1 Samuel 30 - Bible in Tzotzil de Chamula

Ti amalecitaetique tsalbil ta xc'otic yu'un ti Davide

¹ Ta yoxibal c'ac'al un, c'alal c'otic ta jteclum Siclag ti David xchi'uc ti svinictaque, ja' o laj yilic ti ech'ic xa ox ti amalecitaetic ta Négueve. Laj xa stsac ta leto ta stubbel sc'oplal ti Siclage, ti xvo'o'et no'ox ti sc'ac'al yu'unique.

² Ma'uc no'ox taje, laj xchuquic batel ti antsetique, scotol ti ololetique, xchi'uc ti buch'utic staoj xa sva'lejique, ac'o mi mu'yuc buch'u laj smilic.

³ C'alal c'ot ti David xchi'uc ti svinictac ta jteclume, laj yilic ti chic'bil xae, ti chucbil bat ti yantsilelique, ti squerem nich'onique, ti yantsil nich'onique.

⁴ Lic smil sbaic ta yoq'uitael ja' to ti c'uxi lubtsajique.

⁵ Ja' jech xtoc chucbil bat xchibal yajniltac ti Davide, ja' ti Ahinoam ti liquem talel ta Jezreele, xchi'uc ti Abigail yajnil to ox ti Nabal ti nacal ta Carmele.

⁶ Ti Davide mu xnel ta xa'i ti svocole, yu'un sc'anuc xa ya'i pujbatuc ton yu'un ti svinictac ti c'u yepal xchi'uque. Scotolic ech'em chopol ta xa'iic ti jech c'ot ta stojol ti xnich'nabique. Manchuc mi jech un, lic pas ta muc' yo'nton ta stojol ti Dios yu'une.

⁷ Va'i un, xi laj yalbe ti Abiatare, xnich'on ti Ahimeleque: —Avocoluc, ich'bun talel ti jayal saquil luchbil c'u'ile. C'alal laj yich' batel ti Abiatar ti jayal saquil luchbil c'u'il ta stojol ti Davide,

⁸ ti stuc une xi lic sjac'be ti Diose: —¿Mi tsots sc'oplal xbat jlubtsan ta be ti voletel j'eleq'uetique? ¿Mi ta to jta ta be? Xi tac'bat yu'un ti Diose: —Ba lubtsano ya'i. Xata to ta be. Pojo talel ti buch'utic ic'bilic batic ta chuquele.

⁹ Ta anil no'ox laj stam batel sbe ti David xchi'uc ti vaquib ciento ta vo' viniquetic ti xvoletic batel xchi'uque. C'alal c'otic ta uc'um Besore, comic jlom ti svinictaque.

¹⁰ Ja'uc ti Davide laj stam batel sbe xchi'uc ti chanib ciento (400) ta vo' svinictaque. Ti lajunvinic ta vo' ti comique, mu'yuc xa xtuch' yu'unic ti uc'um Besor ta scoj ti lubemic xae.

¹¹ Lec xa ox jliquel yech'el un, laj staic jun egipcio vinic ti ta stenlejale. Yic'ojic batel ta stojol ti Davide, ti xi s'elan ba'yel laj smalq'uinique, laj yac'beic yuch' vo'.

¹² Laj yac'beic cha'xet' pan ti meltsanbil ta icuxe, xchi'uc cha'bej pan ti meltsanbil ta taquintasbil uvae. C'alal laj xa ox sve' ti egipcio vinique, lic tsatsubuc, yu'un yoxibal xa c'ac'al, yoxibal ac'ubal ti mu'yuc ve'eme, ti mu'yuc c'usi yuch'oj jutebuque.

¹³ Va'i un, xi jac'bat yu'un ti Davide: —¿Buch'u ti avajvale? ¿Bu liquemot talel? Xi laj stac' ti egipcioe: —Egipcioun, smosovun jun amalecita. Oy xa ta yoxibal c'ac'al, laj stenun comel ti cajvale, yu'un li'ipaj.

¹⁴ Yu'un li'aycutic ta yu'ninel ti c'usitic x'ayan yu'unic ti cereteotic ti nacalic ta yolon ti yac'ol xocon smaleb c'ac'al yu'un ti Judae. Ma'uc no'ox taje, li'aycutic ta yu'ninel ti c'usitic x'ayan yu'unic ti buch'utic nacalic ta Calebe. Ja' jech xtoc laj jumbecutic sc'ac'al ti jteclum Siclage.

¹⁵ —¿Mi xac'an xavic'un batel ti bu oyic ti voletel j'eleq'uetic taje? —xi laj sjac' ti Davide. Ti egipcioe xi laj staq'ue: —Mi j'ech'el ta xava'an ta rextico ti Dios ti mu xamilune, ti mu ja'uc ta xavac'un batel ta yoc ta sc'ob ti cajval to oxe, ta xquic'ot batel ti bu oyique.

¹⁶ Ic'van ech'el ti bu oy ti j'eleq'uetique, ti busul ta osiltic ta xve'ic ta xuch'ic vo' laj staique. Ta spasic q'uin ta sventa ti c'usi ay yelc'anic talel ta yosilal ti filisteoetique xchi'uc ti ta Judae.

¹⁷ Va'i un, ti Davide sob lic stsac ta leto ti yich'oj sjunul c'ac'al yu'une, ja' to ti c'uxi tsuts yu'un ta j'ech'ele. Mu'yuc laj sta ta milel chanib ciento (400) ta vo' jva'lej viniquetic ti cuch to yu'unic scajlebinel ti scamelloic ti jatavic ech'ele.

¹⁸ Ti c'usitic laj yelc'anic ech'el ti amalecitaetique, laj spoj talel ti Davide. Laj spoj talel ti cha'vo' yajnil eque.

¹⁹ Mi jutebuc oy c'usi bat ta elc'anel yu'unic ti c'usitic pojbat batele, mi ja'uc junuc ti ololetique, mi ja'uc ti muc'tic xae. Chapal scotol laj yich' David ti c'usi pojbat batele.

²⁰ Ja' jech xtoc ti Davide laj stsob ta yu'ninel scotol ti chijetique, ti vacaxetique, ti ta xalic ti ja' xa scanal David ti buch'utic smacojic batele.

²¹ Laj taj une, ti Davide sutic batel ta uc'um Besor ti bu comemic ti lajunvinic (200) ta vo' ti mu'yuc xa xchi'invanic batel ta scoj ti lubemic xa ta j'ech'ele. Calal laj yilic ti David xchi'uc ti svinictaque, loc' talel snupic ta be. Nopaj ech'el ti Davide, ti laj sc'oponane.

²² Ja'uc le' une, oy jlom svinictac ti mu'yuc xch'ulelique, ti chopol yo'ntonique, lic sva'an sbaic ta yalel ti mu'yuc la ta xich'ic spuculalic ti c'usitic laj staic talel ti buch'utic mu'yuc x'ay chi'invanicuque, ti ja' no'ox la ac'o yiq'uic sutel ti yajnilic ti xnich'nabtac ti jech pojbatic talele.

²³ Manchuc mi jech un, xi laj yal ti Davide: —Mu jechuc xapasic, jchi'iltac. Ja'uc le'e, ja' laj yac'botic Dios ti c'usi laj jtatic talele. Laj stic' sba ta spojelotic. Laj yac'botic ta coc ta jc'obtic ti jvoletel j'eleq'uetic ti laj yilbajinotique.

²⁴ Ti va'i s'elan ta xavalique, mu'yuc buch'u ta xchiquinta ti ac'opique. Yu'un co'ol ta xich' ch'aquel ti c'usi laj jtatic ta stojol ti buch'utic ayic ta ac'-letoe, xchi'uc ti buch'utic comic ta xchabiel ti abtejebale.

²⁵ (Ti c'uxi lic talel ta vo'ne yu'un ti israeletique, ja' jech ta spasic ti israeletic avi tana li'e. C'ot ta jun mantal yu'unic.)

²⁶ C'alal c'ot ta jteclum Siclag ti Davide, jaych'ac ti c'usi laj spojique, laj stac batel ta stojol ti moletic yu'un Judae, ja' ti buch'utic lec xil sbaic xchi'uque, ti xi laj yal ech'el ti c'ope: “A'yio ava'iic, jujuti'uc ti uni matanal ti laj jpojbecutic ti yajcontratac ti Diose.”

²⁷ Laj stac batel matanal xtoc ta stojol ti buch'utic nacalic ta Betele, ti oyic ta Ramote, ti oyic ta Négueve, ti nacalic ta Jatire.

²⁸ Ma'uc no'ox taje, laj stac batel ta stojol ti buch'utic nacalic ta Areore, ti oyic ta Sifmote, ti oyic ta Estemoae.

²⁹ ti oyic ta Racale. Ma'uc no'ox taje, laj stac batel matanal xtoc ta stojolic ti buch'utic oyic ta jteclumetic ti oy ta yosilal Jerahmeele, ti oyic ta steclumalic ti quenitaetique,

³⁰ ti oyic ta Hormae, ti oyic ta Corasane, ti oyic ta Ataque,

³¹ ti oyic ta Hebrone, xchi'uc ta scotol ti bu laj ech'uc xchi'uc ti svinictaque.