1 Juan 5 - Bible in Tzotzil de Chamula

Laj to c'op ma' ti ta sventainotic ti sba banomile

¹ Scotol ti buch'u c'otem ta yo'nton ta xch'unel ti ja' Cristo ti Jesuse, ja' xnich'on Dios ec. Ti jech c'ux ta xa'i ti Totile, c'ux ta xa'ibe xnich'nab ti Totil taje.

² C'alal c'ux ta xca'itic ti Diose, ti ta jpastic ti c'usi ta sc'ane, ta jna'tic unbi ti c'ux ta xca'itic xnich'nabtac ti Diose.

³ Ti jech c'ux ta xca'itic ti Diose, ja' smelol ta xich' ch'unbel ti smantale, yu'un ti smantaltaque mu vocoluc ta ch'unel.

⁴ Yu'un ti buch'utic xnich'nabtac ti Diose, laj xa stsalic ti sba banomile. Ti jech stsal cu'untic ti sba banomile, ja' ta sventa ti c'otem ta o'ntonal ta xch'unel ti Jesucristoe.

⁵ Ti buch'u ta stsal ti sba banomile, ja' no'ox ti buch'u c'ot ta yo'nton ta xch'unel ti ja' Xnich'on Dios ti Jesuse.

Rexticoetic ti laj yalbeic sc'oplal ti Xnich'on Diose

⁶ C'alal tal ti Jesucristoe, vinaj sc'oplal ti c'alal laj yich' ti vo'e, xchi'uc ti laj smal ti xch'ich'ele. Ma'uc no'ox vinaj sc'oplal ti laj yich' ti vo'e, ti laj smal ti xch'ich'ele, jech xtoc ti Ch'ul Espíritu ti ja' melel ti c'usi ta xale, ja' laj sva'an sba ta rextico ta yalbel ti sc'oplale.

⁷ Yu'un oy oxib rextico ma' ti ta xalbeic sc'oplal ti oy ta vinajele: ti Dios Totile, ti Ch'ul Nich'onile, ti Ch'ul Espíritue. Ti oxibic taje, jmoj ti sc'opique.

⁸ Ti li' ta banomile, oy oxib rextico ti xi ta xac' ta na'el ti sc'oplale: ti Ch'ul Espíritue, ti vo'e, ti ch'ich'e. Ti oxib taje, jmoj c'usi ta xac' jna'tic

⁹ Ti c'usi ta sva'an sbaic ta yalel ti viniquetique, ta xquich'tic ta muc' ti sc'opique. Ja'uc xa van ti c'usi ta xal ti Diose, jelavem sc'oplal ta j'ech'el, yu'un ja' sc'opojel stuc Dios ti ta xalbotic sc'oplal ti Jesús ti ja' Xnich'one.

¹⁰ Ti buch'u ta xc'ot ta yo'nton ta xch'unel Xnich'on ti Diose, toj c'otel ta yo'nton ta xch'unel ti c'u s'elan yaloj ti Diose. Ti buch'u mu xc'ot ta yo'nton ta xch'unel ti c'u s'elan yaloj ti Diose, ta sbis ta jun jutc'op, yu'un mu xc'ot ta yo'nton ta xch'unel ti ja' stuc Dios laj sva'an sba ta rextico ta yalbel sc'oplal ti Xnich'one.

¹¹ Ti c'op taje, ja' ta xac' ta na'el ti laj xa yac'botic jcuxlejaltic sbatel osil ti Diose. Ti cuxlejale taje oy ta stojol ti Xnich'one.

¹² Ti buch'u oy ta stojol ti Xnich'on Diose, oy xcuxlejal sbatel osil. Ti buch'u mu'yuc ta stojol ti Xnich'on ti Diose, laj to c'op ma' ti oy xcuxlejal sbatel osile.

Sc'oplal ti slajeb bijubtasele

¹³ Ti vo'oxuc ti c'otem ta avo'nton ta xch'unel ti Xnich'on Diose, ta jts'ibaboxuc talel ti jvun li'e yo' xana'ic ti oy acuxlejalic sbatel osile.

¹⁴ Ta jpat co'ntontic ta stojol ti Diose, yu'un ta jna'tic c'alal mi oy c'usi ta jc'antic jech c'u cha'al oy ta yo'ntone, ta xa'i ti jc'optique.

¹⁵ Ti jech ta jna'tic ti ta xa'i jc'optic ti Diose, ta jna'tic xtoc unbi, ti laj xa jtatic ti c'usi laj jc'anbetique.

¹⁶ Mi oy buch'u ta xil ti oy jun xchi'il ti yacal ta sa' smul ti ma'uc sventa ch'ayele, c'oponbeic Dios ta stojol yo' jech ta x'ac'bat xcuxlejal yu'un ti Dios ti buch'ue, ti mi ma'uc jun mulil sventa ch'ayele. Oy mulil ti ta x'ac'van ta ch'ayele. Ma'uc ta xcal ti ta xac'oponbeic Dios ta stojole.

¹⁷ Scotol ti c'usi mu'yuc smelol stuq'uil ta xich' pasele, mulil ono'ox. Oy mulil ti mu x'ac'van batel ta ch'ayele.

¹⁸ Jna'tic lec ti buch'u stotinoj ti Diose, mu teyuc no'ox ta sa'olan ti smule, chabibil yu'un ti Xnich'on Diose, mu x'aq'ue ta piquel yu'un ti pucuje.

¹⁹ Jna'tic ti yu'unotic ti Diose. Jna'tic ti pasbilic ta mantal yu'un pucuj scotol ti jnaclejetic ta banomile.

²⁰ Jna'tic lec xtoc ti tal ti Xnich'on Dios li' ta banomile, ti laj yac'botic jbijiltic ti laj sjam ti jba jsatique, yo' jech ta xcojtiquintic ti bats'i cuxul Diose. Ti Buch'u ja' melel ono'oxe, cuxulotic ta stojol, ti ja' sc'oplal ti Jesucristoe, ja' ti Nich'onile. Taje, ja' ti bats'i cuxul Dios ti oy ta sventa cuxlejal sbatel osile.

²¹ Jnich'nabtac, q'uejo abaic loq'uel ta stojol ti albil sc'oplal ja' diosetique. Jechuc.