1 Samuel 16 - Bible in Tzotzil de Chamula

Ti Davide ta x'ac'bat snup yabtel ta ajvalilal

¹ Ti Diose xi laj yalbe ti Samuele: —¿C'usi to ora ta x'ech' avu'un ti at-o'ntonal ta scoj ti Saule? Mu xa jc'an ti tiq'uil ta ajvalilal yu'un ti Israele. Nojeso ta aceite ti avuni cachue. Ta jc'an ta xabat ta sna ti Isaí ti oy ta Belene, yu'un laj xa jt'uj ta ajvalilal jun ta scotol ti xnich'nabe.

² —¿C'u s'elan ta xibat un? —xi laj stac' ti Samuele—. ¡Mi laj ya'i ti Saule, ta xismilun! Xi tac'bat yu'un ti Diose: —Ic'o ech'el jcotuc ch'iom chij. Alo ti ta xamilbun ta jmotone.

³ Ts'acal to un, ic'o ech'el ti Isaí ta yaq'uel ti milbil matanale. Ta xcalbot ava'i ti c'usi sc'an ta xapase. Ac'bo snup yabtel ta ajvalilal ti bu ta xcalbot ava'i ti sc'oplale.

⁴ Ti Samuele lic spas jech c'u cha'al albat yu'un ti Diose. C'alal c'ot ta Belene, bat nupatuc talel ta be yu'un ti moletic ta lume, ti xi'eltic xa xi laj sjac'beique: —¿Mi lec ti a'yej avich'oj talele?

⁵ —Ja' jech —xi laj stac' ti Samuele—. Yu'un tal cac'be milbil matanal ti Diose. Poco tuso abaic, ba chi'inicun ta yaq'uel ti milbil matanale. Ts'acal to un, ti Samuele lic spoc stus ti Isaí xchi'uc ti xnich'nabe. Laj yic' batel ta yaq'uel ti milbil matanale.

⁶ Ti c'alal c'otique, ti Samuele xi laj snop ti c'alal laj yil ti Eliabe: “Ta jbel sc'oplal ja' ti vinic le'e, ti t'ujbil xa ta ajvalil yu'un ti Diose.”

⁷ Ja'uc le'e, xi albat yu'un ti Diose: “Ma'uc xbat asat yu'un ta sq'uelel ti c'u s'elane, ti ja' xa sva'leb o yilele. Ma'uc tsots sc'oplal ta xca'i yu'un le'e. Ti viniquetique ja' no'ox ta sq'uel ti c'u s'elan ta ilel ti stalele. Ja'uc ti vu'une ja' ta jq'uel ti c'u s'elan ti yo'ntone.”

⁸ Va'i un, ti Isaie laj yic' talel ti Abinadabe, ti tal sva'an ta stojol ti Samuele. Ja'uc ti Samuele xi laj yalbe ti sc'oplale: —Le'e, ma'uc ma' ti t'ujbil yu'un ti Diose.

⁹ Ts'acal to xtoc un, ti Isaie tal sva'an ti Samae. Ja'uc ti Samuele xi laj yale: —Ma'uc ma' ti t'ujbil yu'un le'e.

¹⁰ Yucubal xnich'on, laj sva'an ti Isaí ta stojol ti Samuele. Ja'uc ti Samuele jamal laj yal ti mu junuc ma' ti t'ujbilic yu'un ti Diose.

¹¹ Ta slajeb xa un, xi laj sjac'bee: —¿Mi ja' no'ox jech yepal anich'nab avi le'e? —C'ajomal xa no'ox sc'an ti slajeb uni c'ox ti sbainoj ta sq'uelel ti chije —xi laj stac' ti Isaie. —Taco mantal ta yiq'uel talel —xi laj yal ti Samuele—. Ta xlic jliquestic sventainel mi vule.

¹² Ti Isaie laj stac ta iq'uel. Chacvac'an xa'i sba ti biq'uit quereme. Mu'yuc buch'u xco'olaj jech xchi'uc ti c'upil sbae. Va'i un, ti Samuele xi albat yu'un ti Diose: —Ja' chcal ma' le' une. Ja' yu'un un, lican, va'lan, ac'bo snup yabtel ta ajvalilal.

¹³ Va'i un, ti Samuele, ta jech no'ox yepal, lic stsac ti yavil aceitee. Ta sba ta sat scotol ti sbanquiltaque, laj yac'be snup yabtel ta ajvalilal ti querem ti sbiinoj Davide. Ta yorail ti jech c'ot ta pasel taje, tal u'ninatuc yu'un xcuxlejal ti Diose. Ts'acal to un, ti Samuele c'opoj comel, bat ta Ramá.

Ti Davide ta xtunesat yu'un ti Saule

¹⁴ Ja'uc le' une, ictae comel yu'un xcuxlejal Dios ti Saule. Lic ilbatuc svocol yu'un pucuj ti laj yac' ye sti' ti Dios ti jech ta xc'ot ta stojole.

¹⁵ Jech o xal ti buch'utic ochemic ta yajtuneltaque, xi laj yalbeique: —Mu x'ech', mu xnel ti avocol ta xavil ta aba ta asate, yojtot. Ta xilbot avocol ti pucuj ti c'ot ta pasel yu'un ti Dios laj stac talel ta atojole.

¹⁶ Ja' yu'un un cha'e, albo mantal ti avajtuneltaque ti ac'o sa'ic talel buch'u sna' stijel ti arpae, ti xcuxet to ta xava'i ti banomil yu'un c'alal ta xich' tijel arpa c'alal yorail ta xilbajinot ti pucuje.

¹⁷ —Sa'ic talel un cha'e ti buch'u sna' lec stijele, ic'beicun talel —xi laj stac' ti Saule.

¹⁸ Va'i un, oy jun ta scotolic ti xi laj yale: —Quiloj ti oy jun ta scotol xnich'on ti Isaí ti nacal ta Belene, ti toj lec sna' stijele, xchi'uc ti xtojob ta ac'-letoe, ti mu sna' xi'e. Oy smelol ti sc'ope. C'ac'al querem xa'i sba. Coltabil yu'un ti Diose.

¹⁹ Va'i un, ti Saule laj stac batel j'al-mantal j'ich'-c'opetic ta stojol ti Isaie yo' jech xi ta xalbeique: “Tacbun la batel ti anich'on David ti avajq'uel-chije.”

²⁰ Xnich'on ti Isai David sbie, laj stac ta stojol ti Saule. Laj stac batel ta stojol jcot burro ti xcuchoj batel ti pane, xchi'uc jbej yavil vino ti meltsanbil ta nucul ti noj ta vinoe, xchi'uc jcot tentsun.

²¹ Ja' jech c'ot ti David ta stojol ti Saule. Lic tunuc ta stojol. Lic syales xc'uxulil ti Saúl ta stojole, ti lic sva'an ta yajcoltaobbae.

²² Ti Saule laj stac batel jun j'al-mantal j'ich'-c'op ta stojol ti Isaie, ti laj sc'anbe vocol ti ac'o comuc o ti David ta stojole, yu'un toj lec ta xil ta j'ech'el.

²³ Ja' yu'un un, ti c'alal ta xlic ilbajinatuc yu'un pucuj ti Saúl ti tacbil talel yu'un ti Diose, ta xlic stij arpa ti Davide. Ti jech taj une, xcuxet to ta xa'i banomil ti Saule, ti ta sq'uej sba loq'uel ti pucuj ta stojole.