1 Samuel 9 - Bible in Tzotzil de Chamula

Ti Saule ta xc'ot ta loq'uel ta stojol ti Samuele

¹ Ta snitilul ti Benjamine, oy jun vinic ti sbiinoj Cise, xnich'on ti Abiele, smom ti Zerore, smuc' ta muc'tot ti Becorat ti ja' xnich'on ti Afíahe. Ti Cis taje, vinajem sc'oplal ti ja' jun vinic ti yich'ojbe lec smelole.

² Oy jun xnich'on ti lec c'ac'al querem xa'i sbae, ti sbiinoj Saule. Mu'yuc xa yan israel ti xco'olaj s'elan jech c'u cha'al ti stuque. Yu'un yolon to snequeb comem yu'un ti yan ta snatile.

³ Oy jun c'ac'al, ti Cise ch'ay sburrotac. Va'i un, xi laj yalbe ti Saúl ti ja' xnich'one: —Lic chapano aba, bat sa'o ti burroetique. Ic'o batel junuc ti mosovile.

⁴ Bat ti Saule, ech' xtuch' ti vitstic ta yosiltac ti Efraine. Ech' batel yosilal ti Salisae. Mi ja'uc laj sta ti burroetique. Ech' batel xtoc ta yosilal ti Saalime xchi'uc ta yosilal ti Benjamine. Mi ja'uc laj sta xtoc.

⁵ C'alal c'otic ta yosilal ti Zufe, ti Saule xi laj yalbe ti smosov ti xchi'uc batele: —Sutcutic batel, ep xa nan ta svul yo'nton ta jtojoltic ti jtote, ja' xa nan mu sta ta svul yo'nton yu'un ti burroetique.

⁶ Ti mosovile xi laj staq'ue: —Ti li' ta jteclume, oy jun j'alc'op ti scotolic yich'ojic ta muq'ue. Yu'un scotol ti c'usi ta xale, mu stselbuj ta j'ech'el. Batic ti bu oye. Xu' nan xistojobtasotic ti bu beal ta jtamtic batele.

⁷ —Batic un cha'e —xi laj stac' ti Saule—. Ja'uc le' une, ¿c'usi ta xquich'betic batel ti vinic taje? Yu'un mi ja'uc xa oy jbejuc pan oy ta jnuti'tique. Mi ja'uc xa oy c'usi xu' ta xcac'betic ti j'alc'ope.

⁸ Ti mosovile xi laj staq'ue: —Li' to quich'oj jsep uni nene' saquil taq'uine. Cac'betic yich' ti j'alc'ope yo' jech ta xistojobtasotic batel ti bu beal xu' ta jtamtic batele.

⁹ (Ta vo'ne, c'alal ti israeletic mi oy c'usi ta sjac' ta stojol ti Diose, xi ta xalique: “Batic ta stojol ti buch'u jamal sba sate.” Avi tana li'e, sbiinoj xa “j'alc'op”. Ja'uc ta vo'ne, sbiinoj “ti buch'u jamal sba sate”.)

¹⁰ —Jechuc, batic taj un cha'e —xi laj stac' ti Saule. Laj stam batel sbeic xchibalic ta jteclum ti bu nacal ti jun j'alc'ope.

¹¹ C'alal ta xa xmuyic ech'el ta xch'ut stselej ti ta xc'ot ta jteclume, snupojic c'ot ta be jun chib tsebetic ta xbatic ta lup vo' ti xi laj sjac'beique: —¿Mi ja' li'e ti bu xu' ta jtacutic ti buch'u jamal sba sate?

¹² Xi tac'batic yu'un ti tsebetique: —Ja' li'e, ti le' to xjelav batel jutuque. Batanic ta anil, yu'un talem ta jteclum avie. Yu'un yorail ta xich' aq'uel milbil matanaletic ta ch'ulna avi tanae.

¹³ C'alal mi lac'otique, xc'ot sa'ic no'ox ta anil ti c'alal mu to xbat ta ch'ulna ta sventa ti ve'ele. Yu'un ti jnaclejetique ja' to ta xve'ic ti mi c'ote. Yu'un sbainoj ta sts'uiltasel ti matanale. Ti mi laj une, ta xlic ve'icuc ti buch'utic ic'bilique. Batanic ta anil avie. Tey to ta xataic.

¹⁴ Yac'beic yipal muyic batel c'alal to jteclum. C'alal yacal xa xc'otique, ja' o jot o bu loc' batel ti Samuel yo' ta xbat ta ch'ulnae.

¹⁵ Jun to ox c'ac'al sc'an xc'ot ti Saule, ti xi xcholet ac'bat yil yu'un Dios ti Samuele:

¹⁶ “Jech ora oc'om li'e, ta jtacbot talel jun vinic ta atojol ti liquem talel ta yosilal ti Benjamine, ti ta xava'an ta yac'bel yich' yabtel ta ajvalil ta sventa ti calab jnich'nabe. Yu'un ja' ta stic' sba ta spoj loq'uel ti ilbajinbilic yu'un ti filisteoetique, ti c'uxubaj xa co'nton yu'un ti calab jnich'nab ti c'ot xa ta jtojol ti sc'opique.”

¹⁷ C'alal ti Samuel laj yil ti Saule, xi albat yu'un ti Diose: “Ja' me ti vinic ti laj calbot ava'i sc'oplal le' une. Le'e, ja' ta x'och ta ajvalil yu'un ti calab jnich'nabe.”

¹⁸ C'alal ta xa x'ochic batel ta ochebal sti' ti jteclume, jech ti Saule nopaj batel ta stojol ti Samuel ti xi laj yalbee: —Avocoluc, albun ca'i bu stuq'uil sna nacal ti buch'u jamal sba sate.

¹⁹ —Vu'unun ma' ti xcojtiquin uni jutebuc taje —xi laj stac' ti Samuele—. Jchi'in jbatic muyel ta ch'ulna ti jmoj ve'cutic avi tanae. Sob oc'om ta jchapbot ava'iic scotol ti c'usi ta xajac'bune. Mi laj une, xu' xabat un. Mi ja'uc xa ta xajpajesot.

²⁰ Ja'uc ti burroetic ti oy xa ta yoxibal c'ac'al xch'ayele, mu xavul avo'nton yu'un, yu'un laj xa staic. Ma'uc no'ox taje, ti c'usi juteb ta yo'ntonic ta sc'anel ti israeletique, ta xc'ot ta atojol xchi'uc ti atot ame'e.

²¹ Xi laj stac' ti Saule: —¡Bu la xata xic'ot o ti c'alal snitilulun ti Benjamine, ti c'alal ja' jun snitilul Israel ti jutuctic no'ox yuni c'oplale! Ma'uc no'ox taje, ti jtot jme'e, vinajem yuni c'oplal ti peq'uel ta j'ech'el ta scotol snitilultac ti Benjamine. ¿C'u cha'al ti va'i yelanil ta xavalbun scotol taje?

²² Va'i un, ti Samuele yic'oj batel ti Saule xchi'uc ti mosovile ti bu ti tsoblebale. C'ot xchotanan ta sliqueb chotlebal ti bu chotajtic ti yan ti ja' nan oyic lajuneb xcha'vinic (30) ta vo'e.

²³ Laj taj une, ti Samuele xi laj yalbe ti jmeltsanej ve'lile: —Ich'o talel ti puculil beq'uet ti laj cac'bote, ti laj calbot sc'oplal ti slecoj ta xavaq'ue.

²⁴ Ta jech yepal, ti jmeltsanej ve'lile, sjunul sjequel yo', laj yich' talel ta anil ti laj yac'be ti Saule. Ja'uc ti Samuele xi laj yale: —Oy ta atojol ma' ti oy ti c'usi smalaojot q'uejbilote. Tuno, lajeso, yu'un jch'acojbot comel ti avi tana ti laj quic' ta ve'el ti jteclume. Ti jech c'ac'al taje, jmoj ve' ti Saúl xchi'uc ti Samuele.

²⁵ C'alal loq'uic talel ta ch'ulna ti batic ta jteclume, ta xcha'cojal na laj xchapanbeic svayeb ti Saule.

²⁶ Ti Saule laj spuch'an sba vayuc. Ti ta yoc'omale, xi laj yal ti Samuel ti c'alal laj sc'opon ti Saúl ta xcha'cojal nae: —Lican me, tamo xa batel abe. Lic ti Saule. Laj taj une, loq'uic batel ta be xchi'uc ti Samuele.

²⁷ C'alal stamojic yalel yalobaltic ta loq'uebal xa yu'un ti jteclume, ti Samuele xi laj yalbe ti Saule: —Albo ya'i ti caj-jelavuc batel ti amosove. Malao to jliqueluc ti vo'ote, yu'un ta xcalbot ava'i ti c'usi laj yalbun ti Diose.