1 Samuel 3 - Bible in Tzotzil de Chamula

Ta xtae ta iq'uel yu'un Dios ti Samuele

¹ Ti querem Samuele yac'ojbe yipal ti yac'oj sba ta tunel ta stojol ti Dios ti bainbil yu'un ti Elie. Ti jech yorail ta vo'ne taje, snom staj ta j'ech'el ti ta xc'ot ta pasel ti oy buch'u ta xc'oponat yu'un ti Diose. Snom staj ta j'ech'el ti oy buch'u ta xil ti oy c'usi ta x'ac'bat yil yu'un ti Diose.

² Ja'uc le' une, oy jun c'ac'al ti c'alal lic xa macuc ti sate, ti mu xa xil lec osil ti Elie, ja' o ta xvay ta sna.

³ Yan ti Samuele xpuch'anoj sba ta xvay ta xch'ulna ti Dios ta sts'el ti bu bejel xcaxa ti Diose. Ja'uc ti lamparae staoj yav tsanal ti ta ch'ul cuartoe.

⁴ Va'i un, ti Diose xi lic biiltasvanuque: —¡Samuel! —¡Li'une! —xi laj staq'ue.

⁵ Bat ta anil ti bu oy ti Elie, ti xi laj yalbee: —Li'un xae, ¿c'usi ta xaval? —Ali mu'yuc laj cavtaot une —xi laj stac' ti Elie—. Batan, ba vayan. Va'i un, ti Samuel une bat, cha'vayuc.

⁶ Ja'uc ti Dios une xi cha'avtavane: —¡Samuel! Va'i un, ti Samuele lic ta anil, bat ti bu oy ti Elie, ti xi c'ot yale: —Li'un xae, ¿c'usi ta xaval? —Ali mu'yuc xacavtaot une, nich'on —xi laj stac' ti Elie—. Batan, ba vayan.

⁷ Yu'un ti Samuele mu xojtiquin buch'u ti Diose, yu'un mi ja'uc yac'oj sba iluc ta stojol.

⁸ Ta yoxibal velta un, avtaat yu'un Dios ti Samuele. Ja'uc le' une, lic batel ti xi c'ot yalbe ti Elie: —Li'un xae, ¿c'usi ta xaval? Ti Elí une, vul ta yo'nton ti ta x'avtaat yu'un Dios ti quereme.

⁹ Xi laj yalbe jech c'u cha'al li'e: —Batan, ba vayan, mi ta sbiiltasot yan velta ti Diose, xi xatac'bee: ‘C'opojan, ts'etel xchiquin ta xa'i ac'op ti avajtunele.’ Va'i un, ti Samuele bat spuch'an sba ta svayeb.

¹⁰ Ts'acal to un, c'ot ti Diose, ti va'al uni jliqueluque, ti laj sbiiltas jech c'u cha'al ta ba'yele: —¡Samuel! ¡Samuel! —xi ti Diose —C'opojan, ts'etel xchiquin ta xa'i ti c'usi ta xavalbe ti avajtunele —xi laj stac' ti Samuele.

¹¹ Xi albat yu'un ti Diose: —Oy c'usi ta xlic jpas ta stojol ti Israele, ti ta xc'uxub xchiquin scotolic ti buch'u ta xa'iique.

¹² Ti jech c'ac'al taje, ta xc'ot ta pasel cu'un scotol jech c'u cha'al calojbe ya'i ti oy c'usi ta xc'ot ta pasel ta stojol yalab xnich'nab ti Elie.

¹³ Jt'abojbe xa ono'ox ya'i ti j'ech'el ta jtsits ti yalab xnich'nabe ta scoj ti sna'oj xa ono'ox ti oy c'usi chopol laj spasique, ti laj xa sbisicun ta cotol chaval ti xnich'nabe, ti mu ja'uc oy c'usi ta xalbee.

¹⁴ Ja' yu'un un, laj xa jva'an jba ta yalbel ta jamal ta scontrainel ti mu lecuc ta xquil xnich'nab ti Elie. Mi ja'uc ti milbil matanale, mi ja'uc ti yan matanal ta xtub ti smulic ti c'usi chopol laj spasique.

¹⁵ Laj taj une, jech ti Samuele bat vayuc, ja' to ti c'uxi sacub ta yoc'omale, lic sjam sti'tac xch'ulna ti Diose. Ti c'usi laj yil ti jambat sba sat ti Samuele, ta xi' ta yalbel ti Elie.

¹⁶ Ja'uc le' une, avtaat yu'un ti Elie, ti xi albate: —¡Nich'on Samuel! —¿C'usi ta xaval? —xi laj stac'bee.

¹⁷ Xi jac'bate: —¿C'usi laj yalbot ti Diose? Avocoluc, albun ca'i ta jamal, mu ts'ijluc no'ox ta xacom. ¡Tsots ta stsitsot ava'i ti Dios mi ts'ijil no'ox ta xacome!

¹⁸ Ja'uc ti Samuele xchapet lic yal scotol ti c'usi sc'oplale. Mu ja'uc jutebuc yo'nton no'ox sna', ti xi tsots avan liquel ti Elie: —¡Yu'un ja' Dios ti stuque! ¡Ac'o c'otuc ta pasel yu'un ti c'usi lec ta xa'ie!

¹⁹ Ja'uc ti Samuele ch'i, coltabil yu'un ti Diose. C'ot ta pasel yu'un scotol ti c'usi yaloj ti stuque.

²⁰ C'alal to ta Dan xchi'uc c'alal to ta Beerseba ti vinaj ta scotol Israel ti ja' jun bats'i j'alc'op yu'un Dios ti Samuele.

²¹ Ja'uc ti Diose lic xcha'ac' sba iluc ta Siloe, yu'un ja' to tey ta svinajes ti sc'op ta stojol ti Samuel ti bu taje.