1 Reyes 19 - Bible in Tzotzil de Chamula

Ti Eliase ta xbat snac' sba ta vits Horeb

¹ Ti Acabe laj yalbe ya'i Jezabel scotol ti c'usi laj spas ti Elías ti laj smilan scotol yaj'alc'optac ti Baale.

² Va'i un, ti Jezabele xi laj yalbe ti Elías ti laj stac ech'el jun j'alc'op j'ich'-mantale: “¡Mi vo'ot Eliasote, Jezabelun ec! Tsotsuc ac'o xistsitsun ti diosetique mi mu xc'ot ta pasel cu'un jech ora oc'om ta atojol jech c'u cha'al laj apasbe ti j'alc'opetique.”

³ Ti Eliase laj sna' ti xu' ta stsutsesate, bat ta Beerseba ta yosilal Judá yo' jech ta spoj sba. Laj yicta comel smosov ti bu taje.

⁴ Ti stuque bat ta sbajtical banomil ta tsacal to un, ti sjunul c'ac'al xanav ja' to ti c'uxi lubtsaj ti laj xchotan sba ta yolon pets limil te' ti retama sbie. Ti juteb xa ta yo'nton chamuc ya'ie, xi laj yale: “¡Li' xa no'ox c'alale, Dios, tuch'bun xa ti jcuxlejale! ¡Mu'cun xa lec ta xc'ot ta jtojol jech c'u cha'al ech' ti jtot jme'taque!”

⁵ Laj xpuch'an sba ta yolon ti limlim te'e, ti lic vayuque. Ja'uc le' une, tal jun ánjel ti xi albat ti vuyilanate: “Lican, ve'an.”

⁶ Xjoyet lic sq'uel ta jujujot. Laj yil un oy jbej pan ta'ajesbil ta ac'al, xchi'uc jun jarru vo' ti ta sjolinabe. Va'i un, lic ve'uc yuch' vo', lic xcha'metsan sba un.

⁷ Ja'uc ti yaj'ánjel Diose sut talel xtoc ti xi laj yalbe ti c'alal laj svuyilane: “Lican, ve'an, ti mi mu jechuque, toj nom me ta xava'i ti bee.”

⁸ Ti Eliase lic ve'uc yuch' vo'. Ac'bat yip ta xanobal cha'vinic (40) c'ac'al xchi'uc cha'vinic (40) ac'ubal. C'ot ta Horeb ta ch'ul vits yu'un ti Diose.

⁹ Ti c'alal c'ote, laj stic' sba ochel ta jun nail ch'en, ti ech' yu'un ti ac'ubale. Ja'uc ti yaj'ánjel Diose bat sc'opon ti xi laj yalbe ya'ie: “¿C'usi ta xapas li'e, Elías?”

¹⁰ Xi laj staq'ue: “Toj tsots ac'oplal ta xca'i, ti mu jc'an ta xatenat comel ta Ajvalilal ti scotol xu' avu'une, Dios. Yu'un ti israeletique laj xa sten comel ta spat ta xocon ti atratee. Laj xa sjines ti avaltar une. Laj xa smilic ta espada ti avaj'alc'optaque. C'ajomal xa jch'ul tuc licom, ti yacal ta xisa'icun yo' ta stubbeicun ti jc'oplal avi tana une.”

¹¹ Xi albat yu'un ti Diose: “Loc'an talel ti bu oyote. La' va'lan ta jts'el ti li' ta vitse” Ta jech to yepal, ech' ti Diose, ti tsots ta j'ech'el xjumet liquel ti iq'ue, ti jav ti vitse, ti laj ch'acuc ti tonetic ta sba ta sat ti Diose. Mi ja'uc volibil ta ic' ti Diose. C'alal ech' ti tsots iq'ue, tal tsots niquel. Mi ja'uc tey oy ta niquel ti Diose.

¹² C'alal ech' ti niquele, tal c'oc'. Mi ja'uc volibil ta c'oc' ti Diose. C'alal ech' ti c'oq'ue, oy bu vinaj ti jun yutsil xlamet ti sc'opojel c'opoje.

¹³ C'alal jech laj ya'i ti Eliase, laj smuc ta sc'u' ti sate. Loc' batel, bat svelan sba ta sti' ti nail ch'ene. Ja' o vul ta stojol jun c'opojel ti xi albate: “¿C'usi ta xapas ti bu oyote, Elías?”

¹⁴ Xi laj staq'ue: “Toj tsots ac'oplal ta xca'i. Mu jc'an ta xatenat comel ta Ajvalilal ti scotol xu' avu'une, Dios. Yu'un ti israeletique laj xa sten comel ta svalopat ti atratee. Laj xa sjinesic ti avaltar une. Laj xa smilic ta espada ti avaj'alc'optaque. C'ajomal xa jch'ul tuc licom, ti yacal ta xisa'icun yo' ta stubbeicun ti jc'oplal avi tana li'e.”

¹⁵ Va'i un, xi albat yu'un ti Diose: “Batan, sutan ech'el ti bu lalic talel ta sbajtical banomil yu'un ti Damascoe. Ba ac'o snup yabtel ta ajvalilal yu'un Siria ti Hazaele.

¹⁶ Ac'bo snup yabtel ta ajvalilal yu'un Jerusalén ti Jehú smom ti Nimsie. Ac'bo snup yabtel ti Eliseo xnich'on ti Safat ti liquel ta jteclum Abel-meholae yo' jech ta x'och ta aq'uexol ta alc'ope.

¹⁷ Ti jech taje, ti buch'u mu'yuc xlaj ta milel ta espada yu'un ti Hazaele, ta xmilat ta espada yu'un ti Jehue. Ti buch'u mu'yuc xlaj ta milel ta espada yu'un ti Jehue, ta xmilat ta espada yu'un ti Eliseoe.

¹⁸ Manchuc mi jech un, le'e, ta to jcomtsan vucmil (7,000) ta vo' israeletic ti mu ja'uc squejanoj sbaic ta stojol ti Baale, ti mu ja'uc xnijelet xchimiletic ta sts'uts'ele.”

Ta x'och ta yabtel ti Eliseoe

¹⁹ Ti Eliase loc' batel ti bu oye. Yacal ta sloc yosil ti Eliseo laj stae. Lajcha'chop j'abtel vacax yu'un stsopet ta x'abtej jelavel yu'un ti Eliseoe. Slajeb xa jchop ta cot yic'ojbe ech'el yabtejeb ti stuque. Ti Eliase nopaj ech'el ta sts'el. Laj scajan ti sc'u' ta stojole.

²⁰ Ta jech to yepal, ti Eliseoe laj yicta comel ti j'abtel vacax yu'une. Xbitet batel ta anil ta spat ti Elías ti xi laj yalbe ya'ie: —Ac'bun ave ati' ta yalel jba comel ta sts'uts'el slajeb velta ti jtot jme'e, ta jchi'inot batel ta ts'acal to un. —Batan —xi laj stac' ti Eliase—. Mu me xch'ay xava'i ti oy c'usi laj xa jpas ta atojole.

²¹ Ti Eliseoe laj sq'uej sba batel ta stojol ti Eliase, bat. Laj stsac talel cha'cot j'abtel tot vacaxe, ti laj smile. Laj sta'ajes o ti beq'uet ta yabtejebe, ti laj yac'be sti' ti yaj'abteltaque. Laj taj une, bat sts'acliic ti Eliase, ti c'ot ta yajtunel yu'une.