2 Reyes 23 - Bible in Tzotzil de Chamula1 Va'i un, ti ajvalile laj sta ta iq'uel scotol ti moletic ti ich'bil ye sti'ic ti oyic ta Judae, xchi'uc ti oyic ta Jerusalene, yo' jech ta stsob sbaic xchi'uc. 2 Ti ajvalil une, xchi'uc scotol ti jnaclejetic yu'un ti Judae, yu'un ti Jerusalene, ti paleetique, ti j'alc'opetique, ti jc'ulejetique, ti ma'uc jc'ulejetique, xchi'uc scotol ti c'u yepal smacoj ti muc' ta jteclume, batic ta xch'ulna ti Diose. Jech ti ajvalil une tsots xcholet laj yavta scotol ti c'usi ta xal ta jpoc svunal ti trate ti laj yich' tael ta yut xch'ulna ti Diose. 3 Ti c'alal va'al ta sts'el muc' ta oy ti ajvalile, laj yac' ye sti' ta stojol Dios ti ta xch'unbe ti c'usi ta xale, ti ta yutsil yo'nton ta xc'ot ta pasel yu'une, ti mu xchibetuc yo'nton ta spas ti mantaletique, ti c'usitic nopbile, ti oy c'usi jbel albile, ti ta xc'ot ta pasel yu'un ti c'u s'elan pasbil ti trate ti ts'ibabil ta jpoc svunale. Scotol ti jteclum eque c'ot ta yo'ntonic ta spasic ti va'i s'elane. Ti Josiase lic sliques ta yabtelanel ti c'usi albile ( 2 Cr 34.3-7 ) 4 Va'i un, ti ajvalile laj yalbe mantal ti banquilal pale Hilciase, ti its'inal pale yu'une, xchi'uc ti jchabiej ti'naetique, ti ac'o sloq'uesic talel ta xch'ulna Dios scotol ti c'usitic ta stunesic ta yich'el ta muc' ti Baale, ti Aserae, xchi'uc scotol sloc'obbail ti xnoblajet ta xac' xojobal ta vinajele. Laj xchiq'uic ta loq'ueltic yu'un ti Jerusalén ta yosilal ti Cedrone. Laj taj une, ta ora no'ox laj yich' batel c'alal to Betel ti stanile. 5 Ts'acal to un, laj sloq'uesic ta yabtel ti paleetic ti va'anbilic yu'un ti ajvaliletic ta Judá ta xchiq'uel ti pom ta jujun c'opojebaletic ti oy ta lumetic yu'un ti Judae, xchi'uc ti c'u yepal joyol ta spat xocon ti Jerusalene. Ja' jech xtoc laj sloq'uesic ta yabtel ti paleetic ti sbainojic ta xchic'bel pom ti Baale, ti c'ac'ale, ti ue, ti stsaclebtac jujutose, xchi'uc scotol ti c'analetic ti oy ta vinajele. 6 Ti sloc'obbail ti Asera ti oy ta xch'ulna ti Diose, bat yac' ta loq'ueltic yu'un ti Jerusalene. Laj xchic' ta ti' uc'um Cedrón, ja' to c'uxi stuc stanil com yu'une. Ti stanile, laj svij ta ba muquinal yu'un ti jteclume. 7 Laj slilin xtoc snailtac ti bu ta xmulivajic ti viniquetic ti c'alal ta spasbeic stoyel xi'el ti sdiosic ti oy ta xch'ulna Dios ti bu ta xjalavic ti antsetic ta spasbel sc'u' ti ch'ul me'il Aserae. 8 Ts'acal to un, laj yal mantal xtoc ti ac'o talicuc scotol ti paleetic ti oyic ta jteclumetic yu'un ti Judae. Yu'un mu xa sc'an sq'uelbe sat scotol ti c'opojebaletique, ti lic ta Gebae, ti c'ot c'alal to Beersebae, ti bu laj xchiq'uic to ox pom ti paleetique. Laj slilin xtoc ti altaretic yu'un ti jti'ovaletic ti oy ta ti'na yu'un ti Josué ajvalil yu'un ti jteclume, ti oy ta ts'et c'ob ochebal yu'un ti jteclume. 9 Ja'uc ti paleetic ti sbainojic ti jujun c'opojebaletique, mu xbatic ta yac'bel smoton Dios ta altar ti oy ta Jerusalene. C'ajomal no'ox lec ta xa'iic ti xvoletic xchi'uc ti xchi'iltac ta paleal ti jmoj ta sve'ic pan ti ch'abal yich'oj spajubtasobile. 10 Ti Josiase laj stubbe sc'oplal ti chic'obbail ti oy ta stenlej yu'un ti Ben-hinome yo' jech mi ja'uc xa junuc ti oy buch'u ta xchic'be ta smoton Moloc ti yalab xnich'nabique. 11 Laj sten loq'uel ti ca'etic ti yac'ojic ti ajvaliletic ti ta xtun ta yich'el ta muc' ti c'ac'ale, ti nopol oy yu'unic ta ochebal sti' xch'ulna Dios ta sts'el sna ti Natán-melec ti sbainoj ti abtel taje. Laj xchic' xtoc scarretail ti sloc'obbail c'ac'ale. 12 Ma'uc no'ox taje, laj slilin ti altaretic ti laj smeltsanic ti ajvaliletic yu'un ti Judá ti oy ta xcha'cajal sna ti Acaze, xchi'uc ti altaretic ti laj smeltsan ti Manasés ta yamaq'uil xch'ulna ti Diose. Laj svoc' loq'uel, bat sjip ta uc'um Cedrón ti sjepelultaque. 13 Ti ajvalile mu xa sc'an sq'uelbe sat ti c'opojebaletic ti oy ta yeloval sloq'ueb c'ac'al yu'un ti Jerusalene, ti oy ta stuq'uil yolon ti yac'ol xocon sloq'ueb c'ac'al yu'un ti vits olivose, ti ja' meltsanbil comel yu'un ti Salomón ajvalil yu'un ti Israele. Ti june, ja' ta sventa ti Astarte j'ac'vanej ta vocol ch'ul me'il yu'unic ti sidonioetique. Ti june, ja' ta sventa ti j'ac'vanej ta vocol loc'obbail Quemos dios yu'unic ti moabitaetique. Ti june, ja' ta sventa ti j'ac'vanej ta vocol loc'obbail Milcom dios yu'unic ti amonitaetique. 14 Ja' jech xtoc laj xch'uch'ulta ta voq'uel ti ts'uiltasbil tonetique, ti ts'uiltasbil anbil te'etique. Ti yavilic ti bu oy to ox taje, laj yich' nojesel ta sbaquil animaetic. 15 Ja'uc ti altare, xchi'uc ti c'opojebal ti oy ta Betel ti laj smeltsan comel ti Jeroboam xnich'on ti Nabate, ti laj sta smul yu'un ti israeletique, laj svoc' loq'uel ti Josiase, ja' to ti c'uxi lilijem com yu'une. Laj stsanbe sc'ac'al. Laj stsanbe sc'ac'al xtoc sloc'obbail ti Aserae. 16 C'alal sut ech'el ti Josiase, laj yil ti muquinaltic ti oy ta stselej ti bu taje. Laj yal mantal ti ac'o yich' jots'el loq'uel ti baquetic ti c'u yepal oye. Laj xchic' ta altar. Jech tub ti sc'oplal yu'une. Ti va'i s'elan taje, c'ot ta pasel sc'opojel ti Dios ti laj scaj'al ta sventa ti j'alc'ope. 17 Ts'acal to un, xi laj sjaq'ue: —¿C'usi sna'obil ti le' va'anbil ta xquile? Ti viniquetic yu'un ti jteclume xi laj staq'uique: —Ma' le'e, ja' smuquinal ti j'alc'op ti lic talel ta Judá ti tal scaj'albe ti Jcuch abtel ti c'usi ta spasbe ti altar ti ta Betele. 18 Va'i un, ti Josiase xi laj yal ti mantale: —Jech comuc o, ch'an utic. Mu me buch'u sloq'uesbe ti sbaquiltaque. Ja' jech mu'yuc laj stijbeic ti sbaquiltaque, xchi'uc sbaquiltac ti j'alc'op ti liquel talel ta Samariae. 19 Ja'uc ti nail c'opojebaletic ti oy ta Samariae, ti laj smeltsanic ti ajvaliletic yu'un ti Israele, ti lic sc'ac'al yo'nton yu'unic ti Diose, laj slilin loq'uel ti Josiase. Co'ol jech laj spas jech c'u cha'al c'ot ta pasel ta Betele. 20 Ts'acal to un, laj smil ta sba altaretic scotol ti paleetic ti sbainojic ti jujun c'opojebal teye. Ti sbaquiltac ti animae, laj sbusanbe ta xchiq'uel ta sba ti altare. Ts'acal to un, sut batel ta Jerusalén. Laj spasbe sna'obil q'uin Colel ti Josiase ( 2 Cr 35.1-19 ) 21 Ti ajvalile laj yal mantal ta stojol scotol ti jteclume ti ac'o yich' spasbel sna'obil ti q'uin Colel sventa stoyel xi'el ti Ajvalil Dios yu'une, ti co'ol ta xich' pasel jech c'u cha'al ts'ibabil ta jpoc svunal yu'un ti tratee. 22 Ti c'u s'elan laj ech'icuc ti jpojvanejetic ti laj sventainic ti Israele, xchi'uc ti c'u sjalil laj ech'icuc ta ajvalilal yu'un ti Israele, yu'un ti Judae, mu'yuc bu yich' pasbel o sna'obil q'uin Colel jech c'u cha'al avie. 23 C'alal jech laj yich' pasel sna'obil q'uin Colel ta Jerusaléne, ti stoyel xi'el ti Diose, ja' o ta xvaxaclajunebal (18) jabil stic'lej ta ajvalil ti Josiase. Tsots lic sva'an sba ti Josiase 24 Ti Josiase j'ech'el laj stubbe sc'oplal ti j'ac'-chameletique, ti jt'unvanejetique, ti chabibil loc'obbailetique, ti c'usitic yan loc'obbailetique, xchi'uc scotol ti c'usitic spajebal o chopol ta xil ta sba ta sat ti Diose, xchi'uc ti c'usitic xvinaj lec ta stunesic ta pasob q'uin ta Judae xchi'uc ta Jerusalene. Ja' jech laj spas yo' jech ta xc'ot ta pasel yu'un scotol ti c'usi ts'ibabil ta jpoc svunal yu'un ti c'usi jbel albil ti laj sta ti pale Hilcías ta yut xch'ulna ti Diose. 25 Mi junuc ajvaliletic ti laj ech'uc ta ba'yel ta ts'acale ti jech laj spas jech c'u cha'al laj spas ti Josiase. Yu'un ti stuque, ta sjunul yo'nton, ta sjunul xch'ich'el, ta sjunul yip, laj snaban sba ta stojol ti Diose, jech c'u cha'al ta xal ti oy c'usi jbel albil yu'un ti Moisese. 26 Ac'o mi jech un, ilinem to ti Diose, ja' ti mu to ta x'ech' ta xa'i ti sc'ac'al yo'nton ta stojol ti Judae, ta scoj ti liquesbat sc'ac'al yo'nton yu'un ti c'usi chopol laj spas ti Manasese. 27 Jech o xal laj yal ti Diose ta xch'ac sba loq'uel ta stojol ti Judae, jech c'u cha'al laj xch'ac sba loq'uel ta stojol ti Israele, Laj yal xtoc ti ta xch'ac sba loq'uel ta stojol ti jteclum Jerusalén ti t'ujbil yu'une, xchi'uc ti ta xch'ulna ti yaloj ti ja' staobil ta na'ele. Xcham ti Josiase ( 2 Cr 35.20-27 ) 28 Sc'oplal slo'il ya'yejal ti Josiase, xchi'uc scotol ti c'usi laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae. 29 Ti jech yorail ta vo'ne taje, ti faraón Necao ajvalil yu'un ti Egiptoe, laj stam ech'el sbe ta stuq'uil uc'um Eufrates yo' jech xbat stic' sba ta scoltael ti ajvalil yu'un ti Asiriae. Jech ti ajvalil Josiase loc' batel ta xch'amel ta be. Ja' no'ox un, mile yu'un ti Nacao c'alal ile ti c'ot ta Meguidoe. 30 Ti bu taje, cajanbat ech'el sbec'tal ta carreta yu'un ti yaj'opsialtaque, ti c'ot yu'un c'alal to Jerusalén ti lic ech'el ta Meguidoe. Laj smuquic ta smucobbail. Ti jteclume laj sva'anic ti Joacaz xnich'on ti Josías ta yac'bel snup yabtel ta ajvalilal yo' jech ta xcuchbe comel yabtel ti stote. Ti Joacaze ta x'och ta ajvalilal ta Judá ( 2 Cr 36.1-4 ) 31 C'alal och ta ajvalilal ti Joacaze, yich'oj xa ox oxib xcha'vinic (23) jabil. C'ajomal no'ox uni oxib (3) u ech' ta ajvalilal ta Jerusalén. Hamutal sbi ti sme'e, yantsil nich'on ti Jeremiase, ti liquel talel ta Libnae. 32 Yu'un ti c'usitic lic spase, mu lecuc laj yil ta sba ta sat ti Diose. Mu yanuc jech laj spas jech c'u cha'al laj ech'uc ti smolmuc'totac ta vo'nee. 33 Tiq'ue ta chuquel yu'un ti faraón Necao ta jteclum Ribla ti oy ta yosilal ti Hamate yo' jech mu staojuc yav ochem o ta ajvalilal ta Jerusalene. Lic suj ta sc'anbel spatan ti jteclume. Laj yaq'uic oxmil xchi'uc vo'lajunvinic (3,300) ta kilo ti platae, xchi'uc oxlajuneb xcha'vinic (33) kilo ti oroe. 34 Ma'uc no'ox taje, ti faraón Necaoe laj stic' ta ajvalilal ti Eliaquim xnich'on ti Josiase yo' jech ta xcuchbe yabtel ti stote. Laj sjelbe sbi ti laj yac'be sbiin Joacime. Iq'ue batel ti Joacaz ta Egipto ti bu c'ot chamuque. 35 Laj yac' ech'el plata, oro ti Joacim ti sujbil yu'un ti Necaoe. Laj suj ti jnaclejetic yu'un ti jteclum ti ac'o yaq'uic ti patane. Ti jujunic laj stojic ta plata ta oro ti patan ti c'u yepal albil sc'oplal ta xaq'uique yo' jech ta xich' ti faraón Necaoe. Ta x'och ta ajvalilal ta Judá ti Joacime ( 2 Cr 35.5-8 ) 36 C'alal lic ochuc ta ajvalilal ti Joacime, yich'oj xa ox vo'ob xcha'vinic (25) jabil. Buluchib (11) jabil ech' ta ajvalilal ta Jerusalén. Zabudá sbi ti sme'e, yantsil nich'on ti Pedaias ti liquel talel ta Rumae. 37 Yu'un ti c'usitic lic spase, mu lecuc laj yil ta sba ta sat ti Diose, ti co'ol jech laj spas jech c'u cha'al laj ech'uc ti smolmuc'totac ta vo'nee. |
Biblia en Tzotzil de Chamula, Chiapas, México © Sociedad Bíblica de México, A.C. 2000
Bible Society of Mexico