1 Reyes 5 - Bible in Tzotzil de Chamula

Ti Salomone ta spas strate xchi'uc ti Hiram ajvalil yu'un ti Tiroe

¹ Ti Hiram ajvalil yu'un ti Tiroe, ti c'alal laj ya'i ti ac'bat xa snup yabtel ta ajvalilal ti Salomone, ti och xa ta xq'uexol David ti ja' stote, laj stac ech'el yajtuneltac, yu'un lec laj yil sbaic xchi'uc ti Davide.

² Va'i un, ti Salomone xi laj stac' ta alel ta stojol ti Hirame:

³ “Xana' lec, ti David ti ja' jtote, mu'yuc xu' yu'un ta sva'anel xch'ulna ti Ajvalil Dios yu'une, ta scoj ti oy letovajel ta stojol, ja' to ti c'uxi tsalbat yu'un Dios ti scontrataque.

⁴ Avi tana une, buyuc no'ox laj xa spajes c'op ti Ajvalil Dios cu'une. Mu'yuc ti jcontracutique. Mi ja'uc ti oy c'usi chopol ta xc'ot ta pasel ta jtojolcutique.

⁵ Ja'uc le' une, laj xa jnop ta jva'anbe xch'ulna ti Ajvalil Dios cu'une jech c'u cha'al laj yal sc'op ta stojol ti David ti ja' jtote, ti c'alal albat ono'ox ti ja' jun xnich'on ta x'och ta ajvalil yo' ta xcom ta xq'uexole, ti albat sc'oplal ti ja' ta smeltsan ti ch'ulna sventa staobil ta na'ele.

⁶ Paso mantal un cha'e, ti ac'o xtuch'beicun ti ch'ut-te' ti oy ta Libanoe. Jech ti cajtuneltaque ta scoltaic ti avajtuneltaque. Ta jtojbot ti c'u yepal ta xac'anbe ti stojol ti ta xc'ot ta stojol ti avinictaque. Yu'un xana' lec ti mu jna'cutic xtuch'el ti te' jech c'u cha'al sna'ic xtuch'el ti sidonioetique.”

⁷ C'alal laj ya'i ti Hiram ti va'i s'elan stacoj batel mantal ti Salomone, xmuyubaj xa avan ta j'ech'el ti xi laj yale: “¡Lequil-c'optabiluc ti Dios avi tana li'e, ti laj yac'be jun xnich'on ti Davide, ti bij ta j'ech'ele yo' jech ta spas ta mantal ti muc' ta lume!”

⁸ Ts'acal to un, ti Hirame xi laj stac'be sutel sc'op ti Salomone: “Laj xa quich' ti mantal ti laj atacbun talele. Ta xcac'bot ti ac'ubul laj ac'ane. Ta xlic yich' tuch'el ti ch'ut-te'e xchi'uc ti toje.

⁹ Ti cajtuneltaque ta xeanic yalel talel ta vits Líbano, ti ta xbat sbusanic ta ti' nabe. Ti bu taje, ta xich' pech'el scajtac ti xcajet ta xbat ta ba vo' yu'unic yo' jech ta xc'ot ti bu ta xavac' ta na'ele. Ti bu ta xich' jitunel ti scajtaque, ta xa xlic abain ta yich'el ech'el. Le' une, c'otuc me ta pasel avu'un ti jc'ubul ta yaq'uel ti c'usitic stac' tunel lajesel ti ta xtun ta jna ti bu ta jpas-mantale.”

¹⁰ Ja'uc le' une, ti bu xa c'alal ta xtun yu'un ch'ut-te' xchi'uc toj ti Salomone, ac'bat yu'un ti Hirame.

¹¹ Jech ec ti Salomone xi s'elan laj yac'be ech'el ti c'usi ta xtun yu'un ti Hiram ta sna ti bu ta spas mantale: chanib millon xchi'uc chanib ciento ta mil (4,400,000) litro trigo, xchi'uc chanib ciento ta mil xchi'uc chanib ciento (4,400) ta litro ti bats'i yaceiteal ti olivoe. Ja' jech yepal jujun jabil ta xac'be Hiram ti Salomone.

¹² Ti Dios une laj yac'be sbijil ti Salomone jech c'u cha'al yaloj ono'oxe. Ma'uc no'ox taje, ti Hiram xchi'uc ti Salomone laj spasic jun strateic, ti lamaj ti c'op yu'unic ta xchibalique.

¹³ Va'i un, ti ajvalil Salomone lic sbejan ta ts'ibael jun mantal sventa sc'oplal tsots abtel ta sjunul Israel. Laj stsob sba lajuneb xcha'vinic mil (30,000) ta vo' viniquetic ti yalel muyelic ta sventa ti tsatsal abtele.

¹⁴ Ti jujun veltae, tacbil ta xbatic ta Líbano lajlajun mil (10,000) ta vo' viniquetic ti xcholet ta x'ech'ic jujun ue. Va'i un, ti viniquetic taj une, jun u ta sjoctsajic ta vits Libanoe, chib u ti ta xjalij ta snaique. Ti sbainoj ta stuc'ulanel ti tsatsal abtele, ja' ti Adonirame.

¹⁵ Lajuneb xchanvinic ta mil (70,000) oy yu'un jcuch-icatsiletic ti Salomone. Chanvinic ta mil (80,000) oy yu'un ti j'an-te'etic ta te'tique.

¹⁶ Ja' mu'yuc tsacbil ta atel ti oxmil xchi'uc vo'lajunvinic (3,300) ta vo' jq'uel-abteletique.

¹⁷ Ti ajvalile laj stac ta loq'uesel anbil tonetic ti lec muc'tique, ti toyol stojol ta j'ech'el ti ta xtun ta sventa sliqueb yictac ti ch'ulnae.

¹⁸ Ti j'abteletic yu'un ti Salomone, ti Hirame, xchi'uc ti viniquetic ti liquelic talel ta Gebale, ja'ic lic xchapanic smeltsanel ti te'etique, ta yanel ti tonetique, yo' jech ta xlic yich' va'anel ti ch'ulnae.