2 Reyes 13 - Bible in Tzotzil de Chamula

Yochel ta ajvalilal ti Joacaz ta Israele

¹ Ta oxib xcha'vinic jabil yochel ta ajvalilal ti Joas xnich'on ti Ocozías ta Judae, ta Israele, och ta ajvalilal ti Joacaz xnich'on ti Jehue, ti vuclajuneb no'ox jabil sjalil ech' ta ajvalilal ta jteclum Samariae.

² Ja'uc ti c'usitic lic spase, mu lecuc laj yil ta sba ta sat ti Diose, yu'un laj spas ec jech c'u cha'al chopol laj spas ti Jeroboam xnich'on ti Nabat ti laj sta smul yu'un ti Israele, ti c'ajomal no'ox laj yac'be yipal ta sa'el ti smule.

³ Jech o xal un, lic sc'ac'al yo'nton ti Dios ta stojol ti Israele, ti jal ta j'ech'el ti aq'ueic ta yoc ta sc'ob ti Hazael ajvalil yu'un ti Siriae, xchi'uc ta stojol ti Ben-adad ti ja' xnich'one.

⁴ Va'i un, ti Joacaze lic c'opojuc ti'inuc ta stojol ti Diose, ti tsacbil ich'bil ti sc'opojel yu'un ti Diose, ti yiloj ta sba ta sat ti c'u s'elan ta x'ilbajinatic ti israeletic yu'un ti ajvalil ta Siriae.

⁵ Ac'batic talel jun jpojvanej yu'un ti Diose, ti c'ot ta pasel ti ja' to jech laj staic pojel colel ti israeletic ti tsots ta x'ilbajinatic yu'un ti ajvalil ta Siriae. Laj staic ti jun yo'ntonic lic cuxiuc ta snaic jech c'u cha'al ta ba'yele.

⁶ Manchuc mi jech un, mu'yuc laj yicta sbaic ta spasel chopol jech c'u cha'al laj spasilan snitilultac ti Jeroboame, ti ja' ta scoj laj sta smul yu'un ti israeletique. C'ajomal no'ox laj yac'beic yipal ta spasel ti chopole, ti staoj yav lec no'ox ta xilic sloc'obbail Asera ta Samaria.

⁷ C'ajomal xa no'ox lajuneb yoxvinic (50) ta vo' jcajlejetic ta ca' yajsoldadotac ictabat comel ti Joacaze, xchi'uc lajuncot scarreta sventa ac'ob-leto, xchi'uc lajunmil (10,000) ta vo' soldadoetic ti ta xanavic ta yoquique. Ti yepale, stuc slilijemal ictabat comel yu'un ti ajvalil ta Siriae.

⁸ Ti c'u s'elan slo'il ya'yejal ti Joacaze, ti c'usi laj spase, xchi'uc ti c'usitic cuch yu'une, ts'ibabil ta jpoc svunal slo'il ya'yejal yabtel ti ajvaliletic yu'un ti Israele.

⁹ C'alal cham ti Joacaze, laj smuquic ta Samaria. Ts'acal to un, och ta xq'uexol ta ajvalilal ti xnich'on ti Joas sbie.

Och ta ajvalilal yu'un Israel ti Joase

¹⁰ Ta yuclajunebal xcha'vinic (37) jabil yochel ta yabtel ta ajvalilal ti Joas ta Judae, jech ec ti yan Joas xnich'on ti Joacaze, ja' o lic ochuc ta ajvalilal yu'un ti Israele. Vaclajuneb (16) jabil sjalil ech' ta ajvalilal ta Samaria.

¹¹ Ja'uc ti c'usitic lic spas une, chopol laj yil ta sba ta sat ti Diose, yu'un jech lic spas chopol ec jech c'u cha'al laj spas ti Jeroboam xnich'on ti Nabate, ti laj sta smul yu'un ti israeletique, ti mu ja'uc laj yicta sba ta spasele.

¹² Ti c'u yepal slo'il ya'yejal ti Joase, ti c'usitic laj spase, ti c'usitic tsots sc'oplal cuch yu'une, ti laj scontrain sbaic xchi'uc ti Amasías ajvalil yu'un ti Judae, ts'ibabil ta jpoc svunal slo'il ya'yejal yabtel ti ajvaliletic yu'un ti Israele.

¹³ C'alal cham ti Joase, laj smuquic ta Samaria ti bu muculic ti yan ajvaliletic yu'un ti Israele. Ts'acal to un, och ta ajvalilal ti Jeroboame.

Ta xc'ot ta pasel ti c'usi caj'albile, xchi'uc ta xcham ti Eliseoe

¹⁴ Naca tey xa ti Eliseo ta scoj ti tsacbil ta chamele. Va'i un, bat q'uelatuc yu'un ti Joás ajvalil yu'un ti Israele. X'oc'olet xa yicoj ti xi laj yalbee: —¡Tot un cha'e, tot un cha'e, ti co'ol a'elan jech c'u cha'al junuc banquilal jvoc' jpojvanej soldado la'ech' yu'un ti Israele!

¹⁵ Xi tacbat yu'un ti Eliseoe: —Tsaco ti ayolobe xchi'uc jun chibuc ti sni'e. Jech ti ajvalile laj stsac ti syolobe xchi'uc ti jun chib sni'e.

¹⁶ Va'i un, xi albat yu'un ti Eliseoe: —Chapano aba ta xach'el ti ayolobe. C'alal jech syaquil ta spas ti ajvalile, ti Eliseoe laj scajan sc'ob ta stojol ti ajvalile.

¹⁷ Va'i un, xi laj yalbe ya'ie: —Jamo ti ventana ti sq'ueloj batel sloq'ueb c'ac'ale. Laj sjam ti ajvalile, ti xi albat mantal yu'un ti Eliseoe: —Avi une, ¡teno batel ti sni' ayolobe! Ti ajvalile laj sten batel ti sni' syolobe. Va'i un, xi avan ti Eliseoe: —¡Jpojvanej yolob yu'un ti Diose! ¡Jpojvanej yolobot ta scontrainel ti Siriae! ¡Ta xatsal ti sirioetic ti oyic ta jteclum Afeque, ti ta j'ech'el ta xatsutsese!

¹⁸ Ts'acal to un, xi laj yalbe ya'i ti ajvalile: —Tamo ti sni'tac ayolobe. C'alal laj stam sni'tac syolob ti ajvalile, xi albat mantal yu'un ti Eliseoe: —Avi tana une, pujo ta majel ti banomile. Ti ajvalile, oxib velta laj spuj ta majel ti banomile, lic spajes sba.

¹⁹ Va'i un, ti j'alc'op une lic socuc sjol yu'un, ti xi laj yalbe ya'ie: —Ti lajuc apuj ta majel vo'obuc vaquibuc velta ti banomile, xu' xa avu'un ta stsalel ti sirioetic jechuque, ja' to ti c'uxi stsuts avu'une. Ja'uc tana le' une, c'ajomal no'ox oxib velta xu' avu'un ta stsalel.

²⁰ Cham ti Eliseoe. Laj smuquic. Yantic x'epaj liquel jujun jabil ti j'elec' moabitaetic ta yilbajinel ti muc' ta jteclume.

²¹ Oy jun c'ac'al, oy jun chib israeletic ti yacal ta smuquic jun vinic ti chame c'alal laj yilic ti xvolet talel ta stojolic epal j'eleq'uetique. Va'i un, laj sjipic yalel ta anil ta smuquinal Eliseo ti animae, jatavic batel. Ta jech yepal, ti c'alal cajal c'ot ta sba sbaquil Eliseo ti animae, toj cha'cuxiel c'ot, va'i liquel.

²² Ti Hazaele, ajvalil yu'un ti Siriae, toj ilbaj laj yutilan ti israeletic ti c'alal cuxul to ox ti Joacaze.

²³ Ja'uc ti Dios une toj abol sba laj yil. C'uxubaj yo'nton ta stojolic. Ta sventa ti spasoj strate xchi'uc ti Abrahame, ti Isaaque, ti Jacobe, lic yac' sjol ta stojolic. Mi ja'uc laj stubbe sts'unubalic. Mi ja'uc laj sten loq'uel ta stojol, ti ja' to jech mu'yuc tenvanem avi tana le'e.

²⁴ C'alal cham ti Hazael ajvalil yu'un ti Siriae, xnich'on no'ox och ta xq'uexol ta ajvalilal ti Ben-adad sbie.

²⁵ Va'i un, ti Joás xnich'on ti Joacaze, cuch yu'un ta xcha'u'ninel ti lumetic ti laj spoj ti Ben-adad c'alal laj spas leto ti Joacaz ti ja' stote. Oxib velta laj stsal Ben-adad ti Joase. Lic yu'nin ti lumetic ta Israele.