1 Samuel 20 - Bible in Tzotzil de Chamula

Ti Jonatane ta stic' sba ta spojel ti Davide

¹ Jatav loq'uel ti David ta Naiot ti oy ta Ramae, ti xi c'ot yal ti bu oy ti Jonatane: —¿C'usi laj jpas? ¿C'usi jtosucal ti lijelav ta spasele? ¿C'usi jmul ta xistabun ti atot ti ta xisa'un yo' ta xismile?

² Ja'uc ti Jonatane xi laj staq'ue: —¡Ma'uc xcalbetic Dios taje! ¡Mu xasmilot! Vuleso ta ajol ti mu'yuc c'usi xu' ta spas ta stuc no'oxe, ac'o mi tsots sc'oplal, mi mu tsotsuc sc'oplal, ta xiyalbun ono'ox ta jamal. ¿Mi yu'un ja' to la ya'yel mu jamaluc ta xiyalbun ti jtot ti va'i s'elan taje? ¡Bu la xata!

³ Ja'uc ti Davide xi xvulvun xa liquele: —Ti atote sna' lec ti lec xquil jbatique. Mu ja'uc jutebuc ta xac'bot ana' c'usi ta snop ti ta spase yo' jech mu soc avo'nton. ¡Jamal xcal ava'i ta sba ta sat ti Diose xchi'uc ta atojol ec, anima vinicun xa!

⁴ Va'i un, ti Jonatane xi laj sjaq'ue: —¿C'usi xu' ta jpas ta atojol un cha'e?

⁵ Ti Davide xi laj staq'ue: —A'yio ava'i, ti oc'ome, ja' sq'uinal ti ach' ue, yorail ti tsots sc'oplal ti jmoj chotol ta xive' xchi'uc ti ajvalile. Ja'uc le' une, ta jc'anbot ti ac'o ave ati' ti ta xba jnac' jba ta osiltic ti ja' to xquil jbatic ta smalil c'ac'al cha'eje.

⁶ Ti mi ta sjac' ti atot bu oyune, albo ya'i ti laj avac' ave ati' ti ic'bil libat ta anil ta jlumal ti oy ta Belene, ta sventa yaq'uel chic'bil matanal ta stsutseb jabil yu'un ti cuts' calaltaque.

⁷ ‘Lec oy’, mi xi laj staq'ue, mu'yuc c'usi xal co'nton xcaltic unbi. Mi ta il laj staq'ue, laj xa ana' ti c'ajomal no'ox oy ta yo'nton ta xiyilbun ya'i ti jvocole.

⁸ Ti jech avajtunelune, ti laj xa cal jtratetic ta stojol ti Dios ti lec xquil jbatique, abolajan ta xapasbun taje. Ti mi ta jmul jtuque, jeche' no'ox ta xavic'un batel ta stojol ti atote, milun xch'a li' no'ox unbi.

⁹ Ja'uc ti Jonatane xi laj staq'ue: —¡Mu jechuc xanop ti va'i s'elan taje! Mi ta xca'i ti oy ta yo'nton ti ta sq'uelbot ya'i avocol ti jtote, ta xcalbot ava'i.

¹⁰ Va'i un, ti Davide xi laj staq'ue: —¿Buch'u ta xiyalbun ca'i ti mi mu lecuc ta stac'bot ti atot une?

¹¹ Ja'uc ti Jonatane xi laj staq'ue: —Batic, loc'cutic ech'el ta osiltic. Xchibalic batic ta osiltic.

¹² Ti bu taje, xi laj yalbe ti Davide: —Ta sba ta sat ti Diose, ti ja' Ajvalil yu'un ti Israele, ti oc'om cha'ej jech ora jech c'u cha'al li'e, ta xcalbot ava'i ta jamal c'usi oy ta yo'nton ti jtote. Mi lec ti c'usi snopoj ta atojole, ta jtac talel mantal ta atojol.

¹³ Ti mi oy ta yo'nton ti jtot ta sq'uelbot ya'i ti avocole, tsots ac'o xistsitsun ti Dios ti mi mu xcalbot ava'ie, ti mi mu jcoltaot ti c'uxi ta lequilal ta xajatav batele. Dios ac'o xa scoltaot jech c'u cha'al laj yich' coltael yu'un ti jtote.

¹⁴ Lec un cha'e, ti mi cuxulune, mu xach'ay ti syail xc'uxul avo'nton ta jtojol jech c'u cha'al ta spas ti Dios ta atojole. Yan ti mi lichame,

^15-16 sbateluc osil, oyuc ti syail xc'uxul avo'nton ta stojol ti calab jnich'nabe. ¡C'otuc ta pasel ti ta jujun ta x'ich'bat ye sti'ic li' ta banomil yu'un Dios ti avajcontrae, David, ti ac'o stsalbot scotole! Ja' jech laj xchapbe sbaic strateic ti Jonatán xchi'uc ti Davide.

¹⁷ Ti mu xtuch'van ta o'ntonal ti Jonatane, ta jamal laj yal ti lic sva'an ta xcha'alel ti stratee. Mu jipbaj ta xa'i jech c'u cha'al ti mu jipbaj ti sbec'tal ta xa'i ti stuque.

¹⁸ Laj taj une, xi lic yalbe ya'ie: —Ti oc'ome, sq'uinal xa ti ach' ue. Jutuc to no'ox atijel ta c'op ti xocol ti bu ta xachotie.

¹⁹ Ja'uc ti ta yoxibal c'ac'al une, ta xa me xlic yich' tuc'ulanel ti mu'yucote. Ja' yu'un un cha'e, batan me ti bu laj anac' aba ta ba'yele, ch'ico aba ochel ti ta busul tontique.

²⁰ Ja'uc ti vu'un une, ta jten batel oxmoj yolob ti xi ta jot xocone, ti ta jchan jc'ob yilele.

²¹ Mi laj une, xi ta xcalbe ya'i ti cajtunele: ‘Batan, ba sa'o talel ti sni' jyolob le'e’, mi xcute, ch'an to me chan ava'i unbi. Ja'uc le' une, mi xi ta xcalbe ya'ie: ‘Ti sni' jyolobe, li' no'ox com avu'une, tsaco talel’, mi xcute, junuc avo'nton loc'an talel unbi. Mu'yuc c'usi ta xc'ot ta atojol unbi. Ja' rextico ti Dios ti jech xcale.

²² Yan ti mi xichi ta xcalbe ya'ie: ‘Ti sni' jyolobe, taj to c'ote’, mi xcute, batan me unbi. C'ot ta nopel yu'un ti Dios ta xabate.

²³ Ja'uc ti c'usi laj jva'an jbatic ta yalele, sbatel osil ja' rextico cu'untic ti Diose.

²⁴ Ti Davide bat snac' sba ta osiltic. Ja'uc ti c'alal c'ot sq'uinal ti ach' ue, ti ajvalile choti ve'uc ta mexa.

²⁵ Choti ta yi'bel na ti bu ono'ox nopem xa'i ta xchotie. Ja'uc ti Jonatane yelovtaoj sba choti. Ti Abnere choti ta xocon ti Saule. Xocol com ti bu ta xchoti ti Davide.

²⁶ Mu'yuc c'usi laj yal ti Saúl ti jech c'ac'al taje. Laj snop ti oy c'usi spasoj ti mu'yuc to spocoj stusoj sba ti Davide.

²⁷ Ja'uc ti ta yoc'omale, ti ja' xchibal c'ac'al ti q'uine, xocol com ti bu ta xchoti ti Davide. Va'i un, ti Saule xi laj sjac'be ti Jonatán ti ja' xnich'one: —¿C'u cha'al mu'yuc xtal ta ve'el xnich'on ti Isaí voljee, mi ja'uc avi tana li'e?

²⁸ Xi tac'bat yu'un ti Jonatane: —Ti Davide laj yalbun comel ti ic'bil bat ta anil ta Belene.

²⁹ Laj sc'anbun vocol ti ac'o cac' quee. Ti c'u yepal oyic ta nae, ta la xaq'uic chic'bil matanal ta slumalic ti tsots sc'oplal tae ta iq'uel yu'un ti xchi'iltac ta voq'uele. Ti mi ta la xcac' quee, laj yalbun xtoc ti ta la xbat sq'uel ta anil ti yuts' yalaltaque. Jech o xal mu'yuc xtal chotiuc ta ve'el xchi'uc ti Jcuch abtele.

³⁰ Va'i un, ti Saule cap sjol xchi'uc ti Jonatane, ti xi laj yalbee: —¡Xnich'on xa jlabtavanej! ¿Mi xavac'touc avaloj ti mu jna' ti co'ol ajolic xchi'uc xnich'on ti Isaie? Ic'al q'uexavan ta j'ech'el ti q'uexlal sba sat avu'un ti ame'e.

³¹ Ti jech cuxul to ta banomile, chib sc'oplal ti avabtel xchi'uc ti vo'ote. ¡Ja' yu'un un, alo mantal ti ac'o yich' sa'el talele, ti ic'bun talel ta jtojol ti ja' xtun o ta xich' milele!

³² Ja'uc ti Jonatane xi laj staq'ue: —¿C'u cha'al ta xavalbe sc'oplal ta xchame? ¿C'usi ti laj spase?

³³ Ti Saule, ta jech to yepal, lic sye' ti slanza ta smilel ti Jonatane. Laj sna' ti jbel sc'oplal ta smil ya'i David ti stot ti jech c'ot ta pasele.

³⁴ Va'i un, ti Jonatane ta scapemal xa sjol va'i loq'uel ta mexa. Mu'yuc xa xchi'invan ta ve'el ta xchibal c'ac'al yu'un ti q'uine. Mu xa x'ech' ta xa'i ti c'usi ta xc'ot ta stojol ti David ti jajantaat xa yu'un ti stote.

³⁵ Sob ta yoc'omal un, ti c'usi ora xchapojic xchi'uc ti Davide, loc' batel ta osiltic ti Jonatán xchi'uc ti jun yajtunel querem vinique.

³⁶ Xi laj yalbe ya'ie: —Xbat asa' ta anil ti sni' jyolob ti ta jten batele. Xbitet batel ta anil ti jtunel ti c'alal laj sten batel sni' syolob ti Jonatane, ti chjelav to ech'el c'ot ta bajel ti bu xloc' ech'ele.

³⁷ C'alal c'ot ti jtunel ti bu c'ot ta bajel sni' ti yolobe, ti Jonatane, ta sjunul yip, xi laj yavta ti yajtunele: —¡Ti sni' jyolobe, xjelav to c'ot ta bajel ti bu oyote!

³⁸ Xi to laj xcha'avta yajtunel ti Jonatane: —¡Mu xapajes aba, sujo aba, anilajan! Yajtunel ti Jonatane laj sta ti sni' yolobe. Laj yich' talel ta stojol ti yajvale.

³⁹ Ja'uc ti stuc une mu sna' c'usi smelol, ja' no'ox sna'ic ti Jonatán xchi'uc ti David ti senyail taje.

⁴⁰ Laj taj une, ti Jonatane laj yac'be ech'el yabtejebtac ti yajtunele. Laj yalbe mantal ti ac'o bat yac' ta jteclum yan veltae.

⁴¹ C'alal bat ti yajtunele, ti Davide loc' talel ta spat ti bu busul ti epal tone. Oxib velta snupilan xa laj spatan sba ta lumtic ti c'ot ta stojole. Ts'acal to un, laj smey sbaic. Laj stsacbe sba sc'obic. Jmoj laj yoq'uita sbaic ti laj svinajes ti mu xnel mu x'ech' ta xa'ie.

⁴² Ta slajeb xa un, ti Jonatane xi laj yalbe ti Davide: —Junuc avo'nton, batan. Ti jtratetic laj pastique, ja' ta sventa ti Diose, ti laj jc'antic ta stic' sba o ta jtojoltique, ta stojol ti anitilultaque, xchi'uc ta stojol ti jnitilultaque. Laj taj une, ti Davide laj stam batel sbe. Ti Jonatane sut batel ta jteclum.