1 Samuel 29 - Bible in Tzotzil de Chamula

Ti filisteoetique mu xac' lec sjol yo'ntonic ta stojol ti Davide

¹ Ti ta Afec jteclume, laj stsob sbaic scotol yajsoldadotac ti filisteoetique. Ja'uc ec ti israeletique laj slaman sbaic ta tsoblej ta sat vo' ti oy ta Jezreele.

² C'alal ti banquilaletic yu'un ti filisteoetic ta stacanic ech'el ti yajsoldadotaque, mi ta vo'vinic, mi ta mil, ti ta xbatic yu'une, jech ti David xchi'uc ti svinictaque tijilic batel ta spat xchi'uc ti Aquise.

³ Ja'uc ti banquilal jpas-mantaletic yu'un ti soldado filisteoetique, xi laj sjac'beic ti Aquise: —¿C'usi tal spasic ti hebreoetic li'e? Xi laj stac' ti Aquise: —Li'e, ja' David, yajtunel to ox ti Saúl ti ja' ajvalil yu'un ti Israele. Oy xa sjabilal ti laj jchi'in talele. Ti c'uxi lic jchi'in talele, mu'yuc to c'usi chopol jtaojbe talel avi c'ac'ale.

⁴ Ja' no'ox un, ti banquilal jpas-mantal soldado filisteoetique, soc sjolic yu'un ti Aquise, ti xi laj yalbeique: —Albo ya'i ti ac'o loc'uc batele, ti bat chotluc ta yavil ti bu laj avac'bee. Mi ja'uc chba xchi'inotic ta ac'-leto, naca mi joybijuc ta cajcontratic ti c'alal yacalotic ta ac'-letoe. Xu' nan ti xc'ot la ta pasel ti chlic smil ti cajsoldadotic li'e, yo' jech ta sta ti cajal ta xc'ot sc'oplal yu'un ti Saule. ¡Mu xa ono'ox cha'bel unbi!

⁵ Yu'un ja' ono'ox ti Davide le'e ti xi ta xq'uejintabat ti sc'oplale: ‘Jmil no'ox ta vo' laj smil ti Saule. Ja'uc ti Davide, lajunmil ta vo' laj smil.’

⁶ Va'i un, ti Aquise xi laj yalbe ti David ti c'alal laj sta ta iq'uele: —¡Ta melel, ti jech cuxul ti Diose, jna' lec ti tuq'uil vinicote! Ti c'u s'elan laj apas talel ti bu vololotique, lec laj quil. Ti c'u xa sjalil ti lic jchi'in jbatic talele, mu'yuc c'usi chopol ti laj jtabot talele. Ja'uc le' une, mu lecuc ta xilot ti banquilal jpas-mantal soldado filisteoe.

⁷ Avi tana li' une, junuc avo'nton sutan ech'el yo' jech mu xaliquesbe sc'ac'al yo'nton.

⁸ Xi laj stac' ti Davide: —¿C'usi laj jpas? ¿C'usi laj jpas avil un cha'e, Jcuch Abtel? ¿Mi yu'un oy c'usi chopol laj atabun ti c'u xa sjalil laj jchi'in jbatic talele, ti jech mu xa xajchi'inotcutic ta stsaquel ta c'op ti avajcontrae?

⁹ Ti Aquise xi laj staq'ue: —Jna' lec ti jun avutsil jech c'u cha'al junuc yaj'ánjel ti Diose. Ja'uc ti banquilaletic yu'un ti filisteoetique, c'ot ta nopel yu'unic ti mu sc'anic ti ta xatic' aba ta ac'-letoe.

¹⁰ Ja' yu'un un cha'e, ti vo'ote xchi'uc ti avajtuneltac ti xchi'inojot talele, sob ta xalic ta xatam batel abeic mi sacub oc'ome.

¹¹ Ja' yu'un un, ti Davide xchi'uc ti svinictaque, sob xa liquic ta yoc'omal ti sutic batel ta yosilal ti filisteoetique, ti c'alal ja' o xvoletic batel ti soldado filisteoetic ta stuq'uil Jezreele.