2 Reyes 12 - Bible in Tzotzil de Chamula

Och ta ajvalil yu'un Judá ti Joase

¹ Yucubal (7) xa jabil yochel ta ajvalilal ti Jehue, lic ochuc ta ajvalilal ti Joás ti ja' to no'ox yich'oj vucub (7) jabile. Cha'vinic (40) jabil sjalil och ta ajvalilal ta Jerusalén. Sibia sbiinoj ti sme'e, ti liquel talel ta Beersebae.

² Ti c'usitic laj spas ti Joase, lec laj yil ta sba sat ti Diose, yu'un chanubtasbil lec yu'un ti pale Joiadae.

³ Manchuc mi jech un, lec no'ox laj yil ti va'ajtic ti c'opojebaletic yu'unique, ti staoj yav ti jnaclejetique ta xaq'uic ti chic'bil matanale, ti xchic'bil pome.

⁴ Oy jun c'ac'al, ti xi laj yalbe ya'i paleetic ti Joase: —Tsobo scotol ti taq'uin ti oy stunel ta xich'ic talel ta xch'ulna ti Diose, jech c'u cha'al ti patanil ti oy sc'oplal ta xc'ot ta q'uexolile, jech c'u cha'al ti c'u yepal c'ot ta scotol ti loq'uem ayanem ta o'ntonal ta xich' ich'el talel ta xch'ulna ti Diose.

⁵ C'anbeic ti buch'u va'anbil ta sq'uel ti yavil taq'uine yo' jech ta xich' q'uextael ti c'usitic soquemic yu'un ti ch'ulnae.

⁶ C'alal sta yoxibal xcha'vinic (23) jabil yochel ta ajvalilal ti Joase, ja'uc ti paleetic une, yoquel mu'yuc c'usi sjeltaojbeic ti ch'ulnae.

⁷ Va'i un, ti ajvalil Joase, xi laj yalbe ya'i ti c'alal laj stac ta iq'uel ti pale Joiadae, xchi'uc ti yan paleetique: —¿C'u cha'al ya'yel ti yoquel mu'yuc to aliquesojic ta snojesel ti c'usitic soquem yu'un ti ch'ulnae? Avi tana li'e, mu'yuc xa ta xavich'ic ac'bel ti taq'uin yu'unic ti buch'utic sbainojic ti yavil taq'uine. Ti buch'u oy yu'une, tsots sc'oplal ac'o yac' ta c'abal yo' jech ta xich' q'uextael ti c'usitic soquemic yu'un ti ch'ulnae.

⁸ Ti paleetique lec laj ya'iic ti mu'yuc xa ta sbainbeic staq'uinic ti jnaclejetique, ti ma'uc xa ta sbainic ta xq'uextael ti c'usitic soquemic yu'un ti ch'ulnae.

⁹ Va'i un, ti pale Joiadae laj stam jbej caxa. Laj sjombe ti smac sti'e. Laj sbejan ta xocon stuq'uil bats'i c'obal yu'un ti altare ta ochebal xch'ulna ti Diose. Ti paleetic ti sbainojic ta sq'uelel ti ochebal sti' ch'ulnae, ta xaq'uic ta caxa scotol ti taq'uin ti ta xich' ich'el batel ta sventa xch'ulna ti Diose.

¹⁰ C'alal ta xilic ti ep xa ti taq'uin ta caxae, ta xc'otic ti buch'utic sbainojic ta sts'ibael ti c'usitic ta xc'ot ta pasel yu'un ti ajvalile, xchi'uc ti banquilal palee. Ta xchapic c'u yepal ta staic ti taq'uin ta xch'ulna ti Diose. Ta stiq'uic ech'el ta jun vorxa ta ts'acal to une.

¹¹ C'alal chapbil xa yu'unic ti c'u yepal laj staic une, ta xac'beic ta yoc ta sc'ob ti buch'utic sbainojic ti abtel yu'un ti ch'ulnae yo' jech ta xich' tojel ti jch'ul-te'etique, ti jchanubtasvanej yu'un ti abteletic ta sventa xch'ulna ti Diose,

¹² ti albanyiletique, ti j'an-tonetique. Ma'uc no'ox taje, ta sventa ti taq'uin ti ta xtun ta ch'ulnae, jech ta smanic ti te'e, ti anbil tone, xchi'uc ti c'usitic sc'an manel yane.

¹³ Ja'uc ti taq'uin ti ta xich' ich'el batel ta xch'ulna ti Diose, ma'uc ta sventa ti ta xich' meltsanel ti plata bise, ti xulobiltac sc'aq'uemal ti mechaetique, ti lech-lech taq'uinetique, ti oq'uesetique, xchi'uc ti c'usitic ta xtun ta yan ti meltsanbil ta oroe, ti ta platae.

¹⁴ Ja'uc le'e, ta xich'ic ac'bel ti buch'utic sbainojic ti abtele yo' jech ta xich' q'uextael ti c'usi sc'an ta xch'ulna ti Diose.

¹⁵ Manchuc mi jech un, ti buch'utic ta xich'ic ti taq'uin ti sbainojic ti abtel ta stojol ti j'abtele, mu'yuc ta stsatsal jac'batic ti c'u s'elan ta slajesic ti taq'uine. Stuc'ulanoj sbaic lec ti c'u s'elan ta spiquic ta stunesele.

¹⁶ Ma' ti matanal taq'uin ti ta xich' aq'uel ta sventa ti mulil colo'ile, mu'yuc ta xich' ich'el batel ta sventa ti ch'ulnae. C'otem ta yu'unic ti paleetique.

¹⁷ Ti jech yorail ta vo'ne taje, ti Hazael ajvalil yu'un ti Siriae, lic stsac ta leto ti lum Gate, laj yu'nin. Laj stam batel sbe ta stsaquel ta leto ti lum Jerusalén ta ts'acal to une.

¹⁸ Ja'uc ti Joás ajvalil yu'un ti Judae lic stsob scotol ti c'usitic jtunel ti laj to ox stunesic ta stoyel xi'el Dios ti laj ech'icuc ta ajvalilal ta Judá ti Josafate, ti Jorame, ti Ocoziase, ti ja' smolmuc'totac laj ech'icuc ta pas mantal ta Judae. Lic svol ta tsobel ti c'usitic laj to ox stunes stuque, ti epal oro ti c'otem ta yu'un ti ch'ulnae, xchi'uc ti oy ta chapanobbail ti ta snae. Scotol laj svol ta tsobel ti laj yac'be ech'el ti Hazaele, ja' to jech laj yicta sba ta scontrainel ti Jerusalene.

¹⁹ Ti c'u s'elan c'ot slo'il ya'yejal ti Joase, xchi'uc ti c'usitic laj spase, ts'ibabil com ta jpoc svunal slo'il ya'yejal ti ajvaliletic yu'un ti Judae.

²⁰ Yaj'opisialtac stuc, nopbat, paybat sc'oplal ta mucul, ti mile ta jbej na ta jembil lum ti oy ta yalobaltic yu'un ti Silae.

²¹ Va'i un cha'e, ti Josacar xnich'on ti Simate, xchi'uc ti Jozabad xnich'on ti Somere, ti ja' yaj'opisialtaque, xcham o xa xchi'uc ti syayijemal ti laj yac'beique. Bat smuquic ta Steclumal David ti c'alal chame. Laj taj une, och ta xq'uexol ta ajvalilal ti Amasías ti ja' xnich'one.