1 Samuel 24 - Bible in Tzotzil de Chamula

Ti Davide mu smil ti Saule

¹ C'alal laj xa yo'nton ta snutsel filisteoetic ti Saule, albat ya'i ti oy xa ta sbajtical banomil yu'un En-gadi ti Davide.

² Va'i un, ti Saule lic st'uj oxmiluc (3,000) ta vo' viniquetic ta scotol ti israeletique, bat xchi'uc svinictac ta sa'el David ta lican toyol ch'entic.

³ Nopol xa ech'el ta nail ch'en ti bu tiq'uil ti David xchi'uc ti svinictaque, laj snup ta be epal chij ti xlamet talele. Laj stic' sba ochel ti Saúl ta paxyajele.

⁴ Ti Davide, xi albat sc'oplal yu'un ti svinictaque: —C'ot ta pasel avi tana li' une ti yalojbot ono'ox ti Dios ti ta xac'bot ta avoc ta ac'ob ti avajcontrae. Paso ta stojol ti c'usi lec ta xava'ie. Va'i un, yich'oj sbijil xcujet batel ti Davide, ti laj sbojbe loq'uel juteb xmochib c'u' ti Saule.

⁵ Ti c'alal laj xa ox spas jeche, xbiet liquel ti yo'nton ti mu lecuc ti jech laj spase.

⁶ Xi laj yalbe ya'i ti svinictaque: —¡Ma'uc xcalbe Dios ta jyales coc jc'ob ta stojol ti ajvalil ti c'alal ja' t'ujbile! ¡Ti jech ajvalile, yu'un jech c'ot ta nopel yu'un stuc ti Diose, ja' ti laj st'uje!

⁷ Ti jech taj une, ja' jech laj spajes svinictac ti Davide. Mu'yuc laj yac' ye sti' ti laj stsaquic ta milel ti Saule. Loq'uic ech'el ta nail ch'en. Laj stam batel ti sbeique.

⁸ Ta jech no'ox yepal, tijil loc' ti David ec ta nail ch'ene, ti xi x'avet xa liquel laj yavtae: ¡Jcuch abtel, Jcuch abtel! Laj sq'uel sutel spat ti Saule. Snupilan xa liquel banomil laj spatan sba ta lumtic ti Davide, svinajeb ti ta x'ich'van ta muq'ue.

⁹ Xi laj yalbee: —¿C'u cha'al ya'yel ti ja' no'ox ta xch'un ti Jcuch abtel ti ta x'albun ya'i ti ja' no'ox oy ta co'nton ti oy c'usi chopol ta jpasbe ca'ie?

¹⁰ Laj xavil ta aba ta asat, Jcuch Abtel, ti Diose laj xa yac'ot ta coc ta jc'ob ta nail ch'en yo' ta jmil ti Jcuch Abtele. Mu ja'uc laj jmil ti Jcuch Abtele. C'ajomal no'ox laj jch'aybe smul scolo' ti Jcuch abtele, ti xi laj calbe jbae: “Mi ja' ajvalil ti Jcuch abtele, yu'un jech laj snop stuc ti Diose, ja' laj st'uj.”

¹¹ “Q'uelo avil lec, Jcuch Abtel, ti c'usi oy ta jc'ob li'e: Ja' juteb sbojbenal ti smacobil sic avu'une, Jcuch Abtel. Lec xa c'ot o yorail laj jmilot ti jechuque. Ti jech le'e, Jcuch Abtel, ta xavil ta asat ti mu'yuc jutebuc ta co'nton ti oy c'usi chopol ta jc'an ta jpasbot ca'i ta spaybelot ac'oplale. Mi ja'uc ti oy bu jtaoj jmul ta atojole. Ja'uc le' une, ti Jcuch Abtele xbitet ta anil ta snutselun yo' ta xismil.

¹² ¡Ti jech le'e, jchibaltic, ac'o xischapanotic ti Diose. Ac'o stoj yu'un Dios ti jech c'ot ta pasel avu'un avie! Ja'uc ti vu'une, ta j'ech'el mi ja'uc ta jyales coc jcob ta stojol ti Jcuch Abtele.

¹³ Yu'un oy bu xi ta x'ale ti c'op yu'unic ta vo'nee: ‘Ti spajebal xa chopol ta xc'ot ta pasele, ta xlic talel ta stojol ti buch'u mu'yuc xa xch'ulele’. Jech o xal un, mi ja'uc ta j'ech'el ta jyales coc jc'ob ta stojol ti Jcuch Abtele.

¹⁴ Ma'uc no'ox taje, ti ajvalil yu'un ti Israele, ¿buch'u ti loq'uem ta sa'ilanele? ¿Buch'u ti loq'uem ta snutsilanele? ¿Mi ja' ti vu'un ti co'ol j'elan chamem ts'i'e, ti co'ol j'elan jcot ta bitome?

¹⁵ Ja' yu'un un cha'e, jchibaltic, ac'o snop, ac'o xchapanotic ti Diose. Ac'o yil ta sba ta sat stuc c'usi ti jmule. Ac'o xispojun ta yoc ta sc'ob stuc ti jech ta xismilun ya'i ti Jcuch Abtele.”

¹⁶ C'alal laj yo'nton ta c'opojel ti Davide, xi tsots x'avet xa liquel ti Saule: —¡Vo'ot ca ti ta xac'oponune, jquerem nich'on David! X'oc'olet xa liquel ti Saule,

¹⁷ ti xi laj yale: —Vo'ot xatun ta vinical ti ta lec laj apacbun sutel ti c'usi chopol laj xa jpasbote.

¹⁸ Avi tana li' une, laj avac' ta ilel ti ja' no'ox oy ta avo'nton ti lecuc oyucune. C'alal li'aq'ue xa ta avoc ta ac'ob yu'un ti Diose, mu'yuc xamilun.

¹⁹ Ti jech le'e, mu'yuc buch'u ma' ti sq'ueloj no'ox cuxul ta xicta comel ti lec ta sut ech'el yu'un ti scontrae. Ja' yu'un un cha'e, ¡ac'o sva'an sba ti Dios ta atojolal ti jech laj apasbune!

²⁰ Ti jech tana le' une, ta j'ech'el vic' ti jsat ti vo'ot ta xa'och ta ajvalilal yu'un ti Israele, ti jech ta xabain ta sbijubtasel ta stojobtasel ti Israele. Lec ti c'usi ta xc'ot ta stojolic ti c'alal ajvalilot yu'unique.

²¹ Va'ano aba ta yalel un cha'e, ti ja' rextico ti Diose, ti mu xatsutsesbun ta j'ech'el ti jnitilultaque, ti mu ja'uc ta xatubbun ti jc'oplal ta sba ta sat ti cuts' calaltaque.

²² Ti Davide laj yalbe ta jamal ti Saule ti mu jechuc ta spase. C'alal laj taj une, ti Saule sut ech'el ta sna ti bu ta spas mantale. Ja'uc ti Davide xchi'uc ti svinictaque batic ta nac'obbail.