1 Samuel 23 - Bible in Tzotzil de Chamula

Ti Davide ta stic' sba ta spojel ti jnaclejetic ta jteclum Keilae

¹ Oy jun c'ac'al, lic stsaquic ta c'op jteclum Keila ti filisteoetique. Laj yelc'anic ech'el ti trigo ti ja' to no'ox laj yich' majele. C'alal laj xchapbeic ya'i ti David ti va'i s'elan taje,

² bat ta anil ti xi laj sjac'be ti Diose: —¿Mi xavac'bun ave ati' ta stsaquel ta leto ti filisteoetique? Xi tac'bat yu'un ti Diose: —Ta xcac' que, tic'o aba, tsaco ta leto, pojo ti jteclum Keilae.

³ Ja'uc svinictac ti Davide xi albat yu'une: —Ochemotic xa ta xi'el ti li' oyotic ta Judae ¡Ja'uc xa van taj une, xjelav to xi'elal ta xca'itic mi xba jtsactic ta leto ti soldado filisteoetic ta lum Keilae!

⁴ Va'i un, ti Davide lic xcha'jac'be ti Diose, ti xi tac'bat yu'une: —Xan me ach'a, batan ta lum Keila. Ta xcac' ta avoc ta ac'ob ti filisteoetique.

⁵ Ti Davide xchi'uc ti svinictaque laj stam batel sbeic ta jteclum Keila. Lic stsaquic ta leto ti filisteoetic ti bu taje, ti tsalbilic ta j'ech'el c'ot yu'unique. Laj yu'ninbeic ta spojbel ti xvacaxe. Ja' jech c'ot taje, ti laj stic' sba ta spojel jteclum Keila ti Davide.

⁶ C'alal jech syaquil taje, ti Abiatare, xnich'on ti Ahimeleque, jatav loq'uel ti oy ta yo'nton xbat svol sba xchi'uc ti David ta jteclum Keilae. Yich'oj batel ti jayal saquil luchbil c'u'ile.

⁷ Ja'uc ti Saule, albat ya'i ti oy xa ta jteclum Keila ti Davide, ti xi laj snope: “Laj xa yac'bun ta coc ta jc'ob ma' ti Dios une. Ti jech laj xa stic' sba ochel ta jteclume, bajal ta xcom ta j'ech'el ta smactac, ta syavialtac sti'tac ti jteclume.”

⁸ Ta jech no'ox yepal, ti Saule laj stac ta iq'uel scotol ti yajsoldadotaque yo' jech ta stam batel sbe ta Keila ta svolel ta maquiel ti David xchi'uc ti svinictac ta lume.

⁹ Ja'uc le' une, ti c'alal laj ya'i ti David ti ta xvoliat ta maquel ta be yu'un ti Saule, laj yalbe ya'i mantal ti pale Abiatare ti ac'o yich' talel ti jayal saquil luchbil c'u'ile, yo' jech ta sjac'be Dios ti c'usi xu' ta spase.

¹⁰ Va'i un, xi laj yal ti Davide: —Ch'ul Dios yu'un ti Israele, ti avajtunel li'e sna' ti ta xtal ta jteclum Keila ti Saúl ta stsutseselun ta j'ech'ele.

¹¹ ¿Mi ta xtal sa'un ti Saúl jech c'u cha'al ca'binoje? ¿Mi ta xi'aq'ue ta c'abal yu'un ti jteclum Keilae? ¡Cajval Dios yu'un ti Israele, avocoluc, albo ya'i ta jamal ti avajtunel li'e! Xi tac'bat yu'un ti Diose: Ta xtal ti Saule.

¹² Va'i un, ti Davide xi laj sjac' xtoque: —Ti jteclum Keilae, ¿mi ta xiyac'uncutic ta c'abal jmoj xchi'uc ti jvinictac ta yoc sc'ob ti Saule? Xi tac'bat yu'un ti Diose: —Ta xayac'oxuc.

¹³ Va'i un, ti Davide xchi'uc ti svinictac ti nopoluc van vaquibuc ciento (600) ta scotole, loq'uic batel ta jteclum Keilae. Mi ja'uc sna'ic ti bu ta xbatique. C'alal c'ot ta sni' ta xchiquin ti Saúl ti jatav xa loq'uel ti David ta jteclum Keilae, lic spajes sba ta snutsel.

Ti Davide ta xbat snac' sba ta sbajtical banomil

¹⁴ Va'i un, ti Davide com snac' sba lec ta jun nac'obbail ta sbajtical banomil yu'un Zif. Ac'o mi jujun c'ac'al ta sa'e yu'un ti Saule, mu'yuc x'aq'ue ta c'abal yu'un ti Diose.

¹⁵ Manchuc mi jech un, ti Davide ta xi' yu'un ti Saule, ja' ti loq'uem ech'el ta sa'vanej ti jbel sc'oplal ta xmilee. Jech o xal snac'oj sba com ta Hores ta sbajtical banomil yu'un ti Zife.

¹⁶ Oy jun c'ac'al, ti Jonatane, xnich'on ti Saule, bat sq'uel ti David ti oy ta Horese yo' jech ta stsatsubtasbe ta smuq'uibtasbe yo'nton ta stojol ti Diose.

¹⁷ Xi laj yalbee: —Mu xaxi', ti Saúl ti ja' jtote, mu xastaot ta sa'el. Yu'un ta xa'och ta ajvalil yu'un ti Israele. Ta xi'och ec un, ti ich'bil ta xic'ot ta muc' ta ts'acal toe. Taje, sna' lec ti Saúl ti ja' jtote.

¹⁸ Va'i un, laj sva'anic ta rextico ti Diose ti c'alal laj spasic strate xchibalique. Ts'acal to un, ti Jonatane sut batel ta sna. Ja'uc ti Davide com ta Hores.

¹⁹ Ja'uc le' une, ti jnaclejetic ta jteclum Zife batic ta jteclum Gabaa yo' xi ta xalbeic ya'i ti Saúl ti c'alal ta sc'oponique: —Ti Davide nac'al ta cosilalcutic ta junuc nac'obbail ta vitstic yu'un Haquila ta Hores ta sbajtical ti oy ta yolon ti yac'ol xocon sloq'ueb c'ac'ale.

²⁰ Ja' yu'un un cha'e, ti c'usi ora xal avo'nton xabate, Jcuch abtel, batan, ta xcac'cutic talel ta avoc ta ac'ob.

²¹ Xi laj stac' ti Saule: —¡Dios ac'o sva'an sba ta atojolic ti c'uxun ta avo'ntonique!

²² Ta xa jc'anboxuc vocol avi tana li'e, batanic, t'unic lec yavil ti bu tiq'uile, xchi'uc ti buch'u laj yil ti bu taje, yu'un yalojbeicun ca'i ti sna' c'usi xutilan sba ta j'ech'ele.

²³ Q'uelic lec ta scotol ti snac'obbail ti bu ta stic' sba ochele. Na'bil xa lec avu'un ti bu tiq'uile. C'alal mi lasutic talel ta jtojole, ta jchi'inoxuc batel ec un. Mi melel tey tiq'uil ti bu taje, ta jchaj ta sa'el ta scotol ti c'u yepal snitilultac ti Judae.

²⁴ Ti jnaclejetic ta jteclum Zife laj sc'oponic comel. Ta ye ta sti' ti Saule, sutic batel ta slumalic. Ja'uc ti David xchi'uc ti svinictaque, oyic ta sbajtical banomil yu'un Maon ta stenlejal sbajtical banomil ti oy ta yolon ti yac'ol xocon smaleb c'ac'ale.

²⁵ Yan ti Saúl xchi'uc ti svinictaque laj stam batel sbeic yo' ta xbat sa'ic. C'alal laj yalbeic ya'i David ti va'i s'elan taje, yal ech'el ta lican ch'entic ti oy ta sbajtical banomil yu'un ti Maone. Ti jech laj ya'i ti Saule, yal batel ta anil ta sbajtical banomil yu'un ti Maon ta snutsel ti Davide.

²⁶ Ta jot xocon ti vitse, xlamet batel xchi'uc svinictac ti Saule. Ta jot xocon ti vitse, xlametic batel ta anil xchi'uc svinictac ti David ta spojel sbaic ta stojol ti Saule. C'alal c'ot ti Saúl xchi'uc ti svinictaque, c'alal sjoyobtaojic xa ti David xchi'uc ti svinictaque, c'alal jset'uc xa mu x'ochic ta c'abale,

²⁷ ja' o c'ot jun j'al-mantal j'ich'-c'op ti xi laj yalbe ti Saule: —¡Jcuch abtel, sutan talel ta anil! ¡Ti filisteoetique laj xa yu'ninic ti jteclume!

²⁸ Va'i un, ti Saule laj xquechan comel ta snutsel ti Davide, bat stsac sbaic ta leto xchi'uc ti filisteoetique. Jech o xal ti bu taje, ojtiquinbil com yu'unic, ‘Ch'acobbail lican ch'entic’, xi c'ot ti razone.

²⁹ Ti bu taje, bat snac' sba ta naclej ta nac'obbailetic yu'un En-gadi ti Davide.