1 Reyes 15 - Bible in Tzotzil de Chamula

Yabtel ti Abiam ti c'alal ochem ta ajvalilal ta Judae

¹ Lic ochuc ta ajvalilal ti Abiam ta Judá ti c'alal yich'oj xa xvaxaclajunebal (18) jabil yochel ta ajvalilal ti Jeroboam xnich'on ti Nabate.

² Oxib jabil (3) sjalil och ta ajvalilal ta Jerusalén. Ti sme'e sbiinoj Maaca, yantsil nich'on ti Absalone.

³ Ti c'u s'elan laj spas talel ti stot ta ba'yele, jech lic mulivajuc ec ti Abiame, mu junuc yo'nton ta stojol ti Ajvalil Dios yu'une, mu jechuc yo'nton jech c'u cha'al laj spas ti David ti ja' smuc'tote.

⁴ Manchuc mi jech un, ti jech mu xtuch'at ta o'ntonal ti Davide, ti Diose laj yac' ye ti cuxuluc o sc'oplal ti David ta Jerusalén ti oy sc'oplal ta x'och ta ajvalilal ti xnich'on c'alal mi chame, yo' jech ta sventain ti Jerusalene.

⁵ Yu'un ti Davide toj lec laj stuc'ulan sba ti jun yutsil laj yil ti Diose. Mu'yuc laj stub ta yo'nton ti c'u s'elan albat yu'un ti smantaltac ti Dios ti jayib c'ac'al cuxule. Ja' no'ox laj sta smul ti oy c'usi laj spasbe ti Urias ti hititae.

⁶ Ti c'u sjalil cuxul ti Roboame, xlic xcaj no'ox laj stsac sbaic ta leto xchi'uc ti Jeroboame. Jech xtoc ti Abiame xchi'uc ti Jeroboame laj stsac sbaic ta leto.

⁷ Ti c'u to yepal sc'oplal ti Abiame, xchi'uc ti c'usi laj spase, ts'ibabil com ta jpoc svunal sc'oplal yabtel ti ajvaliletic yu'un ti Judae.

⁸ C'alal cham ti Abiame, laj smuquic ta steclumal ti Davide. Och ta xq'uexol ta ajvalilal ti Asa ti ja' xnich'one.

Yabtel ti Asa ti c'alal och ta ajvalilal yu'un ti Judae.

⁹ C'alal och ta ajvalilal yu'un Judá ti Asae, ja' o yich'oj xa jtob (20) jabil yochel ta ajvalilal yu'un Jerusalén ti Jeroboame.

¹⁰ Cha'vinic jabil laj spas mantal ta Jerusalén. Ti syayae sbiinoj Maaca yantsil nich'on ti Absalone.

¹¹ Lec laj yil ta sba ta sat Dios ti c'u s'elan laj spas ti Asae. Jech laj spas jech c'u cha'al laj spas ti David ti ja' smolmuc'tote.

¹² Laj sten loq'uel ta lum ti buch'utic ta xmulivajic ti c'alal ta spasbeic smuyubtael stoyel xi'el ti loc'obbaile. Laj xch'aybe sc'oplal ti loc'obbail diosetic ti laj smeltsanic ti smolmuc'totaque.

¹³ Laj xch'aybe yip yabtel ta me' ajvalilal ti syaya ti sbiinoj Maacae, yu'un laj yac' ta meltsanel ti jun loc'obbail ti sbiinoj Aserae. Ti Asae, laj stubbe sc'oplal ti loc'obbaile, laj xchic' ta ti' uc'um Cedrón.

¹⁴ C'ajomal xa no'ox mu'yuc laj slilinbe xch'ul natac ti loc'obbaile. Ti Asae jun sjol yo'nton ta stojol ti Diose.

¹⁵ Scotol ti oroe, ti platae, bat yac' ta xch'ulna ti Diose. C'otem ta yo'nton ti stuque jech c'u cha'al ti stote, ti ta stunes ti Diose.

Ti Asae ta sjunajes sjol yo'ntonic xchi'uc ti Ben-adade

¹⁶ Xlic xcaj no'ox stsac-tsac sbaic ta leto ti Asae xchi'uc ti Baasa ajvalil yu'un ti Israele.

¹⁷ Ti Baasae c'alal bat stsac ta c'op ti Judae, laj smac lec ti jteclum Ramae yo' jech mu xjelav batel ti ajvalil yu'un ti Judae.

¹⁸ Va'i un, ti Asae laj stam loq'uel scotol ti oroe, ti platae, ti oy ta yavil ta xch'ulna ti Diose, xchi'uc ti oy ta sna stuc ti ajvalile. Ta sventa ti yaj'opisialtaque, laj stac ech'el ta stojol ti Ben-adad ajvalil yu'un ti lum Siriae. Ti Ben-adad taje, ja' xnich'on ti Tibrimone, smom ti Hezión ti oy ta Damascoe, ti xi laj yalbe ech'el ti j'ich'-c'op j'al-mantaletic yu'une:

¹⁹ “Ti vu'un xchi'uc ti vo'ote, la' jpastic jun jtratetic jech c'u cha'al laj spasic ti jtotique. Li' ta jtacbot talel oro xchi'uc plata ti ja' amotone. Va'ano aba ta xch'aybel sc'oplal ti c'usi achapanojic ta jtojol xchi'uc ti Baasa ajvalil yu'un ti Israele. Ja' to jech ts'ij xi jc'oplal avu'unic.”

²⁰ Ti Ben-adade laj xch'un ti va'i s'elan albat yu'un ti ajvalil Asae. Laj stac ech'el ti banquilaletic yu'un ti yajsoldadotaque yo' jech ta stsaquic ta c'op ti jteclumetic yu'un ti Israele. Ja' jech lic yu'ninan ti Iione, ti Dane, ti Abel-bet-maacae, scotol ti Quinérete, xchi'uc scotol yosilal ti Neftalie.

²¹ C'alal laj ya'i ti Baasae, laj yicta sba ta smaquel ti jteclum Ramae, sut ech'el ta Tirsa.

²² Va'i un, ti ajvalil Asae laj stac ta iq'uel scotol ti jnaclejetic ta lum Judae, ti ma'uc junuc ma' ti mu xc'otique. Laj stamic loq'uel ti tonetique, xchi'uc te'etic ta Rama ti ta stunes ti ajvalil Baasae yo' jech ti ajvalil Asae ta smac o ti jteclum Geba ti oy ta yosilal ti Benjamine, xchi'uc ti jteclum Mizpae.

Ta xcham ti Asae

²³ Ti bu jamal ta x'albat sc'oplal ti yabtel ti c'usi laj spase, xchi'uc ti smuc'ul stsatsal laj yac' iluque, xchi'uc ti laj sva'an jteclumetic ti Asae, ts'ibabil com ta jpoc svunal yabtel ajvaliletic yu'un ti Judae. Lic ipajuc yacan ti c'alal molibem xa ti Asae.

²⁴ Ti c'alal chame, laj yich' muquel ta Steclumal ti Davide, ti bu mucul ti stot sme'taque. Ta ts'acal to une, och ta xq'uexol ta ajvalilal ti Josafat ti ja' xnich'one.

Yabtel ti Nadab ti c'alal och ta ajvalilal yu'un ti Israele

²⁵ C'alal xchibal xa ox jabil yochel ta ajvalil ti Asa ta Judae, ti Nadab xnich'on ti Jeroboame, lic ochuc ta ajvalil yu'un ti Israele, ti c'ajomal no'ox chib jabil jalij ta ajvalilale.

²⁶ Yu'un ti c'usitic lic spase, chopol laj yil ta sba ta sat ti Diose, yu'un jech lic spas jech c'u cha'al laj spas ti stote ta scoj ti laj sta smul yu'un ti Israele.

²⁷ Ja'uc ti Baasa une, xnich'on ti Ahías ti liquel talel ta stojol snitilultac ti Isacare, laj stsob svinictac ta scontrainel ti Nadabe, ti laj smil ta Gibetón ta yosilal filisteoetic ti bu laj yich' joyobtael yu'un ti Nadab xchi'uc scotol ti soldadoetic yu'un ti Israele.

²⁸ Ti Baasae laj smil ti Nadabe ti c'alal yich'oj xa yoxibal jabil yochel ta yabtel ta ajvalil ti Asa ta Judae, ti och ta q'uexolil ta ajvalil yu'une.

²⁹ C'alal och ta ajvalilale, ta jech no'ox yepal, lic smilbe yuts' yalaltac ti Jeroboame. Jech c'ot ta pasel jech c'u cha'al yaloj ono'ox ti Dios ta sventa ti yaj'alc'op Ahías ti liquel talel ta Siloe, ti j'ech'el laj stsutsesbe snitilultac ti Jeroboame, ti mu junuc cuxul laj yicta comele.

³⁰ Taje, ja' ta scoj ti mulivaj ta j'ech'el ti Jeroboame, ti laj sta smulic yu'un ti israeletique, ti laj sliquesbe sc'ac'al yo'nton ti Ajvalil Dios yu'un ti Israele.

³¹ Sc'oplal ti Nadabe, xchi'uc ti c'usitic laj spase, ts'ibabil com sc'oplal ta jpoc svunal yabtel ti ajvaliletic yu'un ti Israele.

³² Ti ajvalil Asae, xchi'uc ti Baasa ajvalil yu'un ti Israele, xlic xcaj no'ox yu'unic ti stsac-tsac sbaic ta leto.

Yabtel ti Baasa ti c'alal ochem ta ajvalilal yu'un ti Israele

³³ Ta yoxibal jabil yochel ta ajvalilal ti Asa ta Judae, ti Baasa xnich'on ti Ahías ti nacal ta Tirsae, lic ochuc ta ajvalilal yu'un sjunul ti Israele, ti jalij chanib xcha'vinic (24) jabil ta ajvalilale.

³⁴ Ja'uc le' une, ti c'usitic lic spas ti Asae, chopol laj yil ta sba ta sat ti Diose. Mulivaj jech c'u cha'al laj spas ti Jeroboame, ti laj sta smul yu'un ti israeletique.