1 Reyes 22 - Bible in Tzotzil de Chamula

Ti Micaiase ta scaj'al ti tsalbil ta xc'ot ti Acabe

¹ Ech' oxib jabil sjalil ti mu'yuc leto yu'unic ti israeletic xchi'uc ti sirioetique.

² Ja'uc le' une, ti c'alal sta ti yoxibal jabile, ti Josafat ajvalil yu'un ti Judae, bat svu'lan ti ajvalil yu'un ti Israele.

³ Ti ajvalil yu'un ti Jerusalene xi laj yalbe ya'i ti yaj'opisialtaque: —Xana'ic xa, ti Ramot ti oy ta Galaade, ja' cu'untic. Va'i un, ¿mi yu'un mu'yuc c'usi stac' jpastic jutebuc yo' jech ta jpojtic ta yoc ta sc'ob ti ajvalil yu'un ti Sirioe?

⁴ Xi albat ya'i ti Josafate: —¿Mi xac'an xba jchi'in jbatic ta jtsaquel ta leto ti Ramot ti oy ta Galaade? Ti Josafate xi laj staq'ue: —Ti vu'une, xchi'uc ti jcaj-soldadotaque, ti jvinictac ti cajlejetic ta ca'e, jununcutic xchi'uc ti avinictaque quere.

⁵ Ja'uc le' une, jac'bo ba'yel c'usi oy ta yo'nton ti Diose.

⁶ Ti ajvalil yu'un ti Israele laj stsob scotol ti j'alc'opetic ti oy nan nopoluc chanib ciento (400) ta vo' ta scotole. Va'i un, xi lic yalbe ya'ie: —¿Mi xu' xbat jtsac ta leto ti Ramot ti oy Galaade, mi mo'oj? Ti stuquique xi laj staq'uique: —Ba tsaco ta leto, ta xac'bot ta avoc ta ac'ob ti Diose.

⁷ Ja'uc ti Josafate xi laj sjac'bee: —¿Mi mu'yuc xa yan yaj'alc'op Dios ti xu' to ta jac'betic une?

⁸ Ti ajvalil yu'un ti Israele xi laj stac'be ti Josafate: —Oy to yan ma' ti oy buch'u xu' ta jac'tic ta stojol ti Dios unbi, ja' ti Micaiase, xnich'on ti Imlae. Ja'uc le' une, mu lecuc xquil. Mu'yuc lec c'usi ta xalbun ti c'alal oy c'usi ta jac'bee, naca chopol ta xalilan. Ja'uc ti Josafate xi laj yalbe ya'ie: —Mu xaval jech taje.

⁹ Ti ajvalil yu'un ti Israele, ta ora no'ox laj sta ta iq'uel jun yaj'opisial ti xi laj yalbe ya'i ti mantale: —¡Ac'o taluc ta anil ti Micaiase, xnich'on ti Imlae!

¹⁰ Ja'uc ti ajvalil yu'un ti Israele, xchi'uc ti ajvalil yu'un ti Judae, slapoj ti smaquique, ti chotajtic ta xilaic ta jujun ta stenlejal ochebal yu'un ti lum Samariae. Scotol ti j'alc'opetique tey ta xalic ta stojol ti ajvaliletic ti c'usi ta xc'ot ta pasele.

¹¹ Ti Sedequías xnich'on ti Quenaanae, yac'oj ta meltsanel xulubiletic ti meltsanbil ta taq'uine, ti xi x'avet xa liquel ta yalele: “¡Xi ta xal ti Diose: ‘Ta sventa ti xulubil li'e, ja' ta xatsac o ta leto ti sirioetique, ja' to ti c'uxi stsuts avu'une!’ ”

¹² Co'ol ta xalic scotol ti j'alc'opetique, ti xi ta xalbeic ya'i ti ajvalile: “Ba tsaco ta leto ti Ramot ti oy ta Galaade, ti tsalbil ta xc'ot avu'une. Ti Diose ta xac'bot ta avoc ta ac'ob ti lume.”

¹³ Ti jtaquel ti buch'u ay yic' talel ti Micaiase, xi lic yalbe ya'ie: —Scotol ti yan j'alc'opetique, jun ti sc'opic ti lec ti c'usi ta xalbeic ya'i ti ajvalile. Ja' yu'un un cha'e, ta jc'anbot vocol ta atojol ti jechuc me xaval ec jech c'u cha'al laj yal scotol ti yan ti oy c'usi lec ta xc'ot ta pasele.

¹⁴ Ti Micaiase xi laj staq'ue: —Xil Dios xcal ti ja' no'ox ta xcal ti c'u s'elan ta xiyac'bun jna' ma' ti Diose.

¹⁵ Laj taj une, c'ot sva'an sba ta stojol ti ajvalile, ti xi jac'bat yu'un ti ajvalile: —Micaías, ¿mi ta xbat jtsaccutic ta leto ti Ramot ti oy ta Galaade, mi mo'oj? Ti Micaiase xi laj yale: —Ba tsaco ta leto, tsalbil ta xc'ot avu'un. Ta xac'bot ta avoc ta ac'ob ti Diose.

¹⁶ Ja'uc le' une, xi tac'bat yu'un ti ajvalile: —Ep xa ta velta calojbot ava'i ti c'alal ta xac'oponun ta sventa ti Diose, ti ja' no'ox ta xavalbun ti melele.

¹⁷ Va'i un, ti Micaiase xi lic yale: “Laj jta ta ilel scotol ti israeletique, ti tanijemic batel ta vitstic co'ol s'elan chij ti ch'abal yajvale, ti xi laj yal ti Diose: ‘Le'e, ch'abal yajval. Junuc yo'ntonic suticuc ech'el ta snaic ti jujunique.’ ”

¹⁸ Ti ajvalil yu'un ti Israele xi laj yalbe ya'i ti Josafate: —¿Mi mu lajuc xa ono'ox calbot ava'i, ti vinic le'e, ta j'ech'el mu'yuc lec ti c'usi ta xac' ta na'ele, ti c'ajomal no'ox naca chopol ta j'ech'ele?

¹⁹ Ti Micaiase xi lic yalilane: —Ti jech laj aval ti va'i s'elan taje, xi chiquintao ava'i sc'opojel ti Diose: Laj quil ti chotol ta chotlebal ti Diose. Va'alic ta sts'el scotolic ti ac'bil yabtelic ti oy ta vinajele, ti vololic ta xocon sts'et c'obe, ti ta xocon sbats'i c'obe.

²⁰ Va'i un, ti Diose laj sjac' buch'u ta sliquesbe sjol ti Acab ti oy ta yo'nton ta stsaquel ta leto ya'i ti Ramot ti oy ta Galaade, ti ta xc'ot ta lajel xchi'uc ti bu taje. Mu xco'olaj ti c'usi ta xalique, jel tos ti sc'opic jujuchope.

²¹ Ja'uc le' une, c'ot jun ch'ulelil ta stojol ti Diose, ti laj yal ti ja' sbainoj ta spasele. Jac'bat yu'un ti Dios c'u s'elan ti ta spase.

²² Ti ch'ulelile laj yal ti ta stic'be ta sjol ta yo'nton jutbil c'op scotol yaj'alc'optac ti ajvalile. ‘Melel ava'uquic’, albat yu'un ti Diose, ‘ta xc'ot ta pasel ti ta xlo'laj avu'une, ta spas.’

²³ Laj xa ava'i tana un, ajvalil, xojbat xa ochel ta sjolic jun ch'ulelil yu'un Dios ti avaj'alc'optaque, ti naca jutbil ti c'usi ta xalique yo' jech xata tsots avocol yu'un.

²⁴ Va'i un, ti Sedequiase, xnich'on ti Quenaanae, nopaj ech'el ta sts'el ti Micaiase, ti nax to mu laj slec' ta majele, ti xi laj yalbee: —¿C'usi ora loc' xcuxlejal ti Dios ta jtojole ti bat sc'oponot ta xavale?

²⁵ Ti Micaiase xi laj staq'ue: —Ja' to ta xana' ti c'alal ta sta sc'ac'alil xanaq'uet xa ta na-natique.

²⁶ Va'i un, ti ajvalil yu'un ti Israele, xi laj yal ti mantale: —¡Tsaquic ya'i ti Micaiase, nax to ti chuc xutic batel ta stojol ti Amón ajvalil yu'un ti jteclume, xchi'uc ta stojol ti Joás ti jnich'one!

²⁷ Albeic ya'i ti vu'un laj cal mantal ti stiq'uicuc ochel ta chuquel, ti jaltabiluc ti sve'el yuch'om ac'o yac'beique, ja' to ti c'uxi lec lisut talele, ti mu'yuc c'usi jnuptae.

²⁸ Xi to lic yalilan ti Micaiase: “Ti mi mu'yuc c'usi anuptanoj lasut talele, yu'un ma'uc c'opoj ti Dios ta jventa unbi.”

²⁹ Ja' yu'un un cha'e, ti ajvalil yu'un ti Israele, xchi'uc ti Josafat ajvalil yu'un ti Judae, lic sliquesic ti leto ta stojol ti jteclum Ramot ti oy ta Galaade.

³⁰ Ti ajvalil yu'un ti Israele xi laj yalbe ya'i ti Josafate: —Jeltajem jc'u' ta xi'och ta ac'-leto. Ti vo'ote, lapo ac'u' sventa ajvalilal. Ja' yu'un un, sjeltaoj sc'u' och ta ac'-leto ti ajvalil yu'un ti Israele.

³¹ Ja'uc ti ajvalil yu'un ti Siriae laj yalbe ya'i ti lajcheb xcha'vinic (32) ta vo' banquilal jpas-mantal yu'un ti soldadoetic ti sbainojic ta stijel ti carretae, ti mu stsaquic ta leto mi ma'uc ajvalil yu'un ti Israele.

³² Ti banquilal jpas-mantal yu'un ti soldadoetic ti sbainoj ta stijel ti carretae, c'alal laj yilic ti Josafate, laj snopic ti yac'toicuc ja' ajvalil yu'un ti Israele. Jech o xal laj svolic yo' jech ta stsaquic ta leto. Va'i un, ti Josafate x'avet xa liquel ta sc'an pojel.

³³ C'alal laj yilic ti ma'uc ajvalil yu'un ti Israele, laj yicta sbaic ta stsaquel ta leto.

³⁴ Ja'uc le' une, oy jun soldado laj stoy ti sc'ob ta toyol ti laj xach' batel ti syolob ti lec laj sts'abe ech'el ta sjap ti smaque, ti xcham o xa xchi'uc syayijemal ti laj syayijes ti ajvalil yu'un ti Israele. Va'i un, ti stuque xi laj yalbe ti buch'u ta stij ti scarretae: —Joybijan sutel ta anil, tamun loq'uel li' ta letovajele, tsots xa yayijemun chca'i.

³⁵ Tsots laj stsac sbaic ta leto ti jech c'ac'al taje. Ti ajvalile tsots to sva'anoj sba ta yut scarreta ta spac sc'oplal ta stojol ti sirioetique. Ja'uc le' une, ta smalil c'ac'al, cham un. Ti xch'ich'el syayijemale xbein no'ox ta yut smac ti scarretae.

³⁶ C'alal naca xa cajal ech'el ti c'ac'ale, xi puc batel sc'oplal ta alel yu'unic ta stojol ti soldadoetique: “¡Ta jujunicuc, baticuc ta slumalic, ta sbanomilic!

³⁷ Ma' ti ajvalile, cham xa, poybil xa bat ta Samaria. Ta xich' muquel yu'unic ti bu taje.”

³⁸ Ts'acal to un, laj spocbeic ti scarreta ta sts'anleb vo' ta Samaria ti bu ta x'atinic ti antsetic ti lec xa'i sbolamalin sbaique. Lec'bat ta ts'i' xch'ich'el ti Acabe jech c'u cha'al laj ono'ox scaj'al ti Diose.

³⁹ Ti sc'oplal ya'yejal ti Acabe, xchi'uc ti c'usitic laj spase, ti sna ti meltsanbil ta c'upil sba saquiquil baxtone, ti jteclumetic ti laj sva'anane, ts'ibabil com ta jpoc svunal yabteltac ti ajvaliletic yu'un ti Israele.

⁴⁰ C'alal cham ti Acabe, och ta xq'uexol ta ajvalilal ti Ocozías ti xnich'on ta ts'acal to une.

Yabtel ti Josafat c'alal ochem ta ajvalilal ta Judae

⁴¹ Ti ta xchanibal jabil yochel ta ajvalilal ti Acab ta Jerusalene, ti Josafat xnich'on ti Asae, ja' o lic ochuc ta ajvalilal ta Judae.

⁴² Ja' o xa yich'oj vo'lajuneb xcha'vinic (35) jabil ti xch'iel sc'opojele, ti jalij vo'ob xcha'vinic (25) jabil ta ajvalilal ta Jerusalene. Ti sme'e, Azuba sbi, yantsil nich'on ti Silhie.

⁴³ Lec scotol ti c'usi laj spas ti Josafate. Jech laj spas jech c'u cha'al ech' ti Asa ti ja' stote. Yu'un scotol ti c'usitic laj spase, lec laj yil ta sba ta sat ti Diose. Manchuc mi jech un, xch'ulnatac ti loc'obbail diose, ti bu ta xaq'uic ti chic'bil matanale, ti bu ta xaq'uic pom ti jnaclejetique, mu'yuc laj sjines un.

⁴⁴ Ti Josafate laj xchap lec sc'op xchi'uc ti ajvalil yu'un ti Israele ti ac'o lajuc ti c'op yu'unique.

⁴⁵ Ti c'usitic yan to laj spase, xchi'uc ti laj stic' sba ta ac'-letoe, ts'ibabil com sc'oplal scotol ta jpoc svunal yabteltac ti ajvaliletic yu'un ti Judae.

⁴⁶ Ti Josafate, ja' me ti buch'u laj stenan loq'uel ta jteclum ti buch'utic ta xmulivajic ti c'alal ta smuyubtaic ta xi'tael stoyel ti loc'obbailetique, ti ch'an no'ox x'utatic ti c'alal ochem to ox ta ajvalilal ti Asa ti ja' stote.

⁴⁷ (Ti ta Edome, mu'yuc va'anbil ti ajvalil yu'unique, c'ajomal no'ox oy jun jbainvanej.)

⁴⁸ Ja'uc ti Josafate laj smeltsanan barcoetic jech c'u cha'al oy yu'un ti Tarsise yo' jech ta xcuchic talel ti oro ti oy ta Ofire. Ja'uc le' une, mu'yuc xc'ot, yu'un ti barcoetique voch' ta lilijel ta Ezión-Geber.

⁴⁹ Va'i un, ti Ocozías xnich'on ti Acabe, laj yalbe ya'i ti Josafate ti yac'uc ye ta xchi'inel batel ti yajpic-barcoetic xchi'uc ti svinictaque. Ja' no'ox un, mu'yuc laj yac' ye ti Josafate.

⁵⁰ Ti Josafate cham, laj smuquic ta Steclumal David ti anima stot sme'taque. Och ta xq'uexol ta ajvalilal ti Joram ti ja' xnich'on ta ts'acal toe.

Yabtel ti Ocozías ti c'alal och ta ajvalilal yu'un ti Israele

⁵¹ Ti ta yuclajunebal (17) jabil yochel ta ajvalilal ti Josafat ta Judae, ja' o och ta ajvalilal ti Ocozías ta stojol ti israeletic ti oy ta Samariae. Chib no'ox jabil och ta ajvalilal ti bu taje.

⁵² Yu'un ti c'usitic lic spase, mu lecuc laj yil ta sba ta sat ti Diose. Ja' jech laj stambe ta spasel chopol jech c'u cha'al laj spas ti stot sme'e, xchi'uc ti c'u s'elan laj spas ti Jeroboam xnich'on ti Nabate, ti ja' ta scoj laj sta smul yu'un ti israeletique.

⁵³ Ma'uc no'ox taje, lic sbic'tajes sba ta yich'el ta muc' ti Baale, ti lic smuyubta ta xi'tael ta stoyele. Jech laj spas ta vo'ne ti stote, ti laj sliquesbe sc'ac'al yo'nton ti Ajvalile, Dios yu'un ti Israele.