1 Reyes 3 - Bible in Tzotzil de Chamula

Ta xic'be yantsil nich'on faraón ti Salomone

¹ Ti Salomone lic yuts' yalalin sbaic xchi'uc ti faraón ajvalil yu'un ti muc' ta lum Egiptoe. Yu'un laj yic'be ti yantsil nich'one, ti laj yic' batel ta jbej na ti oy ta Steclumal ti Davide, c'alal ti stuque yacal ta stsutsesel ti snae, xchi'uc ti xch'ulna Diose, xchi'uc ti smocaltac ta joyob yu'un sjunul ti lum Jerusalene.

² Ja'uc taj une, ti jnaclejetique oyic to ta yaq'uel matanaletic ta toyol vitstic jech c'u cha'al ta spasic ti buch'utic ta snijan sbaic ta yich'el ta muc' ti c'usitic meltsanbil ta c'abale, ja' ti mu'yuc to ox meltsanbil ti ch'ulna ta sventa Dios ti jech c'ac'al taje.

Ti Salomone ta sc'an sbijil ta stojol ti Diose

³ Mi juteb tuch'baj tenbaj ta yo'nton ta xa'i Dios ti Salomone. Stamoj ech'el ta spasel ti jbel c'usi yaloj comel ti David ti ja' stote, ac'o mi ta smil matanal ti ta xchic' pom ta toyol vitstique. Ja' jech ta spasic xtoc ti jnaclejetique.

⁴ Ma'uc no'ox taje, ta xbatilan ta xchiq'uel matanal ta Gabaón ti ajvalile, ti tsots sc'oplal ich'bil ta muc' ta sventa ti toyol vits ti mu no'ox albajuc yepal ti matanal ta xc'ote.

⁵ Ti ta Gabaone, oy jun ac'ubal ti laj yac' sba iluc ti Dios ta xvaich ti Salomone, ti xi albate: “Ti C'usiuc no'ox yatel avo'ntone, c'anbun, ta xcac'bot.”

⁶ Ti Salomone xi laj staq'ue: “Mu no'ox albajuc yutsil avo'nton laj ac'uxubin ti David ti jtote, ti yutsil slequil yo'nton laj yac' sba ta tunel ta atojole, ti mu yanuc sjol sbaquile, ti xa'ibe sni' xchiquinal ti ech' ta atojole. Jech o xal ta yutsil slequil avo'nton laj ac'uxubin, ti la'abolaj ti laj avac'be jun xnich'on choti ta pas mantal ti bu to ox chotole jech c'u cha'al c'ot ta pasel avie.

⁷ Ti vo'ote, Cajval, jch'ul Tot, laj avac' ochcun ta pas mantal ti licom ta xq'uexol ti David ti jtote, ac'o mi naca to jva'lej queremun ti mu jna' c'usi ta xcut jbae.

⁸ Xi s'elan oyun ta o'lol yu'un ti ateclumal ti vo'ot laj at'uje: ti mu albajuc yepal ti jteclume, ti mu xa stac' na'el c'u s'elan ta chapel ti jun yepalic ta j'ech'ele.

⁹ Ac'bun un cha'e, ta jol ta jbaquil yo' ta jna' c'u s'elan ta jchapan ti ateclumale yo' jech xitojob ta ya'yiel ti bu leque, ti bu chopole, yu'un ¿buch'u xa ono'ox xu' yu'un ta xchapanel ateclumal ti vi yepale?”

¹⁰ Lec laj ya'i ti Dios ti jech c'anbat yu'un ti Salomone,

¹¹ ti xi albat yu'une: “Va'i s'elan ta xac'an, ma'uc ta xac'an ya'yel ti ta xnatij ti acuxleje. Mi ja'uc laj ac'an ti ac'ulejale. Mi ja'uc laj ac'an slajel xchamel ti avajcontrae. Yu'un ja' laj ac'an ti ac'o tojobane, ti ac'o ava'ibe xchiquinale, ti c'u s'elan ta xaventainvane.

¹² Ti c'u s'elan laj ac'ane, xi s'elan ta xc'ot ta pasel cu'une: ta xcac' ti abijile, ti abaxbolile, ti mu'yuc buch'u jech staoj ti c'alal mu'yuc to ox ayanemote, mi ja'uc xa ti ta ts'acal toe.

¹³ Ma'uc no'ox taje, ta xcac'bot ac'ulejal, avich'el ta muc' ti ja' avutsilal ti mu ja'uc laj ac'ane. Ti c'u sjalil cuxulote, mu'yuc yan ajvalil ta sta jech c'u cha'al ti vo'ote.

¹⁴ Mi ta xc'ot ta pasel avu'un ti c'usi ta jc'ane, mi ta xc'ot ta pasel avu'un ti jbel ti c'usi albile, xchi'uc ti jmantaltaque jech c'u cha'al laj spas ti David ti atote, ta jaliltasbot ti ach'iel ac'opojele.”

¹⁵ C'alal julave, ti Salomone laj sna' ti ja' jun vaichile. C'alal c'ot ta Jerusalene, bat ti bu oy xcaxail strate ti Diose. Lic yac' chic'bil matanaletic, xchi'uc milbil matanaletic ta sventa ti lajesobil o'ntonale. Ts'acal to un, lic yac' ve'lil ta stojol ti yaj'opisialtaque.

Ti Salomone oy sbijil ta jchapanvanej

¹⁶ Ti jech yorail taje, batic ta stojol ti ajvalile cha'vo' antsetic ti sna' sbolomalin sbaique, ti c'otic ta stojole.

¹⁷ Ti jun ta xchibalique xi lic yalbee: —¡Mu xa ono'ox cha'bel un, Jcuch abtel! Ti ants li'e, ta jun no'ox na nacaluncutic xchi'uc. Ti vu'une licol ta alajel c'alal jun ti jnacutic xchi'uque.

¹⁸ C'alal ech' xa ox yoxibal c'ac'al jcolele, col ec ti ants li'e. Jch'ul tuccutic ti jchibalcutique. Mu'yuc xa buch'u yan ti oy ta nae, c'ajomal no'ox ti chibuncutique.

¹⁹ Yu'un ti ants li'e oy jun ac'ubal cham yu'un yol ta scoj ti laj snet' c'alal ta xvaye.

²⁰ Va'i un, lic talel ta o'lol ac'ubal ti c'alal vayalune, ti laj spet loq'uel ta jxocon ti col ti bu puch'ulune, ti ja' laj xpuch'anbun ta jxocon ti yol chamem xae.

²¹ Ta sob un, ti c'alal lilic yo' ta xcac'be xchu' ti cole, laj quil ti chamem xae. Ja'uc le' une, ti c'alal sac xa lec ti osile, lic jtuc'ulan lec, laj quil ti ma'uc ti col ti laj jvoq'uese.

²² Ti jun antse xi lic yale: —Mo'oj, li cole ja' li cuxule. Ja'uc li avole ja' li chameme. Ti jun ti buch'u ta sliquebal lic c'opojuque, xi laj yale: —Mo'oj, ja' chamem ti avole. Ja'uc ti cole ja' li cuxule. Ja' jech stsac-tsac sbaic ta c'op ta stojol ti ajvalile.

²³ Va'i un, ti ajvalile xi lic snopilane: “Le'e, ta xal ti ja' cuxul ti yole. Ja'uc ti chameme, ja' yol ti jun antse. Ja'uc li jun le'e, yan ta j'ech'el ti c'usi ta xale.”

²⁴ Ta jech yepal xi lic yal mantale: —¡Ich'beicun talel junuc espada! C'alal ich'bat talel jun espada ti ajvalile,

²⁵ xi lic yal mantale: —Javic ta cha'jav ti olol ti cuxule. Ac'beic ech'el jujuxet ti jujune.

²⁶ Ja'uc le' une, sme' ti olol cuxul toe, och ta vul o'nton ta j'ech'el yu'un ti yole, ti xi lic sc'anbe vocol ti ajvalile: —¡Avocoluc, Jcuch abtel, mu xamil ti olol ti cuxul toe! ¡Ja' lec ac'bo ech'el ti ants le'e! Ja'uc ti jun antse xi laj yale: —Mi ja'uc ti vu'une, mi ja'uc ti vo'ote. Ac'o xet'ic ta o'lol.

²⁷ Va'i un, lic stic' sba ta spaquel c'op ti ajvalile, ti xi laj yal mantale: —Ti olol ti cuxule, ac'beic ech'el ti ants le'e. Mu xamilic, ja' sbats'i me' ti olol le'e.

²⁸ Scotol Israel laj ya'iic ti va'i s'elan laj xchapan c'op ti ajvalile. C'ot ta yo'ntonic ti ich'biluc ta muc' yu'unique, yu'un laj yilic ti ac'bil yu'un Dios ti sbijil ti c'u s'elan sna' xchapanvane.