1 Samuel 19 - Bible in Tzotzil de Chamula

Ti Saule oy ta yo'nton ta xac' ta milel ti Davide

¹ Ti Saule laj yalbe mantal ti Jonatán ti ja' xnich'one, xchi'uc scotol ti yaj'opisialtaque, ti ac'o smilic ti Davide. Ja'uc le' une, ti Jonatane lec xil sbaic xchi'uc ti Davide.

² Va'i un, xi laj yalbe ya'i ti laj scajbijubtase: —Ti Saúl ti ja' jtote ta snop ti ta smilote. Ja' yu'un un, ti sob oc'ome, q'uelo me aba, nac'o lec aba ti bu mu xatae ta sa'ele.

³ Ja'uc ti vu'une ta jchi'in batel ti jtot ta osiltic ti bu oyote. Ta xcalbe ya'i ac'oplal. Jq'ueltic quic c'usi ta xal. Ta xcac'bot ana' ta ts'acal to un.

⁴ Ti Jonatane xi laj yalbe ya'i ti Saule sventa slequil ti Davide: —Ti Jcuch Abtelote, altic no'ox ta xasa' amul yu'un ti oy c'usi chopol ta xapasbe ti avajtunel Davide. Mu'yuc c'usi chopol ta spasbot ti Jcuch Abtelote, naca lec ta spas ta atojol.

⁵ Stenoj xa xcuxlejal ti c'alal laj smil ti filisteoetique. C'ot ta pasel ti pojatic yu'un Dios ta j'ech'el scotol ti Israel ti jech taje. Ti jech Jcuch Abtelote, lec laj yil, xamuyubaj xa yu'un. ¿C'u cha'al ya'yel un cha'e ti Jcuch abtelot ta xapaybe sc'oplal ti buch'u mu'yuc smule, ti oy ta avo'nton xamil ava'i ti David ti c'alal mu'yuc c'usi chopol spasoje?

⁶ C'alal laj ya'i ti Saúl oy smelol sc'op ti Jonatane, xi avane: —Ta jva'an ta rextico ti Diose ti mu'yuc ta xcham ti Davide.

⁷ Va'i un, ti Jonatane laj sta ta iq'uel ti Davide. Laj xchapbe ya'i scotol ti lo'il a'yeje. Ts'acal to un, yic'oj batel ti David ta stojol ti Saule. Lic ochuc yan velta ta yajtunel Saúl jech c'u cha'al ta ba'yele.

⁸ Lic no'ox yan velta ti letoe. Loc' batel ta stsaquel ta leto filisteoetic ti Davide, ti tsalbil c'ot yu'une. C'ot ta pasel ti laj sjimbe ta j'ech'ele, ti xc'ulet no'ox ta jatobal yu'une.

⁹ Ja'uc ti Saule, lic ilbajinatuc yu'un ti pucuj ti tacbil talel yu'un ti Diose. C'alal chotol ta snae, stsacoj ti slanza c'alal ta stij arpa ti Davide.

¹⁰ C'ot ta sjol ta yo'nton ti pac'al ta xcom yu'un ta yibel na ti lec ta spajbe ti Davide. Ja'uc ti Davide cuch to yu'un ta scujanel sba. Mats'al c'ot ta yibel na slanza ti Saule. Ta yac'ubalil taje, jatav ech'el yo' ta spoj sba ti Davide.

¹¹ Ta jech no'ox yepal ti Saule laj yalbe mantal ti svinictaque ti ac'o baticuc ta sna ti Davide yo' ta spaiic ta xchabiel ti ta xich' milel ta yoc'omal yu'unique. Ja'uc ti Mical yajnil ti Davide laj scajbijubtas ti xi laj yalbee: —Mi mu xajatav ti ac'ubal avi tana li'e, anima vinicot xa ti oc'ome.

¹² Ta jech no'ox yepal ti Micale laj sjoc'an yalel ta jun ventana ti Davide, ja' jech col batel ti Davide.

¹³ Laj taj une, laj spet talel jun loc'obbail ti Micale ti laj yac' ta ba teme. Laj yac'be jalbil tsotsil tentsun ta xoncol. Laj slambe jlic poc' ta sba.

¹⁴ C'alal laj yalbe mantal svinictac ti Saúl ti ac'o xchuquic batel ti Davide, laj yal ti Micale ti ip ta xa'ie.

¹⁵ Ja'uc ti Saúl une xi laj yalbe mantal ti svinictac ti c'alal loq'uic batel ta sa'el ti Davide: —¡Manchuc mi puch'ul ta stem, jochic loq'uel talel ya'i ti ic'beicun talel yo' ta jmile!

¹⁶ Svinictac ti Saule ochic batel ta sna ti Davide. C'ajomal mucul ta c'u'il xoncolinoj jalbil tsotsil tentsun ti loc'obbail laj staique.

¹⁷ Va'i un, ti Saule xi laj yalbe ti Micale: —¿C'u cha'al laj alo'laun ya'yel jech c'u cha'al le'e ti laj ajatbiltas ti cajcontrae? Ti Micale xi laj staq'ue: —Yu'un loc' ta ye ti j'ech'el ta xismilun ti mi mu xcac' jatavuc batele.

¹⁸ Ja' jech c'ot ta pasel ti jatav loq'uel ti Davide. Va'i un, bat ta stojol Samuel ti oy ta Ramae. Laj xchapbe ya'i scotol ti c'u s'elan pasbat yu'un ti Saule. Laj taj une, ti David xchi'uc ti Samuele bat nacliicuc ta jteclum Naiot.

¹⁹ C'alal laj ya'i ti Saúl ti batem xa ti David ta Naiot ti oy ta Ramae,

²⁰ laj stac batel svinictac yo' ta xchuquic talel. Ja'uc le' une, c'alal c'otic svinictac ti Saule, laj yilic epal j'alc'opetic ti ch'ayal xch'ulelic ta c'opojele, ti tojobtasbilic yu'un ti Samuele. Ta jech no'ox yepal, svinictac ti Saule, u'ninatic yu'un xcuxlejal ti Diose, ti mu'yuc xa xa'iic c'uxi liquic ta c'opojel eque.

²¹ C'alal laj ya'i ti Saule, laj stac batel yan svinictac, ti mu'yuc xa'iic c'uxi liquic ta c'opojel eque. Ta yoxibal velta un, laj stac batel jun chib svinictac ti Saule, ti ja' no'ox jech c'ot ta stojolique.

²² Va'i un, bat stuc ti Saúl ta Ramae. C'alal c'ot ta muc' ta yavil sts'anleb vo' ti oy ta Secue, lic sjac'be sc'oplal ti Samuele xchi'uc ti Davide. Ti jech mu'yuc buch'u ch'an xi yee, laj yalic ti c'otem ta Naiot ti oy ta Ramae.

²³ Nab xi ech'el ec ti Saule. Ja'uc le'e, u'ninat yu'un xcuxlejal ti Diose. Mu'yuc xa'i c'uxi lic ta c'opojel ec. Jech o xvulvun batel ta be ti c'ot ta Naiot ti oy ta Ramae.

²⁴ Ma'uc no'ox taje, laj sloc' ti sc'u'e. T'anal sjunul c'ac'al xchi'uc sjunul ac'ubale, ti xvulvun ta c'opojel ta stojol ti Samuele. Jech loc' ayan talel ta alel yu'unic ti xi x'ale ti c'ope: “¿Mi ja' jun j'alc'op ec ti Saule?”