1 Samuel 7 - Bible in Tzotzil de Chamula

¹ Va'i un, ti jnaclejetic ta Quiriat-jearime batic, ba yich'ic talel ti xcaxa Diose. C'ot stiq'uic ta sna ti Abinadab ti oy ta jun stenlej jol vitse. Lic sva'anic ta yac'bel yich' yabtel ti Eleazar ti ja' xnich'one yo' jech ta stuc'ulan ti caxae.

Ti Samuele lic sva'an sba ta jpojvanej yu'un ti Israele

² C'alal sc'ac'alil laj yich' aq'uel ti caxa ta Quiriat-jearime, loc' xa ox jtob jabil yech'el ti c'alal scotol ti israeletique juteb ta yo'ntonic ti sc'anicuc xa ya'iic ventainel yu'un ti Diose.

³ Taj une, ti Samuele xi laj yalbe ya'i ti israeletique: “Mi ta sjunul avo'ntonic ta xasutic talel ta stojol ti Diose, tsots sc'oplal ta xatenic loq'uel ti yan diosetique, xchi'uc sloc'obbail ti Astartee, ti ta xavac' abaic ta tunesel yu'un ti Diose. C'ajomal no'ox stuc ta xavaq'uic ta ich'el ta muc'. Va'i un, ti stuque ta spojoxuc loq'uel ta yoc ta sc'ob ti contrainbiloxuc yu'un ti filisteoetique.”

⁴ Ti israeletic une lic stenic loq'uel ta stojolic ti ep ta tos sloc'obbailtac ti Baale xchi'uc ti Astartee. C'ajomal no'ox lic snijan xchiman sbaic ta yich'elic ta muc' ti Diose.

⁵ Ts'acal to un, ti Samuele xi lic yal mantale: “Acotolic, Israel, tsobo abaic ta Mizpa. Ta jc'anbe vocol ti Dios ta atojolique.”

⁶ Ti israeletique bat stsob sbaic ta Mizpa. Ti bu taje, laj spulic loq'uel vo', ti laj smalic ti c'ot ta smoton ti Diose. Ti jech c'ac'al taje, laj scomtsan yotic. Laj yojtiquinic lec ta jamal ti staoj smulic ta stojol ti Diose. Ti ta Mizpa taje, lic ochuc ta jpojvanej yu'un Israel ti Samuele.

⁷ C'alal laj ya'i ti filisteoetic ti tsobolic ta Mizpa ti israeletique, ja'uc ti banquilaletic yu'un ti filisteoetique, xvoletic no'ox batel ta contrainvanej. C'alal laj ya'iic ti israeletique, xi'ic ta jmec.

⁸ Xi laj yalbeic ti Samuele: “Mu xavicta aba ta sc'anbel vocol ti Ajvalil ti ja' Dios cu'untique yo' jech ta xispojotic ta yoc ta sc'obic ti filisteoetique.”

⁹ Ti Samuele laj yic' talel jcot ch'iom tot chij ti scotlej laj xchic' ta smoton ti Diose. Xvocolet liquel ta stojol ti Dios ta sc'anbel spojel ti Israele, ti tsacbil ich'bil sc'op yu'un ti Diose.

¹⁰ C'alal yacal ta xac' chic'bil matanal ti Samuele, ja'uc ti filisteoetique xvoletic ono'ox talel ta stsaquel ta leto ti israeletique. Tey xc'avluj liquel chauc yu'un ti Dios ta sibtasel ti filisteoetique. Jech c'ot ta pasel ti tsalatic yu'un ti israeletique.

¹¹ Ta jech yepal, xvoletic ono'ox loq'uel ti israeletic ti oyic ta Mizpa ta snutsel ti filisteoetique. C'ot slubtsanic ta be ta yolon xa batel Bet-care.

¹² Ts'acal to un, ti Samuele laj spet talel jbej ton ti laj spitan ta o'lol ti Mizpa xchi'uc ti Sene. Laj yac'be sbiin Eben-ézer, yu'un xi laj yale: “Ja' to li' laj quiltic ti laj stic' sba ta spojelotic ti Diose.”

¹³ Tsalbil c'otic ta j'ech'el ti filisteoetique. Mi ja'uc xa oy bu lic snet'ic ta spojel yosil ti israeletique. Ti jech cuxul ti Samuele, contrainbilic o yu'un Dios ti filisteoetique.

¹⁴ Ti lumetic yu'un Israel ti pojbatic to ox yu'un ti filisteoetique, ti lic talel ta Ecrone, ti c'ot c'alal to Gate, lic xcha'ich'ic ti Israele. Ti jech taj une, cuch yu'unic ta spojel yosilic ti israeletic ti oy xa ox ta yoc ta sc'obic ti filisteoetique. Ja' to jech lamaj c'op yu'un ti israeletic xchi'uc ti amorreoetique.

¹⁵ Ti c'u sjalil cuxi ti Samuele, c'ot ta jpojvanej yu'unic ti Israele.

¹⁶ Scotol jabil ta xbat ta Betel, ta Gilgal, xchi'uc ta Mizpa, ta xchapbel sc'op ti Israel ti buyuc no'ox ta stsob sbaic talele.

¹⁷ Mi laj yo'nton une, ta sut talel ta Ramá ti bu chotole. Ti bu taje, ja' to tey ta xlic talel ti spaselic ta mantal ti Israele. Ti bu taj xtoque, laj smeltsan jun altar ta sventa ti Diose.