2 Reyes 6 - Bible in Tzotzil de Chamula

Ta jech to yepal muy talel ta ba vo' ti eq'uele

¹ Oy jun c'ac'al, ti j'alc'opetique xi laj yalbeic ya'i ti Eliseoe: —Q'uelo avil, ta na ti li' jchi'inoj jbatic ta nacleje, toj chucul ta xca'icutic.

² Ac'buncutic ave ati' ti batcuncutic ta uc'um Jordane yo' jech ta jsa'cutic talel jujuteluc te' ti jujununcutique, yo' jech ta jmeltsancutic ti bu ta xinaquicutique. —Batanic un cha'e —xi laj stac' ti Eliseoe.

³ —Avocoluc ec un, ba chi'inuncutic —xi laj yal jun yu'unic ta scotolic. —Batic un cha'e —xi laj stac' ti stuque.

⁴ Ti Eliseoe chi'invan batel c'alal to uc'um Jordán. Ti bu taje, ochic ta sts'etel ti te'e.

⁵ Ja'uc le' une, c'alal yacalic sts'etel ti te'e, c'ot ta pasel ti xjipip to batel ti eq'uel ti baj yalel ta uc'ume. Va'i un, xi avane: —¡Mu xa ono'ox cha'bel un, jchanubtasvanej! ¡Ch'amunbil ma' ti eq'uel le' une!

⁶ —¿Bu baj yalel un? —xi laj sjac' ti j'alc'ope. Ti june laj yac' iluc ti bu baj yalele. Va'i un, ti Eliseoe laj set talel jun te'. Laj sts'aj yalel ti bu yal ech'ele. C'ot ta pasel ti xcajet muyel talel ta ba vo' yu'un ti eq'uele.

⁷ —Tsaco un —xi laj yal mantal ti Eliseoe. Laj xach' batel sc'ob ti june. Laj stsac loq'uel talel ti eq'uele.

Ta xcontrainat yu'un ajvalil Siria ti Eliseoe

⁸ Ti ajvalil yu'un Siriae, oy ta letovajel xchi'uc ti Israele. C'alal laj svol sbaic ta scomon nopel ti c'usi sc'an pasel xchi'uc ti yaj'opisialtaque, loc' ta alel yu'un ti bu jotucal xbat svol sbaique.

⁹ Va'i un, ti Eliseoe laj stac batel mantal ta yalbel ya'i ti ajvalil yu'un Israele, ti bijuc ti mu x'ech' ti bu taje, yu'un bat xa slaman sbaic ti sirioetique.

¹⁰ Ti ajvalil yu'un ti Israel une, laj stac batel yajsoldadotac ti bu albatic yu'un ti j'alc'op ti mu x'ech'ique. Laj sta ti ep ta velta ti mu'yuc c'usi snuptane, ti pojbil coltabil c'ote.

¹¹ Ti ajvalil yu'un Siriae, mu stac' a'yeluc ta xa'i c'usi ta spas xchi'uc ti va'i s'elan taje. Laj staan ta iq'uel ti yaj'opisialtac ti xi laj yalbe ya'ie: —¡Albeicun ca'i buch'u jchi'iltical ti co'ol sjol yo'ntonic xchi'uc ti ajvalil yu'un Israele!

¹² Oy jun yu'unic ta scotol ti xi laj staq'ue: —Mi junuc, Jcuch abtel. Ja'uc le'e, ti j'alc'op Eliseo ti oy ta Israele, ja' ti buch'u ta sbijubtas ti ajvalil yu'un Israel scotol ti c'usi ta xal ti Jcuch abtel yu'une, xchi'uc xchapet lec yu'un ti c'usi ta xanop ta avayebe.

¹³ Va'i un, ti ajvalil yu'un Siriae xi laj yal ti mantale: —T'unic ca'itic lec bu oy taje yo' jech xu' ta jtac batel jun chib viniquetic ta stsaquel talel. Albat ya'i ti oy ta Dotane.

¹⁴ Laj stac batel jvol svinictac ti cajalic ta ca'e, ti cajalic ta carreta sventa ti ac'ob-letoe, xchi'uc ep ta xanav ech'el ta yoquic. C'otic ta ac'ubaltic ta Dotán. Laj sjoyobtaic ta volej ti jteclume.

¹⁵ Sacubel osil ta yoc'omal un, julav smosov ti Eliseoe. C'alal ta xa xloc' batele, laj yil ti joyobtabil ta epal soldado, ta carreta yu'un ac'ob-leto ti jteclume. Va'i un, xi bat yalbe ti Eliseoe: —Avi tana une, jchanubtasvanej, ¿c'usi ta jpastic tana un?

¹⁶ Xi tac'bat yu'un ti Eliseoe: —Mu xatsiq'ues avo'nton, yu'un xjelav to xu' yu'un ti buch'u oy ta jtojoltique, ja' mu sta xu' yu'un ti buch'u oy ta stojolique.

¹⁷ Xi lic c'opojuc ti'inuc ta stojol Dios ti Eliseoe: “Cajval, ta jc'anbot vocol ti jambo sba sat ti jmosove yo' jech ta xil.” Ti Dios une lic sjambe sba sat ti mosovile. Laj yil ti noj ta jcajlejetic ta ca' ti yut te'tique, ta carretaetic ti xtiltun sc'ac'al ti joyol ta spat ta xocon ti Eliseoe.

¹⁸ C'alal ti sirioetic ta xa xlic tsacvanicuc ta letoe, ti Eliseoe xi xvocolet liquel ta stojol ti Diose: “Ta jc'anbot vocol ti joybijuc ta ma'sat avu'un ti viniquetic le'e.” Joybinatic ta ma'sat yu'un Dios jech c'u cha'al laj sc'an vocol ti Eliseoe.

¹⁹ Va'i un, xi albatic yu'un ti Eliseoe: —Ma'uc ma' ti be li' une. Mi ja'uc ti jteclum ta xasa'ic talele. La'ic, ts'acliicun batel. Ta xquic'oxuc ech'el ta stojol ti vinic ti buch'u ta xasa'ique. Yic'ojan batel ta Samaria un.

²⁰ C'alal c'otic ti bu taje, xi lic c'opojuc ti'inuc ti Eliseoe: “Jambo xa ti satic tana une, Cajval, yo' jech ta xlic yilic.” Va'i un, ti stuquic une laj yilic ti oyic xa ta yut jteclum Samariae.

²¹ C'alal ilatic yu'un ti ajvalil yu'un Israele, xi laj sjac'be ti Eliseoe: —Tot un cha'e ¿mi ta jmil, mi ta jmil un?

²² Xi tac'bat yu'un ti Eliseoe: —Mo'oj, mu xamil. ¿Mi yu'un nopem xava'iic ti naca smilel no'ox avu'un ti buch'utic laj atsac ta chuquele, ti laj asibtas ta avespada xchi'uc ta ayolobe? Ac'bo sve'el yuch'omic. Taco sutel ta stojol yajvalic ta ts'acal to un.

²³ Va'i un, lic yich' ta pasel jun muc'ul q'uin ta stojolic, ti ve'ic yuch'ic vo'e. Ts'acal to un, c'oponatic batel yu'un ti ajvalile. Sutic ech'el ta stojol ti yajvalique. Ti jech une, lic yicta sbaic ti sirioetic ta xaniel yosilal ti israeletique.

Ti c'usi c'ot ta pasel ta yutil lum Samariae

²⁴ C'alal ech' taj une, ti Ben-adad ajvalil yu'un ti Siriae, lic stsob scotol ti yajsoldadotaque, ti bat sjoyibtaic ta volej ti jteclum Samaria yo' ta stsac ta letoe.

²⁵ Va'i un cha'e, lic ayanuc jun muc' ta vi'nal ta Samariae, ta scoj ti macbilic ta j'ech'el ti mu stac' xloq'uic ti jnaclejetique. C'ot ta pasel ti chanvinic (80) ta sep plata taq'uin stojol ti jbej sjol burroe. C'ot ta pasel ti vo'sep (5) plata taq'uin stojol ti jun varcha te' ti tso' paloma cheneq'ue.

²⁶ Oy jun c'ac'al, ti ajvalil yu'un Israele ech' xanavuc ta sba smocal ti lume, ti xi avtaat yu'un jun antse: —¡Pojun, coltaun, Jcuch abtel!

²⁷ Ti ajvalile xi laj staq'ue: —Ti mi mu'yuc ta stic' sba ta apojel ta acoltael ti Diose, ¿c'usi xcut ta jcoltaot ec un? ¿Mi xu' ta xcac'bot ta ave ati' ti trigoe, mi ja' ti vinoe?

²⁸ ¿C'usi ti avocol ta xc'ot ta pasel un cha'e? Ti stuque xi laj staq'ue: —Ti ants li'e laj yalbun ca'i ti c'ac'al avi le'e, ti ac'o cac' ta c'abal ti cole yo' jech ta jti'cutic. Ti oc'om la ta jti'cutic ti yol ec une.

²⁹ Va'i un, laj jpascutic ta ve'lil ti cole, laj jlajescutic un. Ta yoc'omal xa une, laj calbe ti ac'o yac' talel ti yole yo' jech ta jti'cutic. Ja'uc le' une, c'ajomal no'ox lic scaj-nac' ti stuque.

³⁰ C'alal laj ya'i ti ajvalil ti va'i s'elan albat yu'un ti antse, lic xch'i' ta jatel sc'u', svinajeb ti mu ts'icbaj laj ya'ie. Ti jech xva'et ta ba moque, ile muyel yu'un ti lume ti slapoj c'a' c'u'ile.

³¹ Xi tsots lic avanuc ti ajvalile: “¡Tsotsuc xistsitsun ti Dios avi ti c'ac'al tana li'e, ti mi mu jsetbe snuc' ti Eliseo xnich'on ti Safate!”

³² Ti Eliseoe, jun yo'nton chotol ta sna xchi'uc ti moletique. Ja' o ti ajvalile laj stac talel jun chib svinictac. Ja'uc le' une, ti c'alal mu to ta xc'otic yajtacbolaltac ti ajvalile, ti Eliseoe xi laj yalbe ti moletique: —Q'uelo me avilic ma' ti jmilvanej une. Oy buch'u laj stac talel yo' jech ta sc'ocbeicun ti jnuq'ue. Ts'etano achiquinic ta ya'yiel ava'iic li'e. C'alal mi vul ta ti'na ti jtaqueletique, maquic lec, tsots xaviquic. Ti ta spatique, xvinaj stsavtsun talel yoc ti yajvalique.

³³ Naca to yacal jech xvulajet ta xc'opojic, ja' o c'otic ta stojol Eliseo ti buch'utic tacbilic batele, ti xi albatic yu'une: —Ti jech vul xa ta jtojoltic ti vocol laj xa stacbotic talel ti Diose, ¿c'usi xa stac' ta jmalatic ta stojol un?