1 Reyes 4 - Bible in Tzotzil de Chamula

Yabtel ti c'alal ochem ta ajvalilal ti Salomone

¹ Ti Salomone c'ot ta ajvalilal yu'un scotol ti Israele.

² Xi s'elan ma' ti yaj'opisialtac laj ech'uque: Ti Azarías xnich'on ti pale Sadoque.

³ Ti Elihóref xchi'uc ti Ahías xnich'nab ti Sisae, ja'ic ti ta stsaquic ta vun ti c'usitic xlaj c'otanuc ta pasele. Ti Josafat xnich'on ti Ahilude, ja' yajts'ibajom xtoc ti ajvalile.

⁴ Ti banquilal jpas-mantal yu'un ti soldadoetique, ja' ti Benaía xnich'on ti Joiadae. Ti paleetique, ja' ti Sadoque xchi'uc ti Abiatare.

⁵ Ti tsots yabtel yich'oj ta sbainel scotol ti c'usi sc'an pasele, ja' ti Azarías xnich'on ti Natane. Ti yan jbijubtasvanej yu'un ti ajvalile, ja' ti Zabud xnich'on ti pale Natane.

⁶ Ti sventainojic ti nae, ja' ti Ahisare. Ti Adoniram xnich'on ti Abdae, ja' ti sbainoj ta sq'uel ti tsots abtel ta xich' pasele.

⁷ Ti Salomone, oy yu'un lajcha'vo' viniquetic ti tsots yabtel yich'ojic ta stojol ti israeletique, ti cajanbil ta sbaic ta yac'bel ti c'usi ta xtun yu'un ti ajvalile, xchi'uc ti c'u yepal ta snae. Ti jujun ta scotolique, jun u ta jujun jabil ta xac'beic ti c'usi ta xtun yu'un ti ajvalile.

⁸ Xi s'elan sbiic ma' ti lajcha'vo' ti ac'bil tsots yabtelique: Ti Ben-hure, oy ta yoc ta sc'ob yosilal ti Efraine.

⁹ Ti Ben-déquere, oy ta yoc ta sc'ob ti Macase, ti Saalbime, ti Bet-semese, ti Elone, ti Bet-hanane.

¹⁰ Ti Ben-hésede, oy ta yoc ta sc'ob ti Arubote, ti Socoe, xchi'uc scotol xtoc ti jteclum Hefere.

¹¹ Ti Ben-abinadabe, yajnilanoj ti Tafat yantsil nich'on ti Salomone, oy ta yoc ta sc'ob scotol ti Dore.

¹² Ti Baana xnich'on ti Ahilude, oy ta yoc ta sc'ob ti Taanaque, ti Meguidoe, xchi'uc scotol ti Bet-seane, xchi'uc ti oy ta sts'el Saretane, xchi'uc xtoc ti x'ech' to ta yolon Jezreel ti lic ta Bet-sane, ti c'ot c'alal to Abel-meholae, ti x'ech' to batel ta Jocmeame.

¹³ Ti Ben-guébere, oy ta yoc ta sc'ob ti Ramot ti oy ta Galaade, ti sbainoj ti jnaclejetic ti oy ta yosilal Galaad ti sventainoj ti Jair xnich'on ti Manasese. Ma'uc no'ox taje, oy ta yoc ta sc'ob ti yosilal Argobe, ti oy ta jteclum Basane, ti bu oy oxvinic (60) ta chop muc'tic jteclum ti oy lec smocale, xchi'uc ti yich'ojan c'anal taq'uin ti stsacleb syaviale.

¹⁴ Ti Ahinadab xnich'on ti Idoe, oy ta yoc ta sc'ob ti Mahanaime.

¹⁵ Ti Ahimaas ti laj yic' ti Basemate, yantsil nich'on ti Salomone, oy ta yoc ta sc'ob ti Neftalie.

¹⁶ Ti Baana xnich'on ti Husaie, oy ta yoc ta sc'ob ti Asere xchi'uc ti Alote.

¹⁷ Ti Josafat xnich'on ti Parúahe, oy ta yoc ta sc'ob ti Isacare.

¹⁸ Ti Simí xnich'on ti Elae, oy ta yoc ta sc'ob ti Benjamine.

¹⁹ Ti Guéber xnich'on ti Urie, oy ta yoc ta sc'ob ti banomil yu'un ti jteclum Gade, steclumal to ox ti ajvalil Sihone, ti ja' to ox ajvalil yu'un ti amorreoetique, xchi'uc ti c'u yepal smacoj ti Oge, ti ja' to ox ajvalil ta Basane. Ma'uc no'ox taje, oy jun banquilal yu'unic ti tsots yabtel yich'oj ti sbainoj sjunul ti lume.

Mu albajuc ti c'usi laj sta ti Salomone, xchi'uc ti ac'bat ti sbijile

²⁰ Ti lum Judae xchi'uc ti lum Israele, mu albajuc yepal ta j'ech'el ti jnaclejetic oy yu'unique, co'ol s'elan yi' ta ti' nab ti mu atbajuque. Ja' jech oy ta j'ech'el xtoc ti ve'lile, ti uch'bajele, ti xlaet no'ox ti o'ntonal ta muyubajele.

²¹ Ti Salomone, stuc no'ox c'otem ta banquilal ajvalil yu'un ta scotol ti ajvaliletic ti lic batel ta uc'um Eufratese, ti c'ot c'alal to yosilal ti filisteoetique, c'alal to ti bu oy sts'aquilal yosil ti Egiptoe. Scotolic ti jnaclejetique ta stojbeic ti patanetique, ti pasbilic ta mantal ti c'alal cuxul to ox ti Salomone.

²² Ti ta xtun yu'un jujun c'ac'al sventa ta stun ta slajes ti Salomone, vacmil xchi'uc vaquib ciento (6,600) ta litro ti ninal harinae, oxlajunmil xchi'uc lajunvinic (13,200) ta litro ti juch'bil trigoe.

²³ Ta xtun xtoc lajuncot (10) jubemic tot vacax, jtob (20) ta cot vacax ti ts'itesbil lec ta yaxaltique, vo'vinic (100) ta cot chij, ti mu'yuc xa tsacbil ta atel ti te'tical chije, ti muc'tiquil yaxal te'tical chije, ti jchop ta te'tical chije, xchi'uc ti c'usitic oy sc'uc'umal ti lec jubemic ta tunel ta lajesele.

²⁴ Yu'un ti Salomone sventainoj scotol ti banomiletic ta Eufrates ti oy ta stuq'uil smaleb c'ac'ale, ti ta xlic ech'el ta Tifsae, ti ta xc'ot c'alal to Gazae. Sventainoj xtoc scotol ti ajvaliletic ti bu taje, ti lamajem ti c'op yu'un ta sjoyobal ti yosilique.

²⁵ Ja'uc ti c'alal cuxul to ox ti Salomone, ti jnaclejetic ti oyic ta Judae, ti oyic ta Israele, ti lic ta Dane, ti ta xc'ot c'alal to Beersebae, mu'yuc c'usi xal yo'nton cujajtic ta snaic, ta yolon ti s'uvaique, ta yolon ti icux yu'unique.

²⁶ Ja' jech xtoc ti Salomone, oy yu'un chanmil (4,000) snail ca' sventa ti joch carreta ca'etique, xchi'uc lajcha'mil (12,000) ta vo' jcajlej ta ca' soldadoetic yu'un.

²⁷ Ti viniquetic ti tsots yabtel yich'ojic ti laj xa calbetic sc'oplale, ta suj sbaic ta sa'el talel ti c'usi ta xtun ti c'alal yorail ta x'ech'ic jujun ue, yo' oy lec scotol ti c'usi ta xtun yu'un ti avalile, xchi'uc ti yajvu'laltaque.

²⁸ C'alal ta xc'ot yorail ta sbainel jujun ti c'usi sc'an pasele, ta xalic mantal ta yich'el batel ti bu ta xtun ti jchop o ta trigoe, ti c'ajben ti ta slo' ti cajlebinel ca'e, xchi'uc ti yan jcuch-icatsil chon bolometique.

²⁹ Ti Salomone, ac'bat ep sbijil snopobil yu'un ti Diose, ti mu'yuc spajeb ta ya'yiel ti smelol ta j'ech'ele, co'ol s'elan syi'al ti' nab ti mu stac' nopel ti c'u s'elan staoje.

³⁰ Jelav ta j'ech'el sbijil ti Salomone, ja' mu sta sbijil c'otic ti egipcioetique, ti viniquetic ti oyic ta sloq'ueb c'ac'ale.

³¹ Stuc xa no'ox vinic ti x'ech' ti sbijil laj stae: Mi ja'uc sta ti Etán snitilul ti Zerae. Mi ja'uc sta ti Hemane, ti Calcole, ti Darda xnich'nab ti Mahole. Ti sc'oplale, puc ech'el ta sjunul ti muc' ta lume xchi'uc ti oy ta joyob ti lume.

³² Yajval xa'i ta yalel ti oy me xi x'ale ti c'ope, ti oy yu'un oxmil (3,000) ta bel c'ope, xchi'uc laj smeltsan lajuneb ciento xchi'uc vo'ob (1,005) ta bel nichimal c'opetic ti jun yutsil ta chiquintael ti slo'il ya'yeje.

³³ Xtojob lec ta sa'el yalbe sc'oplal ti te'etique, ti momoletique, ta yalbel sc'oplal ti ch'ut te' ti oy ta Libanoe, ti tsib ti xch'i ta pac'obale. Ja' Jech xtoc laj sa'be lec yalbel sc'oplal ti chon bolometique, ti c'usitic oy sc'uc'umale, ti chonetique, xchi'uc ti choyetique.

³⁴ Scotol ti muc'tiquil lumetic sventainojic ti ajvaliletic ti oy ta banomile, ti c'alal ta xa'ibeic sc'oplal ti mu albajuc sbijil ta j'ech'el ti Salomone, ta xtal q'uelatuc yu'un ti jnaclejetique yo' jech ta xa'ibeic ti sc'ope.