1 Samuel 12 - Bible in Tzotzil de Chamula

Ti c'u yelanil ventainvan ti Samuele, ta xac'be comel sbain ti Saule

¹ Laj taj une, xi laj yal ti Samuel ta sba ta sat scotol ti israeletique: —Laj avilic ti laj jchiquintaboxuc ac'opic ta scotol ti c'usi laj ac'anbeicune. Laj xa jva'an ti jun ajvalile.

² Li' oy ta atojolic ti ajvalil ti ta xastojobtasoxuque. Ja'uc ti vu'une limolib xa, sac chijan xa sjunul ti jole. Li' oy ta atojolic ti jnich'nabtaque. Yu'un ta jqueremal to ox, lic jtojobtasoxuc talel ti li' to avi ta xic'opoj ta atojolique.

³ Ti mi oy bu xi s'elan laj jpas ta atojolique, li' oyune: Mi oy buch'u laj jcu'ninbe ti xvacaxe, mi ja' ti sburroe, mi oy buch'u laj cac'be ti svocole, mi ilbaj ti laj cute, mi oy bu lec laj ca'i ti laj jtsac ti mich'ob c'abale, chapanic jmul ta stojol ti Diose, xchi'uc ta stojol ti t'ujbil ajvalil yu'une. Ta jtoj ti c'u yepal ti quile.

⁴ —Ta j'ech'el mu'yuc laj avac' jvocolcutic, ta yutilaneluncutic, ta yilbajineluncutic. Mi ja'uc oy bu lec laj ava'i ti laj atsac ti mich'ob c'abale —xi laj stac'beique.

⁵ —Ti Diose xchi'uc ti ajvalil ti laj st'uje, ja' rexticoetic ti mu'yuc laj atabeicun jutebuc ti jmule —xi laj yal ti Samuele. —Ja' jech —xutic.

⁶ Ma'uc no'ox taje, ti Samuele xi laj yalbe ti jteclume: —Ti Diose laj sliques yabtel ta sventa ti Moisese xchi'uc ti Aarone ti laj sloq'ues talel ta Egipto ti amolmuc'totic ta vo'nee.

⁷ Ja' yu'un un cha'e, chapano abaic ta ya'yiel ti ta xcalboxuc ava'iic ta sba ta sat ti Dios sc'oplal scotol ti c'usi laj spas ta atojolique, xchi'uc ta stojolic ti amolmuc'totic laj ech'icuc ta vo'nee.

⁸ C'alal batic ta Egipto ti Jacob xchi'uc ti snitilultaque, laj yich'ic tsots ilbajinel yu'un ti egipcioetique. Lic sc'anic parte ta stojol Dios ti amolmuc'totic ta vo'nee. Laj stac batel ti Moisese xchi'uc ti Aarone. Laj sloq'uesic talel ta Egipto ti amolmuc'totic ta vo'nee, ti vulic ta naclej yu'unic ta banomil li'e.

⁹ Ja'uc le' une, ti stuquique laj xch'ay ta yo'ntonic ti Ajvalil Dios yu'unique. Ac'atic ech'el ta yoc ta sc'ob ti Sisarae, banquilal jtsobvanej yu'un yajsoldado ti Jabine, ajvalil yu'un ti Azore, xchi'uc ta yoc ta sc'ob ti filisteoetique, xchi'uc ta yoc ta sc'ob ti ajvalil yu'un ti Moabe, ti lic stsac sbaic ta leto xchi'uque.

¹⁰ Ja'uc le' une, lic ya'i sbaic ti staoj smulic ta stojol ti Dios ti jech laj xa svalopatinic comel ta scoj ti bat snijan xchiman sbaic ta yich'el ta muc' ti ep ta tos sloc'obbail ti Baale, xchi'uc ti Astartee. Jech xvocoletic liquel ti ac'o pojaticuc ti tsalbilic yu'un ti yajcontraique, xchi'uc ti laj yac' ye sti'ic ti c'ajomal no'ox ta snijan xchiman sbaic ta yich'el ta muc' stuc ti Diose.

¹¹ “Va'i un, ti Diose lic sva'anan ta jpojvanejetic ti Jerobaale, ti Baraque, ti Jeftee, xchi'uc ti Samuele, yo' jech ta xaspojoxuc ti tsalbiloxuc yu'un ti avajcontraique. Ja' to jech laj ataic ti jun avo'ntonic lanaquiique.

¹² Ja'uc le' une, ti c'alal laj avilic ti ta xastsacoxuc ta leto ti Nahas ajvalil yu'un ti amonitaetique, laj ac'anbeicun jun ajvalil ti ac'o xasventainoxuque, c'alal ti Ajvalile, ja' ti Dios avu'unique.

¹³ Le'e, li' xa oy ta atojolic ti ajvalil ti laj at'ujique. Laj xa yac'boxuc Dios ti jun ajvalil laj ac'anbeique.

¹⁴ Avi tana li' une, ja' avabtelic ta xi'tael ti Diose, ti nijil chimiloxuc ta stojol ta yich'el ta muq'ue, ti ts'etel lec ani' achiquin ta ya'yibel ti sc'ope. Mu xabajbeic ti smantaltaque. Cuxianic ta spasel ti c'usi ta sc'an ti Diose, jmoj xchi'uc ti ajvalil ti ta sventainoxuque. Va'i unbi, lec ta xc'ot ta loq'uel avu'unic ti c'usi ta xapasique.

¹⁵ Yan ti mi mu xach'unique, ti ja' no'ox ta xabajbeic ti smantaltaque, ta xastsitsoxuc jmoj xchi'uc ti ajvalil avu'unique.

¹⁶ “Ja' yu'un un cha'e, mu to xaloq'uic batel ti bu oyoxuque. Ta xavil ta aba ta asatic ti mu albajuc ta svinajes ta sliquesel ta spasel yabtel ti Dios ta atojolique.

¹⁷ Avi tanae, ja' xa yorail ta xich' tsobel ti trigoe, ti ma'uc yorail ta xac' ti vo'e, ¿mi mu jechuc? Lec oy cha'e, ta jta ta c'oponel ti Dios ti xc'avlajet no'ox liquel yu'un ti chauque xchi'uc ya'lel ta xac' taluque, yo' jech ta xavojtiquin lec abaic xchi'uc ta xana'ic lec ti c'u a'elanic ta xayiloxuc ti Diose, ti chopol labatic ti laj ac'anic ti jun ajvalile.”

¹⁸ Ta jech no'ox yepal un, ti Samuele lic sta ta c'oponel ti Diose. Xc'avlajet no'ox liquel yu'un ti chauque xchi'uc ti ya'lele. Scotol ti jteclume toj ech'em xi'ic ta stojol ti Diose, ta stojol ti Samuele.

¹⁹ Jech o xal un, scotolic xi laj yalbeic ti Samuele: —C'anbo vocol ti Dios avu'un ta sventa ti avajtuneltac li'e yo' jech mu xichamcutic. Yu'un laj to cac'becutic xchi'il ti jmulcutic ti c'alal laj jc'ancutic ti ajvalil ti c'alal oy xa ono'ox ti jmulcutique.

²⁰ Xi tac'batic yu'un ti Samuele: —Mu xaxi'ic. Melel ava'uquic, chopol ti c'usi laj apasique. Ja'uc le' une, mu xa xach'ac abaic ta stojol ti Dios avi tanae. C'ajomaluc no'ox ta sjunuluc avo'ntonic, nijano chimano abaic ta yich'el ta muc'.

²¹ Mu xa naban abaic ta stojol ti jeche' diosetique, ti mu ja'uc xu' ta scoltaoxuque, ti ta spojoxuque, ti mu'yuc c'usi xu' yu'unique.

²² Ti jech jelavem smuc'ul stsatsal ti Diose, ta xac' ta ilel ti mu xayictaoxuc comele, ti c'otem ta yo'nton ti yalab xnich'naboxuque.

²³ Dios ac'o sva'an sba ta jtojol yo' jech mu xc'ot ta pasel ta jta jmul ta stojol ti ta xquicta jba ta sc'anbel vocol ta atojolique. Ja' lec ti c'otuc ta pasel ti ta jchanubtasoxuc ti c'usi stac' chiquintaele, ti lec ta pasele.

²⁴ C'otuc ta pasel avu'unic ti xi'taic ti Diose, ti nijil chimiloxuc ta yich'el ta muc' ta melele, xchi'uc ti ta sjunuluc avo'ntonique ti mu xch'ay xava'iic ti ep oy c'usi lec laj spas ta atojolique.

²⁵ Yan ti mi ja' laj yac' ajol abaquilic ta spasel ti c'usi chopole, ta xc'ot ta atojolic ti tub xi ac'oplalic xchi'uc ti ajvalil avu'unique.