1 Reyes 12 - Bible in Tzotzil de Chamula

Ta xc'ot ta chib ajvalil yu'un ti Israele

¹ Ti bat ta Siquem ti Roboame, yu'un scotol ti Israel batic ti bu taje yo' jech ta snup yabtel ta ajvalilal yu'unic.

² Ja'uc taj une, c'ot ta sni' ta xchiquin ti Jeroboam xnich'on ti Nabate, ti oy to ta Egipto ti bu com ta naclej ta scoj ti jatav ech'el ta stojol ti Salomone.

³ C'alal laj staic ta iq'uele, ti Jeroboam xchi'uc scotol ti Israele xi laj yalbeic ya'i ti Roboam ti c'alal bat sc'oponique:

⁴ —Ti atote, bats'i toj tsots laj spas sba ta jtojolcutic ti c'alal ech' ta ajvalil ta jtojolcutique. Avi tana une, sicubtaso sc'oplal ti ilbajinel ti tsots li'ac'bat quich'cutique, ta xcac' jbacutic ta tunel ta atojol un.

⁵ Xi tac'batic yu'un ti Roboame: —Avie, batanic, xtal aq'uelicun li' ta oxib c'ac'ale. Batic ti jnaclejetique.

⁶ Va'i un, ti Roboame xi lic sjac'be ye sti' ti moletic ti laj to ox yac' sbaic ta tunel ta stojol ti Salomone, ti c'alal cuxul to ox ti ja' stote: —¿C'usi xu' ta xavalic ta jtac'be sc'opic ti jnaclejetique?

⁷ Xi laj stac'beic ti stuquique: —Ti jech ta xavac' aba ta tunel ta stojol ti jnaclejetic avi tana li'e, ti oy stuq'uil ta ac'op ta xatac'bee, ti stuquique ta xac' sbaic ta tunel ta atojol.

⁸ Ja'uc ti Roboam une, mu'yuc laj yac' ta venta sc'opic ti moletique. C'ajomal lic yich'be ye sti' ta sjac'bel sc'opic ti queremetic ti jmoj ch'iel sc'opojelic xchi'uque, ti ja' yajtuneltaque.

⁹ Xi lic sjac'olanbe: —Ti va'i s'elan ta sc'anic ti jnaclejetic ti ac'o jsicubtas ti c'op ti tsots ilbajinatic yu'un ti jtote, ¿c'usi xu' chavalic ec?

¹⁰ Ti queremetic ti jmoj ch'i xchi'uque xi laj staq'uique: —Ti jnaclejetic le'e, ti laj sc'anbot ti ac'o asicubtasbe ti tsots ilbajinatic yu'un ti atote, xi xatac'be jech c'u cha'al li'e: ‘Ti tsots yo'nton ti jtot ech' ta atojolique, vu'un x'ech' to stsatsal co'nton.

¹¹ Ti tsots laj yilbajinoxuque, vu'un x'ech' to ta xquilbajinoxuc. Ti tsots laj stsitsoxuc ta nucule, vu'un x'ech' to ta jtsitsoxuc ta natil ts'otbil nucul ti yich'oj staq'uinal sba sni'e.’

¹² Ta yoxibal c'ac'al un, xvoletic c'otel xchi'uc scotol jteclum ti Jeroboam ta sba ta sat ti Roboam jech c'u cha'al yaloj ti ajvalile.

¹³ Ja'uc le' une, xc'aq'uet xa tac'batic yu'un ti ajvalile. Mi ja'uc laj yac' ta venta ti bijubtasel yu'un ti moletique.

¹⁴ Ja' lic xcha'al ti c'u s'elan bijubtasat yu'un ti queremetic ti xi s'elane: “Ti mi toj tsots laj avich'ic ilbajinel yu'un ti jtote, x'ech' to ta xquilbajinoxuc. Ti mi toj tsots la'ac'batic nucul yu'un ti jtote, x'ech' to ta xquilbajinoxuc ta natil ts'otbil nucul ti yich'oj staq'uinal sba sni'e.”

¹⁵ Ti jech mu'yuc laj yac' ta venta sc'op jteclum ti ajvalile, nopbil xa yu'un ti Diose yo' jech ta xc'ot ta pasel yu'un ti oy c'usi laj yalbe ti Jeroboam xnich'on ti Nabate, ta sventa ti Ahías ti liquel talel ta Siloe.

¹⁶ C'alal laj yil scotol jteclum Israel ti mu'yuc x'ich'batic ta muc' ti sc'opic yu'un ti ajvalile, xi laj stac'beic sutele: “¡Mu'yuc c'usi quich'ojcutic ta sventa ti Davide, mi ja'uc jmoj jrextocutic xchi'uc xnich'on ti Isaie! Batic ta jujubej jnatic ti vo'otic israelotique, ac'o yac' David ti c'usi ta xtun yu'un ti yuts' yalaltaque.” Ta jech to yepal un, bat ta snaic ti israeletique.

¹⁷ Ja'uc ti jvoc' israeletic ti nacalic ta yosilal Judae, c'ot ta ajvalil yu'unic ti Roboame.

¹⁸ Ti Roboame c'alal laj stac batel ti Adoram ti buch'u sbainoj ta sq'uelel ti albil sc'oplal ti tsots abtele, laj ta milel ta ton yu'un scotol ti israeletique. Va'i un, ti ajvalil Roboame laj stic' sba ochel ta anil ta scarreta, jatav ech'el ta Jerusalén.

¹⁹ Ja' jech c'ot ta pasel ti lic scontrainbeic snitilultac David ti Israele, ti ja' to jech avi c'ac'al tana li'e.

²⁰ C'alal laj ya'iic ti israeletic ti sut talel ti Jeroboame, laj staic ta iq'uel yo' jech ta sva'an sba ta sba ta sat scotol ti lume, ti laj yalbeic sc'oplal ti ta xc'ot ta ajvalil yu'un scotol ti Israele, ti tub sc'oplal yu'unic mi ja'uc xa ta x'och ta ajvalil yu'unic junuc snitilultac ti Davide. C'ajomal xa no'ox mu'yuc laj xch'ac sba snitilultac ti Judae.

²¹ C'alal c'ot ta Jerusalén ti Roboame, lic stsob balunvinic ta mil (180,000) soldadoetic ti t'ujbilic ta snitilultac ti Judae, xchi'uc ta snitilultac ti Benjamine, ti ta stsacvan ta c'op Israel yo' ta spoj ti yabtel ti ochem ta ajvalilale.

²² Ti Semaías ti ja' jun yajtunel Diose, xi albat yu'un ti Diose:

²³ “Albo ya'i ti Roboam xnich'on ti Salomone, ajvalil yu'un ti Judae, xchi'uc scotol snitilultac ti Judae, xchi'uc ti snitilultac ti Benjamine, xchi'uc ti lume,

²⁴ ti ta xcal ava'iic ti mu xats'ac abaic ta c'op ti avinquilel abaic ta Israele. C'ot xa ta chapel cu'un ti sutan batel ta ana acotolic.” C'alal laj ya'iic ti va'i s'elan albatic yu'un ti Diose, sutic batel ta snaic jech c'u cha'al albatic mantal yu'un ti Diose.

Ti Jeroboame laj yal ti yich'uc ich'el ta muc' ti c'usitic meltsanbil ta c'abale

²⁵ Ti Jeroboame lic xcha'meltsan ti lum Siquem ti oy ta vitstic yu'un ti Efraine, lic nacluc. Laj taj une, lic xcha'meltsan ti Penuele.

²⁶ Ja'uc le' une, xi laj snope: “Snitilultac ti Davide xu' nan x'ochic yan velta ta ajvalil.

²⁷ Ti jnaclejetic li'e ti mi ta xbatic ta Jerusalén ta yaq'uel chic'bil matanal ta xch'ulna ti Diose, xu' nan ta xlic ochuc ta yo'ntonic ti ta xac' sjolic ta stojol ti Roboam ajvalil yu'un ti Judae. Va'i unbi, ta xismilic, ta xc'ot ta ajvalil yu'unic ti Roboam ajvalil yu'un ti lum Judae.”

²⁸ C'alal laj yo'nton ta snopilanel ti va'i s'elan taje, ts'acal to un, ti ajvalile lic yac' ta meltsanel cha'cot sloc'obbail ch'in vacax ti loc'tabil ta oroe, ti xi laj yalbe ti lume: “Ti vo'oxuque, Israel, ep xa ta velta xacujlajetic ta Jerusalén. Li' oy ti adiosic ti laj sloq'uesoxuc talel ta Egiptoe.”

²⁹ Va'i un, jun, laj yac' ta lum Betel. Jun, laj yac' ta lum Dan.

³⁰ Ja' jech c'ot ta pasel ti laj sta smulic ti Israele, yu'un ti jnaclejetique ta xbatic ta Betel, ta xbatic ta Dan ta snijan xchimanel sbaic ta yich'el ta muc' ti loc'obbaile.

³¹ Lic sva'anan xch'ul natac loc'obbail diosetic, ti lic sva'anan ta paleetic ta jteclum ti ma'uc levitaetique.

³² Ma'uc no'ox taje, ta yo'lajunebal (15) sc'ac'alil yu'un ti xvaxaquibal (8) ue, lic sliques jun q'uin sventa sq'uinal ti loc'obbail diose jech c'u cha'al ta xich' pasel q'uin ta jteclum Judae. Ja' stuc ti ajvalile laj yac' chic'bil matanal ta altar. Taje, jech laj spas ta Betel ti laj yac'be matanal ti loc'obbail dios ti laj yac' ta meltsanele. Xchi'uc xtoc laj sva'anan ti paleetic ta sventa xch'ul natac ti loc'obbail diosetique.

³³ Ja' yu'un un cha'e, ta yo'lajunebal (15) sc'ac'alil yu'un ti xvaxaquibal (8) ue, ja' stuc ti Jeroboame laj yac' ti matanal ta sba ti altar ti laj yac' ta meltsanel ta Betele. Taje, ja' jech yual ti q'uin ti laj sliques ta sjol ta yo'nton stuque, ti jamal laj yal ti ja' jun q'uin yu'un ti israeletique, ti jech yual muy ta altar ta xchiq'uel ti pome.