2 Reyes 17 - Bible in Tzotzil de Chamula

Tsalbil c'otic ti jteclum Samariae, xchi'uc beq'ueic loq'uel ta yosilic ti israeletique

¹ Ti ta slajchebal (12) jabil yochel ta ajvalilal ti Acaz ajvalil yu'un ti Judae, ja' o lic ochuc ta ajvalilal yu'un Israel ti Oseas xnich'on ti Elae. C'ajomal no'ox baluneb (9) jabil ech' ta ajvalilal yu'un ti Samariae.

² Ti c'usi lic spase, mu lecuc laj yil ta sba ta sat ti Diose, ac'o mi mu sta jech c'u cha'al laj spas ti yan ajvaliletic ti laj ech'uc ta ba'yel ta Israele.

³ Ti Salmanasar ajvalil yu'un ti Asiriae, lic stsac ta leto ti Osease. Taje, och ta jtunel, ti laj stoj patan jujun jabile.

⁴ Ja' no'ox un, ti Salmanasare laj ya'i ti ta mucul xchapbat sc'oplal ti ta xcontrainat yu'un ti Osease, ti stacoj xa batel jun chib viniquetic ta stojol ti So ajvalil yu'un ti Egiptoe. Laj ya'i xtoc ti mu'yuc xa ta stoj ti patan yu'un ti jujun jabile. Laj yal mantal ti Salmanasare, ti ac'o yich' sa'el yo' ta xich' tiq'uel ta chuquel ti Osease.

⁵ Ts'acal to un, laj smes ta beq'uel sjunul ti jteclume. Bat stsac ta leto ti jteclum Samariae. Oxib jabil jalij ti ac'-leto yu'une.

⁶ Slajebal xa un, ti c'alal sbalunebal xa ox (9) jabil yochel ta ajvalilal ti Osease, ja' o laj yu'nin Samaria ti ajvalil yu'un ti Siriae. Laj sbec' batel ta chuquel israeletic c'alal to Asiria, ti c'ot yac' nacluc ta Halah ti oy ta yosilal Habore ta sts'el uc'um Gozán xchi'uc ta jteclumetic yu'un ti medoetique.

⁷ Jech c'ot ta pasel taje, yu'un ti Israeletique laj sta smulic ta stojol ti Ajvalil Dios yu'unic ti ja' loq'uesatic talel ta Egiptoe, xchi'uc ti pojatic ti ilbajinbilic yu'un ti faraón ajvalil yu'un ti Egiptoe, ti lic xcha'tsaquic yich'el ta muc' ti meltsanbil diosetique.

⁸ Yu'un ja' laj yac'beic yipal ta spasel jech c'u cha'al laj spasic ti yan lumetic ti laj yilic ta sba ta satic ti jipatic loq'uel yu'un ti Diose. Mu yanuc jech laj spasic jech c'u cha'al sliquesojic comel ti ajvaliletic yu'un ti Israele.

⁹ Ma'uc no'ox taje, ti israeletique mu'yuc stuq'uil ti c'usitic ta xloc' ta yeic ta scontrainel ti Ajvalil Dios yu'unique, xchi'uc laj sva'anic c'opojebaletic ta scotol ti jteclumetic yu'unique. Jech laj spasic xtoc ta toyol luchlebal q'uelob osil ti oy ta pojobbail jteclumetique.

¹⁰ Ti ta jujun stseleje, ti ta yolon limajtic te'e, laj sva'anic loc'obbail tonetic xchi'uc sloc'obbailtac ti Aserae.

¹¹ Yu'un mu yanuc laj spasic jech c'u cha'al laj spasic ti jteclumetic ti laj yilic ta sba ta satic ti jipatic loq'uel yu'un ti Diose. Chopol ti c'usi ta spasique. Laj xchiq'uic pom, ti lic sc'ac'al yo'nton yu'unic ti Diose.

¹² Lic snijan xchiman sbaic ta yich'el ta muc' ti loc'tabil diosetique, ti c'alal tsots albilic yu'un Dios ti mu xu' jech ta spasique.

¹³ Yu'un ta xava'i une, ti Diose scaj-bijubtasoj xa ono'ox ti israeletic ta sventa ti c'usitic yaloj scotol ti j'alc'opetique, xchi'uc ti buch'utic xu' yu'un ta xjac'vanic ta stojol ti Diose, ti ac'o yicta ti c'usitic chopol stamojic ta spasele, ti c'otuc ta pasel yu'unic ti mantaletique, xchi'uc ti c'usitic jbel tsots albil ta scotol ti chanubtasel ti ac'batic comel ti smolmuc'totic ta sventa ti j'alc'opetic ti ja' yajtuneltaque.

¹⁴ Ja'uc le' une, mu'yuc laj yaq'uic ta venta toj pochan xa'i sbaic jech c'u cha'al ech' ti smuc'tot syayaique. C'ot ta pasel ti mu'yuc xa stu laj ya'iic ti Ajvalil Dios yu'unique.

¹⁵ Laj sbajbeic ti oy c'usitic jbel tsots albil yu'une, xchi'uc ti strate ti laj spas ta stojol ti smolmuc'totique, xchi'uc ti mantaletic ti ac'batic comele. Ma'uc no'ox taje, bat yo'ntonic ta yich'el ta muc' ti jeche' loc'obbail diosetique. Laj spec'tsanbe sba sc'oplal xchi'uquic ti laj xchanic ta spasel ec jech c'u cha'al laj spasic ti lumetic ti joyol ta spat ta xoconic ti c'alal albilic ono'ox yu'un Dios ti mu xu' jech ta spasique.

¹⁶ Laj svalopatinic comel scotol smantaltac ti Ajvalil Dios yu'unique. Lic smeltsanic cha'cot sloc'obbail ch'in vacax ti unijesbil ta c'anal taq'uine, xchi'uc jun sloc'obbail ti Aserae, xchi'uc xtoc lic yich'ic ta muc' scotol ti c'usitic oy ta vinajele, xchi'uc ti Baale.

¹⁷ Jech xtoc oy bu laj yaq'uic ta chiq'uel ta matanal ti yalab xnich'nabique, ta xchanel ti t'unvaneje, ta xchanel ta scaj'alel ti c'usi ta xc'ot ta pasel ta ts'acal toe. Laj yac'beic yipal ta spasel ti c'usi chopol ta xil ta sba ta sat ti Dios ti c'ot ta pasel laj sliquesbeic ti sc'ac'al yo'ntone.

¹⁸ Ti jech s'elanic taj une, ilin ta j'ech'el ti Dios ta stojol ti Israele. Laj sten loq'uel ta stojol. C'ajomal xa no'ox com yu'un snitilultac ti Judae.

¹⁹ Jech ec ti Judae mu'yuc xc'ot ta pasel yu'un smantaltac ti Ajvalil Dios yu'une. C'ajomal no'ox lic xchanic ta spasel ti c'u s'elan chopol liquem yu'unic ti Israele.

²⁰ Va'i un, ti Diose laj sten ta yo'nton scotol snitilultac ti Israele. Lic yac' ta xq'uexlal ti laj yac' ech'el ta yoc ta sc'ob ti j'eleq'uetique, ti j'ech'el laj sten loq'uel ta stojole.

²¹ Snitilul ti Davide, laj xch'ac loq'uel ta stojol ti Israele. Ti israeletic une lic sva'anic ta ajvalilal ti Jeroboam xnich'on ti Nabat ti buch'u laj xch'ac sba yu'un ta stojol Dios ti israeletic ti tsots laj sta ti smulic yu'une.

²² Ti israeletique, yacal chiic ta sa'el smulic ec, ti mu ictabaj ta xa'iic ta spasel jech c'u cha'al c'otem ta pasel muliletic yu'un ti Jeroboame.

²³ C'ot ta pasel un, ti Diose laj xch'ac sba loq'uel ta stojol ti Israele jech c'u cha'al scaj'aloj ono'ox ta sventa scotol ti j'alc'opetic ti ja' yajtuneltaque. C'ot ta pasel ti israeletic chucbil batic c'alal to Asiria ti bu oyic avi tana li'e.

Ta xtic'bat yan yajval ti jteclum Samariae

²⁴ Ti ajvalil yu'un ti Asiriae laj yic' batel jnaclejetic ti oy ta Babiloniae, ti ta Cutae, ti ta Avae, ti ta Hamate, xchi'uc ti ta Sefarvaime. Bat yac' naquiicuc ta yosilal ti Samaria, ti c'otic ta xq'uexol ti israeletique. Ja' jech laj yu'ninic ti jteclum Samariae, xchi'uc lic nacliicuc ta jteclumetic yu'un.

²⁵ Ti jech mu snijan xchiman sbaic ta yich'el ta muc' Dios ti c'alal c'otic ti jnaclejetic taje, jech o xal ti Diose laj stac batel jti'oval leonetic ta stojolic ti lajic ta ti'el jun chibuque.

²⁶ Jech o xal xi bat yalbeic ya'i ti ajvalil yu'un ti Asiriae: “Ti jnaclejetic ti bat avac' nacliicuc ta jteclumetic yu'un ti Samariae, mu sna'ic c'u s'elan ta ich'el ta muc' ti Dios yu'un ti jteclum teye. Ti jech mu xtojobic ti c'usi ta spasic ta stojole, tacbatic talel leonetic ti xquechet xa ta xlajic ta ti'ele.”

²⁷ Ja' yu'un un, ti ajvalil yu'un ti Asiriae xi laj yal ti mantale: “Taquic batel junuc ti paleetic ti laj aviq'uic talel ta chuquele yo' jech ta xbat nacluc, yo' jech ta xchanubtasvan ti c'u s'elan ta ch'unel ti Dios yu'un ti jteclum teye.”

²⁸ Va'i un, oy jun yu'unic ti paleetic ti laj sloq'uesic talel ti nacal to ox ta Samariae, bat nacluc ta Betel. Lic chanubtasvanuc ti c'u s'elan smelol ta ich'el ta muc' ti Diose.

²⁹ Ja'uc le' une, ti jujun lumetique lic smeltsan yajdiosic stuquic ta jujun slumalic ti bu nacalique, xchi'uc bat sva'anic ta jujun c'opojebaletic ti bu laj smeltsanic ta jujun stselej ti samariaetique.

³⁰ Ti babiloniaetique lic smeltsanic sloc'obbail ti Sucot-benote. Ti cutaetique lic smeltsanic sloc'obbail ti Nergale. Ti hamateoetique lic smeltsanic sloc'obbail ti Asimae.

³¹ Ti avaetique lic smeltsanic sloc'obbail ti Nibhaze, xchi'uc jun sloc'obbail ti Tartaque. Ti sefarvaimetique lic yac'beic svocol ta xchiq'uel ta matanal ti yalab xnich'nabic ta smoton ti Adrameleque, xchi'uc ti Anamelec ti ja' diosetic yu'unique.

³² Jech xtoc un, ac'o mi ta snijan xchiman sbaic ta yich'el ta muc' ti Diose, ta ono'ox st'uj sbaic ta paleal ti stuquique yo' jech ta xtunic ta ch'ulnaetic yu'un ti loc'obbailetique.

³³ Ac'o mi ta snijan sbaic ta yich'el ta muc' ti Diose, staoj ono'ox yav sbic'tajesoj sbaic ta yich'el ta muc' ti diosetic yu'unique jech c'u cha'al liquem yu'unic ti jteclum ti bu liquemic talele.

³⁴ Jech to staoj yav ta spasic avi tana li'e jech c'u cha'al laj spasic ta ba'yele. Mu sbic'tajes sbaic ta yich'el ta muc' ti Diose. Mu co'oluc ta spasic jech c'u cha'al ta xal ti oy c'usitic jbel tsots albile, ti mantaletic nopbil yu'une, mi jtosuc ti chanubtasele xchi'uc ti mantaletic ti yaloj Dios ti c'otuc ta pasel yu'unic snitilultac ti Jacob ti buch'u Israel laj yac'be sbiine.

³⁵ Xi laj yal ti Dios ti c'alal laj spas strate ta stojolique: “Mu xapasbeic xi'el smuyubtael ti meltsanbil diosetique. Mu xanijan xachiman abaic ta stojol. Mu xavac' abaic ta tunel yu'un ta yac'bel ti milbil matanaletique.

³⁶ Vu'unuc no'ox xapasic jtoyel jxi'el ti Ajvalil Diosun avu'une, ti mu no'ox albajuc jmuc'ul jtsatsal laj jloq'uesot talel ta Egiptoe. Ja'uc no'ox jtuc ti oyuc jtoyel jxi'el avu'unique, xchi'uc ti quich'el ta muc' ta yac'belun ti milbil matanaletique.

³⁷ Ma'uc no'ox taje, c'otuc ta pasel avu'unic ti oy c'usitic jbel tsots albile, ti mantaletic nopbile, ti chanubtaseletique, xchi'uc ti ts'ibabil mantaletic ti laj cac'boxuque. Ja' yu'un un, mu xapasbeic stoyel xi'el ti c'usitic meltsanbil ta c'abale.

³⁸ Mu xach'ay ta avo'ntonic ti laj jpas jtrate ta atojolique. Mi ja'uc xapasbeic stoyel xi'el ti c'usitic ta xabisic ta diosetique.

³⁹ C'ajomaluc no'ox pasic ta jtojol ti Ajvalil Diosun avu'une. Jech ti vu'une ta jtic' jba ta apojel yo' jech mu xa'och ta yoc ta sc'ob ti avajcontrae.”

⁴⁰ Ac'o mi jech un, ti jteclumetic taje mu'yuc xich'ic ta muc. C'ajomal no'ox yac'ojbeic yipal ta spasel ti c'usi liquem ono'ox yu'unique.

⁴¹ Va'i un, mu'yuc smelol ti c'usi lic spasique. Jliquel ta spasbeic stoyel xi'el ti Diose. Ta ono'ox snijan xchiman sbaic ta yich'el ta muc' ti c'usitic loc'tabil yu'unique. Ti snitilulique staoj to o yav ta spasic avi tanae jech c'u cha'al laj spasic ti smolmuc'totique.