1 Reyes 11 - Bible in Tzotzil de Chamula

Ti Salomone ta xlic yich' ta muc' ti c'usi meltsanbil ta c'abale

¹ Ti Salomone, ma'uc no'ox yantsil nich'on ti faraón ti laj yajnilane, xi to s'elan bic'taj yo'nton ta yajnilanel ti jyanlum antsetique, jech c'u cha'al ti moabitaetique, ti amonitaetique, ti edomitaetique, ti sidoniaetique, xchi'uc ti hititaetique.

² Laj yajnilin jyanlum antsetic ti albil sc'oplal yu'un Dios ti jbel sc'oplal mu xiq'uic ti israeletique, yu'un jbel sc'oplal ta x'uninbat yo'ntonic yu'un ti c'usitic meltsanbil ta c'abal yu'unique. Ja'uc ti Salomone bic'taj yo'nton xchi'uc ti antsetique, laj yajnilan.

³ Yu'un ti sbats'i ajniltac laj yiq'ue, c'ot ta vucub ciento (700) ta vo', xchi'uc vo'lajunvinic (300) ta vo' ti sts'acal ajniltaque, ja' antsetic ti yanijesbat yo'nton yu'un taje.

⁴ C'alal molineb xa ti Salomone, yanijesbat sjol sbaquil yu'unic ti antsetique, ti lic snijan xchiman sba ta yich'el ta muc' ti meltsanbil diosetique, ti mu j'ech'eluc laj yac' sba ta stojol ti Dios jech c'u cha'al laj spas ti David ti ja' stote.

⁵ Ti Salomone lic snijan xchiman sba ta yich'el ta muc' ti Astarte sdiosic ti sidonioetique, xchi'uc ti jsoquesej o'ntonal sloc'obbail Milcom ti ja' yajdiosic ti amonitaetique.

⁶ Ja' yu'un un, ti c'usitic laj spas ti Salomone, mu lecuc laj yil ta sba ta sat ti Diose, ti mu staojuc yav jun yo'nton ta stojol ti Dios jech c'u cha'al laj spas ti David ti ja' stote.

⁷ Ti jech yorail ta vo'ne taje, ti Salomone lic smeltsan c'opojebal yu'un Quemos ta vits ti oy ta sloq'ueb c'ac'al yu'un ti Jerusalene, jun jsoquesej o'ntonal loc'obbail dios yu'un ti Moabe, xchi'uc ti Moloc yajdiosic ti amonitaetique.

⁸ Ja' jech laj spasbe ta stojol ti yajniltac ti jyanlum antsetique, ti lic xchiq'uic pome, ti lic smilic matanal ta sventa smoton ti sdiosique.

⁹ Ti Ajvalile, Dios yu'un ti Israele, soc sjol ta stojol ti Salomone ta scoj ti laj xch'ac sba ta stojole, ti c'alal chib velta laj yac' sba iluc ta stojole,

¹⁰ ti c'alal albatem ono'ox ti mu snijan xchiman sba ta yich'el ta muc' ti c'usitic meltsanbil ta c'abale. Manchuc mi jech un, mu'yuc laj yac' ta venta ti c'u s'elan albat yu'un ti Diose.

¹¹ Ja' yu'un un cha'e, xi albat yu'un Dios ti Salomone: “Ti jech laj xa apas ti vi s'elan le'e, ti mu'yuc xc'ot ta pasel avu'un ti jtratee, xchi'uc ti oy c'usi jbel laj calbot ava'ie, ta xajtenot loq'uel ti jech ochemot ta ajvalile, ti ta x'och cu'un junuc ti avajtunele.

¹² Manchuc mi jech un, ta sventa ti mu xtuch' ta co'nton ti David ti ja' atote, mu to ta jtenot loq'uel ta ajvalilal ti jech cuxulot toe. Ja' no'ox un, mu xcac' ochuc ta ajvalil ti anich'nabe.

¹³ Xi s'elan ta xc'ot ta pasele: ma'uc ta jtuch' ta j'ech'el ti ta x'ochic ta ajvalil cu'une. Ta x'och ta ajvalil junuc cu'un ti anitilule, ta sventa ti mu xtuch' ta co'nton ti atote, xchi'uc ti Jerusalén ti lum ti laj jt'uje.”

¹⁴ Va'i un, xi s'elan laj yac' ye ti Dios ti lic scontrainel ti Salomone: tal ti jun edomita ti sbiinoj Hadade, jun yuts' yalaltac ti ajvalil ta Edome.

¹⁵ C'alal tsalbil c'ot yu'un Edom ti Davide, ti Joab banquilal jpas-mantal yu'un ti soldadoetique, c'alal bat smuquic ti buch'utic chamic ta letoe, ja' o laj smil scotol viniquetic yu'un ti Edome.

¹⁶ Vaquib u jalij ti Joab xchi'uc ti israeletique, ja' to ti c'uxi tsuts yu'un ta stubbel sc'oplal ti viniquetic ta Edome.

¹⁷ Ja'uc ti Hadad ti olol to ox ti jech yorail taje, jatav batel ta Egipto xchi'uc svinquileltac ti ochemic ta yajtuneltac ti stote.

¹⁸ Loq'uic ech'el ta Madián, c'otic ta Parán, ti bu laj yiq'uic batel viniquetic ti c'ot ta smosovique. C'alal c'otic ta Egiptoe, bat sc'oponic ti faraón ajvalil yu'un ti lum Egiptoe, ti ac'bat snaic xchi'uc q'uelanbatic yosil sbanomilic yu'une.

¹⁹ Ti Hadade laj sta ti lec ilat yu'un ti faraone, ti laj yac'be yajnilin smu' ti faraone, xchi'il ta voq'uel ti me' ajvalil ti Tahpenes sbie.

²⁰ Ti xchi'il ta voq'uel ti me' ajvalil Tahpenese, laj yilbe sat jun xnich'on yu'un ti Hadade, ti laj yac'be sbiin Guenubate. Ti Tahpenese lic sts'ites ti querem jmoj xchi'uc ti yalabtac ta sna ti faraone.

²¹ Ja'uc le' une, c'alal laj ya'i ta Egipto ti Hadad ti cham xa ti Davide, xchi'uc ti cham xa ti Joab banquilal jpas-mantal yu'un ti soldadoetique, xi lic yalbe ya'i ti faraone: —Ac'bun ave ati' ti sutcun batel ta jlumale.

²² Ti faraone xi laj staq'ue: —¿C'u cha'al ta xasut ava'i ech'el ta alumale? ¿Mi yu'un oy c'usi mu xata li' ta jtojole? Ti Hadade xi laj staq'ue: —Mi ja'uc jutebuc ti c'usi mu'yuc jtaoje. Ja'uc le'e ac'bun ave ati' ti sutcun ech'ele.

²³ Ma'uc no'ox taje, c'ot ta pasel yu'un Dios ti laj yac' ye ti lic contrainatuc ti Salomón yu'un ti Rezone. Ti Rezón taje, ja' squerem ol ti Eliada ti buch'u jatav loq'uel ta stojol yajval ti Hadad-ezer ajvalil yu'un ti lum Sabae.

²⁴ Ti Rezón taje laj stsob jlomuc viniquetic, yu'un ja' jun banquilal xa'i sba yu'un ti j'eleq'uetique. C'alal milbat svinictac ta Soba yu'un ti Davide, jatav batel ta Damasco ti Rezone ti bu lic ochuc ta ajvalilale.

²⁵ C'ot ta scontra Israel ti c'alal cuxul to ox ti Salomone. Ti c'u s'elan ta x'ilbajinvan ti Hadade, laj sco'oltas sjolic xchi'uc, mu'yuc stu ta xil ta sba ta satic ti Israele. Ti ja' jech taj une, och ta ajvalil yu'un ti Siria ti Rezone.

²⁶ Ja' jech ec ti Jeroboam xnich'on ti Nabate lic stoy sba ta stojol ti ajvalile. Ti jun yaj'opisial Salomón ja' ti Jeroboam sbie liquem talel ta lum Seredá, snitilultac ti Efraine, ti ja' jun me'onal ants ti sme' ti sbiinoj Zerúae.

²⁷ Ti smelol ti laj stoy sba ti Jeroboam ta stojol ti ajvalile, xi s'elan lic jech c'u cha'al li'e: ja' o yorail ta sjem ech'el ta snojesel be vo' ti Salomone, xchi'uc ti laj smac ti c'u sjamlej sbelel ti Steclumal ti David ti ja' stote.

²⁸ Tsatsal vinic xa'i sba ti Jeroboame, jbel ti c'usi yale. C'alal laj yil ti Salomón ti xjoybij ta abtel ti quereme, laj yac'be sbain scotol ti abtel ti sujbil ta spasel snitilultac ti Josee.

²⁹ Ti c'alal ja' jech oy taj une, oy jun c'ac'al, loc' ech'el ta Jerusalén ti Jeroboame, snupoj sbaic c'ot ta be xchi'uc ti j'alc'op Ahiase ti liquel talel ta Siloe, ti xpixoj sba lec ta ach' c'u'il yu'un ti smac sique. Xch'ul tuquic oyic ta osiltic ti xchibalique.

³⁰ Va'i un, ti Ahiase lic sjat ta lajcha'lic ti ach' c'u'il ti smac sic yu'un ti svoloj sba xchi'uque.

³¹ Xi laj yalbe ya'i ti Jeroboame: “Ich'o batel ti lajunlic li'e, ti Ajvalile, Dios yu'un ti Israele, yu'un xi ta xalbot ava'ie: ‘Ta jloq'ues ta ajvalil ti Salomone. Ta xcac'bot aventain lajunvoc' nitiluletic.

³² Ja' xa no'ox jvoc' nitilul ta xcac'be sventain ti Salomone, ta sventa ti oy syail xc'uxul co'nton yu'un ti cajtunel Davide, xchi'uc ti Jerusalén ti ja' jun lum laj jt'uj ta scotol ti lumetic yu'unic ti jujuvoc' snitilultac ti Israele.

³³ Yu'un ti Salomone laj xa stenun ta yo'nton. Lic xa sbic'tajes sba ta yich'el ta muc' ti Astartee, sdiosic ti sidonioetique, xchi'uc ti Quemos sdiosic ti moabitaetique, xchi'uc ti Milcom sdiosic ti amonitaetique. Ti c'usitic laj spase, mu lecuc ta xquil ta jba ta jsat. Mu'yuc xc'ot ta pasel yu'un ti jbel c'usi caloje, ti c'usi nopbil cu'une jech c'u cha'al laj spas ti David ti ja' stote.

³⁴ Manchuc mi jech un, mu j'ech'el ta jloq'ues ta ajvalilal ta anil. Staoj to yav c'otem ta ajvalilal ti jech cuxul toe, ta sventa ti oy syail xc'uxul co'nton ta stojol ti cajtunel David ti laj jt'uje, ti laj xch'un ti jbel ti c'usi albile, xchi'uc ti jmantaltaque.

³⁵ Ja'uc ti xnich'nabe, ta jloq'ues ta ajvalilal. Ta xcac'bot ta avoc ta ac'ob lajunvoc' nitiluletic xcaltic.

³⁶ C'ajomal xa no'ox ta xcac'be sventain jvoc' nitilulil ti xnich'one yo' jech mu xch'ay sc'oplal ti cajtunel Davide, ti staojuc yav cuxuluc ta jtojol ti Jerusalén ti laj jt'uje, ti jtaobil ta na'ele.

³⁷ Ta xcac' ochan ta ajvalil yo' jech ta xapasvan ta mantal ti c'u s'elan ti lec ta xava'ie, ti ajvalilucot c'otan yu'un ti Israele.

³⁸ Ti mi ta xapas scotol ti c'u s'elan ta xcalbot ava'ie, mi lec ti arazon ta jba ta jsate, mi ta xach'un ta spasel ti jbel ti c'usi albile, ti jmantaltaque, jech c'u cha'al laj spas ti cajtunel Davide, ta xajchi'inot. Ta xcal ta j'ech'el ti ta xcac' ochuc ta ajvalil junuc ti anitilule jech c'u cha'al laj cal ta stojol ti Davide. Ta xcac'bot ta avoc ta ac'ob ti Israele.

³⁹ Ja'uc snitilultac ti Davide, ta jtsits ya'iic ta scojic taje, ti mu sbateluc osil jech ta xcomic oe.’ ”

⁴⁰ Ta scoj ti va'i s'elan taje, jutuc xa mu milat yu'un Salomón ti Jeroboame. Jatav ech'el ta Egipto ti Jeroboam ti bu ta spas mantal ti Sisaque, ti xnaquet o com ja' to ti c'uxi cham ti Salomone.

Ti Salomone ta xcham

⁴¹ Ti c'u to yepal sc'oplal slo'iltael ti sbijile, xchi'uc scotol ti c'usitic laj spas ti Salomone, ts'ibabil ta jpoc vun ti bu ta xal ta xc'otan ta pasel yu'un ti Salomone.

⁴² Cha'vinic (40) jabil sjalil och ta ajvalil ta Jerusalén ti laj sventain scotol ti Israele.

⁴³ Ti c'alal cham une, laj smuquic ta Steclumal ti David ja' ti stote. Ts'acal to un, och ta xq'uexol ta ajvalilal ti Roboam ti ja' xnich'one.