2 Reyes 22 - Bible in Tzotzil de Chamula

Ti Josiase ta och ta ajvalil yu'un Judá

¹ C'alal lic ochuc ta ajvalilal ti Josiase, c'ajomal to no'ox yich'oj vaxaquib (8) jabil. Buluchib xcha'vinic (31) jabil ech' ta ajvalilal ta Jerusalén. Sbi ti sme'e, Jedidá yantsil nich'on ti Adaías ti liquel talel ta Boscate.

² Ti c'usitic laj spas ti Josiase, lec laj yil ta sba ta sat ti Diose, yu'un ja' jech laj stam ech'el ta spasel scotol jech c'u cha'al laj spas ti Davide, ti ja' smolmuc'tot ta vo'nee. Mi ja'uc jutebuc laj syanijes ti c'u s'elan stamoj ech'ele.

Laj staic jpoc svunal ti oy c'usi jbel tsots albile

³ Ti c'alal xvaxaclajunebal (18) xa ox jabil stic'lej ta ajvalilal ti Josiase, laj stac ech'el ta xch'ulna Dios ti Safán xnich'on Azalías smom ti Mesulame, ti buch'u sbainoj yu'un ta yalel ti c'usitic ta xc'ot ta pasele. Ti Safane xi laj yale:

⁴ —Batan ta stojol ti banquilal pale Hilciase. Albo ya'i ti ac'o stsob ti taq'uin ti laj yich' aq'uel ta xch'ulna ti Diose, xchi'uc ti c'u yepal laj staic ta tsobel staq'uin ti jteclum ti jchabiej-ti'naetique.

⁵ Ac'o yac'beic ta sc'ob ti buch'utic sbainojic ti abteletic ta xch'ulna ti Diose yo' jech ta stojic ti j'abteletic ti yacalic ta sjeltael ti c'usitic soquem yu'un ti ch'ulnae.

⁶ Ti xcaltique, ja' ti jch'ul-te'etique, ti buch'u sbainojic ta yaq'uel iluc ti abtele, ti albanyiletique, xchi'uc ti buch'utic sbainojic ta smanel ti te'etique xchi'uc ti anbiquil ton sventa ta smeltsanic o ti ch'ulnae.

⁷ Albo ya'iic xtoc ti mu stic' sbaic ta sjaq'uilanel ti bu ta xlaj tunuc yu'unic taq'uin ti buch'u ta xac'beique, yu'un yich'oj sbijilic ta stunesel.

⁸ Ti banquilal pale Hilciase laj yalbe ya'i ti Safán ti buch'u sbainoj ta yalel ti c'usitic ta xc'ot ta pasele, ti laj sta ta xch'ulna Dios jpoc svunal ti oy c'usi jbel tsots albile. Ti jpoc vune, laj yac' ta c'abal ti laj yavta ti Safane.

⁹ Ts'acal to un, ti Safane xi bat xcholbe ya'i ajvalil ti va'i s'elan taje: —Ti avajtuneltaque, Jcuch abtel, laj xa yunijesic ti plata ti c'u yepal laj staic ta ch'ulnae. Laj yac'beic ta yoc ta sc'ob ti buch'utic sbainojic ta xq'uextael ti c'usitic soquem yu'un xch'ulna ti Diose.

¹⁰ Ja' jech xtoc ti Safane laj yalbe ya'i ajvalil ti ac'bat jpoc vun yu'un ti pale Hilciase. Laj yavtabe ya'i ti ajvalile.

¹¹ C'alal laj ya'i ti ajvalil ti c'usi ta xal ta jpoc svunal ti jbel c'usi tsots albile, lic xch'i' ta jatel ti sc'u'e.

¹² Va'i un, xi laj yalbe mantal ti Hilciase, ti Ahicam xnich'on ti Safane, ti Acbor xnich'on ti Micaiase, ti Safán ti sbainoj ta yalel ti c'usi ta xc'ot ta pasele, xchi'uc ti Asaías ti yaj'opisial stuc ti ajvalile:

¹³ —Ti c'usitic ta xal ti jpoc vun laj yich' tael taje, batanic, ba jaq'uic ca'itic c'u s'elan jc'oplal ta stojol ti Diose, sc'oplal ti jteclume, xchi'uc sc'oplal scotol ti Judae. Xu' nan ti capem xa sjol ti Dios ta jtojoltique. Yu'un ti jmolmuc'totic ta vo'ne, mu'yuc laj sts'etan lec xchiquinic ta ya'yiel ti c'usi ta xal ti jpoc svunale. Mi ja'uc jutebuc laj xch'unic ta spasel ti c'usi ts'ibabil teye.

¹⁴ Ti Hilciase, ti Ahicame, ti Acbore, ti Safane, xchi'uc ti Asaiase, batic ta stojol ti me' j'alc'op Hulda sbie, yajnil ti Salum xnich'on ti Ticvae, smom ti Harhase ti sbainoj ta sq'uelel ti q'uejob c'u'il ti ta ch'ulnae. Ti Hulda taje nacal ta Xchibal Barrio yu'un ti Jerusalene. C'alal bat sc'oponique,

¹⁵ xi tac'batic yu'une: —Xi stac'obil yu'un ti Ajvalile, Dios yu'un ti Israele: ‘Albeic ya'i ti buch'u stacojoxuc talel ta sjaq'uel sbae,

¹⁶ xichi ta xcal ti vu'un Diosune: Ta xcac' taluc tsots vocol ti li' ta jteclume, ti ta scotol ti jnaclejetic yu'une. Yu'un mu stselbuj jutebuc scotol ti c'u s'elan laj yich' alel ti ts'ibabil ta jpoc svunal ti laj yavta ti ajvalil yu'un ti Judae.

¹⁷ Yu'un laj svalopatinicun comel. Laj xchic'beic pom ti c'usiuc no'ox loc'tabil diosetique. Ja' jech laj sliquesbeicun ti sti'emal jol yu'un scotol ti c'usitic yac'ojbeic yipal ta spasele. Jech o xal ta jcontrain. Mu xa ts'icbaj ta xca'i ti sc'ac'al co'ntone. Mi ja'uc ta xch'ay ta be.

¹⁸ Albeic ya'i un cha'e ti ajvalil yu'un Judá ti laj stacoxuc talel ta sjaq'uel sba ta stojol ti Diose, ti Ajvalil Dios yu'un ti Israele, xi ta xal xtoque: Ti jech laj ats'etan ani' achiquin ta ya'yiel ti c'usitic laj ava'ie,

¹⁹ ti jech abol aba laj ava'ie, ti laj anijan aba ta ya'yiel ti c'u s'elan xcholet sc'oplal laj calbe ti jteclume, ti jnaclejetic yu'une, ti ta jbel sc'oplal mu'yuc c'usi x'ayan ta xcome xchi'uc ti bac svocolique. Ti jech laj ach'i' ta jatel ti ac'u'e, ti la'oc' yu'un ta jba ta jsate, jech ti vu'un eque, laj ca'i ti ac'ope. Jech ta xcal ava'i ti vu'un Diosune.

²⁰ Ta xcac' que ti mu'yuc ta xavil xi'el xacham xalaje, ti jech xbat atsob abaic xchi'uc ti anima amolmuc'totac ta vo'nee. Mu ja'uc xa ta xavil ta aba ta asat ti ta xc'ot ta pasel ti ta jtsutses ti jteclum li'e.’ Ti yajtacbolaltac ti ajvalile sutic batel ta yalel ti va'i s'elan tac'batique.