1 Samuel 21 - Bible in Tzotzil de Chamula

Ti Davide ta xjatav loq'uel ta stojol ti Saule

¹ Ti Davide laj stam batel sbe ta Nob ta sq'uelel ti pale Ahimeleque. Ch'ayal c'ot yo'nton ti ba snup talel ta be ti xi laj yalbee: —¿C'u cha'al atuc latal ti mu'yuc buch'u xchi'inojot talele?

² Xi laj stac' ti Davide: —Laj stacun talel ti ajvalile ti oy c'usi tal jchapbe sc'oplale. Laj yalbun ti mu ja'uc oy buch'u xa'i c'u cha'al ti tacbilun talel yu'une, c'usi ti mantalil quich'oj talele. Ja'uc ti viniquetic ti ja' ta jpas ta mantale, laj calbeic ya'i ti oy bu xu' ta xismalaicune.

³ Ti xcaltic avi le'e, ¿c'usi oy ta avoc ta ac'ob ta stunel ta slajesel? Ac'bun vo'bejuc pan, ti c'usiuc no'ox xu' xata talele.

⁴ Xi tac'bat yu'un ti palee: —Ti pan ti quich'oj ta jventae, ma'uc pan ti buch'uuc no'ox xu' ta sve'e, c'otem ta pan yu'un ti Diose. Ja'uc le'e, ta xcac'bot batel ti mi yictaoj to sbaic ta xchi'inel antsetic ti avinictaque.

⁵ Ti Davide tsots ye ti xi laj staq'ue: —Ti jech loq'uemuncutic ta tsobajele, jbel sc'oplal ti le' to comem ta xchi'inel ma' ti antsetic une. Ac'o mi mu toj tsots sc'oplal ti litalcutic li'e, jna' lec ti mu'yuc soquesoj sba ti jvinictac c'alal liloc'cutic talele. Jbel sc'oplal mu'yuc soquesoj sbaic ma' avi tana une.

⁶ Va'i un, ti palee laj yac'be ech'el ti pan ti c'otem ta yu'un ti Diose. C'ajomal no'ox oy ti t'ujbil pan ta sventa ti Dios ti bu taje, ti ja' o laj stamic loq'uel ta altar ti jech c'ac'al taje, ti c'ac'al pan to laj yich' tic'bel comel ti xq'uexole.

⁷ Ta yorail taje, ja' tey oy jun yajtunel ti Saúl ta ch'ulnae, ti ja' jun edomita ti sbiinoj Doege, banquilal yu'unic ti yajq'uel-chijtac ti Saule.

⁸ Ti Davide xi laj yalbe ti Ahimeleque: —¿Mi oy avu'un junuc lanza, mi ja' junuc espada? Yu'un toj anil tacbilun talel yu'un ti ajvalile, ti mu xa c'usi xcut laj jtam talel ti quespadae, mi ja'uc xa ti yan cabtejebtaque.

⁹ Ti palee xi laj staq'ue: —Oy, li' quich'oj yespada ti Goliat ti filisteo ti laj atsal ta stenlejal Elae. Le' oy ta spat ti luchbil jayal saquil c'u'ile, ti volbil ta c'u'ile. Ich'o batel. Mi ta to xac'an yan abtejebaletique, ch'abal xa cu'un unbi. Ti Davide xi laj staq'ue: —Mu'yuc xa yan abtejebal ti x'ech' to stunel taje. Ac'bun talel.

¹⁰ Ti jech c'ac'al taje, lic ta jatobal ti David ta scoj ti Saule, ti bat ta stojol ti Aquise, ajvalil yu'un ti Gate.

¹¹ Ti Aquise, xi albat yu'un yaj'opisialtaque: —Le'e, ja' David, yajtunel ti Saúl ti ja' ajvalil yu'un ti banomil li'e. Le'e, ja' ti buch'u xi ta xq'uejintabat sc'oplale: ‘Jmil ta vo' (1,000) viniquetic laj smil ti Saule, lajunmil (10,000) ta vo' viniquetic laj smil ti Davide.’

¹² Ts'etel lec xchiquin laj ya'i ti David ti va'i s'elan laj yalique. Jech lic ochuc xi'el ta yo'nton ta stojol ti Aquis ti ja' ajvalil yu'un ti Gate.

¹³ Jech o xal un, ta sba ta satic lic syanijes sba ti c'u s'elan to oxe. Lic sbis sba ta junuc chuvaj, ti xlucuquet no'ox sts'ib lic sts'iba ti ti'nae, ti ya'binoj xa sba ta sbon ta slicoc ti yisime.

¹⁴ Va'i un, ti Aquise xi laj yalbe ti yaj'opisialtaque: —Mi chuvaj laj avilic ti vinic li'e, ¿c'u cha'al laj avic'beicun talel ya'yel un cha'e?

¹⁵ ¿Mi yu'un ch'abal chuvaj ya'yel li' ec une yo' jech laj avic'beicun talel ti ta xtal spasan xchuvajil li' ta jnae?