1 Reyes 16 - Bible in Tzotzil de Chamula

¹ Va'i un, ti Diose bat sc'opon ti Jehú xnich'on ti Hananie yo' xi ta xalbe ya'i ta scontrainel ti Baasae:

² “Laj jtamot loq'uel ta spucuquil ti banomile. Laj jva'anot ta ajvalil yu'un ti jlumal Israele. Ja'uc ti vo'ot une, co'ol laj apas jech c'u cha'al laj spas ti Jeroboam ti laj sta smul yu'un ti israeletique. Laj aliquesbun sc'ac'al co'nton yu'un ti amule.

³ Ja' yu'un un cha'e, Baasa, ta jtsutsesot ta j'ech'el xchi'uc ti c'u yepal oy ta anae. Jech ta jpasbeic ta stojol jech c'u cha'al laj jpasbe ti Jeroboam xnich'on ti Nabate.

⁴ Buch'uuc no'ox junucal avuts' avalal ti ta xcham ta lume, ts'i' xve' o yu'unic. Ti buch'u ta xcham ta osiltique, jti'oval mutetic xve' o yu'unic.”

⁵ Ti sc'oplal ya'yejal ti Baasae, xchi'uc ti c'usitic laj spase, ts'ibabil com ta jpoc svunal sc'oplal yabtel ti ajvaliletic yu'un ti Israele.

⁶ C'alal cham ti Baasae, laj smuquic ta Tirsa. Lic ochuc xq'uexol ta ajvalilal ti Ela xnich'on no'ox ta ts'acal toe.

⁷ Ta sventa ti j'alc'op Jehú xnich'on ti Hananie, albat ya'i ta jamal yu'un Dios ti Baasa ti c'u s'elan ta xc'ot ta stojol xchi'uc ti c'u yepal oy yu'une, ti mu lecuc laj yil ta sba ta sat Dios ti c'usitic ta spase. Laj sliquesbe sc'ac'al yo'nton Dios ti Baasae. Ti c'usitic lic spase, jech laj spas jech c'u cha'al laj spas ti Jeroboame, xchi'uc ti c'u yepal oy yu'une, tubbat sc'oplalic ta j'ech'el.

Yabtel ti ajvalil Elae xchi'uc ti Zimri ta Israele.

⁸ Ti ta svaquibal xcha'vinic (26) jabil yochel ta ajvalilal ti Asa ta Judae, ti Ela xnich'on ti Baasae lic ochuc ta ajvalilal ta stojol ti Israel ta Tirsae, ti c'ajomal chib jabil och ta ajvalilale.

⁹ Ja'uc ti Zimrie, yajtunel ti Ela ti sbainoj j'olol jvoc' ti carreta sventa ac'ob letoe, xq'uelbat no'ox sat yu'un ta sliquesbel sc'oplale. Yu'un oy jun c'ac'al, ti Elae, ti c'alal oy ta Tirsae, bat ta sna ti Arsa ti yajbainej ti c'usitic x'ayan yu'une, ti uch'baj ti bu xa c'alal xu' yu'une, ti yacub xchi'uque.

¹⁰ Ta jech yepal c'ot ec ti Zimrie, ti laj smile, ti och ta q'uexolil ta ajvalilal yu'une. Ti va'i s'elan taje, c'ot ta pasel ti ja' xa yucubal xcha'vinic (27) jabil yochel ta ajvalilal ti Asa ta Judae.

¹¹ C'alal och ta ajvalilal ti Zimrie, ta jech to yepal, lic smilbe ti c'u yepal oy yu'un ti Baasae. Mi junuc queremetic, yuts' yalaltac, xchi'uc ti buch'u xojtiquinanbe leque. Laj smil scotol yo' jech mu xpacbat sutel xq'uexol ti yabtel ta spase.

¹² Ti jech tsutsesbat sts'unubaltac ti Baasa yu'un ti Zimrie, ja' c'ot ta pasel ti laj ono'ox yal Dios ta stojol ti Baasa ta sventa ti j'alc'op Jehue.

¹³ Ja' ta scoj scotol smul ti Baasae, xchi'uc ti Ela ti ja' xnich'one, ti ja' ta scojic laj sta smul ti israeletic yu'unique, ti laj sliquesbeic sc'ac'al yo'nton Dios yu'unic ti israeletic ta scoj ti laj sbic'tajes sbaic ta yich'el ta muc' ti c'usitic meltsanbil ta c'abale.

¹⁴ Sc'oplal ya'yejal ti Elae, xchi'uc ti c'usitic laj spase, ts'ibabil com ta jpoc svunal sc'oplal yabtel ti ajvaliletic yu'un ti Israele.

¹⁵ Ta yucubal xcha'vinic (27) jabil yochel ta ajvalilal ti Asa ta Judae, ti c'alal vololic ti soldado Israel yo' ta stsaquic ta c'op ti filisteoetic ta lum Gibetone, ja' o lic spas mantal ta Tirsa ti Zimrie. C'ajomal no'ox vucub (7) c'ac'al laj spas mantal.

¹⁶ Ti sc'ac'alil vololic ti soldado Israel ti c'alal c'ot ta xchiquinic ti laj ya'iic ti cuch yu'un ta spaybe sc'oplal ti laj smil ajvalil ti Zimrie, scotolic ti c'u yepal vololic ti soldado Israele, laj snup yabtel ta ajvalilal yu'un Israel ti Omri ti ja' jun banquilal jpas-mantal yu'un ti soldadoetique.

¹⁷ Va'i un, ti Omrie xchi'uc scotol ti soldado Israele, mu'yuc laj stsaquic ta c'op ti Guibetone, ja' bat stsaquic ta c'op ti lum Tirsae.

¹⁸ C'alal laj yil ti Zimri ti u'ninbil xa ti lume, och batel ta yut na. Laj stic'be sc'ac'al ti na ti c'alal tiq'uil ti stuque. Ja' jech cham laj.

¹⁹ Ti jech c'ot ta pasel taje, ta scoj ti c'usitic chopol laj spas ta sba ta sat ti Diose, ti co'ol laj sta smul jech c'u cha'al laj spas ti Jeroboame, xchi'uc ti laj sta smul yu'un ti israeletique.

²⁰ Ti c'u yepal sc'oplal ti Zimrie, ti laj spaybe sc'oplal ta smilel ti ajvalil Elae, ts'ibabil com ta jpoc svunal sc'oplal yabtel ti ajvaliletic yu'un ti Israele.

Yabtel ti Omri ti c'alal ochem ta ajvalilal yu'un ti Israele

²¹ Va'i un, ti lum Israele lic spas sbaic ta cha'voc'. Ti jvoq'ue laj yac' sbaic ta stojol ti Tibni xnich'on ti Ginate ti c'otuc ta ajvalil yu'unique. Ja'uc ti jvoq'ue laj yac' sbaic ta stojol ti Omrie.

²² Ta slajeb un, ti buch'u oyic ta stojol ti Omrie, tsots laj sva'an sbaic ta stojol ti buch'u oyic ta stojol ti Tibni xnich'on ti Ginate. Ti Tibnie cham. Ja' to jech och ta ajvalilal ti Omrie.

²³ C'alal och ta ajvalilal ti Omrie, ta xbuluchibal xcha'vinic (31) jabil yochel ta ajvalilal ti Asa ta Judae. Lajcheb jabil och ta ajvalilal, ti tsacbil xa ta venta xchi'uc ti och ta ajvalilal vaquib jabil ta Tirsae.

²⁴ Vaquib xchanvinic (76) kilo ta plata laj smanbe Semer, ja' ti vitstic yu'un ti Samariae. Laj smeltsan lec macbil ta moc jun jteclum ti bu taje, ti laj yac'be sbiin Samaria, sbi ti yajval vitstique, ja' Semer.

²⁵ Ti c'usitic laj spas ti Omrie, mu lecuc laj yil ta sba ta sat ti Diose, ti xjelav to ech'em c'usi laj spase, ja' mu sta c'usitic laj spasic ti yan ajvaliletic laj ech'icuque.

²⁶ Yu'un jech laj spas jech c'u cha'al laj spas ti Jeroboam xnich'on ti Nabate, ti laj sta smul yu'un ti israeletique, xchi'uc ti laj sliquesbe sc'ac'al yo'nton ti Ajvalil Dios yu'un ti israeletique ta scoj ti laj sbic'tajes sba ta yich'el ta muc' ti c'usitic meltsanbil ta c'abale.

²⁷ Ti c'u to yepal sc'oplal yabtel ti Omrie, xchi'uc ti jelavem sc'oplal laj spase, ts'ibabil com ta jpoc svunal sc'oplal yabtel ti ajvaliletic yu'un ti Israele.

²⁸ Ti c'alal chame, laj smuquic ta Samaria. Ts'acal to un, och ta xq'uexol ta ajvalilal ti Acab ti ja' xnich'one.

Yabtel ti Acab ti c'alal och ta ajvalilal yu'un ti Israele

²⁹ C'alal ta xvaxaclajunebal xcha'vinic (38) jabil yochel ta ajvalilal ti Asa ta Judae, ti Acab xnich'on ti Omrie, ja' o lic ochuc ta ajvalilal yu'un Israel. Jalij chib xcha'vinic (22) jabil ta ajvalilal yu'un ti Israel ta Samariae.

³⁰ Ja'uc ti c'usi lic spase, mu lecuc laj yil ta sba ta sat ti Diose, ti x'ech' to xjelav ti c'usi laj spase, ja' mu sta ti yan ajvaliletic laj ech'icuque.

³¹ Yu'un lec no'ox laj ya'i ta spasel ec ti c'usitic chopol laj spas ti Jeroboam xnich'on ti Nabate. C'ot ta pasel yu'un ti laj yic' ti Jezabel ti yantsil nich'on ti Et-baal ajvalil yu'un ti Sidone, ti lic sbic'tajes sba ta j'ech'el ta yich'el ta muc' ti loc'obbail Baale.

³² Laj smeltsan jun altar, laj smeltsanbe xch'ulnail ti Baal ti ta lum Samariae.

³³ Laj smeltsanbe sloc'obbail ti Asera xtoque, ti laj sliquesbe sc'ac'al yo'nton ti Ajvalile, Dios yu'un ti Israele, ja' mu sta liquesbat sc'ac'al yo'nton Dios yu'un ti yan ajvaliletic laj ech'icuque.

³⁴ Ti yorail ochem ta ajvalilal ti Acabe, ti Hiel ti liquel talel ta Betele, lic xcha'meltsan ti jteclum Jericoe. Cham yu'un ti sbanquilal nich'on ti Abiram sbie, ti c'alal lic ta lum ti sliqueb yoc ti abtele. Cham yu'un ti yits'inal nich'on ti Segub sbie, ti c'alal laj xchotanan ti muc' ta ti'naetique. Jech ono'ox c'ot ta pasel jech c'u cha'al laj yal ti Dios ta sventa ti Josué xnich'on ti Nune.