1 Reyes 2 - Bible in Tzotzil de Chamula

Slajeb xa sc'op ti c'u s'elan laj yal comel ti Davide

¹ Ta xa xc'ot, xnopaj ech'el yorail ta xcham ti Davide. Ja' yu'un ti Davide xi laj yalbe ya'i mantal ti Salomón ti ja' xnich'one:

² “Ta xa jtam ech'el ti be ti ja' slajebal ta scotole jech c'u cha'al ta stamic batel scotol ti jnaclejetic li' ta banomile. Tsotsan, vinicuc me xava'i aba un.

³ C'otuc ta xch'unel avu'un ti c'u s'elan snopoj ti Ajvalil Dios avu'une. Pasolano ti jbel oy c'usi albil ti c'u s'elan ta sc'an yo'ntone, ti smantaltaque, ti c'usi albil yu'une, ti smantaltac ti c'ot ta jbel c'usi albil ti laj sts'iba comel ti Moisese, yo' jech lec ta xc'ot ta pasel avu'un scotol ti c'usi ta xapase, xchi'uc ti buyuc no'ox ta xabate.

⁴ Ja' jech xtoc, yo' jech ta xc'ot ta pasel strate ti Dios ti yalojbune, ti mi sjunul yo'ntonique, sjunul xch'ich'elic ta stuc'ulan sbaic, ta stamic batel ti jnich'nab ti c'usi ta sc'an pasbel ti stuque, oy ono'ox buch'u ti jnitilultaque ta x'och ta ajvalil yu'un ti Israele.

⁵ “Lec un cha'e, avi tanae, xana' lec ti c'usi laj spasbun ti Joabe, xnich'on ti Sarviae. Ti xcaltique, ja' ti xi s'elan laj spasbe ti cha'vo' banquilal soldadoetic yu'un ti Israele: sc'oplal ti Abnere, xnich'on ti Nere, xchi'uc ti Amasae, xnich'on ti Jetere, ti ja' o laj smilic ti c'alal lamajem ti c'ope, ti ja' no'ox ta sutes xq'uexic ti c'alal mal ti ch'ich' ti c'alal xyaquet ti letoe, ti ta scajanbeicun ta jba ti milatique.

⁶ Ja' yu'un un cha'e, oyuc me abijil yu'un. Mu me teyuc no'ox aq'ueloj ti jun xa yo'nton ta xcham xlajique.

⁷ Ja'uc ti xnich'nab Barzilaie, ti liquel talel ta Galaade, c'uxubajuc avo'nton yu'un, chotano ta amexa, yu'un laj spojicun ti c'alal jatvilun yu'un ti achi'il ta voq'uel Absalone.

⁸ Ja'uc ti yan xtoque, ti nabal ta atojol ti Simei xnich'on ti Gerae, snitilul ti Benjamine, ti liquel talel ta Bahurime, q'uelo me lec ti c'usi ta spase. Le'e, ja' ti buch'u tsots laj sbisun ta cotol chaval ti c'alal ta xibat ta Mahanaime. Manchuc mi jech un, ts'acal to bat snupun ta be ta uc'um Jordán, ti laj jva'an ta rextico ti Dios ta yalbel ya'i ti mu jmile.

⁹ Oy abijil, xana' c'usi xu' xavut. Mi ja'uc xc'uxubaj avo'nton yu'un ta xch'aybel ti smul scolo'e. Ja'uc le'e, paso tsatsal ti c'ux-c'uxticuc ac'o ya'i ti svocol c'alal ta xchame.”

Ti Davide ta xcham

¹⁰ Ti Davide cham, bat yich' muquel ti bu mucul ti stot sme'taque, ti sbiinoj Steclumal ti Davide.

¹¹ Och ta ajvalilal cha'vinic (40) jabil sjalil ti ta Israele. Vucub (7) jabil sjalil laj spas ajvalilal ta Hebrone, xchi'uc oxlajuneb xcha'vinic (33) jabil sjalil ti laj spas ajvalilal ta Jerusalene.

¹² Laj taj une, ti Salomone laj xq'uexolin comel ta xcuchbel yabtel ti David ti ja' stote, ti mu'yuc yanij yu'un c'alal och ta pas mantale.

Ti Adoniase ta xtub sc'oplalic xchi'uc ti svinictaque

¹³ Ti Adonías yol ti Haguite bat sc'opon ti Betsabé ti ja' sme' ti Salomone, ti xi jac'bat yu'une: —¿Mi ta yutsil avo'nton latal? —Jech —xi laj stac' ti stuque.

¹⁴ Xi to laj sts'acubtas ech'el ti ya'yeje: —Oy c'usi ta xcalbot ava'ie. —Albun ca'i —xi ti Betsabee.

¹⁵ —Xana' —xi laj yal ti Adoniase—, vu'un c'otem ta jventa ma' ti ajvalilale, ti smalaojic scotol israeletic ti ta xic'ot ta ajvalil yu'unique. Ti bainvanej ta ventainvaneje, ja' c'ot ta sventa ti jchi'il ta voq'uele. Chapbil xa yu'un Dios ti ja' ta xc'ot ta ajvalil yu'une.

¹⁶ Avi tana li'e, ta jc'anbot jun xa no'ox vocol ta atojol, ti mu xajalta aba ta spasele. —Albun ca'itic —xi laj stac' ti antse.

¹⁷ Ti stuque xi laj yale: —Avocoluc, albo ya'i ti ajvalil Salomone, ti ac'o yac'bun cajnilin ti Abisag ti sunamitae, yo' ta xquic'. Mu nan ta sjalta sba ta yaq'uel ye.

¹⁸ —Jechuc, ta jc'opon ca'i ti ajvalil ta aventae —xi laj stac' ti Betsabee.

¹⁹ Ja' yu'un un cha'e, ti Betsabee bat sc'opon ti ajvalil Salomón ta sventa ti Adoniase. Ti ajvalile va'i batel, bat snup ta be ti sme'e, ti snupilan xa banomil laj snijan sba ta stojole. Bat chotluc ta xchotleb ta ts'acal to un, ti laj yal mantal ti ac'o yich'ic talel junuc xila ta sventa ti sme'e, ti lic chotiuc ta xocon sbats'i c'ob ti ajvalile.

²⁰ Va'i un, xi lic yalbe ya'ie: —Bats'i xi yuni nene' muc'ul vocol ta jc'an ta atojole. Mu xajaltabun, avocoluc. —C'anbun ti c'usi ta xac'ane, me'tic —xi laj stac' ti ajvalile—, mu jaltabot unbi.

²¹ —Ac'o ave ati' ta stojol ti achi'il ta voq'uel Adonías ti ac'o yic' ti Abisag ti jun sunamita antse —xi laj yal ti stuque.

²² —¿C'u cha'al ta xac'an ti ta xcac'be yic' ti sunamita Abisag ti Adoniase? —xi laj stac'be sme' ti ajvalile—. ¡Ja' xa no'ox sc'an, ti mu'yuc ta xavalbun ti ac'o jtic' ochel ta ajvalil ti jech jbanquile, ti jmoj sjolic xchi'uc ti pale Abiatare, xchi'uc ti Joab xnich'on ti Sarviae!

²³ Ti jech laj yal taj une, xi laj yal ti ajvalil Salomón ti laj sva'an ta rextico ti Diose: “¡Tsots ac'o xistsitsun ti Diose, ti mi mu xcham xlaj o xchi'uc ti va'i s'elan laj yal ti Adoniase!

²⁴ J'ech'el ta xcal ta stojol ti Diose ti ja' stuc laj stic'un ochele. Laj snop stuc ti laj sva'an sba ti li'och ta xq'uexol ti David ti ja' jtote. Laj yac' ye ti mu xch'ay sc'oplal ti snitilul ta x'och ta ajvalilale. Avi tanae, ta xcham ono'ox ti Adoniase.”

²⁵ Ta jech to yepal, laj yalbe mantal ti Benaía xnich'on ti Joiadae, ti ac'o smil ti Adoniase. Bat ec un, laj smil.

²⁶ Ja'uc ti pale Abiatare, xi albat ya'i yu'un ti ajvalile: “¡Batan ta Anatot ti ja' alumale! Ac'o mi xc'ot o ta xavich' milele, mi ja'uc ta jmilot, yu'un vo'ot laj avich' talel ti xcaxa Dios ta stojol ti Davide, ja' ti jtote ti co'ol laj avich' avocolique.”

²⁷ Jech c'ot ta pasel yu'un ti Salomone, ti laj sloq'ues ta yajpale Dios ti Abiatare, xchi'uc c'ot ta pasel yu'un Dios ti laj ono'ox yal ta Siloe, ti oy sc'oplalic snitilultac ti Elie.

²⁸ Ti Joabe laj sco'oltas sjolic xchi'uc ti Adoniase. Ja'uc le'e mu'yuc laj sco'oltas sjolic xchi'uc ti Absalone. C'alal puc batel ti lo'il a'yeje, laj ya'i ti Joabe, jatav batel ta xch'ulna ti Diose, ti bat snac' sba ti bu oy ti altare.

²⁹ Ja'uc le' une, albat ya'i ti ajvalil Salomone, ti jatav xa batel ti Joab ta xch'ulna ti Diose, ti bat xa snac' sba ti bu oy ti altare. Va'i un, ti Salomone laj yalbe ya'i ti Benaiae, xnich'on ti Joiadae, ti ac'o ba smil ti Adoniase.

³⁰ Ti Benaiae bat ta ch'ulna, ti xi laj yalbe ya'i ti Joabe: —Ta xalbot ava'i ti ajvalile, ti loc'an talel teye. Ja'uc ti Joabe xi laj staq'ue: —¡Mo'oj unbi! ¡Li' ac'o chamcune! Ti Benaiae sut ech'el ta yalbel ya'i ajvalil ti c'u s'elan xu' ta stac' ti c'ope, xchi'uc ti c'u s'elan laj yal ti Joabe.

³¹ Va'i un, ti ajvalile xi laj staq'ue: —Mu jmac'betic yo'nton. Milo ya'i, muco, ti ch'ayuc sc'oplal li' ta sna ti jtote, xchi'uc ta jba ta jsat ti ja' ta scoj ti Joab ti oy buch'u milvanique.

³² Ta xcajanbat ta sba yu'un Dios ti ta smul scolo' stuc ta xcham xlaje. Mu ja'uc jutebuc sna' ti jtot ti xi c'ot ta pasel ti laj smil ta cuchilu cha'vo' vinic ti tuc' sjol yo'ntonique, ti xtojobic leque, ti mu sta ti stuque: ti Abnere xnich'on ti Nere, ti banquilal jpas-mantal yu'un ti soldado Israele, xchi'uc ti Amasa xnich'on ti Jetere, ti banquilal jpas mantal yu'un ti soldado Judae.

³³ Sbatel osil cajal ta xc'ot ta sba Joab xchi'uc yalab xnich'nab ta scoj ti milatique. Ja'uc ta stojol ti Davide, ta stojol ti snitilultaque, ti ta snae, ti bu ta spas mantale, ta sventa ti Diose, lamajem c'op sbatel osil.

³⁴ Va'i un, ti Benaiae bat smil ti Joabe. Ti Joabe bat yich' muquel ta sna ti oy ta sbajtical banomile.

³⁵ Ti ajvalile laj stic' ochel ta banquilal jpas-mantal yu'un soldadoetic ti Benaía ta ts'acal toe, ti c'ot ta xq'uexol ti Joabe. Ti Abiatare c'ot ta xq'uexol ti pale Sadoque.

³⁶ Ts'acal to un, laj sta ta iq'uel ti Simeie, ti xi laj yalbee: —Meltsano ana li' ta Jerusalene yo' jech ta xanaqui. Ti bu taj une, mi ja'uc xaloc' batel.

³⁷ Ti sc'ac'alil mi laloc' batele, ti ta x'ech' atuch' ti uc'um Cedrone, albo me avo'nton ti jbel sc'oplal ta xachame, ta acoj atuc un.

³⁸ Ti Simeie xi laj stac'be ti ajvalile: —Jechuc un cha'e. Ta jpas ti va'i s'elan ta xal mantal ti Jcuch abtele. Ti Simeie jal-jaltic naqui ta Jerusalén.

³⁹ Ech' oxib ja'bil un, jatav loq'uel chib smosov, bat nacliicuc xchi'uc Aquis xnich'on ti Maacae, ajvalil yu'un ti jteclum Gate. C'alal albat ya'i ti Simei ti nacalic xa ta Gat ti cha'vo' smosove,

⁴⁰ ta jech no'ox yepal laj slapbe siya ti sburroe, laj stam batel sbe ta Gat ti bu oy ti Aquise, ta sa'el ech'el ti cha'vo' smosove. C'alal sut xa talel ta Gat ti Simei xchi'uc ti cha'vo' smosove,

⁴¹ ja'uc le' une, c'ot ta sni' ta xchiquin ti Salomone ti loc' ech'el ta Jerusalén ti Simeie, ti sut xa talel ti ay ta Gate.

⁴² Va'i un, ti ajvalile xi laj yalbe ya'i ti Simei ti c'alal laj sta ta iq'uele: —¿Mi mu lajuc jva'an ta rextico ti Dios ti xichi laj calbot ava'i ti c'alal sc'ac'alil mi laloc' batele, ti ta jbel sc'oplal ti ta xacham xacute? “Lec oy, ta jch'un” ¿mi mu xachi laj ataq'ue?

⁴³ ¿C'u cha'al ya'yel un cha'e, mu'yuc xc'ot ta pasel avu'un ti laj ava'an ta rextico ti Diose? ¿C'u cha'al mi ja'uc laj ach'un ti c'u s'elan laj calbot ava'ie?

⁴⁴ Xana' lec, ti bu c'alal laj avilbajin ti David ti jtote. Ti bu c'alal la'ilbajinvane, ta j'ech'el ta scajan ta aba ti Diose.

⁴⁵ Ja'uc ti ajvalil Salomone, ta sta ti sva'anoj sba ti Dios ta stojolale. Mi ja'uc ta xtub sc'oplal spasob mantal ti Davide. Sbatel osil oy sc'oplal ta stojol ti Diose.

⁴⁶ Ts'acal to un, ti ajvalile laj yalbe mantal ti Benaiae, xnich'on ti Joiadae. Ti stuque loc' batel, ti laj smil ti Simeie. Ja' to jech laj stsac yip ta ajvalil ti Salomone.