1 Samuel 6 - Bible in Tzotzil de Chamula

Ti filisteoetique ta sutesic ti caxae

¹ Ti xcaxa Diose joc'tsaj vucub u ta yosilal ti filisteoetique.

² Ja'uc ti filisteoetique laj stsobic talel ti paleetique xchi'uc ti jt'unvanejetique yo' xi ta sjac'beique: —¿C'usi ta jpastic xchi'uc ti xcaxa Diose? Albun ca'icutic c'uxi xu' xbat jsutescutic ti bu lic talele.

³ Xi laj stac' ti stuquique: —Ti mi ta xasutesic batel ti xcaxa Dios yu'un ti Israele, mu xa ta jeche'uc no'ox ta xasutesic. Yu'un me ta sc'an ac'bel jutebuc sventa slajesobil yo'nton ti Diose. Va'i un, ti vo'oxuc une ta xacolic, ja' to ta xlic avilic c'u cha'al ti mu xayictaoxuc ta stsitsele.

⁴ —¿C'usi ta xcac'becutic ta sventa ti slajesobil yo'nton une? —xi laj sjaq'uic ti filisteoetique. —Vo'bej oro ti co'ol s'elan sloc'obbail jech c'u cha'al ti chacale —xi laj staq'uic ti stuquique—, ti jujun ta xaq'uic ti banquilaletic yu'un ti filisteoetique. Jech xtoc ta xaq'uic vo'ob oro ti co'ol s'elan sloc'obbail jech c'u cha'al junuc ch'o. Yu'un jmoj oyoxuc ta vocol xchi'uc ti banquilaletic avu'unique.

⁵ Ja' yu'un un cha'e, lic meltsanic sloc'obbail ti chacaletique, xchi'uc sloc'obbail ti ch'oetic ti ochem ta soquesel ti jteclume. Ac'beic ta cajal toyol sc'oplal ti Dios yu'un ti Israele. Ja' to nan quic ta xicta sba ta yac'bel vocol ti diosetique, xchi'uc ti osil banomile.

⁶ ¿C'u cha'al toj tsots avo'ntonic ti sta sal xa jech yo'nton jech c'u cha'al ti egipcioetique xchi'uc ti faraone, ti ja' to laj yac' loc'uc batel ti israeletic ti c'alal tsots ac'batic svocolic yu'un ti Dios yu'un ti Israele?

⁷ Aq'uic ta meltsanel junuc ach' carreta. Sa'ic talel cha'cotuc me vacax ti mu'yuc xjochoj ti yabtejebe, ti ta to xac' chu'unuc ti yole. Lot'beic ta chuquel ti carretae. Mu ja'uc xavaq'uic ti tijil ta xbat ti xch'in oltaque, ictabeic comel bu ti svayebique.

⁸ Chechic talel ti xcaxa Dios mi laj taj une. Cajanic muyel ta sba ti carretae. Ti ta xocon ti caxae, tiq'uic ochel ta junuc caxa ti c'usitic meltsanbil ta oro ti ta xavaq'uic ta sventa ti lajesobil o'ntonale. Mi laj une, ch'an utic, xanavuc batel stuc xchi'uc ti carretae.

⁹ Xi me s'elan ti q'uelic lec une: Mi tuc' ta stam ech'el ti carreta ta stuq'uil ti Bet-semes ta yosilal stuque, yu'un ja' svinajeb ti Dios yu'un ti Israele ti ja' laj yac' taluc ti mu no'ox albajuc ti jvocoltique. Ti mi jot o bat une, ta jna'tic ti ma'uc Dios laj yac'botic ti jvocoltique, na'tic no'ox c'usi vul ta loq'uel ta jtojoltic unbi.

¹⁰ Jech laj spasic ti viniquetic taje. Laj yiq'uic talel ti cha'cot me' vacax ti ta to xchu'un ti yolique. C'alal laj sbajic comel ti ch'in vacax ti bu ta xvaye, laj slot'beic ta chuquel ti scarretae.

¹¹ Ts'acal to un, laj scajanic muyel ta carreta ti xcaxa Diose, xchi'uc ti caxa ti bu tiq'uil batel sloc'obbail ti ch'oetic ti meltsanbil ta oroe, xchi'uc sloc'obbail ti chacaletique.

¹² Laj taj une, laj smaquic batel ti vacax ta sbelel ti Bet-semese. Xmu'u'et batel tuc' stamoj batel ti sbee. Mu ja'uc jutebuc oy bu q'uejbuj ta be. Nomtic ts'acalic batel ta patil ta xanbil ti filisteoetic ti c'otic c'alal to sts'aquil yosil ti Bet-semese.

¹³ C'alal yacalic ta tuch' trigo ta stenlejal ti jnaclejetic ta Bet-semese, ti c'alal laj stoy ech'el ti satique, laj yilic ti caxae. Xmuyubajic xa liquel ta j'ech'el.

¹⁴ C'alal c'ot ti carreta ta yosil ti Josuee, lic spajes sba ta xanobal ti vacax ta Bet-semese. Ti bu taje, oy jun muc' ta ton. Va'i un, ti jnaclejetic ta Bet-semese laj sbasic ta si' ste'eltac ti carretae. Lic yaq'uic ta chiq'uel ta smoton Dios ti me' vacaxetique.

¹⁵ Ja'uc ti levitaetique syalesojic xa ox ti caxae, xchi'uc ti jun caxa ti tiq'uil batel ti c'usitic meltsanbil ta oroe. Bat scajanic ta sba jun muc' ta ton. Ti jech c'ac'al taje, ti jnaclejetic ta Bet-semese laj yac'beic chic'bil matanaletic ti Diose, xchi'uc yan milbil matanaletic.

¹⁶ C'alal jech laj yilic ti vo'ob banquilaletic yu'un ti filisteoetique, ta sc'ac'alil no'ox, sutic batel ta Ecrón.

¹⁷ Ti vo'ob sloc'obbail chacal ti meltsanbil ta oro ti laj yaq'uic batel ti filisteoetic ta sventa slajesobil yo'nton ti Diose, ja' yu'unic ti Asdode, ti Gazae, ti Ascalone, ti Gate, xchi'uc ti Ecrone.

¹⁸ Ti c'u yepal ts'ibabil batel snumeroal ta jujucot ch'o ti meltsanbil ta oroe, ja' ti c'u yepal smacoj jteclumetic ti vo'ob banquilaletic yu'un ti filisteoetique. Tsacbil ta venta xtoc ti pojobbail jteclumetique, xchi'uc ti bic'tal jteclumetic ti ch'abal smocale. Ti muc' ta ton ti bu laj scajanic muyel xcaxa ti Diose, xvinaj to avi tana le' ta yosil ti Josué ti oy ta Bet-semese.

¹⁹ Ja'uc ti jnaclejetic ta Bet-semese, ti buch'utic xvechetic ta sq'uelel ti c'usitic tiq'uil ta yut caxae, oy jlom tubbat sc'oplalic yu'un ti Diose. Yu'un chamic lajuneb xchanvinic (70) ta vo' viniquetic. Lic oq'uicuc ti jteclum ta scoj ti c'ot ta stojolic yu'un Dios ti ep cham ti xchi'ilique.

²⁰ Va'i un, ti jnaclejetic ta Bet-semese xi laj yalique: “¿Buch'u xa ono'ox xu' ta spoj sba ta stojol ti Ajvalil ti ja' Ch'ul Diose? ¿Buch'u xa ono'ox ta stsac ta c'op ti c'alal ta xch'ac sba ta jtojoltique?”

²¹ Xi laj stacbeic batel mantal ti jnaclejetic ta Quiriat-jearime: “Ti filisteoetique laj xa sutesic talel ti xcaxa Diose. La' me ich'ic batel.”