2 Reyes 19 - Bible in Tzotzil de Chamula

Ti Judae mu'yuc stsutsesat yu'un ti Senaqueribe

¹ C'alal laj ya'i ti ajvalil Ezequías ti va'i s'elan taje, laj xch'i' ta jatel ti sc'u'e. Jatantic xa ti c'u'il laj slapic ech'el svinajeb ti mu x'ech' xjelav ta xa'i ti svocole. Bat ta xch'ulna ti Diose.

² Laj stac ech'el ta stojol Isaías ti Eliaquim ti yich'oj ta sventa ti chapanobbaile, ti Sebna ti sbainoj ta sts'ibael ti c'usitic ta xc'ot ta pasele, xchi'uc ti paleetic ti bu vulem xa lec xch'ulique. Jatantic xa laj slapic ech'el ti sc'u'ic svinajeb ti mu x'ech' xjelav ta xa'iic ti svocolique. Bat sc'oponic ti j'alc'op Isaías xnich'on ti Amose.

³ Xi ta xbat yalbeic ya'i ti tacbilic batel yu'un ti ajvalile: “Tana li'e, mu cha'bel, oyotic ta vocol, ta tojob mulil, ta q'uexlal ti nijilotic co'ol s'elan jech c'u cha'al junuc ants ti ch'abal xa yipal ta xcom yu'un ti alajele.

⁴ Oc la ta alel ti lajuc ya'i ti Ajvalil Dios avu'un ti c'usi loc' ta ye ti j'opisial ti tacbil talel yu'un ti ajvalil Asiria ti ja' yajvale, ti tal stsac ta c'op ti cuxul Diose, ti tsitseuc la yu'un stuc ti Ajvalil ti ja' Dios avu'une, ti laj van ya'ie. Vocoletan ta c'opojel ta ti'inel yu'un ti c'u to yepal cuxul ta xcome.”

⁵ Ti jtuneletic yu'un ti ajvalil Ezequiase bat sc'oponic ti Isaiase.

⁶ Ti Isaiase xi laj sc'ubanbe ti ac'o yalbeic ya'i ti yajvalic jech c'u cha'al li'e: “Ti Diose xi ta xale: ‘Mu xaxi' yu'un ti va'i s'elan chopol loc' ta yeic ta jtojol yajtuneltac ti ajvalil Asiriae.

⁷ Q'uelo avil lec, ta xvul ta loq'uel cu'un ta stojol lo'il a'yej ti tsots sc'oplal ta sut batel ta slumal yu'une, ti bu ta xc'ot ta lajel cu'une.’ ”

⁸ Ti asirio j'opisiale laj ya'i ti loc' batel ta lum Laquis ti ajvalil yu'un Asiriae. Va'i un, ti j'opisiale loc' batel ta Jerusalén, ti xc'anobaj xa leto yu'un c'ot sta ta Libna ti ajvalil yu'un ti Asiriae.

⁹ Ti bu taje, laj ya'i ti ajvalil yu'un Asiriae, ti ta xa svol xa yajsoldadotac ti Tirhaca ajvalil yu'un ti Etiopiae yo' jech ta xich' contrainel yu'une. Yan to velta, ti ajvalil yu'un ti Asiriae laj no'ox stac ech'el yajtuneltac ta stojol ti Ezequías ajvalil yu'un ti Judae,

¹⁰ ti xi laj stac' ta alele: “Ti Dios ti stsacoj lec yip avo'nton ta stojole, ti ta xalbot ti mu x'och ta coc ta jc'ob ti Jerusalene, c'ajomal no'ox ta xalaj ta lo'lael yu'un.

¹¹ Yu'un ava'binoj lec ti c'usi laj spasic ti ajvaliletic yu'un ti Asiria ta stojol scotol ti lumetic ti bu ta sc'an ta stubbeic ti sc'oplale. ¿Mi yu'un ta la xaspoj ti avaloj ec une?

¹² ¿Mi yu'un oy bu c'ot ta pasel ti diosetic ti cuch yu'un ta spojel ti lumetic ti xi s'elan laj slilin ti jmolmuc'totac ta vo'ne, jech c'u cha'al ti Gozane, ti Harane, ti Résefe, xchi'uc ti jnaclejetic ta Bet-edén ti oyic ta Telasare?

¹³ ¿Mi cuxulic to xana' ti ajvaliletic yu'un ti Hamate, ti Arfade, ti Sefarvaime, ti Henae, xchi'uc ti Ivae?”

¹⁴ Ti Ezequiase laj stsac laj yavta ti ts'ibabil vun ti ac'bat yu'un ti jtuneletique. Ta jech yepal un, bat ta ch'ulna. Lic xlich'an ta stojol Dios ti ts'ibabil vune,

¹⁵ ti xi lic c'opojuc ti'inuc ta stojol ti Diose: “Ajvalil, Dios yu'un ti Israele, ti xi s'elan chotolot ta xapas mantal ti bu va'alic ti c'usi oy xiq'uique: Vo'ot no'ox Diosot jpas-mantalot yu'un ti jpas-mantaletic ta sjoylej ti banomile. Avabtelanoj ta smeltsanel ti vinajele, ti banomile.

¹⁶ Ts'etano ani' achiquin, Ch'ul Dios. A'yio ti sc'op chapbile. Tuc'ulan avil lec. A'yio ava'i ti c'usi ta xal ta vulvunel ta stsaquel ta c'op Cuxul Dios ti Senaquerib laj stacbun talele.

¹⁷ Jech xal ya'uc unbi, Dios, ti ajvaliletic yu'un Asiriae cuch yu'unic ta stsutsesel ti muc'tiquil lumetic ta yu'ninbel ti yosilalique.

¹⁸ Laj xchiq'uic ti loc'obbailetic yu'unique, ti c'alal ma'uc diosetic ta melele. C'ajomal no'ox meltsanbilic ta te'e, mi mo'oje ta ton, ti laj yabtelanic ti viniquetique. Jech o xal mu vocoluc laj slilinic.

¹⁹ Lec un cha'e, Ajvalil, ti Diosot cu'uncutique, pojuncutic ta yoc ta sc'obic yo' jech ta sna'ic scotol ti muc'tiquil lumetic ti oy ta sbejel banomile, ti vo'ot Ajvalilote, ti atuc no'ox Diosote.”

²⁰ Va'i un, ti Isaiase xi laj stac ech'el ta yalbel ya'i ti Ezequiase: “Xi ta xal ti Ajvalil Dios yu'un ti Israele: ‘Laj xa ca'i ma' ti ac'op ti laj ataun ta c'oponel ta scoj ti Senaquerib ajvalil yu'un ti Asiriae.’ ”

²¹ Xi s'elan ma' ti sc'oplal ti ajvalil yu'un Asiria ti albat yu'un ti Diose: “Senaquerib, ti jteclum Sione, co'ol s'elan jun tseb ti sts'e'in xa ta atojolale. Ti Jerusalene sjimolan xa sjol ta labanvanej ti c'alal ta xatam batel abee.

²² ¿Buch'u la laj atsac ta c'op ti avaloj une, ti laj ati'ol-c'optae? ¿Buch'u la ti laj atoy ave ta stojole, ti xnelet no'ox asat laj apasbee? Ja' la ti Ch'ul Dios yu'un ti Israel une.

²³ Ja' laj atsac ta c'op ti Dios ta sventa ti j'al-mantal j'ich'-c'opetic avu'une. Xachi laj avale: “Ti ta toyol vitsetique, xic'uletcutic no'ox muyel xchi'uc ti epal carretaetic cu'un ta sventa ti ac'ob-letoe, ti lic'ot ta stselej yu'un ti Libanoe. Ti natiquil ch'ut te'e, ti c'upil sba tojetic yu'une, laj jq'ui ta lomesel. Lic'ot ti bu xa c'alal spajeb stoyolal ti vitsetic yu'une, ti ta te'tic yu'un ti co'ol s'elan ts'unubil nichim yilele.

²⁴ Laj jots' joq'uetic ma' ta yan jteclumetique; laj cuch'be ya'lel ma' ti joq'uetic taje. Taquij cu'un scotol ti yuc'umal Egipto ti c'alaluc lixanav batele.’

²⁵ ¿Mi ja'uc laj ana', ti vu'un Diosun laj jchapan scotol ti jech c'ot ta pasel taje? Ti c'usitic c'ot ta pasel cu'un avi tana le'e, vo'ne xa ono'ox jchapanoj talel. Jech o xal ta xalilin ti pojobbail jteclumetique, ti busul ta xames ti xvoch'emale.

²⁶ Ti jnaclejetic yu'une, ti mu xa c'usi xut sbaique, ti batem xa xch'ulelic ta xi'ele, ti nijilic chimilic xa ta xq'uexlale, co'ol s'elan c'otic jech c'u cha'al momoletic ta osiltique, co'ol s'elan yaxal ti yaxju'ane, co'ol s'elan tsib ta xch'i ta xtexail ti nae, ti ta xchiq'ue ta taquijesel yu'un ti ic' ti ta xlic talel ta sloq'ueb c'ac'ale.

²⁷ Jna' lec ti bu yalel muyelote, xcojtiquin lec scotol ti avabtele; jna' lec ti capem ajol ta jtojole.

²⁸ Xcojtiquin lec ma' ti apucujile, ti ech'em xava'i abae, jech o xal ta jxojbot ava'i xot-xot taq'uin ta ani', ta jtic'bot ava'iic spajesojbil ta avee, ta xasut ech'el cu'un ta be ti bu lalic talele.”

²⁹ Ti Isaiase xi laj yalbe ech'el ya'i ti Ezequiase: “Xi s'elan ma' ti svinajebtac ta xc'ot ta pasele: ti jabil li'e, xchi'uc ta xtale, ta xatun ta xalajesic ti trigo ti ta xvoc' stuque. Ta yoxibal xa jabil une, ta xats'unubajic liquel, ta xatsobbe ti sate, ta xlic ats'unic ti a'uvaique, ti ta xalo'beic ti sate.

³⁰ Ti c'u yepal mu'yuc xlajic snitilultac ti Judae, xi s'elan ta xc'ot ta pasele: co'ol s'elan jtec' te' ta sts'un ech'el ti yi'bele, ti ta xac' lec ti sate.

³¹ Yu'un oy jvoc' scomelal ta xcom ta Jerusalén. Ti ta vits yu'un Sione, oy to buch'u cuxul ta xcom. Ti jech ta xc'ot ta pasel taje, ja' ta sventa ti mu albajuc syail xc'uxul yo'nton ti Dios ti scotol xu' yu'une.

³² “Xi ta x'albat yu'un Dios sc'oplal ti ajvalil yu'un Asiriae: ‘Mi ja'uc ta x'och talel ma' ta jteclum Jerusalén une. Mi junuc sni' yuni yolob ta sten talel ta stojol, mi ja'uc ta svol stsaquel ta c'op xchi'uc ti macobbaile, mi ja'uc ta sbujanic lum ta sjoyobal ti jteclume.

³³ Ta sut ech'el ta be ti stamoj talel ti c'alal tale, mi ja'uc ta x'och talel ma' ta jteclum li'e. Ti vu'un Diosune, mu me lo'iluc no'ox ta xcal.

³⁴ Vu'un ta jchabi ti jteclum li'e; ta jtic' jba ta spojel ta sventa ti mu tenbaj ta xca'i ti cajtunel Davide, ti mu tenbaj ta xca'i jba ti jtuque.’ ”

³⁵ Ta yac'ubalil taj une, bat ti yaj'ánjel Dios ti laj smil vo'ob slajunvinic ta mil (185,000) viniquetic ti bu vololic ta lamlej ti asirioetique, ti chamem sacub scotolic ta yoc'omale.

³⁶ Va'i un, ti Senaquerib ajvalil yu'un ti Asiriae, loc' batel ti bu lamalique, sutic batel ta Ninive.

³⁷ Oy jun c'ac'al, ti c'alal yacal xc'opoj xti'in ta stojol ti Nisroc ti ja' sdiostac ti ta ch'ulnae, ti Adrameleque xchi'uc ti Sarézer, ti ja' xnich'nabtaque, batic ec ti laj smilic ti stotique. Jatavic ech'el ta yosilal Ararat. Ts'acal to un, och ta cuch abtelal ti Esarhadón ti ja' xnich'one.