1 Reyes 14 - Bible in Tzotzil de Chamula

Ti Ahiase ta xalbe ya'i ti Jeroboam ti oy c'usitic ta xc'ot ta stojole

¹ Ti jech yorail ta vo'ne taje, ti Abías xnich'on ti Jeroboame, yal ta chamel.

² Xi laj yalbe yajnil ti Jeroboame: —Maco ech'el asat yo' jech mu xa'ojtiquinaj ti vo'ot cajnilote. Batan ta Silo. Ti bu taje, nacal ti j'alc'op Ahiase, ti laj yalbun jc'oplal ta xi'och ta ajvalil yu'un ti muc' ta lum li'e.

³ Ich'o batel lajunbejuc pan, xchi'uc ti muc'tic pane, xchi'uc jbejuc jarru ajapom. Ba vu'lano ta sq'uelel yo' jech xu' ta xalbot c'usi ta xc'ot ta stojol ti olol li'e.

⁴ Ja' jech lic spas yajnil ti Jeroboame. Lic xchapan sba ti bat ta Siloe. C'ot ta sna ti Ahiase. Ti Ahiase mu xa xc'ot lec ti sate, maquem xa ta scoj ti syijubele.

⁵ Ja'uc le'e, ac'bat xa sna' yu'un ti Dios ti ta xc'ot yajnil ti Jeroboam ta sjac'be sc'oplal ti yol ti yalem ta chamele. Ja' jech xtoc ac'bat sna' c'u s'elan ta stac'be sutele, xchi'uc ac'bat sna' ti smacoj ti sat ta xc'ote.

⁶ C'alal laj ya'i ti Ahías ti xpulajet c'otel ta x'och batel ta ti'nae, xi laj yalbee: —Ochan talel, yajnil Jeroboam. ¿C'u cha'al ta xabis aba ta yan ants? Yu'un laj xa quich' albel ti tsots que jti' ta jtac'bote.

⁷ Ta lec no'ox sutan batel. Albo ya'i ti Jeroboam ti xi ta xal ti Ajvalile, Dios yu'un ti Israele: ‘Laj jt'ujot loq'uel ta stojol scotol ti lume, ti la'och ta banquilal cu'un yu'un ti jlumal Israele.

⁸ Laj jva'an jba ta stenel loq'uel snitilultac ti Davide yo' jech ta xa'och ta ajvalil cu'un. Ja'uc ti vo'ot une, mu jechuc snopobil avu'un jech c'u cha'al ti cajtunel Davide, ti laj xch'un ti jmantaltaque, ti sjunul yo'nton tun ta jtojole, ti lec laj quil ta jba ta jsat ti c'usi laj spase.

⁹ Ti vo'ote toj ech'em lajelav ta spasel ti c'usi chopole, ja' mu sta ti buch'u ba'yel jch'iel jc'opojele. Yo' jech ta xc'ot ta soquel avu'un ti jole, laj avac' ta meltsanel ti loc'obbailetique, ti loc'obbail diosetic ti unijesbil ta taq'uine. Laj ajip atenun comel.

¹⁰ Jech o xal ta xcac'be svocol ti anitilultac ti xi s'elan ta xc'ot ta pasele: Ti li' ta Israele, ta xc'ot ta pasel cu'un ti ta xcac' chamuc scotol ti queremetic avu'une, mi junuc cuxul ta xcom. Ta j'ech'el ta jmes ta tsutsel scotol ti anitilultac jech c'u cha'al ta xich' mesel ti c'a'epe.

¹¹ Ti ta xchamic ti avuts' avalaltac ta jteclume, ts'i' xve' o yu'unic. Ti buch'u ta xchamic ta osiltique, xulem xve' o yu'unic. Jech c'ot ta nopel cu'un ti vu'un Ajvalilune.’

¹² “Ja'uc ti vo'ot une ants, va'lan, batan ta ana. Ta jech no'ox yepal, mi laj atec' ochel jteq'uel avoc ta lume, ta xcham ti olole.

¹³ Va'i un, scotol Israel ta xa'iic sme'inalil yu'un. Ta smuquic, ti ja' no'ox jech yepal snitilul Jeroboam ti ta xich' muquele. Ti ta scotol snitilultac ti Jeroboame, c'ajomal jun ti lec laj yil ta sba ta sat ti Ajvalil Dios yu'un ti Israele.

¹⁴ Ts'acal to un, ta sva'an jun ajvalil ti ja' ta stsutsesbe scotol snitilultac ti Jeroboam ti c'alal sta sc'ac'alile, ti ja' jech ta xlic spas avi tana li'e.

¹⁵ Ta xq'uiatic ta vocol yu'un Dios ti israeletique co'ol jech c'u cha'al ti xq'uiet no'ox ta xbat ta jujujot ti pujetic yu'un ti uc'ume. Ta xjipatic loq'uel li' ta lequil banomil ti ac'batic ti amolmuc'totique, ti jelavel to ta uc'um Eufrates ta xtenatic batel ta scoj ti laj spasbeic sloc'obbail ti Astartee, ti lic ilinuc ti Dios yu'unique.

¹⁶ Ta xac' ta c'abal ti israeletique ta scoj smul ti Jeroboame, ti laj sta smul yu'un ti israeletique.”

¹⁷ Va'i un, yajnil ti Jeroboame lic sva'an sba, loc' batel laj stam batel sbe ti c'ot ta Tirsae. C'alal laj stec' jun yacan ta ti'nae, lic chamuc ti olole.

¹⁸ Scotol israeletic laj yoq'uitaic, laj smuquic jech c'u cha'al yaloj ono'ox ti Dios ta sventa ti yaj'alc'op Ahiase.

¹⁹ Ti sc'oplal ya'yejal yabtel ti Jeroboame, ti tsacvan ta letovajele, ti c'usitic yan laj spas ti c'alal tiq'uil ta yabtele, ts'ibabil sc'oplal ta jpoc svunal yabtel ti ajvaliletic yu'un ti Israele.

²⁰ Ti Jeroboame, c'ajomal no'ox chib xcha'vinic jabil (22) sjalil ti och ta ajvalile. C'alal chamem xae, och ta xq'uexol ta ajvalilal ti Nadab ti xnich'on ta ts'acal to une.

Yabtel ti ajvalil Roboam ta lum Judae

²¹ Ti xnich'on Salomón ti Roboam sbie, ti ochem ta ajvalilal ta lum Judae, yich'oj xa ox jun yoxvinic (41) jabil ti xch'iel sc'opojel ti lic ochuc ta ajvalilale. C'ajomal no'ox vuclajuneb (17) jabil och ta ajvalilal ta Jerusalene, ti jun jteclum laj st'uj ti Dios ta scotol steclumal snitilultac ti Israele, ti snail ti bu ta xich' tael ta na'ele. Sme' ti Roboame, ja' jun jyanlum amonita ants ti sbiinoj Naamae.

²² Ja'uc ti c'usitic lic spas ti Roboame, mu lecuc laj yil ta sba ta sat ti Ajvalil Diose. Toj ech'em laj soquesbe yo'nton ti Diose, ti jc'ol to mu sta ti c'usi laj spas ti smolmuc'totaque.

²³ Ti stuquique laj smeltsanic jujun c'opojebaletic. Laj sva'ananic loc'obbailetic ti loc'tabil ta te'etique, ti loc'tabil ta tonetique, ti laj yaq'uic ta jujun stseleje, ti oy ta yolon limajtic te'etique.

²⁴ Ja' jech xtoc ta vinic ta antsetic laj yac'beic yipal ta mulivajel ta sventa smuyubtael stoyel xi'el ti loc'obbail diosetique, ti lic stsacbeic ta spasel jech c'u cha'al ilo sba ta spasic ti yan muc'tiquil lumetic ti laj sten loq'uel ti Dios ta sba ta sat ti israeletique.

²⁵ C'alal yo'obal xa jabil yochel ta ajvalilal ti Roboame, ti ajvalil yu'un ti lum Egipto ti Sisac sbie, tal stsac ta c'op ti Jerusalene.

²⁶ Sc'ulejal ti Dios ti oy ta ch'ulnae, xchi'uc ti c'usi oy ta sna ti ajvalile, laj yu'nin. Scotol laj smes ta tsobel, xchi'uc laj yich' batel ti macobbail oro ti laj yac' ta meltsanel ti Salomone.

²⁷ Ti ajvalil Roboame laj yac' ta meltsanbel xq'uexol ti macobbail ti naca xa c'anal taq'uine, ti laj yac'be comel ta sventainel ti j'opisialetic ti ta xchabiic ti ochebal ti'na yu'un ti ajvalile.

²⁸ C'alal jujuten ta xbat ta xch'ulna Dios ti Roboame, ti jchabivanejetique ta xich'ic batel. Mi laj stu une, ta xaq'uic comel ta yavil ti bu oy ti jchabivanej soldadoetique.

²⁹ Ti c'u yepal sc'oplal ti Roboame, xchi'uc ti c'usi laj spase, ts'ibabil ta jpoc svunal yabtel ti ajvaliletic yu'un ti Israel ti oy ta Judae.

³⁰ Xlic caj no'ox ti letovajel yu'un ti Roboam xchi'uc ti Jeroboame.

³¹ C'alal cham ti Roboame, bat yich' muquel ta Steclumal David ti bu mucul ti stot sme'e. Sbi ti sme'e, Naamá ti liquel talel ta Amone. Laj taj une, och ta xq'uexol ta ajvalilal ti xnich'on ti sbiinoj Abiame.