1 Samuel 22 - Bible in Tzotzil de Chamula

¹ Ti Davide loc' batel ti bu taje, bat snac' sba ta nail ch'en ti oy ta Adulame. C'alal laj ya'iic ti xchi'iltac ta voq'uele, xchi'uc scotol ti yuts' yalaltaque, bat stsob sbaic ta jmoj xchi'uc.

² Ja' jech xtoc scotol ti buch'u ilbajinbilique, scotol ti buch'u oy yilique, xchi'uc scotol ti buch'u mu junuc yo'ntonique, bat svol sba scotolic ta stojol, ti c'ot ta banquilal jvolvanej yu'unic ti Davide. Ti c'u yepal xvoletic ta stojole, oy nan jutucuc mu chanibuc ciento (400) ta vo' ti viniquetique.

³ Ti bu taje, ti Davide laj stam batel sbe ta Mizpa ti oy ta Moabe, ti xi laj yalbe ya'i ti ajvalil yu'un ti Moabe: —Avocoluc, ta jcomtsan li' ta atojolic ti jtot jme'e ja' to ti mi laj jna' c'usi ta spas ti Dios ta jtojole.

⁴ Jech ti David une laj yic' batel ti stot sme' ta stojol ti ajvalil yu'un ti Moabe, ti naquiic ta stojol ti c'u sjalil oy ta nac'obbail jteclum ti Davide.

⁵ Va'i un, ti j'alc'op Gade xi laj sbijubtas ti Davide: —Altic ma' ti li' xanaq'uet ta nac'obbaile. Tamo batel abe, batan c'alal ta yosilal Judá. Ja' yu'un un cha'e, bat ti Davide, c'ot ta te'tic yu'un ti Hérete.

Ti paleetic ti laj yich' milel ta Nobe

⁶ C'alal syaquil taje, joyol ta spat ta xocon scotol yaj'opisialtac ti Saule, ti stsacoj slanza chotol ta yolon tamarisco te' yu'un ti ch'ulna ta Guibeae. C'alal laj ya'i lec ti vinaj xa bu c'otemic xchi'uc svinictac ti Davide,

⁷ xi laj yalbe ya'i ti yaj'opisialtac joyol ta sts'ele: —A'yibeicun ava'iic lec viniquetic yu'un Benjamín: Ti xnich'on Isaie, ¿mi ta xach'unic xana' ti ta xayac'boxuc abanomilique, ti ta xac'boxuc ats'unub uvaique? ¿Mi ta xach'unic xana' ti ta xac' avabtelic ta spas mantale, ti ta xa'ochic ta banquilaletic yu'une?

⁸ Acotolic aq'uelojbeicun ti jba jsate. Mu'yuc buch'u junucal xavalbeicun ca'i ti spasoj xa strateic ti jnich'on xchi'uc xnich'on ti Isaie. Mu junuc ta xavul avo'ntonic ta jtojol. Mu junuc ta xavalbeicun ca'i ti ja' cajcontra ti jnich'one xchi'uc ti cajcoltaobbae, ti nac'alic xa ta scontrainelicun jech c'u cha'al ta spas avi tanae.

⁹ Va'i un, ti Doege, ti ja' edomita vinic ti jmoj capal xchi'uc yaj'opisialtac ti Saule, xi laj stac' ti c'ope: —Ti xnich'on Isaí ti c'alal c'ot ta Nobe, laj quil ti lo'ilajic xchi'uc ti Ahimeleque, xnich'on ti Ahitobe.

¹⁰ Ti Ahimeleque laj sjac'be Dios ta sventa ti Davide. Laj yac'be ti c'usitic ta xtun yu'une, xchi'uc ti yespada Goliat ti filisteoe.

¹¹ Va'i un, ti ajvalile laj stac ta iq'uel ti pale Ahimeleque xchi'uc scotol ti paleetic ta Nob ti ja' ono'ox yuts' yalaltaque. Ti c'alal c'ot scotolic ta stojol ti ajvalile,

¹² ti Saule xi laj yalbe ti Ahimeleque: —A'yio ava'i lec, xnich'on Ahitob. —Li' oyun ta ats'el ta avichon, Jcuch Abtel —xi la stac' ti Ahiméleque.

¹³ Xi jac'bat yu'un ti Saule: —Ti vo'ote xchi'uc xnich'on ti Isaie, ¿c'u cha'al ta xacomon milicun ava'iique? Lec laj ava'i laj avac'be ti pane xchi'uc ti jun espadae. Jech xtoc laj jac'be Dios ta sventa ti Davide yo' jech ta xiscontrainun ti bu xnaq'uet jech c'u cha'al ta spas avi tanae.

¹⁴ Va'i un, ti Ahimeleque xi laj stac'be ti ajvalile: —Mu'yuc buch'u junucal ta scotol ti avaj'opisiale, Jcuch Abtel, ti lec tuc' sjol yo'nton ta spasel jech c'u cha'al ti Davide. Ti yanuque, ani' no'ox, Jcuch abtel, banquilal yu'un ti avajchabivaneje, ich'bil ta muc' ti bu ta xapas mantale.

¹⁵ ¿Mi yu'un ja' to no'ox sba velta ta jac'be Dios ta sventa ti stuque? ¡Ma'uc to calbetic sc'oplal ma' le' une! Ja' yu'un un cha'e, Jcuch Abtel, mu ta jeche'uc no'ox xasa'be smul ti avajtunel xchi'uc ti yuts' yalale. Ti avajtunel li'e, mu jutebuc sna' mi tsots, mi jutuc no'ox ti c'op taje.

¹⁶ Ja'uc ti ajvalile xi xvulvun xa liquele: —¡Jbel sc'oplal, Ahimelec, albo xa avo'nton ti ta xacham xchi'uc scotol ti avuts' avalale!

¹⁷ Ta jech no'ox yepal un, ti ajvalile xi laj yalbe ya'i mantal ti yajchabivanejtaque: —Milic ti yajpaletac Diose, yu'un ti stuquic le'e, co'ol sjolic xchi'uc ti Davide. Sna'ic lec ti jatbile, mi ja'uc jutebuc laj yalbeicun. Ja'uc le' une, ti yajchabivaneje mu'yuc xyal yoc sc'ob ta stojol ti yajpaletac Diose.

¹⁸ Va'i un, ti ajvalile xi laj yalbe mantal ti Doege, ja' ti edomitae: —¡Milo scotolic! Jech ti Doege mu ta vocoluc laj syales yoc sc'ob ta stojol ti paleetique. Laj smil vo'ob yo'vinic (85) ta vo' viniquetic ti slapojic ti jayal luchbil saquil c'u'il ti jech c'ac'al taje.

¹⁹ Laj taj une, och batel ta jteclum Nob, steclumalic ti paleetique. Laj smil ta espada ta viniquetic, ta antsetic, ta muc'tic ololetic, c'alal ta jvoq'uel ololetic. Ma'uc no'ox taje, laj smil ta vacaxetic, ta burroetic, xchi'uc ta chijetic.

²⁰ Jun xa no'ox ta scotol xnich'on ti Ahimelec ti Abiatar sbie, cuch to yu'un spojel sba, ti jatav batel ti bu oy ti Davide.

²¹ Ti bu taje, xchapet laj yal scotol ti laj xa smil yajpaletac Dios ti Saule.

²² Xi tac'bat yu'un ti Davide: —Ti c'alal tey oy ti Doeg ti jech c'ac'al taje, laj xa ono'ox jna' ti ta xchapbe ya'i ti Saule. Vu'un ta jmul ti jech cham scotolic ti avuts' avalaltaque.

²³ Coman li' ta jtojole, mu xaxi'. Ti buch'u ta smilot ya'ie, ta xismilicun ya'iic ec. Ti li' ta jtojole, mu'yuc c'usi xal avo'nton.