2 Reyes 21 - Bible in Tzotzil de Chamula

Ta x'och ta ajvalilal yu'un Judá ti Manasese

¹ Naca to no'ox yich'oj lajcheb (12) jabil ti c'alal och ta ajvalilal yu'un Judá ti Manasese, ti vo'lajuneb yoxvinic (55) jabil ech' ta ajvalilal yu'un ti Jerusalene. Hepsiba sbi ti sme'e.

² Ja'uc ti c'usitic lic spas une, mu lecuc laj yil ta sba ta sat ti Diose, ti xi s'elan lic xchan ta spasel ti c'usitic ilo sba ta spasic ti jteclumetic ti laj yilic ta sba ta satic ti israeletic ti jipatic loq'uel yu'un ti Diose:

³ Lic xcha'va'anan jujun c'opojebaletic ti laj slilinan ti Ezequías ti ja' stote. Lic xcha'meltsanan yaltar ti Baale. Lic xcha'meltsanan sloc'obbail ti Aserae jech c'u cha'al laj spas ti Acab ajvalil yu'un ti Israele. Lic snijan xchiman sba ta yich'el ta muc ta sbic'tajesel sba ta stojol ti c'usitic xnoblajet ta vinajele.

⁴ Laj smeltsan yan altaretic ta xch'ulna ti Diose, ti c'alal laj ono'ox yal stuc ti Diose ti ja' staobil ta na'el stuc ta Jerusalene.

⁵ Ti ta xchibal yamaq'uil xch'ulna ti Diose, laj sva'anan yan altaretic ti c'ot ta xchic'obil matanal yu'un scotol ti c'usitic xnoblajan xojobal ta vinajele.

⁶ Ma'uc no'ox taje, laj yac' ta chiq'uel ta sventa matanal ti xnich'nabe. Lic xchanbe sc'oplal sti'inel sc'oponel ti pucuje, xchi'uc sc'oplal ti jt'unvaneje. Laj yac' ye ti licuc ti bainom satinometique, ti j'ac'-chameletique. Toj ech'em chopol laj yil ta sba ta sat Dios ti c'usitic chopol laj spase. C'ot ta pasel ti ilin ta j'ech'el ti Diose.

⁷ Jech xtoc lic sva'anan sloc'obbail Asera ta xch'ulna ti Diose, c'alal xi ono'ox albilic yu'un Dios ti Davide xchi'uc ti Salomón ti ja' xnich'one: “Ti ch'ulna ti laj yich' va'anel li' ta Jerusalene, ti laj jt'uj jun ta scotol snitilultac ti Israele, ja' jna'obil quich'obil ta muc' sbatel osil.

⁸ Ti bu laj cac'beic yosilic ti smolmuc'totique, mi ja'uc xa ta jtenic loq'uel ti israeletique, yavil mi ta xch'unic, ta spasic ti c'u s'elan caloj ti jmantale, xchi'uc scotol ti chanubtasel ti laj cac'be yil ti cajtunel Moisese.”

⁹ Ja'uc le' une, mu'yuc laj xch'unic ta spasel. C'ajomal no'ox x'ech' to xjelav ac'bat yilic ta spasel chopol yu'un Manasés ti ja' mu sta ti jnaclejetic ti laj yilic ta sba ta sat ti israeletic ti tsutsesatic yu'un ti Diose.

¹⁰ Yu'un xi ono'ox c'opoj ti Dios ti laj yal ti c'alal c'opoj ta sventa ti yajtuneltac ja' ti yaj'alc'optaque:

¹¹ “Ti jech mu no'ox albajuc stac' albel sc'oplal c'usitic chopol laj spasilan ti Manasese, ti xjelav to chopolal laj spas ti ja' mu sta laj spasic ti amorreoetic ti c'alal ch'abalic to ox ti laj sta smul yu'un ti Judá ta scoj ti loc'obbailetique,

¹² va'i un, ti Ajvalilune, Diosun yu'un Israele, xichi ta xcal ta jamale: Mu no'ox albajuc ta xcac'be yich' svocol ti israeletique, xchi'uc ti Judae, ti mu no'ox albajuc ta xc'uxub sjol sbaquil yu'un ti buch'u ta xa'ie.

¹³ Ti c'u s'elan laj cac'be svocol ti Samariae, svocol snitilultac ti Acabe, ja' jech ta xcac'be yich' ti Jerusalene. Ta jmes ta stsutsesel ti sts'ijlajan ta xcome jech c'u cha'al junuc sets' ta xich' nujanel c'alal mi laj yich' suq'uele.

¹⁴ Ti c'u to yepal ta xcom ti calab jnich'nabe, ta jtenic comel. Ta xcac' ech'el ta yoc ta sc'ob ti yajcontraique, ti elc'anbaticuc pojbaticuc ech'el yu'unic ti c'usi oy x'ayan yu'unique.

¹⁵ Yu'un ti c'usitic laj spasique, mu lecuc laj quil ta jba ta jsat. Staoj yav sa'sunic ta jtojol ti c'alal loq'uic talel ta Egipto ti smolmuc'totique, ti jech yacal to ta spasic avi tana li'e.”

¹⁶ Ta scoj ti chopol ono'ox ti Manasese laj sta smul yu'un ti Judae, mu lecuc laj yil ta sba ta sat Dios ti yabtele. Ma'uc no'ox taje, laj to yac'be ech'el xchi'il un, laj yac'anan ta milel ta Jerusalén ti buch'u mu'yuc smulique, ti buyuc no'ox malem ti ch'ich' ta jujujot yu'une.

¹⁷ Ti sc'oplal slo'il ya'yejal ti Manasese, xchi'uc scotol ti c'usitic laj spase, xchi'uc ti smul laj spase, ts'ibabil com ta jpoc svunal slo'il ya'yejal yabtel ajvaliletic yu'un ti Judae.

¹⁸ C'alal chame, laj smuquic ta yavil ts'unbil nichimetic ta snae, ta yavil sts'unobil nichim yu'un ti Uzae. Ta ts'acal to un, och ta ajvalil ti Amón ti ja' xnich'one.

Ti Amone ta x'och ta ajvalilal yu'un ti Judae

¹⁹ Ti Amone yich'oj xa ox chib cha'vinic (22) jabil ti c'alal och ta ajvalile. C'ajomal chib (2) jabil och ta ajvalilal yu'un ti jteclum Jerusalene. Mesulémet sbi ti sme'e, yantsil nich'on ti Harús ti liquel talel ta Jotbae.

²⁰ Yu'un ti c'usitic laj spase, chopol laj yil ta sba ta sat ti Diose. Jech laj spas jech c'u cha'al laj spas ti Manasés ti ja' stote.

²¹ Yu'un laj stam ech'el sbelel ta spasel ti c'usi chopole. Lic snijan xchiman sba ta yich'el ta muc' ti loc'obbailetic jech c'u cha'al laj spas ti Manasés ti ja' stote.

²² Ja' jech c'ot ta pasel ti laj sten comel ta svalopat ti Ajvalile, Dios yu'un ti smolmuc'totaque. Mu'yuc xc'ot ta pasel yu'un ti c'u s'elan ta sc'ane.

²³ Yaj'opisialtac ti Amone lic spay sc'opic ta mucul yo' jech ta scontrainic ti Amone. Laj smilic ta sna ti c'otem ta chapanobbaile.

²⁴ Ja'uc le' une, ti jnaclejetic ta jteclume laj smilic ec ti buch'utic laj spay sc'opic ta scontrainel ti ajvalil Amone. Och ta ajvalilal yu'unic ti Josías ti ja' xnich'one.

²⁵ Ti sc'oplal slo'il ya'yejal ti Amone, xchi'uc ti c'usi laj spase, ts'ibabil com ta jpoc svunal slo'il ya'yejal yabtel ajvaliletic yu'un ti Judae.

²⁶ Laj smuquic ta smucobbail ta yavil ts'unubal nichim yu'un ti Uzae. Laj taj une, och ta ajvalil ti Josías ti ja' xnich'one.