1 Samuel 17 - Bible in Tzotzil de Chamula

Ti Davide c'ot ta banquilal jpojvanej yu'un ti lume

¹ Ti filisteoetique lic stsob svinictac ta tsacvanej ta leto, ti xvoletic no'ox c'ot stsob sbaic ta Socoe ta jteclum ti ja' yu'un ti Judae. C'ot svol sbaic ta Efes-damim ta o'lol yu'unic ti Soco xchi'uc ti Azecae.

² Ja'uc ti Saúl xchi'uc ti israeletique laj stsob sbaic, ti svoloj sbaic c'ot ta stenlejal Ela ta xchapanel sbaic yo' jech ta stsac sbaic ta leto xchi'uc ti filisteoetique.

³ Ja'uc ti stuquique staoj lec yavilic ta vitstic. Ti israeletique xi to vololic ta jot ti oy ta o'lol yu'unic ti stenlejale.

⁴ Ta jech yepal, ti c'alal xcholet loq'uel ti filisteoetique, ja' to laj yilic loc' talel jun j'ac'-leto vinic ti oy nan vo'lajunch'ixuc ti snatile, ti sbiinoj Goliate, ti ja' slumal ti Gate.

⁵ Naca c'anal taq'uin ti sbin jol slapoje. Naca c'anal taq'uin ti smac ta sjunule, ti yich'oj lajuneb yoxvinic (50) kilo ti yalale.

⁶ Mu yanuc ti staq'uinal smactac yacane xchi'uc ti spuya' xcuchoj batele.

⁷ Ti ste'el slanzae, jun ta yacan jolobil, ti x'ech' to ta vaquib kilo yalal ti staq'uinal sni' ti slanzail no'ox stuque. Jba'be ech'el yu'un ti yajcoltaobbae.

⁸ Xteq'uet no'ox liquel ti xi laj yalbe ya'i ti soldado yu'un Israel ti Goliate: —¿C'u cha'al xavoletic no'ox talel ta tsacvanej ta leto? Filisteoun. Ti vo'oxuque, yajtuneloxuc ti Saule. T'ujic junuc avu'unic ti yaluc talel yo' ta jtsac jbacutic ta leto xchi'uque.

⁹ Ti mi vinic xa'i sba ta stsacun ta letoe, ti mi tsalbil lic'ot yu'une, ta xcac' jbacutic ta mosovinel ta atojolic. Ti mi tsalbil c'ot cu'une, ta xa'ochic ta jmosovcutic.

¹⁰ Xi ta jam ta alel ti c'ac'al avi tana li'e, ta jtsac ta leto ti soldado Israele: ¡Tacbeicun talel junuc vinic yo' ta jtsac jbacutic ta leto xchi'uc!

¹¹ C'alal laj ya'i ti Saúl xchi'uc ti israeletic ti va'i s'elan c'opoj ti filisteoe, mu x'ech' laj ya'iic, ch'ay xch'ulelic ta xi'el.

¹² Ja'uc taj une, oy jun vinic ta Belen ti sbiinoj Isaie, ti vulem xa xch'ulel ti c'alal yorail yochel ta yabtel ti Saule. Ti vinic taje, oy vaxaquib xnich'nab ti sbiinoj David ti jun ta scotole.

¹³ Ja'uc ti oxib sbanquilal xnich'nab ti Isaie, nabalic ech'el xchi'uc ti Saúl ta letovajele. Sbiic ti oxib xnich'nab ti batemic ta ac'-letoe, xi s'elan jech c'u cha'al li'e: Eliab ti banquilale, Abinadab ti xchibale, Sama ti yoxibale.

¹⁴ David sbi ti slajeb xa c'ox its'inale. Ti oxib banquilaletic taje nabalic ech'el xchi'uc ti Saule.

¹⁵ Va'i un, ti Davide xtal xbatilan ta xc'ot ti bu vololic ti Saule, ti ta xtal ta Belén ta sq'uelbe xchij ti stote.

¹⁶ Ja'uc taj une, ta sob ta mal c'ac'al, xtoyet ono'ox ye ta xloc' talel ti filisteo ta soquesbel sjol ti israeletique. Ja' jech ta spasilan loc' ti cha'vinic c'ac'ale.

¹⁷ Ti Isaie, oy jun c'ac'al, ti xi laj yalbe ti David ti ja' xnich'one: —Pulo batel jtobuc ta bis ti bacubtasbil trigo li'e, xchi'uc ti lajunbej pan li'e. Ich'bo batel ta ora no'ox ta stojol ti achi'iltac ta voq'uel ti bu vololique.

¹⁸ Ta sventa ti banquilal jpas-mantal yu'un ti soldadoe, ich'o batel ti lajunbej quexu li'e. Tuc'ulano c'u s'elan ti abanquiltaque, ti xchapet xvul avalbun ca'i mi lec oyique.

¹⁹ Ja'uc ti Saule, ti xchi'iltac ta voq'uel ti Davide, xchi'uc scotol ti israeletique, ta stsacolan sbaic ta c'op ta stenlej Ela xchi'uc ti filisteoetique.

²⁰ Sob xa loc' batel ti David ta yoc'lomale. Laj sc'uban comel ta yan ti xchijtaque. Laj stam batel sbe ta yich'el batel ti c'usitic ta xtun ti ac'bat yu'un ti Isaie. C'alal c'ot ti bu vololique, ja' o xa ta xchapan sbaic loq'uel ta ac'-leto ti soldadoetique, ti x'avlajetic ta sliquesel ti letoe.

²¹ Ti israeletique xchi'uc ti filisteoetique sq'uelojan sbaic lec ti xchololic ta jujuvoq'ue.

²² Ti c'usitic yich'oj batel ti Davide, laj yac' comel ta stojol ti buch'u yich'oj ta sventa ti ve'lile xchi'uc ti abtejebaletique. Xbitet batel ta anil laj stic' sba ochel ti bu chololique. Laj sjac'be ti xchi'iltac ta voq'uel ti c'u s'elan oyique.

²³ C'alal ja' o syaquil ta xc'opoj xchi'uc ti xchi'iltac ta voq'uele, ti jletovajel filisteo vinic ti sbiinoj Goliat ti liquem talel ta jteclum Gate, xva'et talel ti bu chololic ti filisteoetique. Cajal xa ye xvulvun xa liquel ta stojol ti israeletic jech c'u cha'al ta spasilan ono'oxe. Laj ya'i ti Davide.

²⁴ C'alal ti israeletic laj yilic ti vinic taje, xi'ic ta j'ech'el, jatavic loq'uel ta stojol.

²⁵ Xi lic yalolanbe sbaique: “¿Mi mu lajuc avilic ti vinic loc' talele? ¡Cajal ye xa'i sba ta j'ech'el ta stsaquel ta c'op ti Israele! Buch'uuc no'ox ti ta stsal yu'une, ta x'ac'bat ep sc'ulejal, ta x'ac'bat stseb ti ajvalile. Mu'yuc ta x'ac'bat stoj patan ti c'u yepalic oyic ta nacleje.”

²⁶ Va'i un, ti Davide xi laj sjac'be ti buch'u nopol ta sts'ele: —¿C'usi ta x'ac'bat ti buch'u ta smil ti vinic le'e ti ch'ab xi sc'oplal yu'un ti xvulvun ta svulel ti Israele? ¿Bu loc' talel ya'yel ti pucujil filisteo vinic le'e, ti cajal ye ta svulilanel ti yajsoldadotac ti cuxul Diose?

²⁷ Ti stuquique ja' no'ox laj xcha'alic ti c'u s'elan laj slo'iltaic ta ba'yele. Laj yalic ti oy c'usi ta x'ac'bat ti buch'u ta smil ti Goliate.

²⁸ Ja'uc ti Eliabe, sbanquil ti Davide, laj ya'i ti ta xlo'ilajic xchi'uc ti viniquetique. Xti'et xa sjol ti xi laj yalbee: —¿C'usi tal asa' ya'yel li'e? ¿Buch'u laj ac'ubanbe comel ti chijetic ti lamal ta sbajtical banomile? Yu'un xcojtiquinot lec ti c'u s'elan ti avuni talele, ti c'usi mu lecuc ti c'usi ta xapase, ti ja' no'ox oy ta avo'nton ta xaq'uel ava'i ti letovajele.

²⁹ —¿C'usi laj jpas avil avie ti c'alal naca no'ox ta xic'opoje? —xi laj stac' ti Davide.

³⁰ Va'i un, laj sq'uej sba loq'uel ta stojol ti xchi'iltac ta voq'uele. C'alal lic sjac'be ti yane, co'ol tac'bat talel jech c'u cha'al tac'bat ta ba'yele.

³¹ Oy jlom laj ya'iic ti c'usi ta sjac'olan ti Davide. Bat yalbeic ya'i ti Saule, ti tae ta iq'uel yu'un taje.

³² Va'i un, ti Davide xi laj yalbe ya'i ti Saule: —Altic ti oy buch'u ta stsiq'ues yo'nton ta scoj ti filisteo le'e, yu'un ti yajtunelun ti Jcuch Abtele, ta xbat jtsac jbacutic ta leto xchi'uc ti vinic le'e.

³³ —Mu xu' avu'un ta stsaquel ta leto ti filisteo vinic le'e —xi laj yal ti Saule—, uni queremot to. Ja'uc ti stuque ta squeremal no'ox lic xchan talel ti ac'-letoe.

³⁴ Xi laj stac' ti Davide: —Ti c'alal ta jq'uelbe xchij ti jtot ti vu'un avajtunelune, Jcuch Abtel, c'alal mi ta xtal ti'atuc yu'un ti leone, mi ja' ti osoe, ti ta xchech ech'el jcotuc ti bu lamal cu'une,

³⁵ ta jtij-pati ech'el, ta jpojbe talel ta ye. Ti mi xliquic talel ta sti'elune, ta jpujbe majel. Ta jatbe ti yee ja' to ti c'uxi ta xcham cu'une.

³⁶ C'usiuc no'ox, mi león, mi oso, ti avajtunel li'e, Jcuch Abtel, ta smil. Ja'uc ti pucujil filisteo vinic le'e, ja' no'ox jech ta xc'ot ta stojol, yu'un cajal ye xa'i sba ta stsaquel ta c'op ti yajsoldadotac ti cuxul Diose.

³⁷ Ti c'otem ta pasel yu'un ti Dios ti spojun ta ye ta sti' ti jti'oval leone, mi ja' ti osoe, ja' ono'ox jech ta xispojun. Mu xistsalun ti filisteo le'e. Va'i un, xi albat yu'un ti Saule: —Batan un cha'e, xchi'inojucot ti Dios.

³⁸ Laj taj une, ti c'usi slapoj ti Saule, laj yac' ye sti' ti ac'o yich' lapbel ti Davide, jech c'u cha'al ti sbin sjol ti meltsanbil ta c'anal taq'uine, ti smacobbailtac ta sjunule.

³⁹ Ta slajeb xa un, ti Davide laj xchuc ta xchucbenal ti espada ta spat sc'u'e. Lic xanavuc xchi'uc taje. Mi ja'uc nopem xa'i xchi'uc scotol taje. Ta jech no'ox yepal, xi laj yalbe ti Saule: —Mu xu' xixanav xchi'uc scotol li'e. Mi ja'uc nopem xca'i yu'un le'e. Va'i un, laj sloc' scotol ti c'usitic slapoje.

⁴⁰ Ts'acal to un, stam xch'a ech'el ti snamte'e. Lic st'uj vo'bej ch'uletel ton ti ta uc'ume, ti laj stic' ech'el ta xvorxa nucul ti sjelbunoje. Stsacoj batel jun sjimich' ti lic stsac sbaic ta c'op xchi'uc ti filisteoe.

⁴¹ Ja'uc ti filisteoe c'un c'un xvelet batel, ba snup ta be ti Davide. Jba'be ech'el yu'un ti yajcoltaobbae.

⁴² C'alal ti filisteo laj sq'uel batel ti Davide, laj yil ti ja' jun querem ti lec chacvac'an xa'i sbae, ti lec c'upil sbae. Mu jutebuc tsots sc'oplal laj ya'i.

⁴³ C'ajomal no'ox xi laj yalbee: —¿Mi yu'un co'ol j'elan ts'i' ta xavilun ti ayolinoj aba ta xtal ach'amun ta te'e? Ta sventa ti dios yu'une, ta jech no'ox yepal, lic sbis ta cotol chaval ti Davide.

⁴⁴ Ma'uc no'ox un, xi laj yalbee: —¡La' li'e, ti abec'tale, ta xcac'be sti' mutetic ti xvilet ta vinajele, xchi'uc ti jti'oval chon ti xcotlajet ta osiltique!

⁴⁵ Xi tac'bat yu'un ti Davide: —Ta xtal atsacun ta milel ava'i ta avespada, ta alanza, xchi'uc ta apuya'e. Ja'uc ti vu'une ta jtsacot ava'i ta milel ta sventa ti Dios ti scotol xu' yu'une, ti ja' banquilal jpojvanej yu'un ti Israel ti cajal ave ati' ta xatsac ta c'ope.

⁴⁶ Avi tana li' une, ti Diose ta xayac'ot ta coc ta jc'ob. Ta xajmilot avi tanae. Ta jboj anuc'. Sbec'talic ti j'ac'-leto filisteoetique, ta xcac'be sti' ti mutetic ti xvilet ta vinajele, xchi'uc ti jti'oval chon ti xcotlajet ta osiltique. Scotol banomil ta sna'ic ti oy jun Dios yu'un ti Israele.

⁴⁷ Scotol ti c'u yepal li' tsobolique, ta sna'ic lec ti ma'uc ta xpojvan ta espada ta lanza ti Diose. Ti letovajel li'e, ja' c'otem ta sventa stuc ti Diose. Ta xac'oxuc ta coc ta jc'obcutic.

⁴⁸ Ti filisteoe xvelet no'ox loc' batel, bat snup ta be ti Davide. Ta jech no'ox yepal, xi s'elan lic xchapan sba ta stsaquel ta leto ti filisteoe:

⁴⁹ Laj stic' sc'ob ta xvorxa nucul. Laj stsac loq'uel jbej ton ti laj stic' ochel ta sjimich'e, ti xjimet no'ox liquel yu'une. Lec laj sc'ojbe ta sti'ba ti filisteoe. Taj to patal c'ot ta lum ti c'alal lec c'ojbat ti ton ta sti'ba ti filisteoe.

⁵⁰ Jech c'ot ta pasel ti laj stsal filisteo ti Davide. Yu'un ta jlic no'ox jimich' xchi'uc ta jbej no'ox ton, laj stunes ti David ti toj chamel c'ot yu'un ti laj syayijes ti filisteoe. Ti mu ja'uc jutebuc yich'oj ti yespadae,

⁵¹ xvilil batel ta anil ti bu nujul ti filisteoe. Tsac xutbe loq'uel ti yespada ti oy ta snae. Laj stsutses o ta jmoj xchi'uc. Ts'acal to un, c'oc xutbe ti sjole. C'alal laj yilic ti filisteoetic ti cham xa ti banquilal j'ac'-leto yu'unique, xc'uletic no'ox batel ta jatobal.

⁵² Va'i un, ti viniquetic yu'un ti Israele xchi'uc ti Judae, lic avanicuc ta sventa ti ac'-letoe. Snutsojic batel c'alal to ochebal yu'un ti jteclum Gate xchi'uc ta ti'naetic yu'un ti Ecrone. Ta sjunul be ti ta xbat ta Saaraime, ti ta xbat ta Gate, xchi'uc ti ta Ecrone, busul no'ox batel ti j'ac'-leto filisteoetic ti chamemic xae.

⁵³ C'alal laj xa yo'nton ta snutsel ti filisteoetique, ti israeletique sutic ech'el. Ti c'usitic x'ayan yu'un ti scontraic ti bu lamalique, laj yu'ninbeic.

⁵⁴ Ja'uc ti David une laj yich'be batel sjol ti filisteo c'alal to Jerusalén. Ja'uc ti yabtejebtaque, bat yac' ta yaxibal na.

⁵⁵ Ti Saule xi laj sjac'be ba'yel ti Abner banquilal yu'un ti yajsoldadotaque, ti laj yil ti bat snup ta be filisteo ti Davide: —Abner, ¿buch'u stot ti querem le'e?

⁵⁶ —Bats'i ta melel, Jcuch Abtel, mu jna' buch'u —xi laj stac' ti Abnere. —Lec cha'e, baino ta sjaq'uel —xi albat yu'un ti ajvalile.

⁵⁷ Ja'uc le' une, ti c'alal laj xa smil filisteo ti Davide, spetojbe ech'el ti sjole. Ti Abnere yic'oj batel ta stojol Saúl ti Davide.

⁵⁸ Xi jac'bat yu'une: —Albun ca'i, querem, ¿buch'u ti atote? Ti Davide xi laj staq'ue: —Jcuch abtel, xnich'onun ti avajtunel Isaie, ti oy ta Belene.