1 Samuel 31 - Bible in Tzotzil de Chamula

Ti Saule xchi'uc ti xnich'nabe ta xchamic ta ac'-leto

¹ Ti filisteoetique lic stsaquic ta leto ti Israele, ti jatavic loq'uel ti israeletic yu'une, yu'un yepal ti chamic ta vits Gilboae.

² Ti filisteoetique bat snutsic ti Saúl xchi'uc ti xnich'nabe. Laj smilic ti Jonatane, ti Abinadabe, xchi'uc ti Malquisúae.

³ Laj taj une, ja' xa lic yac'beic yipal ta stsaquel ta leto ti Saule, ti tsots xi'el yayijesat yu'un ti j'ac'-yolobetique.

⁴ Ja'uc le' une, xi laj yalbe ti yajcuch-abtejebale: —Nito loq'uel ti avabtejebe. Ts'apbun xch'a yo' jech mu ta xc'ot ta pasel ti ma'uc ta smilicun ti jeche' viniquetic no'oxe, mi ta xislabanicun ta ilbajinele. Mi ja'uc oy xa bu laj spas ti yajcuch-abtejebale, yu'un batem xa xch'ulel ta xi'el ec. Va'i un, ti Saule laj snit loq'uel ti yabtejebe, lic sts'apbe sba stuc.

⁵ C'alal laj yil ti jcuch-abtejebal ti cham xa ti Saule, lic sts'apbe sba stuc ti yabtejebe eque, ti jmoj cham xchi'uc ti Saule.

⁶ Ti jech c'ac'al taje, ja' jech c'ot ta chamel ti Saule xchi'uc ti xnich'nabe, ti yajcuch-abtejebale, xchi'uc scotol ti svinictaque.

⁷ Ti israeletic ti nacalic ta jot stenlej ti oy ta yeloval sloq'ueb c'ac'al yu'un ti uc'um Jordane, laj yilic ti jatavic xa ti soldado Israele, ti cham xa xtoc ti Saúl xchi'uc ti xnich'nabe. Jech o xal laj yictaic comel ti jteclumetic ti bu nacalique, jatavic batel ec. Va'i un, c'otic ti filisteoetique, lic naquiicuc.

⁸ Ta yoc'omal un, ti filisteoetique bat stamic talel ti c'usitic x'ayan yu'unic ti scontraic ti chamemic xae. Ja' o tey telel laj staic ti Saule, xchi'uc ti oxib xnich'nab ta vits Gilboae.

⁹ Va'i un, laj sbojbeic ech'el ti sjole. Laj stambeic ech'el ti yabtejebe. Laj staquic batel j'al-mantal j'ich'-c'opetic ta sjunlej yosilal ti filisteoetique yo' jech ta xalbeic sc'oplal ta xch'ulna sdiosic ti c'usi c'ot ta pasele, xchi'uc ta stojol ti jteclume.

¹⁰ Ts'acal to un, bat yac'beic yabtejeb ti Saúl ta xch'ulna ti Astartee. Laj sjoc'anbeic ti sbec'tal ta smocal ti jteclum Bet-sane.

¹¹ C'alal laj ya'iic ti jnaclejetic ta Jabes ti oy ta Galaad ti va'i s'elan laj spasic ti filisteoetic ta stojol ti Saule,

¹² scotol ti tsatsaquil viniquetic xa'i sbaique, laj sco'oltas sjol yo'nton xchi'uquic. Sjunul ac'ubal xanavic batel, bat syalesic talel sbec'tal ti Saule xchi'uc ti xnich'nab ti joc'ol ta smocal ti jteclum Bet-sane. Va'i un, sutic ech'el ta Jabes ti bu laj xchic'beic ti sbec'tale.

¹³ Laj taj une, laj smuquic ti scomelal ta yolon jtec' te' ti oy ta Jabese. Ts'acal to un, vucub c'ac'al sjalil laj yicta yotic.