1 Reyes 20 - Bible in Tzotzil de Chamula

Ti sirioetique tsalbil ta xc'otic yu'un ti Acabe

¹ Ti Ben-adad ajvalil yu'un ti lum Siriae, laj stsob scotol ti yajsoldadotaque, xchi'uc yan lajcheb xcha'vinic (32) ta vo' ajvaliletic ti jmoj sjolic xchi'uque, xchi'uc ti ca'etique, ti carreta sventa ac'ob-leto yu'unique, ti bat ta lum Samaria yo' jech ta sjoyobta ta stsaquel ta leto.

² Ta yorail no'ox, laj stac batel j'al-mantal j'ich-c'opetic ta lum taje, ti xi ac'o yalbe ya'i ti Acab ajvalil yu'un ti Israele:

³ “Ti Ben-adade xi ta xal ava'ie: ‘Ti ac'ulejale, cu'un xa jech c'u cha'al ti avajniltaque, ti anich'nabtac ti ja' yip avo'nton xchi'uque.’ ”

⁴ Ti ajvalil yu'un ti Israele xi laj stac' sutel ti c'ope: “C'otuc ta pasel jech c'u cha'al laj yal ti Jcuch abtel avu'une. C'otcun ta yu'un xchi'uc scotol ti c'usi oy cu'une.”

⁵ Ti j'al-mantal j'ich'-c'opetique bat to sq'uelic ti Acab ti xi laj yalbeique: “Ti Ben-adade xi ta xalbote: ‘Laj xa calbot ava'i ti c'otem xa ta cu'un ti ac'ulejale, ti avajniltaque, ti anich'nabtaque.

⁶ Ma'uc no'ox taje, oc'om jech ora jech c'u cha'al li'e, ta jtac talel caj'opisialtac yo' jech ta xchajic ta sa'el ti anae, xchi'uc snaic ti avaj'opisialtaque. Scotol ti c'usi lec ta staique, ta xc'ot ta yu'unic.’ ”

⁷ Va'i un, ti ajvalil yu'un ti Israele xi laj yalbe ti moletic yu'un ti lum ti laj sta ta iq'uele: —Ti tauc xana'ique, ti vinic taje, c'ajomal no'ox oy ta yo'nton ti ta xiyilbajinune, ac'o mi mu'yuc laj jalta jba ti laj xa cac' que jti' ti ta xcac'beic ti cajniltaque, ti jnich'nabtaque, xchi'uc ti jc'ulejale.

⁸ —Mi ja'uc xachiquintabe ti sc'ope. Mi ja'uc xach'unbe ti jech ta sc'anbote —xi laj yalic ti moletique xchi'uc scotol ti c'u yepal oyique.

⁹ Va'i un, ti Acabe xi laj yalbe ya'i ti yaj'al-mantal j'ich'-c'opetic ti Ben-adade: —Albeic ya'i ti Jcuch abtel avu'unique ti c'usi laj yalbun ta sliquebal ta jpase, ja' jech ono'ox une. Yan ti c'usi ta stsatsal sujun ta spasele, mu jpas une. Ti j'al-mantal j'ich'-c'opetique bat yalbeic ya'i ti Ben-adad ti va'i s'elan tac'batique.

¹⁰ Va'i un, ti Ben-adade, yan to velta ti xi laj stac'be ech'el ta yalbel ya'i ti Acabe: “¡Tsotsuc xistsitsun ti diosetique ti mi mu xa xcom jutebuc cu'un xch'uch'ulil ti Samariae, yo' jech ta xcac'be ech'el jujun ti jvinictac ti ta xists'acliicune!”

¹¹ Ja'uc ti ajvalil yu'un ti Israele xi laj yalbe ya'i ti laj stac ech'el ti mantale: “Mu to me xacaj'alilan ti mu to vinajemuc ti c'usi ta xc'ot ta pasele.”

¹² C'alal c'ot ta stojol ti Ben-adad ti va'i s'elan tac'bat sutel ti c'op taje, ja' o yacal ta x'uch'obaj xchi'uc ti yan ajvaliletic ta yut ti axibal yanalte' na ti spasojique. Va'i un, xi laj yalbe ya'i ti yaj'opisialtaque: “¡Ba jtsactic ya'iic ta leto taje!” Scotolic lic xchapan sbaic ta stsaquel ta leto ti lume.

¹³ C'alal jech syaquil taje, ja' o vul jun j'alc'op ta stojol ti Acab ajvalil yu'un ti Israele, ti xi albat ya'ie: —Ti Diose xi laj yale: ‘Ac'o mi ta xavil ta aba ta asat ti jun yepal ti avajcontrae, avi tana le'e, ta xcac'bot ta avoc ta ac'ob yo' jech ta xana' ti vu'un Diosune.’

¹⁴ —¿Buch'u ta sbain ta yac'belun ta coc ta jc'ob un? —xi laj sjac' ti Acabe. Xi laj stac' ti j'alc'ope: —Laj yal ti Diose ti ja' ta sbainic ti jva'lej viniquetic ti ochemic ta abtel yu'un jchapanvanejetic ta jujun lumetique. —¿Buch'u ta sliques ba'yel ti c'op une? —xi lic yalilan ti Acabe. —Vo'ot une, ¿buch'u xa ca xana' un? —xi laj stac' ti j'alc'ope.

¹⁵ Va'i un, ti Acabe lic xchap c'u yepal ti jva'lej queremetic ochemic ta abtel yu'un ti jchapanvanejetic yu'un ti jujun lumetique, ti ja' loc' ta chapel ta scotole, lajunvinic xchi'uc lajcheb xcha'vinic (232) ta vo', ti c'otic ta vucmil (7,000) ta vo' soldado xchi'uc ti israeletic ti c'alal laj stsob sba ta scotole.

¹⁶ Ta o'lol to c'ac'al, laj stam batel sbeic, ti c'alal yacalic ta uch'bajel ti Ben-adad xchi'uc ti lajcheb xcha'vinic (32) ta vo' ajvaliletic ti jmoj sjolique, ta xyacubic ta yaxibal naic ti bu smeltsanojique.

¹⁷ Jba'be jelavel batel yu'unic ti jva'lej viniquetic ti ta x'abtejic ta stojol ti jchapanvanejetique. C'alal laj yich' albel ya'i ti Ben-adad ti c'otic xa viniquetic ti loq'uemic talel ta Samariae,

¹⁸ xi laj yal ti mantale: “¡Mi ta lequilal talemic, mi talemic ta letovajel, ta jc'an ti cuxul xavic'beicun talele!”

¹⁹ Ti querem viniquetic ti ochemic ta abtel yu'un ti jchapanvanejetique, loq'uic ech'el ta lum. Tijatic batel ta spatic ti soldadoetique.

²⁰ Ti jujunique laj smilic ti scontraique. Ti sirioetique jatavic ech'el. Nutsbilic batel yu'un ti israeletique. Ja'uc ti Ben-adad ajvalil yu'un ti sirioetique, mu'yuc x'och ta c'abal, jatav loq'uel ta anil ta ca' xchi'uc jlom svinictac ti cajlejetic ta ca'e.

²¹ Va'i un, ti ajvalil yu'un ti Israele net'vanic ech'el ti laj yu'ninic ti ca'etique, ti carretaetic sventa ti ac'ob-letoe, ti tsalbil c'otic ta j'ech'el ti sirioetique.

²² Ts'acal to un, ti j'alc'ope tal sc'opon ti ajvalil yu'un ti Israele, ti xi laj yalbe ya'ie: —Batan, ba tsobo lec ti avajsoldadotaque. Nopo lec c'usi stac' xapas, yu'un ti li' c'alal junabie, ta xtal stsacot ta leto yan velta ti ajvalil yu'un ti Siriae.

²³ Ja'uc ti j'opisialetic yu'un ti ajvalil Siriae, xi laj yalbe ti yajvalique: —Ma' ti dios yu'unic ti israeletique, ja' vitstical diosetic. Jech o xal laj stsalotic. Yan ti mi ta jtsac jbatic ta leto xchi'uquic ta stenlejaltique, ta jbel sc'oplal ta jtsaltic une.

²⁴ Ti c'usi sc'an xapas avi tana le'e, Jcuch abtel, loq'ueso ta yabtelic ti ajvaliletique, ti ochuc talel j'opisialetic ti bu to ox tiq'uilique.

²⁵ Mi laj taj une, tsobo lec jvoluc soldadoetic jech c'u cha'al oy to ox ta ba'yel ti tsalbil c'otique, jechuc yepal ti ca'etique, jechuc yepal ti carretaetique. Va'i un unbi, ta jtsactic ta c'op ta stenlejaltic ti cuchem xa cu'untic ta stsalel xcaltique. Ti Ben-hadade laj sts'etan lec xchiquin ta ya'yiel ti va'i s'elan bijubtasate. Ja' jech lic spas.

²⁶ C'alal sta ti jun jabil une, ti Ben-adade lic xchap c'u yepal ti sirioetique. Bat svol sbaic ta lum Afec ta ts'acal to une yo' jech ta stsac sbaic ta leto xchi'uc ti Israele.

²⁷ Ja' jech ec ti israeletique lic xchapic talel ti yajsoldadotac ti ja' yip yo'nton xchi'uquique, ti laj yac'beic ech'el ti c'usi ta xtun yu'unique. Bat snup sbaic ta be xchi'uc ti sirioetique, ti c'ajomal nene' cha'voc' ta tentsun volol c'otic ta q'uelele. Ja'uc ti sirioetique smacojic scotol ti banomile.

²⁸ C'alal jech taje, c'ot jun j'alc'op ti xi laj yalbe ya'i ti ajvalil yu'un ti Israele: —Ti Diose xi ta xale: ‘Ti loc' ta alel yu'unic ti sirioetic ti vitstical diosune, ti ma'ucun diosun yu'un ti stenleje, ta xcac'bot ta avoc ta ac'ob ti vi yepalic le'e. Ja' to jech ta xana' ti vu'un Ajvalilune.’

²⁹ Vucub c'ac'al sjalil lamal sq'ueloj sbaic ti sirioetique xchi'uc ti israeletique. Ja'uc ta yucubal c'ac'al une, lic ti letovajel yu'unique. Ti jech c'ac'al taje, ti israeletique laj smilic vo'vinic ta mil (100,000) soldado sirioetic ti ta xanav ta yacanique.

³⁰ Ti c'u yepal cuxul to com ti soldadoetique, jatavic batel ta lum Afec. Ja'uc smocal ti lume, lom talel ta sbaic ti vucub xcha'vinic ta mil (27,000) ti soldadoetic ti jatavique. Ti Ben-adade jatav batel ec, ti c'ot ta lum ti lic snac' sba ech'el ta jujuc'ol naetique.

³¹ Va'i un, xi albat yu'unic ti yaj'opisialtaque: —Ca'binojcutic ma' ti ajvaliletic Israele, sna' xc'ot ta pasel yu'un ti strateic ti c'alal ta spasique. Va'i un cha'e, jlaptic ech'el uni lajemal c'u'il xchi'uc cuintic ech'el ch'ojon. Ba jc'opontic ti ajvalil yu'un ti Israele. Jq'ueltic quic mi xch'aybotic to ti jmul jcolo'tique.

³² Va'i un, lic slapic ech'el ti lajemal c'u'ile. Lic sc'amic ech'el ta snuq'uic ti ch'ojone, ti xi c'ot yalbeic ti ajvalil yu'un ti Israel ti c'alal bat sc'oponique: —Jcuch abtel, avocoluc la ti ch'aybo la smul scolo' ti Ben-adade, ti mu la xamile. Ti Acabe xi laj staq'ue: —¿Mi cuxul to cha'e? ¡Toj lec, yu'un cuts' calal xca'i jbacutic yu'un ma' taj une!

³³ Ti viniquetique lec laj ya'iic ti jech tac'batique, ti xi laj staq'uic ta anil ti c'ope: —¡Avuts' avalal cac'tic unbi ma' ti Ben-adade, Jcuch abtel! —¡Ba iq'uic talel un cha'e! —xi laj stac' ti Acabe. Ti Ben-adade bat sc'opon ti Acabe, ti tiq'uil ochel ta carreta yu'un ti Acabe.

³⁴ Xi no'ox lic yal ti Ben-adade: —Ti lumetic ti laj spojbot ti jtote, ta jsutesbot, ti xu' ta xlic bolomajan ta lum Damasco jech c'u cha'al oy to ox sbolomal ti jtot ta Samariae. —Ta jamal xcal ta xcac' que ti ta jcoltaot batele —xi laj stac' ti Acabe. Ti jech taj une, laj spas strate ti Acab xchi'uc ti Ben-adade, ti laj scolta batele.

³⁵ Manchuc mi jech un, oy jun vinic ti ja' svoloj sbaic xchi'uc ti j'alc'opetique, ti xi laj yalbe ya'i ti jun xchi'il ta sventa smantal ti Diose: —¡Avocoluc, c'ojbun lec jmojuc ta j'ech'el! Mu'yuc xc'ot ta yo'nton ti jech ta spas ti june.

³⁶ Va'i un, ti j'alc'ope xi laj yale: —Ti jech mu'yuc xach'unbe ti c'usi ta sc'an ti Diose, ti c'alal ta xaloc' batel li' ta jtojole, ta xa sbalot ta ti'el jcot león. Jech ono'ox c'ot ta pasel. Ti c'alal loc' batel ti jun ta stojol ti j'alc'ope, bale ta milel yu'un jcot león ti laj snup ta bee.

³⁷ Laj taj une, ti j'alc'ope laj snup ta be jun vinic ti laj yalbe ya'i ti c'ojbatuc ta j'ech'el yu'une. Laj yich' c'ojbel un, ti yayijesat yu'un ti vinique.

³⁸ Va'i un, ti j'alc'ope bat smala ta be ti ajvalile, ti volol xa ta poc' ti sat ti syanijesoj sba xchi'uque.

³⁹ C'alal ta x'ech' xa jelavel ti ajvalile, xi tsots x'avet xa liquel ti j'alc'ope: —Ti avajtunel li'e, Jcuch abtel, stic'oj sba ta ac'-leto ec. Jun ta scotol ti soldadoe, laj yic'bun talel jun jchuquel. Laj yalbun ti ac'o jchabi leque, ti laj st'abbun lec ta jchiquin ti mi col batel cu'une, ti ta xcac' o jol jbaquil yu'une, mi ta jtoj ta oxmil (3,000) ta sep plata taq'uin yu'un.

⁴⁰ Ja'uc ti avajtunel li'e, Jcuch abtel, oy bu laj xch'ay yo'nton ti oy c'usi sc'an pasel laj yile, ti jatav batel ti jchuquel yu'un une. Va'i un, xi albat yu'un ti ajvalil une: —Laj avinajes aba atuc. Laj achap ac'oplal atuc ti ta xalaje.

⁴¹ Va'i un, ti j'alc'ope, ta jech to yepal, laj sjip loq'uel ti svol sat ti smacoje. Laj yil ti ajvalil ti ja' jun ta scotol ti j'alc'ope.

⁴² Xi albat yu'un j'alc'ope: —Xi ta xal ti Diose: ‘Ti jech laj acolta batel ti vinic ti albil xa sc'oplal ti ta xchame, ta xatoj ta ajol abaquil ti laj acoltae, xchi'uc ta stoj ta sjol ta sbaquil ti jteclum avu'une.

⁴³ Va'i un, ti ajvalil yu'un ti Israele bat ta Samaria ta vul-o'nton xa. Xtaqui capet xa ta xa'i laj stic' sba ochel ta yut sna.