1 Samuel 8 - Bible in Tzotzil de Chamula

Ti Israele ta sc'anic ti ac'o va'anbaticuc junuc ajvalil yu'unique.

¹ C'alal molibem xa ti Samuele, ja' laj sva'an ta jpojvanej yu'un ti Israel ti xnich'nabe.

² Ti sba xnich'one sbiinoj Joel. Ja'uc ti xchibale sbiinoj Abías. Ti stuquique sbainojic ta sventainel ti Beersebae.

³ Ja'uc le' une, ti xnich'nabe mu jechuc yo'ntonic loq'uic jech c'u cha'al ti stotique. Yu'un c'ajomal no'ox bic'tajem yo'ntonic yu'un ti matanale, ti lec xa'iic stsaquel ti mich'ob c'abale, ti mu xa sventaicuc ta xchapanvanic leque.

⁴ Jech o xal ti moletic yu'un ti Israel une laj stsob sbaic, bat xchi'in ta lo'il ti Samuel ti oy ta Ramae.

⁵ Xi c'ot yalbeique: “Lamolib xa. Ja'uc ti anich'nab une mu jechuc yo'ntonic jech c'u cha'al ti vo'ote. Ja' yu'un un cha'e, va'anbuncutic junuc ajvalil yo' jech ta xisventaincutic jech c'u cha'al liquem yu'unic scotol ti muc'tiquil lume.”

⁶ Mu lecuc laj ya'i ti Samuele ti ta xc'anbat ti ac'o va'anbaticuc junuc ajvalil yo' ta xventainatique. Lic c'opojuc ta sti'inel sc'oponel ti Diose.

⁷ Ja'uc le' une, xi tac'bat talel yu'un ti Diose: “A'yibo sc'op ti jteclum ti c'usi ta sc'anbote, yu'un ma'uc ta xayictaic comel. Ta xiyictaicun comel yo' jech mu ta jventainic.

⁸ Jech staoj o yav ta xispasbeicun jech c'u cha'al ti c'alal laj jloq'uesic talel ta Egiptoe. Jech to ta xispasbeicun avi tanae jech c'u cha'al ta xaspasbeique. Laj xa yictaicun comel yo' jech xbat snijan sbaic ta yich'el ta muc' ti yan diosetique.

⁹ Ja' yu'un un cha'e, a'yibo ti sc'opique. Tsots sc'oplal, t'ambo ya'iic ba'yel ti ta sbainic lec c'u s'elan yabtelal ta xlic ayanuc ti jun ajvalil yu'unique.”

¹⁰ Va'i un, ti Samuele laj xchapbe ya'i ti jteclum ti c'u s'elan tac'bat talel yu'un ti Dios ti jech ta xc'anbat ti ac'o va'anbaticuc ti jun ajvalile.

¹¹ Xi laj yalbe ya'iique: —Ti jech taj une, malao xa no'ox ava'iic un ti xi s'elan ta sc'an ti ajvalil ti ta xasventainoxuque: Ta xlic stsob ta stojol ti anich'nabique. Ta xac'be yabtel ta sbainel ti carreta sventa ti ac'ob-leto ti jlome. Cajlejetic ta ca' ta xc'ot yu'un ti jlome. Ta xc'ot ta yajchabivanej yu'un stuc ti jlome.

¹² Ta xac'be yabtel ta banquilal ta sventainel lajuneb ciento (1,000) ta vo' soldadoetic ti jlome. Ti banquilaletique, ta sventain yu'un lajuneb yoxvinic (50) ta vo'. Oy jlomoxuc, ta xac' abtejanic ta sloq'uel ti yosil sbanomile. Ta xatsobbeic mi yijub ti sts'unubaltaque, mi ja' ti ta xabainic ta smeltsanbel ti yabtejeb sventa ac'-letoe, xchi'uc ti c'usitic ta xtun ta sventa ti ac'ob-leto carretae.

¹³ Ta xic' ta yajtunel xtoc ti avantsil nich'onique yo' jech ta xtunic ta yaq'uel ti muil poxile, ta spasel ti ve'liletique, xchi'uc ta smeltsanel ti pane.

¹⁴ Ta xu'ninboxuc ti ve'ebal banomile, ti banomil ti xch'iebtac ti uvae, xchi'uc ti banomil ti xch'iebtac olivo te'etique, ti ta xac'be yich' scotol ti banquilal yajtuneltaque.

¹⁵ Ta xastsatsal c'anboxuc jbus ta jujun lajunbus ti sat jchop o ta trigoe, xchi'uc ti uvae, ti ta xac'be yich' ti banquilal yajtuneltaque xchi'uc ti jchabivanejetic yu'un ti bu chotole.

¹⁶ Ta xastsatsal pojboxuc xtoc ti amosovique, c'usiuc no'ox mi ja' vinic, mi ja' ants, xchi'uc ti lequiquil vacaxetique, ti burroetique, ti ta xac' abtejuc ta sventa yabtel stuque.

¹⁷ Ta xu'ninboxuc jcot ta lajuneb ti achijique. C'alal ta vo'oxuc ta xavac' abaic ta tunel ta stojol.

¹⁸ C'alal yorail ta xac'anbeic parte ti Dios ta scoj ti ta xavilic ti chopol ta spas ti ajvalil ti laj at'ujique, xasq'uelic no'ox ti Diose.

¹⁹ Ja'uc ti jteclume mu'yuc laj xchiquintaic ta j'ech'el ti bijubtasel yu'un ti Samuele. C'ajomal no'ox xi laj staq'uique: —Ma'uc ta alel ma' taj une. Ja' tsots sc'oplal ta jc'ancutic ti oyuc ti ajvalil cu'uncutique.

²⁰ Ta jc'an ti c'otcutic jech c'u cha'al ti yan muc'tiquil lum ti ventainbilotique, ti ac'o xispasotic ta mantale, ti jba'beuc batel ta ac'-leto cu'uncutique.

²¹ C'alal laj xchiquintabe sc'op jteclum ti Samuele, lic xcha'albe ya'i ti Diose.

²² Xi tac'bat talel yu'un ti Diose: —Ich'bo ta muc' ti sc'opique. Va'anbo ti ajvalil yu'unique. Va'i un, ti Samuele laj yalbe mantal ti ac'o suticuc batel ta slumalic ta jujuchop ti bu liquelic talel ti israeletique.