 Reyes 7 - Bible in Tzotzil de Chamula

¹ Ti Eliseoe xi laj staq'ue: —Chiquintao ava'i sc'opojel ti Diose. Ti Diose xi ta xale: ‘Ti ta ochebal ti sti' jteclum jech ora oc'om jech c'u cha'al li'e, ta jsep no'ox uni plata taq'uin, xman o yu'un vucub (7) litro juch'bil trigo, xchi'uc xtoc ta jsep no'ox uni plata taq'uin, xman o yu'un vo'lajuneb (15) litro ta chop o ta trigo.’

² Ti yajcoltaobba stuc ti ajvalile xi laj stac'be ti j'alc'ope: —Ac'o mi ta sjam talel sti' vinajel ti Diose, mi ja'uc ta xc'ot ta pasel ti va'i s'elan ta xavale. Ja'uc ti Eliseoe xi laj staq'ue: —Ma' taje, ta xavil ta aba ta asat, ti mu ja'uc xa ta xatun ta xalajes une.

³ C'alal jech syaquil taje, oy chanib jc'a'emal chameletic ti oyic ta ochebal sti'il jteclum ti xi lic yalbe sbaique: —¿C'usi ta jpastic ti li' no'ox chotolotic ca'binoj jbatic ta xijchamotique?

⁴ Mi ta jnoptic ta xij'och batel ta yutil lume, ta xijchamotic, yu'un mu no'ox albajuc xyaquet ti vi'nal ta yutile. Mi li' no'ox chotolotique, ta xijchamotic ono'ox. Avi tanae, batic ta sq'uelel ti bu vololic ta lamlej ti sirioetique. Mi mu xismilotique, ch'an no'ox xijyut unbi, ta to xijcuxi. Mi laj smilotic une, jechuc unbi, yavil ti ta ono'ox xijchamotique.

⁵ Ja' yu'un un cha'e, xyabet xa osil laj stam batel sbeic c'alal to ti bu vololic ti sirioetique. Laj yilic ti mu'yuc buch'u oy ti c'alal nopol xa oyique.

⁶ Taj une, c'ot ta pasel yu'un Dios ti oy c'usi laj sliques ti bu vololic ti sirioetic ti co'ol s'elan xniquet xa talel ti j'ac'-leto ta carretaetique, ti jcajlejetic ta ca'e, ti mu albajuc yepal ti soldadoetic laj ya'iique. Laj snopic ti sirioetic ti laj xa svol sc'opic ti ajvalil Israel xchi'uc ti ajvalil yu'un ti hititaetique, xchi'uc ti ajvalil yu'un ti egipcioetique yo' jech ta stsacatic ta leto ti yalojique.

⁷ Jech o xal, ta yochel no'ox ac'ubal, laj stam batel sbeic ta jatobal. Lamal laj yictaic comel ti yaxibalnaique, ti sca'ique, ti sburroique. Va'al laj yictaic comel ti yaxibalnaic ti bu vololique, yavil ti cuxul to laj ya'iic ti jatavic batele.

⁸ C'otic ti jc'a'emal chameletic ta spat ta xocon ti bu to ox vololic ti sirioetique. Ochic ta yut jbej axibalna. Lic ve'icuc uch'ubajicuc. Lic yu'ninic ti platae, ti oroe, ti c'u'ile, ti bat snaq'uique. Sutic no'ox ech'el xtoc. Ochic ech'el ta jbej xa axibalna ti laj stamic loq'uel ti c'usitic x'ayane, bat snaq'uic.

⁹ Ja'uc le' une, xi lic yalanbe sbaique: —Mu lecuc ma' ti c'usi ta jpastique. Ti jechuque, ti c'ac'al avi tana li'e, ja' yorail ta yalel ti c'usi lec c'ot ta pasele. Le'e, li' no'ox ts'ijilotique. Ti mi ja' to ta jmalatic ti oc'ome, ta xijtabat jmul jcolo'tic. Ta lec no'ox ba caltic a'yej ta sna ti ajvalile.

¹⁰ Va'i un, batic, ti xi laj yalbeic ti laj staic ta iq'uel ti jchabiej lume: —Li'aycutic ti bu vololic ta tsoblej ti sirioetique. Mi junuc oy buch'u ta j'ech'el. Mi ja'uc xava'i ti oy buch'u ta xc'opoje. C'ajomal no'ox chucul ti ca'etique, ti burroetique, ti staoj yav va'al ti axibalnaetic jech c'u cha'al laj sva'anique.

¹¹ Ti jchabiej ochebal jteclume, ta jech yepal laj staic ta iq'uel ta anil ti buch'utic oy ta sna ti ajvalile.

¹² Va'i un, ti ajvalile lic xchapan sba. Manchucuc mi ac'ubaltic xa, xi bat yalbe ti yaj'opisialtaque: —Ta xcalboxuc ava'iic yuni c'oplal ma' ti oy c'usi ta yo'nton ta spasbotic ya'iic ti sirioetique. Ti jech sna'ic lec ti sirioetic ti oy jvocoltic ta vi'nale, loq'uic batel ti bu vololique, bat snac' sbaic ta osiltic. Ta snopic xa mi liloc' ech'el ta lume, cuxul ta xmich'otic, ta x'ochic talel ta jteclum.

¹³ Ja'uc le' une, oy jun ta scotol ti yaj'opisial ti xi laj yale: —Nitic talel scomelal ti vo'cot ca' ti li' to cuxule. Jtactic batel jun chib viniquetic ta sq'uelel. Jq'ueltic quic c'usi ta xc'ot ta pasel. Mi ta xchamic, mi cuxul ta sutic talel. Ti c'usi ta xc'ot ta stojolique, mi ja'uc xa toj lec, mi ja'uc xa toj chopol, ti co'ol no'ox sba jech c'u cha'al ti jlom israeletic li' ta xcomique.

¹⁴ Ja' yu'un un, lic xchapanic cha'cot carreta xchi'uc sca'il, ti tacatic batel yu'un ti ajvalil ta st'unel ta xchajel ta q'uelel ti bu vololic ti sirioetique.

¹⁵ Batic un, st'unojic batel ti bu ech'ic ti sirioetique, ti c'ot c'alal to ta uc'um Jordane. Laj yilic ti sjunul be lamal no'ox batel ti c'u'ile, xchi'uc ti c'usitic yan ti sjipojic comel ti sirioetic ti ta anil loq'uic ta jatobale. Ta ts'acal to un, sutic ech'el ti jtaqueletic yu'un ti ajvalile, ti xchapet c'ot yalic ti c'u s'elan laj yilique.

¹⁶ Ta jech no'ox yepal un, batic ti jnaclejetic ta stsobel ti c'usitic oy yu'unic ti sirioetic ti bu to ox vololique. Ti c'u s'elan yaloj ti Diose, c'ot ta pasel un ma' ti laj yich' chonel ta jsep no'ox uni plata taq'uin ta vucub (7) litro ti juch'bil trigoe, ti laj yich' chonel ta jsep no'ox uni plata taq'uin ta vo'lajuneb (15) litro ti tos o ta trigoe.

¹⁷ Ti yajcoltaobba stuc ti ajvalile laj yalbe mantal ti ac'o xchabi ti ochebal ti'na yu'un ti jteclume. Le' une, lats'e ta ti'na yu'un ti jnaclejetique, cham. Jech ono'ox c'ot ta pasel jech c'u cha'al laj yal ti j'alc'op ti ay q'uelatuc yu'un ti ajvalile.

¹⁸ C'ot ono'ox ta pasel un ti c'u s'elan laj scaj'al ti j'alc'op ta stojol ti ajvalile. Mu'yuc stselbuj ta j'ech'el ti laj yal ti ta jsep no'ox uni plata taq'uin xman yu'un ti vucub (7) litro juch'bil trigoe, ti ta jsep no'ox uni plata taq'uin xman yu'un ti vo'lajuneb (15) litro ti jtos o ta trigo ta xchone ta ochebal sti' ti jteclume.

¹⁹ Ti laj stac'be j'alc'op ti j'opisiale, ac'o mi sjam talel ti' vinajel ti Diose, mu ja'uc xc'ot ta pasel ti xie. Ti tac'bat yu'un ti Eliseoe, ti ta xil ta sba ta sate, ti mu'yuc ta stunes ta slajese,

²⁰ jech no'ox c'ot ta pasel un, yu'un cham ta lats'el ta ti'na yu'un ti jnaclejetic ta ochebal ti'na yu'un ti jteclume.