1 Samuel 18 - Bible in Tzotzil de Chamula

Ti Jonatane xchi'uc ti Davide ta xac' strateic ti lec xil sbaique

¹ Ts'acal to un, ti Davide, c'alal laj yo'ntonic ta sc'oponel ti Saule, ti Jonatane, bats'i ja' jun xchi'il laj ya'i ti Davide, ti mu tuch'baj ta o'ntonal ta xa'i jech c'u cha'al mu tenbaj ta xa'i sba ti stuque.

² Ja'uc ti Saúl ti jech c'ac'al taje, com o ta yajtunel yu'un ti mu ja'uc xa sut ech'el yu'un ta sna ti stote.

³ Ti Jonatán xchi'uc ti Davide laj sva'an sbaic ta yalel strateic ti sbatel osil lec xil sbaique. Yu'un ti Jonatane ja' sbec'tal stuc ta xa'i ti Davide.

⁴ Ma'uc no'ox taje, ti Jonatane laj yac'be jelavel David ti smochib c'u'e, xchi'uc ti sloin c'u'e, jmoj xchi'uc ti yespadae, ti syolobe, ti xchuque.

⁵ Vinaj sbijil ta spasel ti David ti c'u s'elan ta x'albat yu'un ti Saule. Lec laj stuc'ulan ta spasel ta j'ech'ele ti ac'bat sbain yu'un Saúl ti j'ac'-leto viniquetique. Ti jech taje, lec laj ya'iic scotol ti j'ac'-letoetique xchi'uc ti j'opisialetic yu'un ti Saule.

Ti Saule it'ix ta xa'i ti cajal ta xc'ot sc'oplal ti Davide

⁶ C'u stu un, oy bu c'ot ta pasel ti c'alal sutic talel ti j'ac'-letoetic ti c'alal laj xa ox smil comel filisteoetic ti Davide, scotol ti jteclum yu'un ti Israele xchi'uc ti antsetique, xmuyubajic xa, xq'uejinic xa, x'ac'otajic xa ta stijic batel ti chij-chij taq'uine, ti set-set taq'uine, ti loq'uic batele, ba snupic ta be ti ajvalil Saule.

⁷ C'alal x'ac'otajic no'oxe, xq'uejinic no'ox ti xi ta xcha'alilanic ti antsetique: “Jmil ta vo' viniquetic laj smil ti Saule. Lajunmil ta vo' viniquetic laj smil ti Davide.”

⁸ Ti jech taj une, ep soquesbat yo'nton ti Saúl yu'une, ti ta il xa xi laj yale: —Ti Davide, ta x'albat sc'oplal ti laj smil lajunmil (10,000) ta vo' viniquetic. Ja'uc ti vu'une, ta xalic jc'oplal ti ja' no'ox laj jmil (1,000) ta vo' ti viniquetique. ¡Ja' xa no'ox sc'an yu'unic ti ta sva'anic ta ajvalile!

⁹ Ja' o lic yu'un ti Saule ti mu xa lecuc ta xil ti Davide.

¹⁰ Ta yan c'ac'al un, c'ot ta pasel ta stojol ti Saule ti u'ninat yu'un ti pucuj ti ja' tacbil talel yu'un ti Diose. Ti jech taje, lic chuvajibuc ti ta yut snae. C'alal yacal ta stij arpa ti David jech c'u cha'al ta spasilan ono'oxe, stsacoj slanza ti Saule.

¹¹ Ta jech yepal ti Saule lic stoy ti slanza ti laj sjip ech'el ti yo'ntonuc xa pac'al comuc ta yibel na ti Davide. Ja'uc le' une, chib velta laj scujan sba ti David yu'un ti Saule.

¹² Ti Saule ta xi' yu'un ti Davide, ja' ti coltabil yu'un ti Dios ti Davide. Ja'uc ti stuque mu'yuc xa ta xcoltaat yu'un.

¹³ Jech o xal laj sloq'ues ech'el ti oy ta stojole. Laj stic' ech'el ta banquilal sbainel jvoc' soldadoetic yu'un ti xloc' x'och ta sba ta sat ti jteclume.

¹⁴ Ti coltabil yu'un Dios ti Davide, lec ta xc'ot ta loq'uel yu'un scotol ti c'usi ta spase.

¹⁵ Ti jech ta xil ti Saúl ti stuc'ulanoj sba lec ti c'usi ta spas ti Davide, xi'eltic xa ta xa'i ta j'ech'el.

¹⁶ Ja'uc le' une, scotol ti Israele, ti Judae, yac'oj xc'uxulic ta stojol ti Davide, ja' jtojobtasvanej yu'unic ti c'alal ta xloc' ta xbatic ta ac'-letoe.

¹⁷ Oy jun c'ac'al un, ti Saule xi laj yalbe ti Davide: —Ta xcac'bot avajnilin ti jvixil tseb Merabe, ti tsots sc'oplal ta xac'ot ta banquilal j'ac'-leto cu'un ti c'alal ta xletovaj ti Diose. Ti Saule laj snop ti ma'uc ta smil ti stuque, ti ja' xa ta sbainic ta smilel ti filisteoetique.

¹⁸ Ja'uc le' une, xi laj stac' ti Davide: —Mu'yuc c'usi balun o. Mi ja'uc oy c'usi bal ti jtot jme' ta stojol ti israeletic ti ta xic'ot ta sni' ti ajvalile.

¹⁹ Manchuc mi jech un, c'alal sta sc'ac'alil ta xac' stseb ti Saúl ti Merab sbie yo' jech ta xajnilin ti Davide, ja' laj yac'be ti Adriel ti liquem talel ta Meholae, ti c'alal laj yal ti ta xac'be ti Davide.

²⁰ Ja'uc le' une, ti Micale, yan stseb ti Saule, ic'bil yo'nton xch'ulel yu'un ti Davide. C'alal albat ya'i ti Saule, xcuxet to batel laj ya'i.

²¹ Laj snop ti ta xac'be yic' ti Davide yo' ta xpaybat sc'oplal ti ta xlaj ta milel yu'un ti filisteoetique. Va'i un, xi laj yalbe ya'i ti David yan veltae: —Ja' to ta xa jni'inot cac'tic un.

²² Laj taj une, ti Saule xi laj yalbe mantal ti yajtuneltaque: —Lo'ilajanic ta mucul xchi'uc ti Davide. Albeic ti mu'yuc jipbil tenbil cu'une, ti lec ta x'ile yu'un scotol ti cajtuneltaque, ti tsots sc'oplal ta xc'ot ta jni'e.

²³ Yajtuneltac ti Saule bat yalbeic David scotol ti va'i s'elan taje. Ja'uc le' une, xi laj stac' ti Davide: —¿Mi ta xach'unic xana' ti mu vocoluc ta xc'ot ta sni' jun ajvalil jun vinic ti mu'yuc c'usi bal o yuni c'oplal jech c'u cha'alune?

²⁴ Yajtuneltac ti Saule sutic ech'el ta yalel ti va'i s'elan laj yal ti Davide.

²⁵ Va'i un, ti Saule, ti oy ono'ox ta yo'nton ti ac'o milatuc yu'un filisteoetic ti Davide, xi laj staq'ue: —Albeic ya'i ti Davide ti mu xa tsotsuc sc'oplal ta xac' ti c'u s'elan liquem ta stojel ti ajnilile. Ti vu'un ajvalilune, tsots sc'oplal ta xca'i ti ac'o yich'bun talel vo'vinicuc (100) ta lic snuculil sjol sc'unilic ti filisteoetique yo' jech ta jpacbe sutel xq'uex ti cajcontrataque.

²⁶ Yajtuneltac ti Saule bat yalbeic ya'i David ti va'i s'elan ti a'yej taje. Lec laj ya'i ti David ti ta xc'ot ta sni' ti ajvalile. C'alal mu to ta xc'ot ti sc'ac'alile,

²⁷ ti Davide laj stsob ti svinictaque, loc' batel ta smilel lajunvinic (200) ta vo' filisteoetic. Yich'oj c'otel xtoc un snuculil sjol sc'unilic taje. Bat yac'be ti ajvalile yo' jech ta xc'ot ta ni'il yu'un. Jech o xal un, ti Saule laj yac' ye ti xu' ta xcom ta yajnil David ti Mical ti ja' yantsil nich'one.

²⁸ Ja'uc le' une, laj yil ti Saúl ti coltabil yu'un Dios ti Davide, ti lec c'ux ta xa'i sbaic xchi'uc David ti Mical ti ja' yantsil nich'one.

²⁹ Ti Saúl ti c'alal jech laj ya'i taje, x'ech' to och xi'el ta yo'nton, ja' mu sta ta ba'yele, ti j'ech'el ja' scontra laj yile.

³⁰ Ja'uc le'e, ti c'alal ta xloq'uic jujun velta ta ac'-leto ti banquilal filisteoe, stuc no'ox vinajem sc'oplal ti xu' yu'un ti Davide, ti ja' mu sta scotol ti yajtuneltac ti Saule. C'ot ta pasel ti ich'bil ta muc' c'ot taje.