2 Reyes 2 - Bible in Tzotzil de Chamula

Ti Eliase ta x'ic'at batel ta vinajel

¹ C'ot ta pasel un, tal tsots sutub ic' c'alal ti Dios ta xic' muyel ta vinajel ti Eliase. Ti Elías une xchi'uc ti Eliseoe, loq'uic ech'el ta Gilgal.

² Ti Eliase xi laj yalbe ti Eliseoe: —Coman li'e, yu'un ti Diose ta xistacun batel ta Betel. Ja'uc le' une, xi tac'bat yu'un ti Eliseoe: —Mu xaquictaot comel atuc unbi, ja' rextico cu'un ti Diose xchi'uc ti vo'ote. Va'i un, jmoj batic xchibalic c'alal to ta Betel.

³ Ja'uc ti j'alc'opetic ti nacalic ta Betele, tal snupic ta be ti Eliseoe, ti xi laj yalbe ya'ie: —¿Mi xana' xa, ti avajchanubtasvaneje ta xic'bot batel ti Diose? —Jna' xa —xi laj stac' ti Eliseoe—. Ja'uc le' un, ts'ijlanic no'ox me. Mu me c'usi xavalic.

⁴ Laj taj une, ti Eliase xi laj yalbe ya'i ti Eliseoe: —Coman li'e, yu'un ti Diose ta xistacun batel ta Jericó. Ti Eliseoe xi laj staq'ue: —Mu xaquictaot comel atuc unbi, ja' rextico cu'un ti Diose xchi'uc ti vo'ote. Va'i un, jmoj batic xchibalic ta Jericó.

⁵ Ja'uc ti j'alc'opetic ti nacalic ta Jericoe, loq'uic batel ta snupel ta be ti Eliseoe, ti xi laj yalbeique: —¿Mi xana' xa ti avajchanubtasvaneje, ta xic'bot batel ti Diose? —Jna' xa —xi laj stac' ti Eliseoe—. Ja'uc le' un, ts'ijlanic no'ox me. Mu me c'usi xavalic un.

⁶ Ts'acal to un, xi laj yal ti Eliase: —Coman li'e, yu'un ti Diose ta xistacun batel ta Jordán. Ja'uc ti Eliseoe xi laj staq'ue: —Jamal xcal ta stojol ti Diose. ta atojol ec. ti mu xaquictaot comele. Va'i un, jmoj batic xchibalic.

⁷ Ja'uc le' une, c'ot lajuneb yoxvinic (50) ta vo' j'alc'opetic ti xi snatil sq'ueloj sbaic xchi'uc ti Eliase, ti Eliseoe, ti va'ajtic c'otic ta ti' uc'um Jordán ti stuquique.

⁸ Va'i un, ti Eliase laj svol ti smacob sic c'u'e. Laj smaj o ti uc'um xchi'uque. Lic xch'acan sba ta jujujot ti uc'um yu'une, ti taquin ech' xtuch'ic jelavel ti uc'um xchibalique.

⁹ C'alal laj xa xtuch'ic jelavel ti uc'ume, ti Eliase xi laj yalbe ya'i ti Eliseoe: —Albun ca'i, ¿mi oy c'usi stac' ta jpas ta atojol ti c'alal mu to jch'ac jbatique? Ti Eliseoe xi laj staq'ue: —Ta jc'an ti x'ech'uc to o'lol ta xavac'bun comel ti abijil ti ac'bilote.

¹⁰ —Mu no'ox jutuc ma' ti c'usi ta xac'ane —xi laj stac' ti Eliase—. Mi laj to ataun ta q'uelel ti c'alal ta xich'aque batel ta atojole, ta x'aq'ue avich' unbi. Yan ti mi mu'yuque, mu'yuc c'usi ta xavich' unbi.

¹¹ C'alal yacalic ta xanvil ta xlo'ilajic batele, ta jech to yepal, vul ta loq'uel jcot carreta ti volibil ta c'oq'ue, xchi'uc ca' ti volibil ta c'oc' xtoque. Ch'acatic batel yu'un. Ti Elías une, ic'at muyel ta vinajel ta jun tsots sutub ic'.

¹² C'alal jech laj yil ti Eliseoe, xi avane: “¡Tot un cha'e, tot un cha'e, ti c'otemot ta banquilal jtsalvanej soldado yu'un ti Israele!” Ts'acal to un, ch'ay batel ta sat ti Eliase. Ti Eliseoe lic xch'i' ta jatel ti sc'u'e.

Ti Eliseoe ta x'och ta xq'uexol ti Eliase

¹³ Laj taj une, lic stsacbe sc'u' ti Elías ti baj comel yu'une. Sut batel ta uc'um Jordán. C'ot sva'an sba ta sti'il.

¹⁴ Ta jech yepal un, lic smaj ta ba vo' ti c'u'ile, ti xi avane: “¿Bu oy ti Ajvalile, Dios yu'un ti Eliase?” Naca to no'ox ta xlic smaj ti vo' xchi'uque, ti uc'ume lic xch'acan sba ech'el ta jujujot. Jech ti Eliseoe jelav batel ta uc'um.

¹⁵ Ti yan j'alc'opetic ti liquelic talel ta Jericó ti nopol va'alique, xi laj yalique: “¡Ti c'usi xu' yu'un ti Elías to oxe, ja' xa yich'oj ti Eliseo tana li'e!” Va'i un, bat snupic ta be. Laj squejan sbaic ta stojol,

¹⁶ ti xi laj yalbeic ya'ie: —A'yio ava'i, ti avajtuneltac li'e, oyuncutic lajuneb yoxvinic (50) ta vo' ti oy yip co'ntoncutique. Ac'o ave ati' ta sa'el talel ti avajchanubtasvaneje. Spas me ma' ti xcuxlejal Diose ti naca no'ox laj xchech batele, ti laj sten comel ta pimilal te'tic mi ta junuc stenlejaltique. Ja'uc ti stuque xi laj yale: —Mo'oj, mu'yuc buch'u xataquic batel mi junuc.

¹⁷ Manchuc mi jech un, xvulajetic no'ox liquel. Jech o xal laj yac' ye ti ac'o staquicuc batel ti lajuneb yoxvinic (50) ta vo' ti jsa'vaneje. Laj yich'ic oxib c'ac'al ti laj xchajic ta sa'el ti Eliase. Mi ja'uc oy bu laj staic.

¹⁸ Va'i un, sutic ech'el ta Jericó ti bu comem ti Eliseoe, ti xi albatic yu'une: —Laj ono'ox calboxuc ava'iic ti mu xabatique.

Ti Eliseoe ta sme'ts'ultas ti sat vo' ti oy ta Jericoe

¹⁹ Ti jnaclejetic ta lume xi laj yalbeic ti Eliseoe: —A'yio ava'i, ti bu staoj yavil ti jteclume, toj jun yutsil ta q'uelel jech c'u cha'al ta xavile. Ja'uc ti vo' une mu xtun. Jech xtoc ti banomile mu'yuc c'usi xch'i yu'un.

²⁰ —Ich'beicun talel junuc ach' lech-lech taq'uin, xchi'uc ats'am —xi laj stac' ti Eliseoe. C'alal laj yich'beic batel ti lech-lech taq'uine,

²¹ ti Eliseoe bat ta sat vo', ti xi laj yal ti c'alal laj sjip ochel ti ats'ame: —Xi ta xal ti Diose: ‘Laj xa jlecubtas ti vo' li'e. Ta j'ech'el xc'ot ta pasel ti mu ja'uc xa ta xchamesvane. Mi ja'uc xa ta soques ti banomile.’

²² C'ot ta pasel ti j'ech'el lec com ti vo' jech c'u cha'al laj yal ti Eliseoe.

²³ Ts'acal to un, loc' batel ti Eliseo ta Betele. C'alal yacal xa ta xmuy batel ta bee, loc' talel jvoc' queremetic ti liquelic ech'el ta jteclume, ti xvulajetic liquel ta labanvaneje. Yu'un xi x'avlajetique: “¡Muyan ech'el un, t'ax-jol mol! ¡Muyan ech'el un, t'ax-jol mol!”

²⁴ Ti Eliseoe joybij batel ta stuq'uil ti bu oyique. Laj sq'uel lec ech'el. Lic sti'ol-c'opta ta sventa ti Diose. Ta jech no'ox yepal, loc' talel cha'cot oso ta te'tic. Balatic ta ti'el ti chib yoxvinic (42) ta vo'e.

²⁵ Ti Eliseo une bat ta vits Carmelo ta ts'acal to un. Ti bu taje, sut ech'el ta Samaria.