2 Reyes 16 - Bible in Tzotzil de Chamula

Ta och ta ajvalilal yu'un Judá ti Acaze

¹ Ti ta yuclajunebal (17) jabil yochel ta ajvalilal ti Peka xnich'on ti Remaliase, ja' o lic ochuc ta ajvalilal ti Acaz xnich'on ti Jotam ajvalil yu'un ti Judae.

² Yich'oj xa ox jtob (20) jabil ti c'alal lic ochuc ta ajvalilale, vaclajuneb (16) jabil ech' ta ajvalilal ta Jerusalén. Ti c'usitic lic spase, mu lecuc laj yil ta sba ta sat ti Ajvalil Dios yu'une. Mu xco'olaj jech c'u cha'al laj spas ti David ti ja' smolmuc'tote.

³ Yu'un yac'ojbe yipal ta spasel jech c'u cha'al laj spas ti ajvaliletic yu'un ti Israele. C'ot ta pasel yu'un ti laj yac'be yich' svocol ta chiq'uel ta matanal ti xnich'one, ti co'ol s'elan laj spas jech c'u cha'al liquem yu'unic ti jteclumetic ti mu'yuc smelol ti c'usitic ta spasique, ti tenatic loq'uel yu'un Dios ta stojol ti israeletique.

⁴ Ma'uc no'ox taje, yu'un laj yac' milbil matanaletic xchi'uc laj xchic' pom ti bu sbiinoj jujun c'opojebal ti oy ta jujun stselejtique, xchi'uc scotol ti oy ta yolon limajtic te'e.

⁵ Ti ta vo'ne taje, ti Resín ajvalil yu'un ti Siriae, xchi'uc ti Peka xnich'on ti Remaliase, ajvalil yu'un ti Israele, laj stam batel sbeic ta tsacvanej ta leto c'alal to ta Jerusalén. Va'i un, laj svoliic ti Acaze. Ja' no'ox ti jeche' laj yac' yuni vocolique. Mu'yuc xu' yu'unic ta yu'ninel ti jteclume.

⁶ Va'i un, ti ajvalil yu'un ti jteclum Edome cuch yu'un ta xcha'ich'el ti jteclum Elate yo' ta xc'ot ta yu'un ti Edome. C'alal cuch xa yu'un xujel loq'uel snitilultac ti Judá ta Elate, lic ochicuc nacalic o avi tanae.

⁷ Va'i un, ti Acaze xi laj yal ti laj stac batel j'al-mantal j'ich'-c'opetic ta sventa stuc ta stojol ti Tiglat-pileser ajvalil yu'un ti Asiriae: “Ti avajtunel li'e, co'ol s'elan junuc anich'on. Ja' yu'un un, la' pojun un, yu'un ta xistsaquicun ta leto ti ajvalil yu'un ti Siriae, xchi'uc ti ajvalil yu'un ti Israele.”

⁸ Ti Acaze laj stam loq'uel xtoc ti platae, ti oroe, ti oy ta xch'ulna ti Diose, xchi'uc ti q'uejajtic ta yavil ta snae. Laj stac batel ta sventa smoton ti ajvalil yu'un ti Asiriae.

⁹ Ti jech taje, tac'bil c'ot ti sc'op yu'un ti ajvalile. Lic xchapan j'ac'-leto ta scontrainel ti Damascoe. C'ot ta pasel ti laj yu'nine. C'alal laj sbec' loq'uel ti jnaclejetic ta Kire, lic smil ti Rezine.

¹⁰ C'alal bat snup sbaic ta be ta Damasco ti ajvalil Acaz xchi'uc ti Tiglat-pileser ajvalil yu'un ti Asiriae, laj yil ti oy jun altare. Va'i un, laj stac batel jlic vun ta stojol ti pale Urias ti c'u s'elan sbisoltac loc'tabil ta meltsanel ti altare.

¹¹ Jech ti Uriase lic ta smeltsanel ti altare. Lec xquechet lic xchapan scotol jech c'u cha'al ta xac' iluc ta svunal ti ta Damasco to laj stac talel ti ajvalil Acaze. Meltsajem xa ox yu'un c'alal sut talel ta Damasco ti ajvalil Acaze.

¹² C'alal c'ot ti ajvalil ti lic talel ta Damascoe, laj yil ti altare. Nopaj batel. Laj yac' jun chic'bil matanal ta sba.

¹³ Jmoj laj xchic' xchi'uc ti matanal sat ts'unubaletique. Laj smal ta sba altar ti matanal vinoe. Laj svijbe xch'ich'eltac ti milbil matanaletic ta sventa ti lajesobil o'ntonale.

¹⁴ Ja'uc ti c'anal taq'uin altar ti oy ta yeloval xch'ulna ti Diose, ti Acaze laj xq'uextabe yavil. Bat yac' ta stuq'uil yolon ti yolon xocon sloq'ueb c'ac'al yu'un ti altare. Yu'un ach' altar xa ti yelovtaoj sbaic xchi'uc ti xch'ulna ti Diose.

¹⁵ Laj taj une, laj yalbe mantal ti pale Uriase, ti ta muc' ta altare, ta xlic yich' chiq'uel ti chic'bil matanal ti ta xich' aq'uel ta jujun sobe, ti matanal sat ts'unubaltic ti ta xich' aq'uel ta jujun mal c'ac'ale, ti chic'bil matanale, ti matanal sat ts'unubil ti ta xac' ti ajvalile, xchi'uc ti chic'bil matanale, ti matanal sat ts'unubiletique, xchi'uc ti matanal vino ti ta xaq'uic scotolic ti jteclume. Ja' jech xtoc laj yalbe ya'i ti ac'o svijbeic xch'ich'el ti milbil chic'bil matanal ti ta altar taje. Ja'uc ti ta c'anal taq'uin altare, ja' xa no'ox ta xich' tunesel ti c'usi ta xich' aq'uel ta sventa ti jac'obbail ta stojol ti Diose.

¹⁶ Ti pale Uriase jech laj spas scotol jech c'u cha'al albat yu'un ti ajvalil Acaze.

¹⁷ Ts'acal to un, ti ajvalil Acaze laj stots loq'uel ta stsacleb ti muc' ta pila ti ic'bil yu'un ta loc'tabil c'anal taq'uin vacaxetique. Bat xchotan ta sba meltsanbil pac'bil ton.

¹⁸ Yo' ta sta ti xmuyubaj yo'nton yu'un ti ajvalil Asiriae, laj slilin loq'uel ti bu ta stsob sbaic ti c'alal ta sta ti jujun cuxob o'ntonal ta xch'ulna ti Diose. Jech xtoc laj stots loq'uel ti ti'na ta loq'ueltic ti bu ta stunes stuc ti ajvalile.

¹⁹ Ti sc'oplal slo'il ya'yejal ti Acaze, xchi'uc scotol ti c'usi laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae.

²⁰ C'alal cham ti Acaze, bat smuquic jmoj xchi'uc ti bu mucul ti smolmuc'totac ta Steclumal ti Davide. Ts'acal to un, ja' laj xcuch comel abtel ta ajvalilal ti Ezequías ti ja' xnich'one.