1 Samuel 27 - Bible in Tzotzil de Chamula

Oy ta yosilal filisteoetic ti Davide

¹ Manchuc mi jech un, xi ta snopilan ono'ox ti Davide: “Mu ta sjaliluc ti oy bu jun c'ac'al ta xismil ti Saule. Ti c'usi xu' ta jpase, ja' lec ta xijatav batel ta yosilal ti filisteoetique yo' jech ch'an xiyut ti Saule, yo' jech mu teyuc no'ox ta xisa'ilan ta yosilal ti Israele. Ja' jech ta jq'uej jba loq'uel ta yoc ta sc'ob.”

² Va'i un, ti Davide xchi'uc ti vaquib ciento (600) ta vo' svinictac ti xchi'inojane, laj stam batel sbeic yo' jech ta xbat yac' sbaic ta tunel ta stojol ti Aquis xnich'on ti Maoque, ajvalil yu'un ti jteclum Gate.

³ Ti David une xchi'uc ti svinictaque naquiic ta Gat ta steclumal ti Aquise. Slecoj-lecoj aq'ue nacliicuc ti bu laj svol sbaic ta jujuchop xchi'uc ti yalab xnich'nabique. Ti Davide laj yic' ech'el xchibal ti yajniltaque, ja' ti Ahinoam ti liquem talel ta Jezreele, xchi'uc ti Abigail ti yajnil to ox ti Nabal ti liquem talel ta Carmele.

⁴ C'alal laj ya'i ti Saúl ti bat xa nacluc ta yosilal filisteoetic ti Davide, laj yicta sba ta snutsel.

⁵ Ja'uc ti Davide xi laj yalbe ti Aquise: —Mi lec ta xavilun ta aba ta asate, Jcuch Abtel, ta xajc'anbot vocol ta atojol ti ac'o ave ati' ti naclucun ta junuc jteclum yu'un ti muc' ta lume. Mu xc'ot o ti jmoj nacalot ta muc' ta lum ti bu chotol ta xapas mantal xchi'uc ti avajtunel li'e, Jcuch Abtel.

⁶ Ti jech c'ac'al taje, ti Aquise laj yac'be yich' ti jteclum Siclage. Jech o xal ti jteclum Siclag avi tana le'e, c'otem to ta sventa ti Judae.

⁷ Naqui jun jabil xchi'uc chanib u ti David ta yosilal ti filisteoetique.

⁸ Ta xloq'uic ech'el xchi'uc svinictac ta spojbel ti c'usitic x'ayan yu'unic ti jnaclejetic ta Guesure, ti ta Guezere, xchi'uc ti ta Amaleque. Ti slumalic ti bu taje, ja' ta xlic ta Telaím, ti x'ech' ta Shure, ta xc'ot c'alal to Egiptoe.

⁹ Naca sbalalinic no'ox ta leto ti jteclumetic taje. Laj smilic ta viniquetic, ta antsetic. Ma'uc no'ox taje, naca spojic no'ox ech'el ta yelc'anel ti chijetique, ti vacaxetique, ti burroetique, ti camelloetique, xchi'uc c'alal ta c'u'iletic. Ts'acal to un, ta sutic ech'el ta Aquis ti bu nacalique.

¹⁰ Le' une, xi ta xjac'bat yu'une: “¿C'usi jteclumal laj atsaquic ta leto avi li'e?” Xi ta staq'uilan ti Davide: “Ay jtsaccutic ta leto ti jnaclejetic ti nacalic ta yolon ti yac'ol xocon smaleb c'ac'al yu'un ti Judae.” Mi mo'oje, xi ta staq'uilan ti Davide: “Ay jtsaccutic ta leto ti jnaclejetic ti nacalic ta yolon ti yac'ol xocon smaleb c'ac'al yu'un ti Jerahmeele.” Mi mo'oje, “Ay jtsaccutic ta leto ti jnaclejetic ti nacalic ta yolon ti yac'ol xocon sloq'ueb c'ac'al ti oy ta yosilal ti quenitaetique.”

¹¹ Mi junuc ta vinic ta ants cuxul ta scomtsan ti Davide yo' jech mu ta xc'ot ta pasel ti oy buch'u ta xbat yal ta jteclum Gat ti c'usi ta spas ti Davide. Ja' jech laj spasilan ti c'u sjalil naquiic ta yosilal ti filisteoetique.

¹² Ti Aquise spatoj yo'nton ta stojol ti Davide, yu'un xi ta snope: “Pisile, joybij xa ta scontrainel israeletic ti Davide, ta xcom o ta cajtunel ti jech ta spas le'e.”