2 Reyes 3 - Bible in Tzotzil de Chamula

Ta x'och ta ajvalilal yu'un Israel ti Jorame

¹ Ta xvaxaclajunebal jabil (18) yochel ta ajvalilal ti Josafat ta Judae, ti Joram xnich'on ti Acabe, ja' o lic ochuc ta ajvalilal yu'un ti Israele. C'ajomal no'ox lajcheb (12) jabil ech' ta ajvalilal ta Samaria.

² Ti c'usitic laj spase, mu lecuc laj yil ta sba ta sat ti Diose. Ja' no'ox ti jc'ol to mu sta jech c'u cha'al laj spas ti stot sme'e, yu'un ti stuque laj sjip loq'uel sloc'obbail ti Baal ti bisbil ti cuxul ton ti ja' laj yac' ta meltsanel ti stote.

³ Ja'uc le' une, mu'yuc xa'i c'uxi bat ti jech lic spas jech c'u cha'al laj spas ti Jeroboam xnich'on ti Nabate, ti laj sta smul yu'un ti israeletique.

Ti Eliseoe ta scaj'al ti tsalbil ta xc'ot ti Moabe

⁴ Ti ajvalil yu'un Moab ti Mesá sbie, tsots sc'oplal ta xa'i ti yich'uc bolesel ta sts'unel ti chije yo' ta stoj o spatan ta stojol ti ajvalil yu'un ti Israele. Ta xac' vo'vinic ta mil (100,000) ta cot ch'iom chijetic, xchi'uc vo'vinic ta mil (100,000) ta c'ot chij ti mu'yuc loc'bil ti stsotsil ta xbate.

⁵ C'alal chamem xa ti Acabe, ti ajvalil yu'un ti Moabe lic stoy sba ta scontrainel ti ajvalil yu'un Israele.

⁶ Va'i un, ti ajvalil Jorame loc' ech'el ta Samaria. Lic xchap c'u yepal oy ti soldado israele.

⁷ Laj taj une, xi laj yal ti laj stac batel mantal ta stojol ti ajvalil yu'un ti Judae: “Ti ajvalil yu'un Moabe stoyoj sba ta scontrainelun. ¿Mi xac'an jvol jc'optic yo' ta xachi'inun ta stsaquel ta leto?” Ti ajvalil yu'un ti Judae xi laj staq'ue: “Ta jvol jbatic ta xchi'inelot. Ti vu'une li' oyun xchi'uc ti cajsoldadotaque, xchi'uc ti jca'taque. Co'ol ta jvol jbatic xchi'uc ti avinictaque quere.

⁸ Ja'uc le' une, ¿bu jotucal sc'an maquel ta be xana' un?” Ti Jorame xi laj stac' sutele: “Ta beetic ta x'ech' ta sbajtical banomil yu'un ti Edome.”

⁹ Va'i un, ti ajvaliletic yu'un ti Israele, ti Judae, xchi'uc ti Edome, laj stam batel sbeic. Ti jech x'ech'ic ta joyetel vucub (7) c'ac'ale, c'ot ta lajel ya'alic ti soldadoetique, xchi'uc sventa ti ta xuch' ti sca'ique.

¹⁰ Va'i un, xi laj yal ti ajvalil yu'un ti Israele: —¡Tsutsemotic xa jna' ma' li' une! Yu'un xaval yilel ti Diose tijbil xa talel joltic yu'un ti oxib ajvalilotique yo' ta xijyac'otic ta yoc ta sc'ob ti moabitaetique.

¹¹ Ti Josafate xi laj sjaq'ue: —¿Mi mu'yuc junuc yaj'alc'op Dios li'e yo' jech sva'an sba cu'untic ta sjaq'uelotic ta stojol ti Diose? Oy jun ta scotol ti yaj'opisialtac ajvalil yu'un ti Israele, ti xi laj yale: —Li' oy ti Eliseoe, xnich'on ti Safate, ti xnabet to ox ta scoltaobba ti Eliase.

¹² —Oy nan c'usi stac xijyalbotic ta sventa ti Diose —xi laj stac' ti Josafate. Ti ajvalil yu'un ti Israele, ti Josafat ajvalil yu'un ti Edome, batic ta anil ta sq'uelel ti Eliseoe.

¹³ Ja'uc ti Eliseoe xi laj yalbe ya'i ti ajvalil yu'un ti Israele: —¿Mi yu'un xavac'touc avaloj ta jtic' jba ta atojol une? Ja' ba jac'o aba ta stojol ti yaj'alc'optac ti atot ame'e. Ti ajvalil yu'un ti Israele xi xvulvun liquele: —Mu xaval jech, yu'un ti oxib ajvaliluncutic li'e, tijbil xa talel jolcutic yu'un ti Dios yilele yo' jech ta xi'ochcutic ta yoc ta sc'ob ti moabitaetique.

¹⁴ Va'i un, xi albatic yu'un ti Eliseoe: —Jamal xcal ava'i ta stojol ti Dios ti scotol xu' yu'une, ti yilojun avie, ti manchucuc jbic'tajesoj jba ta stojol ti Josafat ajvalil yu'un ti Judae, mi ja'uc jc'an jq'uelbot asat. Mi ja'uc ta jc'an jts'etan jchiquin ta ya'yiel ma' ti ac'op unbi.

¹⁵ Batanic, ba ic'beicun talel junuc jtij-vob. C'alal lic stij vob ti jtij-vobe, ti Eliseoe, u'ninat yu'un ti Diose.

¹⁶ Va'i un, ti Eliseoe xi lic yale: —Ti Diose xi laj yale: ‘Meltsanic ep macbil vo' ta stenlejal li'e.

¹⁷ Ac'o mi mu xava'iic xjumet ti iq'ue, mi ja'uc ta xavilic ti ta xac' ti vo'e, ti stenlej li'e, mu no'ox albajuc ta sts'ani liquel ti vo'e. Acotolic ta xavuch'ic jech c'u cha'al ti avacaxique, ti achon abolomique.

¹⁸ Ti jech taje, ta svinajes xi yuni nene' muc'ul ti oy c'usi xu' stac' spas ti Diose. Ma'uc no'ox taje, yu'un ti Diose ta xac'boxuc ta avoc ta ac'obic ti moabitaetique.

¹⁹ Ti vo'oxuque ta xalilinic scotol ti lumetic ti oy lec smocaltaque, xchi'uc ti lumetic ti cajal sc'oplalique. Ta xalomesic scotol ti te'etic ti stac' tunesbel sate. Ta xabut'iic ta snojesel scotol ti sat vo'etique. Busul no'ox ta tontic xcom avu'unic ti ve'ebal banomile.

²⁰ Jech ono'ox c'ot ta pasel un. Ta sob ta yoc'lomal, c'alal ta sta yorail ta xich' aq'uel ti matanale, ta stuq'uil ti Edome, tal ti vo' ti laj smut'ian ti banomile.

²¹ Ti jech taj une, ti moabitaetique c'ot ta sni' ta xchiquinic ti tal stsacaticuc ta leto ti ajvaliletique. Jech o xal laj staic ta iq'uel scotol ti querem viniquetic ti ja' xa yutsil o xc'ot ta soldadoile. Va'i un, bat sa' yavilic bu oy sts'aquil ti sbanomilique.

²² Va'i un, ta sob yoc'lomal ti c'alal liquic ti moabitaetique, xojobin xa ti sat c'ac'al ti c'alal laj sq'uelic ech'el ti vo' ta stuq'uil yelovalic ti chac pulan ta j'ech'el ta cuxul ch'ich' ti vo'e.

²³ Va'i un, xi laj yalbe sbaique: “Ch'ich' xa ma' le' une. Ti c'usi c'ot ta pasel le'e, laj stsac sbaic ta leto stuquic ti ajvaliletique. ¡Moabitaetic avi tana le' une, ba cu'ninbetic ti c'usitic laj scomesique!”

²⁴ Ja'uc le' une, ti c'alal ochic batel ti moabitaetic ti bu lamalic ti israeletique, tsacbil c'otic ta leto yu'un ti israeletique. Jatav ech'el yu'unic. Va'i un, nutsbil batic yu'un ti israeletique. Milatic yu'un.

²⁵ Laj slilinic ti lumetic ta ts'acal to une. Busul no'ox laj yictaic comel ta ton ti ve'ebal banomile. Laj smut'iic ta muquel ti sat vo'etique. Laj sbojic ta slomesel scotol ti te'etic ti stac' tunesbel ti sate. Ja' xa no'ox va'al com ti jteclum Kir-harésete. Ja'uc le' une, volibil c'otic yu'un ti jim-jimich'etique, u'ninatic yu'un.

²⁶ C'alal laj yil ti ajvalil yu'un Moab ti xjelav to x'ech' xu' yu'unic ti scontrae, ti ja' mu sta ti stuque, laj stac ta iq'uel vucub ciento (700) ta vo' viniquetic ti xc'abajic ta yaq'uel ti espadae, yo' jech ta sjamic ech'el ti be ti bu oy ti ajvalil yu'un ti Edome. Mi ja'uc jutebuc cuch yu'unic.

²⁷ Ta scoj taje, va'i un, laj stsac ti sbanquilal nich'on ti oy ox sc'oplal ta x'och ta xq'uexol ta ajvalilale, lic xchic' ta matanal ta sba smocal ti jteclume. Tsots lic sc'ac'al yo'nton yu'unic ti israeletique. Laj stuquiic ti yaxibal naic ti bu vololic to oxe. Sutic batel ta slumalic.