1 Reyes 6 - Bible in Tzotzil de Chamula

Ti Salomone ta xlic sva'an ti ch'ulnae

¹ Ti Salomone och ta sva'anel xch'ulna Dios ti c'alal oy xa ta xchanibal jabil yochel ta ajvalilal yu'un ti Israele, ta yu'al Ziv ti ja' xa xchibal u yu'un ti jabile, c'alal xchanibal xa ciento xchi'uc chanvinic (480) jabil ti sloq'uelic talel ta Egipto ti israeletique.

² Ti ch'ulna ti och ta sva'anel ti Salomón ta sventa ti Diose, yich'oj vucub xcha'vinic (27) metro ti snatile, yich'oj baluneb (9) metro ti sjamleje, yich'oj oxlajuneb metro xchi'uc o'lol (13.50) ti stayleje.

³ Ti ta ochebal yamaq'uil yu'un ti ch'ulnae, yich'oj baluneb (9) metro ti snatile, co'ol xchi'uc jech c'u cha'al sjamlej ti ch'ulnae, yich'oj chanib metro xchi'uc o'lol (4.50) ti sjamlej yeloval sti'e.

⁴ Ti sventanail ch'ulna laj spas ti Salomone, jamal lic ti ta yute, ja' biq'uit xa ic'ot ta spat.

⁵ Ma'uc no'ox taj une, ta joyob laj sliques ech'el spac'bal jbej na ti nabal c'ot ta joyob bu lic spac'balil ti ch'ulnae. Jech c'u cha'al lic ta joyob ta sliquebale, jech c'ot xchi'uc ti ta o'lole. Laj smeltsan ep ta c'ol na ta joyob.

⁶ Ti sjamlej yich'oj ti jbej na ti lic ta sliquebale, yich'oj buluch-ch'ix xchi'uc oxbej ni' c'ob (2.25 m.) ti sjamleje. Ja'uc ta xcha'cojale, yich'oj oxlajunch'ix xchi'uc jquejlej (2.70 m.) ti sjamleje. Ti ta yoxcojale, yich'oj vo'lajunch'ix xchi'uc ch'utub (3.15 m.) ti sjamleje, ja' ti xjam ech'el xpach'alil spac'balil ti ch'ulnae, yo' jech mu xjelav ech'el ta c'atlej sts'amte'altac ti ch'ulna ta spac'obale.

⁷ Ti stonaltac ti ch'ulna laj yich'e, lec anbil ta j'ech'el. C'alal laj yich' va'anel ti ch'ulna une, mu'yuc xa xvinaj xc'ojc'un ti martilloe. Mi ja'uc xvinaj xc'ojc'un ti yan abtejebaletic ti meltsanbil ta taq'uine.

⁸ Ja'uc ti sti'tac ti sliqueb ti jbej nae, xi com ta stuq'uil bats'i c'ob yu'un ti ch'ulnae. Ti ochebal yu'un ta xcha'cajale, xchi'uc ti ta yoxcojale, oy jun xot-xot tec'obal ti ta xmuye.

⁹ C'alal tsuts xa yu'un sva'anel spac'obal ch'ulna ti Salomone, laj slambe sts'amte'altac ta naca ch'ut te' ti luchaltic no'ox yutsile.

¹⁰ Ja' jech laj spas xtoc ti jbej na ti nabal ta joyob ta sjunul ti ch'ulna ti yich'oj staylej buluch-ch'ix xchi'uc oxib ni' c'ob (2.25 m.) jujucoje, ti tsacal c'ot xchi'uc spac'obal ti ch'ulnae.

¹¹ Va'i un, ti Diose xi laj yalbe ti Salomón ti laj sc'opone:

¹² “Ti jech yacalot ta smeltsanel ti ch'ulnae, ta xcalbot ava'i, mi ja' ta xatam ta spasel ti oy c'usi jbel albile, ti c'usi nopbil cu'une, mi ta xc'ot ta pasel avu'un ti jmantaltaque, ti mi co'ol avo'nton xchi'uque, ta xc'ot ta pasel cu'un ti jtrate jech c'u cha'al calojbe ya'i ti David ti atote, ti ja' ac'oplale.

¹³ Ta jchi'in ta naclej ti israeletique. Mi ja'uc ta jten ti Israel ti jteclumale.”

¹⁴ Ti Salomone tsuts yu'un ta sva'anel ti ch'ulnae.

¹⁵ Ta naca ch'ut te' tenel-te', laj sjil ta maquel spac'obal ti yut ch'ulnae. Naca tenel-te' laj yac'be ta yac'ol ta yolon xchi'uc naca ta tojal tenel-te' laj sq'ui ta lamel ti ta lumtique.

¹⁶ Ma'uc no'ox taje, ta naca ch'ut te' tenel-te' laj sjil ta maquel ta yac'ol ta yolon ta yut ta spat ti ch'ulnae, ti yich'oj baluneb (9) metro sjamlej ta jujujot ti laj stuch' ta maquele, ti c'ot ta sventa yavil yu'un ti Bats'i Cuxul Ch'ul Cuartoe.

¹⁷ Ta yut ti ch'ulnae, ta yeloval ti Bats'i Cuxul Ch'ul Cuartoe, yich'oj vaxaclajuneb (18) metro ti snatile.

¹⁸ Ti naca ch'ut te' tenel-te' ti xcha'lamal spac'obal ti yut ch'ulnae, yich'ojan loc'tabil nichimetic, xchi'uc sat te'etic. Scotol naca ch'ut-te', mu ja'uc xvinaj jbejuc ton.

¹⁹ Ja' jech laj xchapan ti Bats'i Cuxul Ch'ul Cuarto ta ch'ulna ti Salomone yo' jech ta stic' ochel xcaxail strate ti Diose.

²⁰ Ti yut ti Bats'i Cuxul Ch'ul Cuartoe, yich'oj baluneb (9) metro ti snatile. Yich'oj baluneb (9) metro ti sjamleje. Yich'oj baluneb (9) metro ti stayleje. Ta yeloval ti bu oy ti Bats'i Cuxul Ch'ul Cuartoe, ti Salomone laj smeltsan jun altar ti meltsanbil ta ch'ut-te'e, ti laj sbon lec ta oroe.

²¹ Scotol yut ti ch'ulnae, laj sbon lec ta bats'i oro, xchi'uc ti Bats'i Cuxul Ch'ul Cuartoe. Ti ta yeloval ti bu taje, laj sjoc'anan carinaetic ti meltsanbil ta oroe.

²² Ti xcaltique, naca ta oro bonbil sjunlej ti ch'ulnae, xchi'uc ti altar ti oy ta yeloval ti Bats'i Cuxul Ch'ul Cuartoe.

²³ Laj smeltsan xtoc, ta olivo te' chib sloc'obbail ti c'usi oy xic' ta sventa ti Bats'i Cuxul Ch'ul Cuartoe. Ti jujun taje, yich'oj o'lol yo'obal (4.50) metro ti snatile.

²⁴ Xic' ti c'usi loc'tabile, yich'oj buluch-ch'ix xchi'uc cha'bej c'ob (2.25 m.) ti june. Ja'uc ti june, yich'oj no'ox xtoc buluch-ch'ix xchi'uc cha'bej c'ob (2.25 m.) ti xiq'ue. Ti tijil c'ot xiq'uic ta xchibalic ti c'usi oy xic' une, loc' ta chanib metro xchi'uc o'lol (4.50) ti snatile.

²⁵ Co'ol sbisol yich'oj ti c'usi oy xiq'ue, ti loc' ta chanib metro xchi'uc o'lol (4.50) ta xchibalique, yu'un co'ol meltsanbilic xchi'uc co'ol ti c'u s'elan loc'tabile.

²⁶ Ja'uc ti snatile, yich'oj chanib metro xchi'uc o'lol (4.50) ti jujune.

²⁷ Ti Salomon une laj stic' ochel ta Bats'i Cuxul Ch'ul Cuarto. Ti c'usi oy xic' une lich'il c'ot ta o'lol ti Bats'i Ch'ul Cuarto ti sba sni' xiq'uique. Ti jun xiq'ue tijil c'ot ta jot pac'bal ta sba sni' xiq'ue. Ti june tijil c'ot xic' xi ta jot pac'bale.

²⁸ Ti Salomone laj sbon lec ta oro ti c'usi oy xiq'uic ta ts'acal to une.

²⁹ Ta spat, ta yut scotol ti ch'ulnae, laj xch'oj ta loc'tael ti c'usi oy xiq'ue, ta sloc'tael ti xane, ta sloc'tael ti nichimetique.

³⁰ Ja' jech xtoc ta lumtic ti bu q'uiil batel ti tenel-te'e, laj sbon ta oro scotol.

³¹ Ja'uc ti sti' ti ochebal yu'un ti Bats'i Cuxul Ch'ul Cuartoe, naca ta olivo te' laj smeltsan. Ta sba sti'e, xchi'uc ti yoyale, xbalet vo'pol loc'tabil.

³² Ti jech ta olivo te' ti sti'e, laj sloc'ta ta meltsanel ti c'usi oy xiq'ue, xchi'uc sloc'ol xanetic, xchi'uc sloc'ol nichimetic, ti laj sbon lec ta oro scotol ti c'usitic loc'tabil ta ts'acal to une.

³³ Ja'uc ti ta sventa ochebal smuc' ta ti' ti ch'ulnae, lec chantsel laj smeltsan ta olivo te' ti smarcoile.

³⁴ Ti xcha'pechal ti'nae, meltsanbil ta tojal te', ti chu' ti'naetique.

³⁵ Laj xch'oj ta loc'tael ti c'usi oy xiq'ue, ti xanetique, ti nichimetique. Ts'acal to un, laj sbon ta jayal oro ti c'usitic loc'tabile.

³⁶ Ta yeloval sti' ti ch'ulnae, laj sva'an muyel jun pac'bal ta naca ton ti jit'il xmuye. Ti bu c'ot ta tsutsel ti oxchol tone, laj yac'be jcoj anbil chantsel ch'ut te'.

³⁷ Ti ta xchanibal jabil yochel ta ajvalilal ti Salomone, ti ja' o yu'al ti Zive, laj yich' liquesel stsaclebtac xch'ulna ti Diose.

³⁸ Ti ta xbuluchibal (11) sjabilal yochel ta ajvalilale, ti ja' o yu'al ti Bule, ti ja' xa xvaxaquibal (8) u yu'un ti jabile, tsuts ti jujuti' ti c'usi xa sc'an pasbel ti ch'ulnae, yepal to ti c'usi sc'an pasbele. Vucub (7) jabil sjalil abtej ti Salomone.