1 Samuel 25 - Bible in Tzotzil de Chamula

Cham ti Samuele

¹ Cham ti Samuele. Scotol ti israeletique laj stsob sbaic ta yoq'uitael ti jech chame. Laj smuquic ta Rama ti bu oy ti snae. Laj taj une, ti Davide bat ta sbajtical banomil yu'un Parán.

Ti Abigaile ta snijan xchiman sba ta stojol ti Davide

² Ti ta Maone, oy jun jc'ulej vinic ti oy oxmil (3,000) ta cot ti xchije, jmil (1,000) ta cot stentsun. Oy sbolomal ta jteclum Carmele ti bu nopem xa'i ta xbat sloc'be stsotsil ti xchijtaque.

³ Nabal sbi ti vinic taje, ti liquem talel snitilul ta stojol ti Calebe. Ti Nabal taje, ja' jun pucujil vinic ti mu xa'ibe xchiquinale. Ja'uc ti Abigail ti ja' yajnile, toj lec baxbol, toj c'upil sba ta j'ech'el.

⁴ C'alal oy ta sbajtical banomil ti Davide, laj ya'i sc'oplal ti Nabal ti yacal ta sloc'be stsotsil ti xchije.

⁵ Va'i un, ti Davide xi laj yalbe ya'i lajunvo' querem viniquetic ti laj stac batele: Batanic ta stojol ti Nabal ti oy ta Carmele. Chabanuc xavalbe ya'i ta jventa,

⁶ ti xi xcholet xavalbe ya'ie: “Mu'yucuc la c'usi xal avo'nton cuts' calal xchi'uc ti avalab anich'nabe, xchi'uc scotol ti c'u yepal oy ta anae.

⁷ Ca'binoj ti li' syaquilot ta sloc'bel stsotsil ti achije. Ja' jech xtoc xana' nan ti avajq'uel-chijtaque ay xchi'inuncutic ti c'alal oyuncutic to ox ta lum Carmele. Ti jech xchi'inojuncutique, ta j'ech'el mi ja'uc laj jq'uilbajincutic. Mi ja'uc oy c'usi laj jpojbecutic.

⁸ Jac'bo ava'i ti avajq'uel-chijtaque, xu' ta xalbot ava'i ti stuquic ti ja' melele. Ja' yu'un un, avocoluc, c'uxubajuc avo'nton yu'un ti queremetic li'e. Lec xa van yorail ti c'ot ta loq'uel ta atojole ti ac'buncutic ti c'usi ta xtun cu'uncutique jech c'u cha'al ti c'usi ta xtun yu'un ti Davide, ja' ti co'ol s'elan anich'onun ya'yele.”

⁹ Smosovtac ti Davide batic, bat yalbeic ti Nabal ti a'yej taje. Laj smalaic ti c'u s'elan ta xtac'batic sutel talele.

¹⁰ Ja'uc ti Nabal une xi xjajet laj stac' sutel ti c'ope: —¿Buch'u ya'yel ti Davide? ¿C'u to ono'ox s'elan ya'yel xnich'on ti Isaie? ¡Yu'un ti c'ac'al avi tana li'e, ep ti mosoviletic ta xicta comel ti yajvalique, ti jatvil ta xloq'uic ech'ele!

¹¹ ¿Mi yu'un yac'touc la yaloj ta xcac' ech'el ti ve'lile, ti uch'bolale, ti beq'uet ti laj yich' meltsanel ta sventa ti cajloc'-tsotsetic ta xcac'be ech'el ta stojol ti buch'u mu xcojtiquine, ti mu jna' bu liquem talele?

¹² Smosovtac ti Davide lic xcha'tam ech'el ti sbeique. C'alal c'otic ta stojol ti David une, laj yalbeic ti c'u s'elan laj yal ti Nabale.

¹³ Va'i un, ti Davide xi laj yalbe ti svinictaque: —¡Chuquino avabtejebic acotolic! Scotol ti svinictaque xchi'uc ti Davide lic xchuquinic ti yabtejebique. Xchi'inoj batel chanib ciento (400) ta vo' svinictac, chib ciento (200) ta vo' com xchabiic ti c'usi oy yu'unique.

¹⁴ Ja'uc le' une, oy jun ta scotol smosov ti Nabale ti xi bat yalbe ya'i ti Abigail yajnil ti Nabale: —Ta sbajtical to banomil, laj stacbe talel chabanuc cajvalcutic ti Davide. Ti stuc une mu'yuc stuq'uil ti sc'op laj stac'be ech'ele.

¹⁵ Ja'uc ti viniquetic le' une lec laj spas sbaic ta jtojolcutic ti c'u sjalil lixanavcutic xchi'uquic ta osiltique. Mi ja'uc oy bu laj yilbajinuncutic. Mi ja'uc oy c'usi laj spojbuncutic.

¹⁶ Yu'un ti stuquique c'ajomal no'ox laj xchabiuncutic ta c'ac'al ac'ubaltic jech c'u cha'al ti jchijcutique.

¹⁷ C'u stu un, ti amalale, toj chopol ti yuni talele, mu tabaj ye ta c'oponel. Nopo ava'i c'usi stac' ta xapas un. Ta jbel sc'oplal ma' le' une, oy c'usi chopol ta xc'ot ta stojol xchi'uc ti yalab xnich'nabe.

¹⁸ Ta jech to yepal, ti Abigaile ta anil no'ox lic xchapan chib ciento ta jbej pan, cha'bej yavil vino ti meltsanbil ta nucul ti noj ta vinoe, vo'cot vobil chij, cha'vinic ta bis sbisol bacubtasbil trigo, vo'vinic ta jbej pan ti pasbil ta taquintasbil uvae, lajunvinic ta jbej pan ti meltsanbil ta taquintasbil sat icuxe. Scotol laj scajan batel ta burro.

¹⁹ Xi laj yalbe ti smosovtaque: —Jelavanic batel, ts'acal to tijil ta xital ta apatic ec. Mu ja'uc jutebuc laj yalbe ti smalal ti va'i s'elan taje.

²⁰ Ta mucul laj scajlebin ech'el sburro ti Abigaile. Yal ech'el ta vitstic. Ta jech to yepal, yil ti xvoletic no'ox talel ti David xchi'uc ti svinictac ti tal nupatuc ta bee. Bat snup ta be ec.

²¹ Snopilan xa talel ti Davide, ti ta jeche' no'ox laj stuc'ulanbe lec ti c'usi oy yu'un ti Nabal ta sbajtical banomile, ti c'alal mu'yuc c'usi laj yu'ninbe ti c'usi x'ayan yu'une. Ti Nabale ta stoj sutel ta chopol ti c'usi lec laj yich' pasbele.

²² Xi laj yal ti laj sva'an sba ta rexticoe: “¡Tsotsuc stsitsun ti Diose ti mi mu stsuts cu'un oc'om cha'ej scotol ti queremetic ti ja' snitilultaque!”

²³ C'alal ti Abigail laj yil ti Davide, yal ta burro ti cajal batele. Snupilan xa banomil laj spatan sba ta lumtic svinajeb ti ta sbic'tajes sba ta stojole.

²⁴ Ts'acal to un, lic squejan sba ta stojol ti xi laj yalbee: —¡Ti stoyobbaile, lamluc c'otuc ta jba ta jtojol! Ta jc'anbot vocol ta atojol ti a'yibun ti jc'opojel jti'inel ta yalel ti jrazone.

²⁵ Mu xavac' ta avo'nton stoyobbail ti Nabale, ti c'alal uni pochan vinic no'ox xa'i sbae. Ta sc'an ti ich'bil ta muc' ta xc'ote, ti c'alal jech ono'ox sc'oplal ta melele. Yu'un jech ono'ox stalel ti mu'yuc stuq'uil ti c'usi ta spase. Ti avajtunel li'e mu'yuc laj yil ti laj atac batel ti avajmosove.

²⁶ Ta xcal ti vu'une, ta j'ech'el laj van yac' anop ti Diose ti mu xamal ti ch'ich'e, ti ta xachapan atuque. ¡Ti buch'u ta xayilbajinote, ti buch'u ta scontrainote, jechuc c'otuc ta stojol yu'un Dios jech c'u cha'al ti c'usi ta xc'ot ta stojol ti Nabale!

²⁷ Avocoluc avi tana une, ti matanal quich'oj talele, ac'o yich' ch'aquel ta stojol ti amosovtac ti xchi'inojot talele.

²⁸ Ch'aybo smul scolo' ti avajtunel li'e. Jbel sc'oplal ta j'ech'el ta stic' sba ti Dios ta atojole yo' jech mu xtub ac'oplalic ta spasel mantal xchi'uc ti anitilultaque, ti atic'oj aba ta letovajel yu'un ti Diose. Ti c'u sjalil cuxulote, mu'yuc c'usi chopol ta xc'ot ta atojol.

²⁹ Mi oy buch'u xbitet ta snutselot ti ta snop ti ta smilote, ti acuxleje, chabibil ta squeoval yolon yoc sc'ob ti Ajvalil ti ja' Diose. Ja'uc sc'oplal ti avajcontrae, ta xtenatic batel yu'un Dios jech c'u cha'al ti buch'u ta sten batel ti ton ta jimich'e.

³⁰ Ja' yu'un un cha'e, ti c'alal ta svinajes ti Dios ti laj scaj'al ac'oplal ti scotol lec ta xc'ot ta pasel ta atojol yu'une, ta xlic sva'anot ta banquilal yu'un ti Israele.

³¹ Va'i unbi, mi ja'uc ta stij ajol abaquil yu'un ti oy buch'u ch'abal smul laj amile, ti atuc lic atic' aba ta xchapanele. C'alal ta xc'ot ta pasel ti lec ta xata yu'un ti Diose, mu me xach'ay ta avo'nton ti avajtunel li'e.

³² Ti Davide xi laj stac'bee: —Lequil c'optabiluc ta j'ech'el ti Ajvalil Dios yu'un ti Israele, ti laj stacot talel ta snupelun ta bee.

³³ Lequil c'optabiluc c'otan ec ti oy lec snopobil avu'une, ti tal apajesun ta syalesel ti coc jc'obe, ta stiq'uel jba jtuc ta xchapanel ta smalel ti ch'ich'e.

³⁴ Xcaltic ma' le' une, ta jva'an ta rextico ti Ajvalil Dios yu'un ti Israele, ti ja' stuc tal spajesun yo' jech mu xaquilbajinote. Ti manchucuc laj asuj aba ta snupelun ta bee, mi ja'uc xa junuc svinictac Nabal cuxul ma' ti oc'om jechuque.

³⁵ Ti c'usitic yich'oj batel ti antse, ts'acal to un, laj yac'be yich' ti Davide, ti xi albate: —Junuc avo'nton sutan batel ta ana. Yu'un laj xa avil ta aba ta asat ti laj jchiquintabot ti ac'ope, ti tac'bil c'ot ti c'usi laj ac'anbune.

³⁶ C'alal sut ech'el ti Abigail ti bu oy ti Nabale, c'ot sta ti co'ol s'elan junuc ajvalil syaquil ta spas q'uine. Siquet no'ox banomil ta xa'i xchi'uc yacubem ta j'ech'el. Jech o xal un, ti stuque mu'yuc c'usi laj yal. Ta yan to c'ac'al, oy c'usi laj yalbe.

³⁷ Ta yoc'omal un, ti c'alal laj xa ox xcux ti Nabale, jamal laj yal ti Abigail ti c'usi c'ot ta pasele. Toj alubel c'ot ti Nabale, ti co'ol s'elan junuc ton ti te' xuban come.

³⁸ Slajunebal xa ox c'ac'al yech'el ti va'i s'elan taje, tal tsitsatuc ta ach' yu'un ti Diose, ti cham o ta j'ech'el xchi'uc ti Nabale.

³⁹ Xi laj yal ti David ti c'alal laj ya'i ti cham xa ti Nabale: —¡Lequil c'optabiluc c'otuc ta j'ech'el ti Diose, ti ja' stuc laj spac sutel ti c'usi chopol laj spasbun ti Nabale! ¡Ja' laj yac'bun slequilal jol jbaquil ti mu'yuc jpasbe ti c'usi chopole, ti laj scajanbe ta sba Nabal stuc ti c'usi chopol laj spas ti Nabale! Ts'acal to un, bat t'abbatuc ya'i ti Abigaile ti ta x'iq'ue yu'un ti Davide.

⁴⁰ C'alal c'otic ta Carmel smosovtac ti Davide, xi laj yalbeic ya'i ti antse: —Ti Davide laj stacuncutic talel li' ta atojole, ti tal calcutic ava'i ti ta xayajnilanote.

⁴¹ Snupilan xa banomil laj spatan sba c'alal to lumtic ti Abigaile, svinajeb ti ta x'ich'van ta muq'ue, ti xi laj staq'ue: —Yajtunelucun ti David un cha'e. Chapalun xa ta spocbel yacantac smosov ti cajval ti mi jech oy ta yo'nton ta spasun ta mantale.

⁴² C'alal laj yo'nton ta yalel ti va'i s'elan taje, lic xchapan sba ta anil, xchi'uc vo'ob yajmosov antsetic, caji batel ta sburro ta stamel batel sbe ta spatic xchi'uc yajtacbolaltac ti Davide, ti nupij ts'aquij xchi'uc ti Davide.

⁴³ Nupij ts'aquij xtoc ti David xchi'uc ti Ahinoam ti nacal ta Jezreele. Ti xchibalique c'ot ta yajniltac.

⁴⁴ Ja'uc ti Paltí xnich'on ti Lais ti liquem talel ta Galime, ac'bat yajnilin yu'un Saúl ti Mical ti ja' yantsil nich'one, yajnil to ox ti Davide.